نیل ازرق دریا، ایتھوپیا دی جھیل ٹانا توں نکلݨ والا ہک دریا ہے جینکوں ایتھوپیا وچ ابے تے سوڈان وچ نیل ازرق دے ناں نال پکارا ویندے۔ نیل ازرق سوڈان دے دار الحکومت خرطوم دے قریب نیل ابیض نال مل کے دریائے نیل تشکیل ݙیندے جیہڑا سوڈان تے مصر توں گذردا ہویا اسکندریہ دے مقام تے بحیرہ روم وچ ڈھہندے۔ نیل ازرق جھیل ٹانا توں نکلݨ دے بعد شمال مغرب دی جانب اپݨے سفر دا آغاز کریندے تے صرف 30 کلومیٹر دے فاصلے دے بعد ہک عظیم گھاٹی وچ داخل تھی ویندے۔ ایہ علاقہ ایتھوپیا وچ سیاحت دے حوالے نال معروف ہے۔
جون توں ستمبر دے بارش دے موسم وچ نیل ازرق وچ سطح آب بہت ودھ ویندی ہے تے اے دریائے نیل کوں ݙو ترہائی پاݨی فراہم کریندے۔ ایہو دریا ایتھوپیا دے دریائے اتبارا دے نال مل کے دریائے نیل وچ سیلاب دا باعث بݨدا رہیا لیکن 1970ء وچ اسوان ڈیم دی تعمیر دے نال ہی ایں سلسلے دا خاتمہ تھی ڳیا۔ نیل ازرق، نیل ابیض کولوں لمبائی وچ چھوٹا ہے لیکن ایندے باوجود مصر پہنچݨ والا 56 فیصد پاݨی ایہو دریا فراہم کریندے۔ ایہ دریا سوڈان کیتے یکساں اہمیت دا حامل ہے جتھاں ایندے تے قائم ݙو ڈیم ملک دی 80 فیصد بجلی پیدا کریندن۔ انہی ڈیماں دی بدولت ایں علاقے وچ دنیا دی بہترین کپاس پیدا تھیندی ہے۔