Wb/nia/Yoeli/1

I. Famakao andrö, sangohori sinanö edit

1 Taroma li Yehowa, niŵa'önia khö Yoeli, ono Wetueli. 2 Mifondrondrongo da'e, ya'ami satua, mibe'e mbörö dalingami, ya'ami niha ba danö, fefu! Hadia, no irai si manö ba götömi. Ba ma ba götö ndra tuami? 3 Midunö-dunö ba ndraonomi, ba iraonomi zanutunö ba ndraonora, ba iraono da'ö, ba sama'ema mitou! 4 Si lö ahori i'a tamo lea, ba i'a era, ba si lö ahori i'a era, ba ifakiko föla, ba si tosai ba wöla, ba i'a siliŵi.^[1] 5 Mifaoso, ya'ami si mabu andrö, ba mi'ege-ege! Mi'angarö-ngarö, ya ami samadu-madu agu, fefu, me no muböda ba mbawami nidanö nagu! 6 Noa sa ihawui danögu soi baero, soi sabölö, si lö mutaha mu'erai ha wa'ato niha; ifö zingo niföra ba boha zingo si alawe mbohara. 7 Tola nagu khögu, ba no lafufu, ba töla ara khögu, ba no lafatö; no ahori labo'a guli ba no laso'agö, tobali afusi manö ndraha; 8 Mi'ege-ege, timba nono alawe, si no mamaru baru ba wa'abu dödö, wamato-matou tödönia soniha ya'ia, me ono alawe ia! 9 Lö'ö sa'ae sumange ni'a ba lö'ö sa'ae sumange nibadu ba gosali Yehowa; abu dödö gere, enoni Yehowa. 10 No mubali'ö tanö si mate mbenua ba no sabu tödö danö salo'o; noa sa mufufu zinanö ba nowi, otufo nösi nagu, ariri wanikha. 11 Ya afusi mbawami wa'aila, ya'ami sangahalö, ba mi'ege-ege, ya'ami sokabu nagu, ba gandru andrö ba ba ze'iri; me si lö boto sa'ae mbasitö ba nowi. 12 Töla nagu ba no mate, ba ara, ba aleu, ba he dalimo ba ohi ba ma'ufa, ba eu ba mbenua fefu, ba oi mate-mate; ba noa sa ogo'ö wa'omuso dödö nono niha.

II. Famarou tödö ba wangalulu khö Lowalangi edit

13 Mi'obaru [mbaru ba wa'abu dödö] ba mi'ege-ege, ya'ami sangai halöŵö ba naha wame'e sumange! Mi'ae bakha [ba gosali], ba sara wongi böi miheta nukha ba wa'abu dödö, ya'ami enoni Lowalangigu! Me lö'ö sa'ae falukha zumange ni'a ba he sumange nibadu, ba gosali Lowalangimi. 14 Miŵa'ö wamoni ni'amoni'ö, mikaoni zato ba gowuloa! Mifa'aso zatua, awö niha ba danö fefu, ba gosali Lowalangimi Yehowa, ba mikao khö Yehowa.^[2] 15 Alai mbaŵa da'ö! Noa sa ahatö mbaŵa andrö khö Yehowa, so moroi sa wanudugö, nifatörö Zi lö ambö fa'abölö.^[3] 16 Hadia, tenga no muböda fönada göda, ba he fa'omuso dödö ba fa'iki ba gosali Lowalangida? 17 No ariri ba danö wakhe si no mutaru, si lö ösi lou, awö halasa, ba si no adudu naha mbalazo, me no mate zinanö ba nowi. 18 Mu'ö'ö'ö'ö sibai gurifö, ba sihufa ngawawa zaŵi, me lö öra, fefu gofu heza! Ba famakao sa'ae göi ba ngawawa mbiri-biri. 19 He Yehowa, ya'ugö u'angaröfi li! Me no akhozi mbenua si so du'u mege, ba me no ariri ba hola-hola galitö geu ba danö, fefu. 20 Ba he utu ndru'u, ba mangarö-ngarö khöu, me no ogo'ö mbombo ba me no i'a alitö mbenua, si so du'u mege.^[4]