Me föna so samösa razo. Oya khönia nono alawe ba no oi si sökhi bawa. Ono alawe siakhi khönia ba no fondrege sökhi, irege luo samösa si no mangila oya nono alawe si sökhi ba gulidanö lö aföli-föli wamaigi bawania.
Lö aröu moroi ba gödo razo so göi sambua gatua satabö. Ba gatua andrö so sambua namö barö sambua geu sebua.
Ero aukhu zino möi nono razo siakhi andre ba gatua andrö. Ilau mudadao ba zinga namö sokafu-kafu. Ba itaria ilau famai, ifazaumba-zaumba khönia gelera ana'a omasi'önia.
Samuza luo tegaölö khönia gelera ana'a aekhu bakha ba namö. Abakha sibai namö andrö irege lö oroma narönia. Ba ilau mege-ege. Itugu ara itugu abölö-bölö.
Irongo li sanguŵa'ö khönia, Hana mege-ege ndra'ugö? Ifakhölö ia ba i'ila sara dalaho, högönia anuzu dödö niha wamaigi. Itema linia, No atoru khögu gelera ana'a bakha ba namö.
Böi busi dödöu, iŵaö khönia talaho, tola uhalö khöu gelera ana'a andrö. Hadia dania öbe'e khögu na uhalö ia khöu?
Itema linia, Gofu hadia manö ube'e khöu asala öhalö khögu gelera ana'a andrö. Tola öhalö khöu nukhagu andre ma mani-mani andre khögu ma zui takulagu andre.
Imane khönia talaho, Lö sa omasido nukha ma mani-mani ma zui takula. Na öfabu'u khögu wa tobali awöu ndra'o, wa lö aetu fao-fao ita, faoma manga ita moroi ba wiga göu, faoma tabadu idanö moroi ba mako khöu, ba mörö ndra'o ba zingau ba zibongi. Na öfabu'u khögu fefu da'ö ba uhalö khöu gelera ana'a andrö.
Ba itema li ono alawe razo siakhi, Ufabu'u khöu fefu da'ö asala ö'ohe khögu gelera ana'a satoru ba namö. Imane i ba dödönia, talaho si lö boto ndra'ugö, hewisa tola fao ndra'ugö khö niha me nahau bakha ba namö idanö.
Itueli ba narö namö talaho ba lö ara no irugi zui mbewe namö. Itura'ö gelera ana'a moroi ba mbawania ba ibe'e khö nono razo.
Omuso sibai dödö nono razo ba ifaröga ia wangawuli ba nomo.
He... base'ö ndra'o. Da'i-da'i wofanö ena'ö ukhamö ndra'ugö! mu'ao khönia dalaho.
Ba lö infondrondrongo linia ono alawe razo andrö. Imane tödönia tebai sa'atö iröi namö talaho andrö.
Mahemolunia so watomesa sebua ba nomo razo. Ba no dumadao ira fefu edöna lalau manga.
Ba larongo so zanoko-noko bawandruhö. Möi nono razo siakhi ibokai mbawandruhö. Me i'ila dalaho, iduhö mangawuli mbawandruhö. Ifuli dumadao ia ba zinga namania.
Me i'ila razo wa abölö manimba-nimba dödönia, imane khönia, Hana nogu? Hadia no ö'ila zata'u ita? Itema linia, Lö'ö wö, ma. Ha sara talaho sanuzu ita wamaigi högönia.
Hadia zomasi dalaho andrö? isofu khönia razo. Ba itutunö khönia hadia zalua ba namö ba gatua ba hadia nifabu'unia khö dalaho andrö.
Ba terongo zui zanoko-noko ba mbawandruhö. Mu'ao dalaho andrö, Ono razo siakhi, bokai khögu mbawandruhö. Hadia no olifu ndra'ugö zi no öfabu'u khögu? Ono razo siakhi, bokai khögu mbawandruhö!
Ba imane khö nononia alawe siakhi razo, Si lö tola lö'ö öfalua zi no öfabu'u. Bokai khönia mbawandruhö.
Ibokai khönia mbawandruhö ba möi si bakha dalaho ba i'o'ö ia. Ba me no dumadao nono alawe siakhi, imane khönia talaho, Halö ba fedadao ndra'o ba gahetamö. Ba imane na, Hatö'ö khögu wiga göda, datalau manga.
Aefa manga ira, iŵaö talaho, No abuso ndra'o ba erege göi dödögu. Ohe ndra'o ba wöröma. Datalau mörö.
Ba ilau mege-ege ono alawe siakhi andrö. Lö omasi ia na mörö dalaho ba zingania.
Ba hiza mofönu khönia namania imane, No itolo ndra'ugö me göna'ö fa'abu dödö. Böi ositengagö ira sanolo ya'ugö.
Ba ihalö dalaho ba i'ohe ba wörömania. Ifedadao ia ba dalinga mbatö. Aefa da'ö ba möi ia ilau mörö. Ba hiza möi khönia dalaho imane, Na lö ötehe mörö ndra'o ba zingamö ba u'ombakha'ö ndra'ugö khö razo.
Ihalö dalaho andrö ba ifemörö ba zingania.
Hiza i'anema'ö tobali niha dalaho andrö, ono matua si hino döla ba somasi ita wamaigi-maigi.
Ba itutunö khönia wa ono razo ia göi, ba hiza no i'elifi ia sebua elemu tobali talaho ba namö idanö. Ba lö samösa sangefa'ö ya'ia, ha ono alawe razo siakhi andrö zi tola mangefa'ö ya'ia.
Ba lalau mörö.
Mahemolunia tebua ira ba lasaŵa mbanua nono razo andrö. Omuso sibai dödö nono razo andrö me no aefa ia ba wangelifi ba no göi isöndra wo'omonia ni'omasi'önia.
Nitöngöni edit
- Nidunö-dunö andre tehalö moroi ba Grimms Märchen ba hiza no te'adogo'ö ia. Te'oguna'ö gumbu andrö ha tobali dane-dane.
- Sama'anö ba li Niha: Slaia. Höndrögö ba da'a na omasi'ö öfa'ohe'ö khönia goroisa.