Famangelama ba zamaelungu andrö
editI. 1 He ya'ami ni'omasi'ö! böi dozi eheha faduhu dödömi, mitandraigö sa geheha andrö, na moroi ba Lowalangi ira. No ato zama'ele'ö sofaya, si möi ba niha ba guli danö.[1] 2 Ba da'ö aboto ba dödömi Geheha Lowalangi: Dozi eheha, sanehe Yesu Keriso, si no tobali ösi niha, ba moroi ba Lowalangi da'ö;[2] 3 ba dozi eheha, si lö manehe Yesu, ba tenga moroi ba Lowalangi, ba da'ö gamuata zi fa'udu khö Keriso andrö, nirongomi, so ia, ba no so ia sa'ae ba guli danö.[3] 4 Moroi ba Lowalangi ami, ya'ami iraono, ba no milaŵa da'ö, me no ebua zi so ba dödömi, moroi ba zi so ba niha ba guli danö andrö.[4] 5 Moroi ba guli danö ira, andrö moroi ba guli danö huhuora, ba niha guli danö zamondrongo khöra.[5] 6 Moroi ba Lowalangi ita. Si no aboto Lowalangi ba dödö, da'ö zamondrongo khöda; lö ifondrondrongo khöda si tenga moroi ba Lowalangi. Moroi ba da'ö aboto ba dödöda Geheha si duhu ba eheha samaelungu.[6]
Famarou tödö ba wangomasi'ö talifusö
editII. 7 He ya'ami ni'omasi'ö! data'omasi'o nawöda, me no moroi ba Lowalangi wa'omasi andrö, ba me no si tumbu ba Lowalangi dozi sangomasi'ö awöra, ba me no aboto ba dödöra Lowalangi.[7] 8 Si lö mangomasi'ö awönia, ba lö saboto ba dödönia Lowalangi, me no fa'omasi Lowalangi. 9 Ba da'ö no oroma wa'omasi Lowalangi andrö, ba khöda, me no ifatenge ba guli danö Nononia Lowalangi, ononia si ha sambua andrö, ena'ö auri ita balazi ia.[8] 10 Ba da'ö so wa'omasi andrö, tenga wa no ta'omasi'ö Lowalangi, no wa no i'omasi'ö ita, awö wa no ifatenge Nononia, höli, ba horöda.[9] 11 He ya'ami ni'omasi'ö! na no imanö wangomasi'ö ya'ita Lowalangi, ba mo'ömö göi ita fangomasi'ö awöda. 12 Samösa lö niha si no irai mangila Lowalangi; na ta'omasi'ö nawöda, ba lö tebulö ia ba dödöda, ba mo'ahonoa ba dödöda wangomasi'öda ya'ia.[10] 13 Ba da'ö aboto ba dödöda, wa lö tebulö ita ba khönia, awö wa lö tebulö ia ba dödöda, me no ibe'e khöda Gehehania andrö, ösa.[11] 14 Ba no anehe ndra'aga ba mafaduhu'ö, wa no ifatenge Ama Nononia, sangorifi ösi guli danö.[12] 15 Na so zanehe, Ono Lowalangi Yesu, ba ba dödönia lö tebulö Lowalangi, ba ya'ia, ba lö tebulö ba khö Lowalangi.[13] 16 Ba no aboto ba dödöda wa'omasi Lowalangi ita, ba no faduhu dödöda ba da'ö. Lowalangi, ba no fa'omasi, ba lö tebulö ba khö Lowalangi zi lö tebulö ba wa'omasi andrö, ba lö tebulö Lowalangi ba dödönia.[14] 17 Ba da'ö mo'ahonoa wa'omasi andrö khöda, fa lö ata'u ita, na luo wanguhuku andrö, me no si mane ya'ia göi ita, ba guli danö andre.[15] 18 Lö fa'ata'u ba wa'omasi andrö, ifofanö sa wa'ata'u fa'omasi si no mo'ahonoa, me no fa'afökhö wa'ata'u; ba sata'u ba lö mo'ahonoa na ba wa'omasi.[16] 19 Ta'omasi'ö ia, me no oföna i'omasi'ö ita. 20 Na so zanguma'ö: Omasido Lowalangi, ba na fatiu dödönia ba dalifusönia, ba sofaya ia; Si lö mangomasi'ö talifusönia sa, ni'ila hörönia, ba tebai omasi ia Lowalangi, si lö i'ila hörönia.[17] 21 Ba da'ö goroisa, nibe'enia khöda, ena'ö i'omasi'ö göi dalifusönia sangomasi'ö Lowalangi.[18]
Famotokhi ba gahe
edit- ↑ TesI 5:19–22; Yoh 2:18; FetII 2:1
- ↑ Yoh 1:1–14
- ↑ Faigi 2:18,22; TesII 2:7
- ↑ Faigi 5:4; Luk 11:22
- ↑ Yoh 15:19
- ↑ Yoh 8:47; 17:14
- ↑ Faigi 3:11
- ↑ Yoh 3:16
- ↑ Rom 5:8; KorII 5:19,20
- ↑ Yoh 1:18
- ↑ Faigi 3:24
- ↑ Mat 3:17; Yoh 3:17
- ↑ Yoh 6:69; Ayati 2
- ↑ Faigi 4:8,12
- ↑ Faigi 2:28,6
- ↑ Rom 8:15
- ↑ Faigi 3:17; 2:4
- ↑ Faigi 3:23; Yoh 13:34
Fabaliŵa lala
editOlayama Zura Yohane I: 1 • 2 • 3 • 4 • 5
Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö