曼谷（泰文：กรุงเทพฯ）係泰國嘅首都，亦係泰國最大嘅城市。呢度本來只係昭披耶河沿岸一個商港，後嚟變咗做拉瑪王朝嘅都城，慢慢變成泰國嘅政治、經濟、文化中心。
到埗
edit航空
edit- 新曼谷國際機場係泰國嘅航空樞紐。喺度入境要用成半個鐘，甚至兩個鐘頭。機場鐵路嘅服務時間由朝早六點去到半夜十二點，十到十三分鐘一班車，搭客可以落去客運大樓嘅地牢搭機場鐵路出市區，喺目甲訕站轉地鐵，或者喺披耶泰站轉空鐵。機場去披耶泰站全程26分鐘，盛惠45銖。或者搭接駁巴士去運輸中心（機場巴士總站）轉巴士出市郊，或者空鐵／地鐵唔經嘅地方（例如考山路）都得。
- 廊曼機場係曼谷嘅舊機場，而家主要係畀廉價航空公司用。可以喺慕七空鐵站坐A1號巴士過去，盛惠30銖。或者喺勝利紀念碑西北邊搭A2號巴士都得，票價一樣。去到2020年，搭客重可以搭火車過嚟。
巴士
edit慕七車站喺翟道翟公園附近，空鐵／地鐵站隔離。
火車
edit泰國嘅城際鐵路服務由泰國國家鐵路局（☎ +66 2 222-0175）包辦。華喃峰火車站係曼谷嘅城際火車總站，每日有60班火車開去全國各地，好似西北部嘅清邁、東北部嘅廊開（近住老撾），東部嘅芭堤雅，亞蘭（近住柬埔寨），同埋南部嘅合艾。個火車站本身喺1916年落成，由意大利建築師設計，又寛闊又宏偉。落車之後可以喺華喃峰站坐地鐵出市區。
市區交通
edit火車
edit空鐵、地鐵同上面提到嘅機場鐵路係曼谷公共交通體系嘅脊樑。雖然轉車唔算摎挍，不過呢幾條鐵路嘅票務系統各自為政，搭客想遊車河唯有侷住買單程飛／儲值飛。轉車站個名往往唔一樣，例如喺地鐵藍線嘅Sukhumvit站轉空鐵，空鐵站個名叫Asok。
輔助嘅公共交通工具重有渡輪同巴士。搭呢啲交通工具一定要用散紙買車／船飛。
空鐵
edit
空鐵（รถไฟฟ้าบีทีเอส，英文簡稱BTS）起嚟係為咗解決曼谷嘅塞車同污染問題，搭客搭空鐵出市區（特別係暹邏廣場左近）零舍就腳。空鐵分做兩條線：素坤逸線（淺綠色）喺北欖府三龍站（E15）起步，跟住沿素坤逸路北上再轉去東邊，去到暹邏廣場轉去北邊，沿拍鳳裕庭路北上，一直去到喺翟道翟週末市場左近嘅慕七站（N8）。是隆線（深綠色）喺碧甲盛路起步，經過昭披耶河渡輪碼頭附近嘅鄭皇橋站（S6）同是隆區，喺MBK商場隔離嘅國家運動場站（W1）收尾。呢兩條線喺暹邏站（CEN）交匯。空鐵唔經考山路，你可以喺鄭皇橋站轉渡輪，喺Phra Athit碼頭落船，行幾分鐘就到。
你可以喺客務處或者售票機買單程飛，但係售票機淨係收5銖或者10銖銀仔；有時啲售票機會收20銖、50銖同100銖銀紙，不過呢啲位通常排長龍。車費可以睇返售票機左近嘅路線圖。揀喺曼谷留幾日（或者一個月嚟幾次曼谷）嘅旅客可以諗吓：
- 買儲值飛（100銖起跳；入面30銖係按金，可以回水，30銖係工費，冇得回水）
- 買旅遊飛（每日140銖）
- 買多程車票（15程賣345銖，25程賣220銖，加30銖按金——可以回水；有效期5年）
咁樣做又慳錢，又慳時間（買飛加牂錢）；詳情可以問吓票務處識講英文嘅員工。
拎住大件行李嘅搭客應該用閘機隔離嘅大閘（而唔係閘機）入閘，入咗閘之後可以搭𨋢上落月台。出咗閘之後，有時啲車站有裝𨋢，有時冇。空鐵嘅服務時間由朝早5點15分去到半夜12點24分。
地鐵
edit地鐵（รถไฟฟ้ามหานคร，簡稱MRT）分做兩條線：藍線多數路段起喺地底（挽鍚站同島本站中間嗰段路有一部分起喺高架橋上面）。連接華喃峰火車站同島本站，路經是隆、素坤逸、銀禧（Ratchadaphisek）同拍鳳裕庭區翟道翟週末市場附近一帶。搭客可以喺是隆站、素坤逸站，或者翟道翟公園站轉搭空鐵，亦可以喺島本站轉搭紫線。紫線起喺高架橋上高，連接島本站同暖武里府，冇乜遊客會用，不過附近仍然有地方好去：有咗地鐵，而家去Siam Gypsy Junction飲酒飲到天光會方便過以前（可以喺島本站落車）。地鐵系統而家重擴建緊，雖然呢啲工程搞亂咗某啲地區嘅交通，不過起好之後搭客就可以搭地鐵去華埠。
車錢計站數，16銖起跳，頂多42銖。售票機又收銀仔又收銀紙，跌出嚟嘅單程票同廣州／深圳一樣係圓形膠幣，入閘嘅時候要掃過閘機，出閘嘅時候要掟落閘機。或者可以買預繳卡，餘額最多1000銖。地鐵車飛唔可以攞嚟搭空鐵。小朋友／老人搭地鐵有半價優惠，不過咁樣佢哋就要喺票務處買飛。
老人、傷殘人士同拎住大件行李嘅搭客可以搭𨋢上落月台，出入車站，或者轉搭空鐵（至少喺是隆站係得嘅）。呢度雖然有安檢，但係好求其，冇乜牙力，阻唔到啲恐怖分子放炸彈。
對遊客嚟講，地鐵冇空鐵咁常用，不過地鐵藍線重係有幾個實用嘅車站。是樂園（Lumphini）站顧名思義。碧武里站（Phetchaburi）近住阿淑碼頭同機鐵目甲訕站，。拍喃九站近住富神商業大廈，有啲本地人認為喺度買電腦用品好過喺Pantip商場買。入黑之後，可以搭地鐵去火車夜市，去睇暹邏天使劇場（都係喺泰國文化中心站落車），或者去Suan Lum夜市（喺叻拋站落車）。去翟道翟週末市場嘅搭客應該喺甘烹碧站（Kamphaeng Phet；而唔係翟道翟公園站）落車，因為一出站就到。
曼谷而家嘅火車總站——華喃峰火車站同將來嘅火車總站——挽鍚火車站都可以接駁地鐵。而家嚟講喺華喃峰轉車會好啲，因為挽鍚火車站有好多平交道，另外搭客亦可以喺華喃峰轉車去是隆、華埠、考山路呢啲地方。去新機場嘅搭客可以喺碧武里站（Phetchaburi）轉搭機場鐵路。
地鐵嘅服務時間由朝早6點去到半夜12點。