開羅（阿拉伯文︰القاهرة 'al-Qāhirah'）係埃及嘅首都。大開羅都市圈有超過1600萬人口，係非洲同中東最大嘅城市之一，亦都係世上第十九大城，喺人口密度上亦都名列茅。
開羅出名在佢保存咗好多歷史悠久嘅建築，例如古城區就因為入面包含咗中世紀伊斯蘭老城同科普特遺跡，而獲聯合國教科文組織收入世界遺產名錄。開羅下城區嘅埃及博物館係必去之處，入面有數之不盡嘅古埃及文物，而去Khan al-Khalili市集買嘢亦都係不容錯過嘅節目。當然，去得開羅就唔可以唔去埋吉薩金字塔群同埋附近嘅薩卡拉金字塔群啦，喺嗰度你可以搵到第三王朝法老起嘅第一座階梯金字塔。
開羅係個新舊交融嘅城市，所以你除咗探索佢嘅歷史，仲可以睇到佢充滿活力而現代化嘅一面。喺下城區嘅Midan Tahrir區喺19世紀起好，可以稱得上係「尼羅河上嘅巴黎」。去開市郊嘅話，不妨去馬底同赫里奧波里斯呢兩個現代化嘅社區行個轉。
如果你怕熱嘅話，最好就春天或者秋天先去開羅。而如果你嫌市中心太嘈雜，可以去尼羅河坐下felucca（فلوكة，一種帆船），或者去Al-Azhar公園散下步，遠離繁囂。