【2019年2月21號訊】
今旦（21號）是國際母語日。今年母語日其主題，是「土著語言是發展、和平、和解其要素」。聯合國教科文組織復蜀回強調，所有母語都𣍐使忽視，嚽對和平共可持續發展盡去重要。教科文組織固發微博「呼籲大家齊關注方言共土著語言」，問大家會𣍐「使鄉音講『我愛汝』」。
中國教育部、聯合國教科文組織駐華代表處、中國聯合國教科文組織全國委員會、中國國家語言文字工作委員會也敆今旦齊做了發布會，正式發布《岳麓宣言》。《岳麓宣言》是教科文組織頭蜀隻主題是「保護語言多樣性」其重要永久性文件。只篇宣言號召國際社會、各國、各地區、政府、非政府組織等等，敆保護共促進世界語言多樣性只件事計懸頂達成共識。
聯合國官網懸頂講，每兩隻禮拜就有蜀隻語言消失，並且帶去相關其囫圇隻文化共知識遺產。按伊講法，世界懸頂40%其儂無辦法使伊母語接受教育。正好《福州新聞網》其記者調查發現，福州野価後生囝都無能耐講平話，大學生遘外斗，發現伊宿舍儂都會講自家方言，㑚伊𣍐。記者採訪蜀隻做娘奶其，仱伊就講：「伲囝伓講平話情有可原，学校裏勢一直推廣普通話，同學各儂都伓講，伊也𣍐好意思講，總款慢慢就𣍐仈講了。」《山西晚報》去年調查山西方言倛現狀，結果顯示，50歲以上倛儂認為「母語」就是自家方言。50歲以下遘30歲以上倛答案𣍐蜀樣，有倛講是普通話，有倛講是自家方言。30歲以下倛，就認為「母語」是普通話。
消息來源
edit- 教科文组织总干事奥德蕾·阿祖莱女士国际母语日致辞，2019年2月21日. 聯合國教科文組織. 2019-02-21.
- 国际母语日 2月21日. 聯合國. [2019-02-21]. （原始内容存档着2019-02-21）.
- 联合国教科文组织. 每一门语言的形成，都经历了千百年的积淀。. 微博. 2019-02-21 [2019-02-21].
- 联合国教科文组织. 今天是 #国际母语日#！. 微博. 2019-02-21 [2019-02-21].
- 胡巧灵; 蔡晨烨. 国际母语日引热议 福州妈妈感叹儿子不说福州话. 福州新闻网. 2019-02-21 [2019-02-21].
- 国际母语日来谝谝咱山西话. 山西晚報. 2017-02-21.