Wb/nia/Tanö Ni'amoni'ö/Famasao

Hana wa lafotöi ia amabu'ula li si föföna ba si bohou?

Sura Ni'amoni'ö no te'owuloi tobali dombua buku sebua: Amabu'ulali Siföföna (ASF) ba Amabu'ulali Sibohou (ASB). Bakha ba ASF te'owuloi fefu Zura Ni'amoni'ö ndra niha Yahudi, nisura fatua lö tumbu Yesu. Sura Ni'amoni'ö andre nibaso Yesu samösa. Duma-dumania itutunö khöda Luka 4:14-30 wa samuza ma'ökhö me möi Yesu ba nomo Lowalangi, ibaso khö niha sato zura Yes 61:1-3.

Aefa wa'amate ba femaoso Yesu, me labörögö ira solo'ö khönia wangowuloi fefu nidunö-dunö sanandrösa ba wa'auri awö halöŵö nifalua Yesu. Öfa mbuku angowuloa andre si toröi khöda irugi ma'ökhö lafotöi Turia Somuso Dödö nisura Matai'o, Mareko, Luka ba Yohane. Aefa da'ö lanönö ba da'ö ngawalö zura nifa'ohe'ö Waulo ba ira nifahaö Yesu tanöbö'ö. Fefu zura andre te'osambua'ö tobali buku Amabu'ulali Sibohou.

Heŵa'ae latötöi ia amabu'ula li si föföna ba si bohou, tenga eluahania wa lö moguna sa'ae Gamabu'ulali Siföföna. Töi andre eluahania ha wa da'ö si föföna tesura ba te'owuloi. Ngawalö zura tanöbö'ö tesura ba te'owuloi ia furinia.

Amabu'ulali Siföföna no hikaya wefao-fao Lowalangi khö ndraono Gizara'eli. Amabu'ulali Sibohou manutunö waö-waö wa'auri ba famahaö Yesu awö waö-waö wa'amuzaewe Injil ba gotalua ndra niha Keriso si föföna, si tobali dane-dane wamati niha Keriso.

Hana wa so gamaehuta Zura Ni'amoni'ö ba Gereja Protestan ba ba Gereja Katolik?

Sura Ni'amoni'ö ni'oguna'ö bakha ba Gereja Katolik ba ba Gereja Protestan no fabö'ö, ba hiza tenga fabö'ö nösinia, ba hiza fabö'ö wa'oya zura si so bakha khönia.

Na so gamaehuta wehede bakha ba Zura Ni'amoni'ö ni'oguna'öra, da'ö ha börö wo'ali ya'ia ba li khöda. Amabu'ulali Sibohou no tesura ba li Yunani, ba moroi ba li Yunani andre te'ali ia ba li bö'ö simane li Indonesia ma zui li Niha. Ba börö me famo'eluaha sambua fehede tola fabö'ö-bö'ö, andrö wa itaria fabö'ö wamo'eluaha bakha ba Zura Ni'amoni'ö ni'oguna'ö Gereja Katolik moroi ba ni'oguna'ö Gereja Protestan. Alua göi zimane na ta'ali sambua zura moroi ba li Indonesia lumalö ba li Niha! Andrö na so zi fabö'ö wamo'eluaha, lafaigi zura asli ba li Yunani/Ibrani. Simanö göi na so zambö aboto ba dödöda ba teks si no i'ali H. Sundermann. Tola tafaigi hewisa tesura ia ba li Yunani/Ibrani, ba ta'atulö'ö ia. Taromali Lowalangi lö tebulö, ba hiza fanura ba ba fangali ya'ia tola mo'amböta ba börö da'ö tola tebulö.

Amaehuta sindruhu ba gotalua Zura Ni'amoni'ö ni'oguna'ö ba Gereja Protestan ba ba Gereja Katolik ya'ia da'ö fa'oya zura si so bakha. So ösa Zura Ni'amoni'ö nifaogö bakha Zura Ni'amoni'ö Gereja Katolik/Gereja Ortodoks/Agama Yahudi si lö mufaogö ba Zura Ni'amoni'ö Gereja Protestan. Sura andre ya'ia da'ö Tobit, Yudit, Sura Wa'atua-tua, Sirakh (Ecclesiasticus), Baruch ba onönöta zura Ester (Gesiteria) ba Daniel (Dani'eli). Fefu mbuku andre lafotöi ia Deuterokanonika.

Hadia so nasa ndraono Gizeraeli irugi ma'ökhö?

Talifusömi: Sirus Laia
Molo'ö fa'atumbu moroi ba Lölömatua,
molo'ö fekoli moroi ba London, Inggris.

Fabaliŵa lala

Fanolo ba wanura: Lala wanura • Fama'oli nösi • Ngawalö templat • Ngawalö kategori

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö