Wn/shn/ၼမ်ႉလူၵ်ႈ တီႈ ဢႃႇၾၵၢၼ်ႇၼီႇသတၢၼ်ႇ ၵူၼ်းတၢႆ 300 ပၢႆ

ဝၼ်းသဝ်၊ မေႇ 11၊ 2024 

ၼမ်ႉလူၵ်ႈ တီႈ ဢႃႇၾၵၢၼ်ႇၼိတ်ႇသတၢၼ်ႇ မိူဝ်ႈပီ 2010 (ၶႅပ်းႁၢင်ႈၵဝ်ႇ)

ၸုမ်းၸၢတ်ႈၸိုင်ႈလုမ်ႈၾႃႉ လႄႈ ၽူႈမီးၸၼ်ႉ လူင်ပွင်ၸိုင်ႈ တႃႇလီႇပၢၼ်ႇၶဝ်ဝႃႈ ယွၼ်ႉပိူဝ်ႈ ၽူၼ်ႁႃႇယႂ်ႇသေ ၼမ်ႉလူၵ်ႈ တီႈပွတ်းႁွင်ႇ မိူင်းဢႃႇၾၵၢၼ်ႇၼီႇသတၢၼ်ႇ လႄႈ ၵူၼ်းတၢႆ မီးၵႂႃႇ ဢမ်ႇယွမ်း 300 ဝႃႈၼႆႉယဝ်ႉ။ ၽူႈမီးၸၼ်ႉ ထၢၼ်ႈယႂ်ႇ လူင်ပွင်ၸိုင်ႈ တႃႇလီႇပၢၼ်ႇ လၢတ်ႈဝႃႈ ႁူဝ်ၼပ်ႉၵူၼ်းတၢႆၼႆႉ တေတိူဝ်းၸၢင်ႈၼမ်မႃးလိူဝ်ၼႆႉ ဝႃႈၼႆ။

မၼ်းလၢတ်ႈဝႃႈ တွၼ်ႈတႃႇ ႁဵတ်းၵၢၼ်ၽူတ်ႇၸွႆႈ တီႈၺႃးၽေးၼမ်ႉလူၵ်ႈၼၼ်ႉ ၸိူဝ်းပဵၼ် ႁိူဝ်းမိၼ်မႅင်းမီႈသိုၵ်းၵေႃႈ ႁွတ်ႈထိုင်ဝႆႉယဝ်ႉဝႃႈၼႆ။ ယွၼ်ႉပိူဝ်ႈ ၼမ်ႉလူၵ်ႈလႄႈ ႁိူၼ်းၵူၼ်း လႆႈလုလႅဝ်ၵႂႃႇ 1,000 ပၢႆၼႆ ဢၼ်ပဵၼ် ၶူင်းၵၢၼ်ၸွႆႈထႅမ်ၶဝ်ႈၼမ်ႉတၢင်းၵိၼ်လုမ်ႈၾႃႉ WFP မွၵ်ႇလၢတ်ႈဝႃႈၼၼ်ႉယဝ်ႉ။ ႁူမ်ႈဝႃႈပဵၼ်ၶၢဝ်းၽူၼ်သေတႃႉ ယွၼ်ႉပိူဝ်ႈ ၽူၼ်ႁႃႇယႂ်ႇလိူဝ်သေ ၵူႈပွၵ်ႈလႄႈ တႄႇဢဝ် ဝူင်ႈဝၢင်ႈပူၼ်ႉမႃးၼၼ်ႉ ၼမ်ႉလႆႈယိုင်ႈလႆႈၼွင်းမႃးယူႇဝႃႈၼႆ။

ၽူႈမီးၸၼ်ႉ လူင်ပွင်ၸိုင်ႈတႃႇလီႇပၢၼ်ႇ လၢတ်ႈဝႃႈ မိူဝ်ႈဝၼ်းသုၵ်းၼၼ်ႉ ယွၼ်ႉပိူဝ်ႈၽေးၼမ်ႉသေ တီႈ Nahreen ဢၼ်ပဵၼ် ထုင်ႉဢၼ်ၼိုင်ႈ တီႈၼႂ်း Baghlan ၼၼ်ႉ ၵူၼ်းလႆႈတၢႆၵႂႃႇ ဢမ်ႇယွမ်း 150 ဝႃႈၼႆယဝ်ႉ။ ၸဝ်ႈၼႃႈတီႈ ဢႃႇၾၵၢၼ်ႇၶဝ် လၢတ်ႈဝႃႈ ၵူၼ်ႈၽူတ်ႇၸွႆႈၶဝ် လႆႈဢဝ်တၢင်းၸွႆႈထႅမ် သူင်ႇပၼ်တီႈ ထုင်ႉ Baghlan ဢၼ်ၺႃးၽေးၼမ်ႉႁၢႆႉၸႃႉသေပိူၼ်ႈၼၼ်ႉယူႇ ဝႃႈၼႆယဝ်ႉ။

ၽူႈမီးသုၼ်ႇလၢတ်ႈ လူင်ပွင်ၸိုင်ႈတႃႇလီႇပၢၼ်ႇ Zabihullah Mujahid လုၵ်ႉတီႈ သိုဝ်ႇသၢၼ်တူင်ႇၵူၼ်း X သေ လၢတ်ႈဝႆႉဝႃႈ ယွၼ်ႉၽေးၼမ်ႉၼႆႉလႄႈ ၸိူဝ်းပဵၼ် ၸႄႈမိူင်း Badakhshan ၊ Ghor လႄႈ Herat ဢိၵ်ႇတင်း ပွတ်းႁွင်ႇ လႄႈ ပွၵ်းတူၵ်း မိူင်း ၵမ်ႉၼမ်ၼမ်ၼႆႉ လႆႈမီးလွင်ႈလုလႅဝ်ဝႆႉ ဝႃႈၼႆယဝ်ႉ။ ၸုမ်း WPF လၢတ်ႈဝႃႈတႄႉ ၶဝ်လႆႈ ၽႄႈပၼ် ၶဝ်ႈမုၼ်း ဢႃးႁၢၼ်တဵမ် တွၼ်ႈတႃႇ ၵူၼ်းၸိူဝ်းဢၼ်ၵိုတ်းဢသၢၵ်ႈဝႆႉၼၼ်ႉ ဝႃႈၼႆယဝ်ႉ။

ငိူၼ်ႈငဝ်ႈတိုၼ်း

• Ayaz Gul. "UN reports 300 deaths from flash floods in northern Afghanistan" — VOA News, May 11, 2024
• Sayed Hassib and Mohammad Yunus Yawar. "Afghanistan floods kill at least 153, Taliban interior ministry says" — Reuters, May 11, 2024
• Al Jazeera. "More than 150 killed in Afghanistan flash floods, government says" — Al Jazeera, May 11, 2024