Dredwardortho

ಜೆಂವ್ಕ್ ಶಿಕ್‌ಲ್ಲ್ಯಾಕ್ ಪಿಡಾ ನಾ

ಉಲೊಂವ್ಕ್ ಕಳಿತ್ ಆಸ್‌ಲ್ಲ್ಯಾಕ್ ಝಗ್ಡೆಂ ನಾ ಆನಿ ಜೇಂವ್ಕ್ ಕಳಿತ್ ಆಸ್‌ಲ್ಲ್ಯಾಕ್ ಪಿಡಾ ನಾ ಮ್ಹಳ್ಳಿ ಏಕ್ ಸಾಂಗ್ಣಿ ಆಸಾ ತಿ ಜಿರ‍್ವಣೆಕ್ ಲಗ್ತಿ ಸಮಸ್ಸ್ಯಾಂಕ್ ಬರ‍್ಯಾನ್ ಲಾಗು ಜಾತಾ. ಖಾಣಾ-ಜೆವ್ಣಾಂತ್ ಶಿಸ್ತ್ ಲ್ಹಾನ್ ಪ್ರಾಯೆರ್ ಥಾವ್ನ್ ಭುರ‍್ಗ್ಯಾಂಕ್ ಶಿಕಯ್ಜೆ ಆನಿ ಕುಟ್ಮಾಂತ್ ತಿ ಸವಯ್ ತಶೆಂ ಜಾಯ್ಜೆ. ಹ್ಯಾ ಶಿವಾಯ್ ಜೆವ್ಣಾ-ಖಾಣಾಚ್ಯಾ ಗಜಾಲೆಂನಿ ಥೊಡ್ಯೊ ಚತ್ರಾಯ್ ಘೆತ್‌ಲ್ಲ್ಯಾನ್ ಜಾಯಿತ್ತ್ಯೊ ಪಿಡಾ ಆಡಾಯ್ವೆತಾ. ·ಖಾಣ್ ಸೆಂವ್ಚ್ಯಾಂತ್ ಆನಿ ಜೆಂವ್ಚ್ಯಾಂತ್ ಶಿಸ್ತ್ ಗರ‍್ಜೆಚಿ. ಸಕಾಳಿಂಚೊ ಗರ‍್ಜೆತಿತ್ಲೊ ನಷ್ಟೊ(ವಾ ಪೆಜೆಚೆಂ ಜೆವಾಣ್), ಮಧೆಂ ಗರ‍್ಜ್ ತರ್ ಮಾತ್ರ್ ಚಾ/ಕಾಫಿ ತಸಲೆಂ ಪಿಯೊಣೆಂ, ನಿರ‍್ದಿಶ್ಟ್ ವೆಳಾರ್ ದೊನ್ಪಾರಾಂಚೆಂ ಜೆವಾಣ್, ಸವಯ್ ಆಸ್ಲ್ಯಾರ್ ಸಾಂಜೆಚಿ ಚಾ ಆನಿ ಉಪ್ರಾಂತ್ ರಾತಿಚೆಂ ಜೆವಾಣ್ ಅಶೆಂ ನಿಯಮಿತ್ ಥರಾನ್ ಖಾಣ್ ಸೆಂವ್ಚೆಂ ಆನಿ ಜೆವಾಣ್ ಕರ‍್ಚೆಂ ಭಲಾಯ್ಕೆಕ್ ಬರೆಂ. ಅನಿಯಮಿತ್ ಥರಾನ್ ದೀಸ್‌ಭೊರ್ ತವಳ್ ತವಳ್ ಖಾಣ್ ಸೆವಿತ್ತ್ ರಾಂವ್ಚೆಂ, ಲೇಕ್ ಚುಕೊನ್ ಚಾ/ಕಾಫಿ ಪಿಯೆಂವ್ಚಿ ಅಸಲಿ ಸವಯ್ ಜಿರ‍್ವಣೆಚ್ಯಾ ಭಲಾಯ್ಕೆಕ್ ಸಾಂಗ್‌ಲ್ಲಿ ನ್ಹಯ್. ಜಾಯಿತ್ತೆಪಾವ್ಟಿಂ ಮಧೆಂ ಮಧೆಂ ಸೆವ್‌ಲ್ಲಿಂ ಖಾಣಾಂ ಭುಕ್ ಪಾಡ್ ಕರ‍್ತಾತ್. ಜಿರ‍್ವಣೆಚೆ ಸಮಸ್ಸೆ ಆಸ್ಚ್ಯಾಂನಿ ಚಾ ಕಾಫಿ ಉಣಿ ಪಿಯೆಂವ್ಚಿ ವಾ ಪುರ‍್ತಿ ಬಂಧ್ ಕರ‍್ಚಿ ಬರೆಂ. ಅಶೆಂಚ್ ಬಿಡಿ, ಸಿಗ್ರೆಟ್ ವಾ ಹೆರ್ ರುಪಾರ್ ಧುಮ್ಟಿ ಸೆಂವ್ಚಿ ಆಡಾಂವ್ಚಿ ಜಿರ‍್ವಣೆಚೆ ಸಮಸ್ಸೆ ನಿವಾರುಂಕ್ ಆಧಾರ್ ಜಾವ್ಯೆತಾ. ·ಥೊಡ್ಯಾಂಕ್ ನಿರ‍್ದಿಶ್ಟ್ ಥರಾಚಿಂ ಖಾಣಾಂ ಸಮಸ್ಸೊ ಉಬ್ಜಯ್ತಾತ್. ಹೊಟೆಲಾಂನಿ ಆನಿ ಸಂಬ್ರಮಾಂನಿ ರಂಗ್ ಸಾರಾಯಿಲ್ಲಿಂ ಖಾಣಾಂ ಖೆಲ್ಲೆಂಚ್ ಥೊಡ್ಯಾಂಕ್ ಪೊಟಾಂತ್ ಹುಲೊಪ್ ಸುರು ಜಾತಾ. ಹೆರ್ ಥೊಡ್ಯಾಂಕ್ ನಿರ‍್ದಿಶ್ಟ್ ಥರಾಚಿಂ ಮಾಸಾಂ ಆನಿ ಥೊಡ್ಯಾಂಕ್ ಫಳಾಂ ಖೆಲ್ಯಾರ್ ಜಾಯ್ನಾಂತ್. ಪೊಟಾಕ್ ವೊಂಬನಾತ್‌ಲ್ಲೆಂ ಖೆಲ್ಲೆಂಚ್ ಪೊಟಾಂತ್ ಭರೊನ್ ಯೆವ್ಯೆತಾ, ಆವಾಜ್ ಯೆತಾ ಆನಿ ಉಪ್ರಾಂತ್ ಉದ್ಕಾಡೆ ಪಾತಳ್ ವೆತಾ. ಖಾಣಾಂತ್ ಭರ‍್ಸುನ್ ಆಸ್ಚ್ಯಾ ಕೃತಕ್ ಬಣಾಂಕ್, ರೂಚ್ ಚಡೊಂವ್ಕ್ ವಾಪ್ರುಂಚ್ಯಾ ರಾಸಾಯನಿಕಾಂಕ್ ವಾ ತ್ಯಾ ಖಾಣಾಂನಿ ಆಸ್ಚ್ಯಾ ನಿರ‍್ದಿಶ್ಟ್ ಥರಾಚ್ಯಾ ಪ್ರೋಟಿನ್ ವಸ್ತುಂಕ್ ಜಿರ‍್ವಣೆಚ್ಯಾ ಭಾಗಾಂನಿ ದಾಕೊಂವ್ಚಿ ಎಲರ‍್ಜೆ ತಸಲಿ ಪ್ರತಿಕ್ರಿಯಾ ಹ್ಯಾ ಸಮಸ್ಸ್ಯಾಕ್ ಕಾರಣ್ ಆಸ್ಯೆತಾ. ಆನಿ ಥೊಡ್ಯಾಂಕ್ ನಿರ‍್ದಿಶ್ಟ್ ಥರಾಚ್ಯಾ ತೆಲಾಂತ್ ತಯಾರ್ ಕೆಲ್ಲಿಂ ಖಾಣಾಂ ಖೆಲ್ಯಾರ್ ಜಾಯ್ನಾ. ಖಾಣಾ ಭಾಗಾಂಕ್ ವೊಂಬನಾತ್‌ಲ್ಲೆಂ ಖಾಣ್ ವೊಂಬೊಂಚೆಪರಿಂ ಕರುಂಕ್ ಚಿಕಿತ್ಸಾ ನಾ, ತ್ಯಾ ಬದ್ಲಾಕ್ ತಸಲಿಂ ಖಾಣಾಂ ಖಾಂವ್ಕ್ ನಜೊ. ಅಶೆಂ ಖಂಚ್ಯಾ ಥರಾಚ್ಯಾ ಖಾಣಾಂನಿ ಸಮಸ್ಸೊ ಉಬ್ಜತಾ ತಸಲಿಂ ಖಾಣಾಂ ಆಡಾಂವ್ಚೆಂಚ್ ಬರೆಂ. ·ಜೆವ್ಣಾಚ್ಯಾ ಪಯ್ಲೆಂ ಕೆದ್ನಾಂಯ್ ಭುಕ್ ಲಾಗ್ಚೆಂ ಬರ‍್ಯಾ ಭಲಾಯ್ಕೆಚೆಂ ಲಕ್ಷಣ್. ಭುಕ್ ಲಾಗ್ತಾನಾ ಜೆವ್ಲ್ಯಾರ್ ಜಿರ‍್ವಣ್ ಬರಿ ಜಾತಾ. ಜೆವಾಣ್‌ಯಿ ಬರೆಂ ರುಚ್ತಾ. "Hunger is the best mustard."  ಮ್ಹಣ್ ಸಾಂಗ್ಣಿ ಸಯ್ತ್ ಆಸಾ! ಸಾಂಜೆಚ್ಯಾ ಜೆವ್ಣಾಪಯ್ಲೆಂ ಬರಿ ಭುಕ್ ಲಾಗಾನಾ ತರ್ ದೊನ್ಪಾರಾಂ ಹಳ್ತ್ ಜೆಂವ್ಕ್ ಜಾಯ್ ತಶೆಂಚ್ ದೊನ್ಪಾರಾಂಚ್ಯಾ ಜೆವ್ಣಾ ಉಪ್ರಾಂತ್ ಮಧೆಂ ಹೆರ್ ಕಿತೆಂಯ್ ಖಾಂವ್ಕ್ ನಜೊ. ಜೆವಾಣ್ ಉಣೆಂ ಜೇವ್ನ್ ಆಸ್ತಾನಾ ಆ ಮಧೆಂ ಕಿತೆಂಯ್ ಖಾಣ್ ಸೆವಿನಾತ್ಲ್ಯಾರ್‌ಯಿ ಭುಕ್ ಲಾಗಾನಾ ತರ್ ಜಿರ‍್ವಣೆಚ್ಯಾ ಭಾಗಾಂತ್ ಕಿತೆಂ ಅವ್ಯವಸ್ಥಾ ಮ್ಹಣ್ ಸಮ್ಜುಯೆತಾ. ·ಆಮ್ಚೆಪಯ್ಕಿಂ ಜಾಯಿತ್ತ್ಯಾ ಜಣಾಂಕ್ ಖಾಣ್/ಜೆವಾಣ್ ಬರ‍್ಯಾನ್ ಚಾಬೊಂಕ್ ಕಳಿತ್ ನಾ. ಮುನ್ಶ್ಯಾಕ್ ದಾಂತ್ ಆಸ್ಚೆಚ್ ಖಾಣ್ ಚಾಬೊಂಕ್. (ಜಾಯ್ರತಾಂನಿ ದಾಕಾಯಿಲ್ಲೆಪರಿಂ ದಾಂತಾಂಚೊ ಮುಳಾವೊ ಶೆವಟ್ ಸೊಭಾಯ್ ನ್ಹಯ್!) ಬರ‍್ಯಾನ್ ಚಾಬೊನ್ ತೊಂಡಾಂತ್ ಪಿಟೊ ಜಾಲ್ಲೆಂ ಖಾಣ್ ಜಿರೊಂಕ್ ಬರೆಂ. ತೊಂಡಾಂತ್ ಪಿಟೊ ಜಾಯ್ನಾಸ್ತಾಂ ಭಿತರ್ ಗೆಲ್ಲೆ ಸಭಾರ್ ವಸ್ತು ಅನ್ಕಿಟೆಂತ್ ಆಸಾ ತಶೆಚ್ ಮುಕಾರುನ್ ಕಾಕ್ಸಾಂತ್ ಭಾಯ್ರ್ ವೆತಾತ್. ಜೆವ್ಣಾ-ಖಾಣಾಂತ್ ಆಮ್ಸೊರಾನ್ ಆಸುನ್, ಖಾಣ್ ಚಾಬಾನಾಸ್ತಾಂ ಗಿಳ್ಳ್ಯಾರ್ ಅಜೀರ‍್ಣ್ ಜಾಂವ್ಚಿ ಸಾಧ್ಯತಾಯ್ ಚಡ್. ಅಜೀರ‍್ಣ್ ಜಾಲ್ಲೆಂ ಖಾಣ್ ಥೊಡೆಪಾವ್ಟಿಂ ಚಡ್ ವಾಯ್ ಉಬ್ಜೊಂಕ್‌ಯಿ ಕಾರಣ್ ಜಾತಾ. ·ಖಾಣ್ ಜೆವಾಣ್ ಆರಾಮಾಯೇರ್ ಸೆಂವ್ಚೆಂ ಬರೆಂ. ತಶೆಂ ಮ್ಹಣ್ ಜೆವ್ಣಾಚ್ಯಾ ಮೆಜಾರ್ ಉಲಯಿತ್ತ್ ರಾಂವ್ಚೆಂಯ್ ನ್ಹಯ್. ಉಲೊವ್ನ್ ಉಲೊವ್ನ್ ಜೆವ್‌ಲ್ಲ್ಯಾನ್ ಖಾಣಾ ಸಾಂಗಾತಾ ವ್ಹಾರೆಂ ಭಿತರ್ ವಚೊನ್ ಆನಿ ಪೋಟ್ ವೆಗಿಂ ಭರೊನ್ ಆಯಿಲ್ಲೆಪರಿಂ ಜಾವ್ಯೆತಾ. ಚಡ್ ದೆಂಕ್ ಯೆಂವ್ಚೆ ವಾ ವಾಯ್ ವೆಚೆ ಸಮಸ್ಸೆ ಆಸ್ಚ್ಯಾಂನಿ ಜೆವ್ತಾನಾ ತೋಂಡ್ ದಾಂಪುನ್ ಜೆಂವ್ಚೆಂ ವ್ಹಾರೆಂ ಭಿತರ್ ವೆಚೆಂ ಆಡಾಂವ್ಕ್ ಆಧಾರ್ ಜಾಯ್ತ್. ತಶೆಂಚ್ ಜೆವ್ಣಾಚಿ ಬೊಶಿ ಘೆವ್ನ್ ಟೆಲೆವಿಶನ್ ಪಳಯಿತ್ತ್ ರಾಂವ್ಚೆಂ, ಜೆವ್ಣಾಕ್ ಬಸ್ಲಾಂ ಮ್ಹಳ್ಳೆಂ ವಿಸ್ರ್ರೊನ್ ಮ್ಹಳ್ಳೆಪರಿಂ ಟಿ. ವಿ. ಪಳೆಂವ್ಚಿ, ಮಧೆಂ ಮಧೆಂ ಜೆಂವ್ಚೆಂ ಭುಕ್ ಪಾಡ್ ಕರುಂಕ್, ಜಿರ‍್ವಣೆಕ್ ಲಗ್ತಿ ಎನ್‌ಜಾಯಿಮ್ ಉಣೆಂ ಜಾವ್ನ್ ಜಿರ‍್ವಣ್ ಪಾಡ್ ಜಾಂವ್ಕ್ ಪ್ರೇರಣ್ ಜಾಯ್ತ್. ·ಜಿರ‍್ವಣೆಚೆ ಸಮಸ್ಸೆ ಆಸ್ಚ್ಯಾಂನಿ ಮಾಸಾಚ್ಯಾ ಖಾಣಾಂವಿಶಿಂ ಚತ್ರಾಯ್ ಸಾಂಬಾಳ್ಚಿ. ಖಾಣಾಂತ್ ಸಾಧ್ಯ್ ತಿತ್ಲೆಂ ಮಾಸ್ ಉಣೆಂ ಕರ‍್ನ್ ರಾಂದಾಯೆಚೆಂ ಖಾಣ್ ಚಡ್ ಖೆಲ್ಲೆಂ ಜಿರ‍್ವಣೆಕ್ ಬರೆಂ. ಖಾಣಾಂತ್ ನಾರ‍್ಕುಟ್ ಭಾಗ್ (fiber) ಚಡ್ ಆಸ್ಲ್ಯಾರ್ ಅನ್ಕಿಟೆಂತ್ ಖಾಣಾಚಿ ಚಲವ್ಣಿ ಬರ‍್ಯಾನ್ ಜಾತಾ. ಸಲಾದ್, ಜಿವಿ ರಾಂದಾಯ್, ಫಳ್ ವಸ್ತುಂನಿ ನಾರ‍್ಕುಟ್ ಭಾಗ್ ಚಡ್ ಆಸ್ತಾತ್. ಮಾಸಾಂತ್ ನಾರ‍್ಕುಟ್ ಭಾಗ್‌ಚ್ ಆಸಾನಾ ಜಾಲ್ಲ್ಯಾನ್ ಫಕತ್ ಮಾಸ್ ಮಾತ್ರ್ ಖೆಲ್ಯಾರ್ ಖಾಣ್ ಅನ್ಕಿಟೆಂತ್ ಜಿರೊನ್ ಮುಕಾರ್ ವೆಚೆಂ ಸಲೀಸಾಯೆನ್ ಜಾಯ್ನಾ. ಮಾಸ್ ಉಣೆಂ, ರಾಂದಾಯ್ ಆನಿ ಫಳ್ ವಸ್ತ್ ಚಡ್ ಖಾಂವ್ಚೆಂ ಜೆರಾಲ್ ಥರಾನ್ ಸಕ್ಡಾಂಕ್ ಆನಿ ಜಿರ್ವಣೆಚೆ ಸಮಸ್ಸೆ ಆಸ್ಚ್ಯಾಂಕ್ ಪ್ರತ್ಯೇಕ್ ಥರಾನ್ ಬರೆಂ. ·ಖಾಣ್ ಬರ‍್ಯಾನ್ ಜಿರೊನ್ ವಚನಾತ್‌ಲ್ಲ್ಯಾಂನಿ ಪಿಜ್ಜಾ, ಬ್ರೆಡ್ ತಸಲ್ಯಾ ಖಾಣಾಂಪ್ರಾಸ್ ಶಿತ್ ಜೆವ್‌ಲ್ಲೆಂ ಬರೆಂ. ಗೊಂವ್ ಆನಿ ಹೆರ್ ಖಾಣಾಂಕ್ ತುಲನ್ ಕೆಲ್ಯಾರ್ ಶಿತ್ ಸಲೀಸಾಯೆನ್ ಜಿರೊನ್ ವೆತಾ. ಜಿರ‍್ವಣೆಚೆ ಸಮಸ್ಸೆ ಆಸ್ಚ್ಯಾಂನಿ ಸಕಾಳಿಂ ಕೃತಕ್ ಖಾಣಾಂ ಸೆಂವ್ಚೆಪ್ರಾಸ್ ಪೇಜ್ ಜೆಂವ್ಚಿ ವಾ ತಾಂದ್ಳಾಥಾವ್ನ್ ತಯಾರ್ ಕೆಲ್ಲಿಂ ಸನ್ನಾಂ, ಪೊಳೆ ಸೆಂವ್ಚೆ ಬರೆ. ·ಭಲಾಯ್ಕೆಚ್ಯಾ ಹೆರ್ ಜಾಯಿತ್ತ್ಯಾ ಸಮಸ್ಸ್ಯಾಂಕ್ ಸದಾಂಯ್ ವ್ಯಾಯಮ್ ಕೆಲ್ಲ್ಯಾನ್ ಜಾಯಿತ್ತೆಂ ಬರೆಂಪಣ್ ಜಾತಾ ತಶೆಂಚ್ ಜಿರ‍್ವಣೆಚ್ಯಾ ಸಮಸ್ಸ್ಯಾಂಕ್‌ಯಿ ಬರ‍್ಯಾನ್ ವ್ಯಾಯಮ್ ಕೆಲ್ಲ್ಯಾನ್ ಪರಿಯಾರ್ ಸಾಧ್ಯ್ ಆಸಾ. ಶೆರಾಂತ್ ಜಿಯೆತೆಲ್ಯಾಂಕ್ ಆಸ್ಚೆ ತಿತ್ಲೆ ಜಿರ‍್ವಣೆಚೆ ಸಮಸ್ಸೆ ನಾಡಾಂತ್ ಭೊರಾಚೆಂ ಕಾಮ್ ಕರ‍್ತೆಲ್ಯಾಂಕ್ ಆಸಾನಾಂತ್. ಕುಡಿಕ್ ಭೊರ್ ಪಡ್ಚೆಂ ಕಾಮ್ ಕರಿನಾತ್‌ಲ್ಲ್ಯಾಂನಿ ಭುಕ್ ಲಾಗೊಂಕ್, ಜೆವ್‌ಲ್ಲೆಂ ಜೆವಾಣ್ ಆನಿ ಖೆಲ್ಲಿಂ ಖಾಣಾಂ ಜಿರೊಂಕ್ ದಿಸಾಚೆಂ ಥೊಡೊ ವೇಳ್ ತರ್‌ಯಿ ವ್ಯಾಯಮ್ ಕರ‍್ಚೆಂ ಗರ‍್ಜ್. ಸದಾಂಯ್ ಅರ‍್ದೆಂ ಥಾವ್ನ್ ಏಕ್ ವೋರ್ ಭೊರ್ ಚಲ್ಚೆಂ ಜಾಯಿತ್ತ್ಯಾ ಜಣಾಂಕ್ ಸಲೀಸಾಯೆನ್ ಕರುಂಕ್ ಜಾಂವ್ಚೆಂ ವ್ಯಾಯಮ್. ಹ್ಯಾ ಶಿವಾಯ್ ಉಪೆಂವ್ಚೆಂ, ಸಾಯ್ಕಲ್ ಸವಾರಿ ಅಸಲಿಂ ವ್ಯಾಯಮಾಂ ಕರ‍್ಯೆತಾ ತರ್‌ಯಿ ಚಲ್ಚೆಂ ವ್ಯಾಯಮ್ ಸರ‍್ವಾಂಕ್ ಕರುಂಕ್ ಸಲೀಸ್. ಸದಾಂಯ್ ಚಲ್‌ಲ್ಲ್ಯಾನ್ ಜಿರ‍್ವಣೆಚ್ಯಾ ಭಾಗಾಂಚಿ ಭಲಾಯ್ಕಿ ಬರಿ ಉರ‍್ತಾ. ·ಜಿರ‍್ವಣೆಚೆ ಸಮಸ್ಸೆ ಆಸ್ಚ್ಯಾಂಕ್ ವೊಂಬತಾ ಆನಿ ಭಲಾಯ್ಕೆಚ್ಯಾ ಹೆರ್ ಸಮಸ್ಸ್ಯಾಂಕ್ ಆಡ್ವಾರುಂಕ್ ನಾ ತರ್ ಖಾಣಾಂ-ಜೆವ್ಣಾ ಸಾಂಗಾತಾ ಧಂಯ್ ಆನಿ ತಾಕ್ ಸೆಂವ್ಚೆಂ ಭಲಾಯ್ಕೆಕ್ ಬರೆಂ. ಧಂಯಾಂತ್ ಆನಿ ತಾಕಾಂತ್ ಆಸ್ಚಿಂ ಎಕಾ ಜಾತಿಚಿಂ ಬೆಕ್ಟೀರಿಯಾಂ ಖಾಣಾಚ್ಯಾ ಜಿರ‍್ವಣೆಕ್ ಆಧಾರ್ ಜಾತಾತ್. ನೈಸರ್ಗಿಕ್ ಥರಾನ್ ಹಿಂ ಬೆಕ್ಟೀರಿಯಾಂ ಆಮ್ಚ್ಯಾ ಆನ್ಕಿಟೆಂತ್ ಆಸ್ತಾತ್ ಆನಿ ಖಾಣಾಚ್ಯಾ ಜಿರ‍್ವಣೆಕ್ ಕಮಕ್ ಕರ‍್ತಾತ್. ಆಂಟಿಬಯೋಟಿಕ್ಸ್ ಒಕ್ತಾಂ ಸೆವ್‌ಲ್ಲ್ಯಾನ್ ಅನ್ಕಿಟೆಂತ್ಲಿಂ ಬೆಕ್ಟೀರಿಯಾ ಮರೊನ್ ವೆಚಿ ಸಾಧ್ಯತಾಯ್ ಆಸ್ತಾ. ಹ್ಯಾವರ‍್ವಿಂ ಖಾಣಾಚ್ಯಾ ಜಿರ‍್ವಣೆಕ್ ಆಡ್ಕಳ್ ಜಾವ್ಯೆತಾ. ತಸಲ್ಯಾಂಕ್ ಧಂಯ್ ಆನಿ ತಾಕ್ ಬರೆಂ. ಧಂಯ್, ತಾಕ್ ತಸಲಿಂ ಖಾಣಾಂ ಹೆರ್ ಕಾರಣಾಂ ಖಾತಿರ್ ಆಡ್ವಾರ‍್ಲ್ಯಾಂತ್ ತರ್ ಅಸಲಿಂ ಬೆಕ್ಟೀರಿಯಾಂ ಆಸ್ಚಿಂ ಒಕ್ತಾಂ ಮೆಳ್ತಾತ್, ತಿಂ ವಾಪ್ರಿಯೆತಾ. ಜಿರ‍್ವಣೆಕ್ ಆಧಾರ್ ಜಾಂವ್ಚಿಂ ಥೊಡೆ ಎನ್‌ಜಾಯಿಮ್‌ಯಿ ಕೃತಕ್ ಥರಾನ್ ತಯಾರ್ ಕೆಲ್ಲೆ ಒಕ್ತಾಂಚ್ಯಾ ರುಪಾರ್ ಮೆಳ್ತಾತ್. ದಾಕ್ತೆರಾಂಚ್ಯಾ ಸಲಹಾ ಪ್ರಮಾಣೆಂ ತಿಂ ಒಕ್ತಾಂ ಸೆವ್ಯೆತಾ. ·ಜೆವ್ಣಾಚ್ಯಾ ಉಪ್ರಾಂತ್ ಜಾಯ್ ತಿತ್ಲೆಂ ಉದಕ್ ಪಿಯೆಂವ್ಚಿ ಸವಯ್ ಖಾಣ್ ಜಿರೊಂಕ್ ಆಧಾರ್ ಜಾಯ್ತ್. ಪೋಟ್ ಭೊರಾಸರ್ ಜೆವಿನಾಸ್ತಾಂ, ಜೆವಾಣ್ ಜಾಲ್ಲೆಂಚ್ ಗ್ಲಾಸ್ ಭೊರ್ ಉದಕ್ (ವಾ ತಾಕ್) ಪಿಯೆಂವ್ಚೆ ತಿತ್ಲೊ ಅವ್ಕಾಸ್ ಆಸೊಂಕ್ ಜಾಯ್. ತವಳ್ ತವಳ್ ಉದಕ್ ಪಿಯೆಂವ್ಚೆಂಯ್ ಭಲಾಯ್ಕೆಕ್ ಬರೆಂ. ·ಪೊಪಾಯ್, ಅನಾಸ್, ಅಂಜೂರಾಂ ಅಸಲಿಂ ಫಳಾಂ ಆನಿ ಮುಂಗೆ ಆಯಿಲ್ಲಿ ಧಾನಿ (ಮೂಗ್, ಚಣೆ, ಅಲ್ಸಂಡೆ, ಬೀನ್ಸ್) ಜಿವಿಚ್ ಖೆಲ್ಲ್ಯಾನ್ ಜಿರ‍್ವಣೆಕ್ ಬರೆಂ. ಮುಂಗೆ ಆಯಿಲ್ಲಿ ಧಾನಿ ರಾಂದ್‌ಲ್ಲ್ಯಾನ್ ತಾಂತು ಆಸ್ಚೆ ಸಭಾರ್ ಥರಾಚೆ ಎನ್‌ಜಾಯಿಮ್ ನಾಸ್ ಜಾತಾತ್. ಸಾಧ್ಯ್ ಆಸ್ಲ್ಯಾರ್ ಮುಂಗೆ ಆಯಿಲ್ಲ್ಯಾ ಧಾನಿಯೆಚೆಂ ಸಲಾದ್ ಕರ‍್ನ್- ಟೊಮ್ಯಾಟೊ, ರುಚಿಕ್ ಜಾಯ್ ತರ್ ಮಿರ್ಸಾಂಗ್ ಆನಿ ಮೀಟ್ ಭರ‍್ಸುನ್ ಖೆಲ್ಲೆಂ ಜಿರ‍್ವಣೆಕ್ ಬರೆಂ. ·ಜಿರ‍್ವಣೆಚೆ ಸಮಸ್ಸೆ ಆಸ್ಚ್ಯಾಂಕ್ ಕ್ಯಾರಟ್, ಕ್ಯಾಬೇಜ್ ಅಸಲ್ಯಾ ರಾಂದಾಯೆಂಚೊ ರೋಸ್ ಕಾಡ್ನ್ ಜಿವೊಚ್ ಪಿಯೆಲ್ಲೆಂಯ್ ಉಪ್ಕಾರ‍್ಚೆಂ ಆಸಾ. ಜೆರಾಲ್ ಥರಾನ್ ಜಿರ‍್ವಣೆಕ್ ಮಾಸಾಚ್ಯಾ ಖಾಣಾಂಪ್ರಾಸ್ ರಾಂದಯ್ ಬರಿ. ತೆಲಾ-ತುಪಾಂತ್ ವಾ ಚರ‍್ಬೆಂತ್ ರಾಂದ್‌ಲ್ಲ್ಯಾ ವಾ ಭಾಜ್‌ಲ್ಲ್ಯಾ ಖಾಣಾಂಪ್ರಾಸ್ ಉಬೆಂತ್ (ವಾ ಉದ್ಕಾಂತ್) ಉಕಡ್‌ಲ್ಲಿಂ ಖಾಣಾಂ ಬರಿಂ.