1 Töla nagu sabölö manöi Ndraono Gizeraeli mege, ba si sökhi fowua. Ba itugu abölö mbua, ba oya lafa'anö khöra naha wame'e sumange [ba nadu]; itugu abölö mbua danö, ba itugu lafazökhi khöra nadu nihaogö.[1] 2 No tödö si falimo dödöra; andrö wa ni'otu'ö ira. Ya'ia zanudugö naha wame'e sumange andrö khöra, ba irasa nadura. 3 Lamane sa dania: Lö khöma razo sa'ae, me no lö ni'ata'ufima Yehowa. Ba hadia guna razo khöma?[2] — 4 Hadia, samagölö [ba nawönia] ia, si möi ia ba hölu si lö itörö, ba ma si fawu'uwu'u li wamatumbu'ö huku si bohou, timba ndru'u langu ba nowi, na no lafaku? 5 Saŵi si matua andrö ba Mbeti Awene ni'abusi mbanua Zamaria tödö dania; abu dödö zi olembai ya'ia, mege, ba manizi-nizi gerenia ba khönia, dania, — ba girö-girö andrö khönia, me saheta khönia.[3] 6 Ba ya'ia na'i, ba ni'oloi'ö ba danö Asiria, buala khö razo Yarebi; fa'aila mado Geferayi andrö ihalö khönia, ba tobali faya wanötöna Ndraono Gizeraeli ba nikhoi dödöra andrö.[4] 7 Safufu Zamaria andrö, ba razora, ba si hulö wahawaha geu solangi ba dete nidanö. 8 Sadudu dania hili-hili famakiko andrö, horö Ndraono Gizeraeli andrö, ba lato ba sa'a-sa'a mao zi tumbu dania ba naha wame'e sumange andrö khöra. Ba ba da'ö dania lamane ba hili: Mihawui ndra'aga! Ba ba hili-hili: Milangögöga![5]
9 I'otarai götö ba Gibea andrö, ba no molalö ami, ya'ami Iraono Gizeraeli. Lö si tebulö ira ba da'ö, ba ikhamö ira fanuwö sanao horö andrö ba Gibea andrö.[6] 10 Na edöna ndra'o, ba u'ila u'otu'ö ira, ni'owuloi dania soi niha baero, solau khöra, wangotu'ö ya'ira ba lalöra andrö si no dua winaeta. 11 Mado Geferayi andrö, ba no hulö nono zaŵi si no muhaogö famamaha, somasi mamöbörö fakhe. Noa sa lö nibe'egu kalo mbagi ba mbaginia si sökhi andrö, mege, ba iya'e, ba ufokalo mbagi sa'ae mado Geferayi; ba sondröni famali'ö danö mado Yuda ba sondröni kori-kori ma'uwu Yakobo. 12 Fa'ahakhö dödö mitaru, ba so fönami wamasi dania, ibe'e fa'ebua dödö Lowalangi andrö! Mitua'ö zi bohou, me no irugi inötö, ba wangalui Yehowa, ena'ö i'ondrasi ami, ba ena'ö ifatörö khömi deu fangorifi.[7] 13 Ba me no mitaru horö, ba no famakiko nibasimi, ba no bua walimosami gömi! Noa sa tötönaföu gureta ba wanuwö andrö ba fa'ato zabölö andrö khöu! 14 Ba rumuru dania moroi sa zanuwö sato andrö khöu; ba banua saro andrö khöu fefu, ba ladudugö, si mane me idudugö Mbeti Arebeli Salama, me luo manuwö no, me la'ö'ötö nina ndraono, fabaya iraonora.[8] 15 Si manö sibai dania wolaura khömi, ya'ami Iraono Gizeraeli me no hatö falösökhi khömi. Ba zanguhulö wongi dania mate nibunu razo Ndraono Gizeraeli!
Famotokhi ba gahe
editFabaliŵa lala
editOlayama Hosea: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö