Wt/zea/'Ulpe:Petjoh en Javindo

Dit is 'n 'ulpblad, bedoeld vo korte achtergrondinformatie over 'n taele. Deze informatie is bedoeld vo de gebruker t'elpen bie vraegen die 'n drôge vertaelienge nie zòmae beantwoorde kan.

Petjoh en Javindo bin op 't Nederlands gebaseerde creoôltaelen die-a in 't ouwe Nederlands-Indië wiere gesproke. Ze trekke vee op mekaore, mae de bron is anders. 't Petjoh is ontstae deu vermengienge mee 't Malayalam, 't Javindo eêder deu contact mee 't Javaons. In aollebei de gevaollen is 't 'n taele van Indo's, mensen mee gemiengd bloed, die in ulder milieu vee wisselde tussen Nederlands en d'r eigen taele.

Aollebei is 't nie 'tzelfde as Indisch-Nederlands, wat-a ok Maleisen invloed ei mae z'n eigen in principe an de Nederlandse taelregels 'ouwt.

Sprekers

D'r bin in oônzen eêuw nie vee sprekers meêr over. 't Javindo is aol uutgesturve. Van 't Petjoh bin d'r meschien nog 'n paer vreêd ouwe mensen die 't van 'uus uut spreke, mae je za't nog 't meêste 'ôre op Indische aevendjes (Pasar Malam), daer-an de mensen onder mekaore bin en prebêre te praoten zòas vroeger.

Onderzoek

D'r is nie vee onderzoek gedae nae deze twee taelen, mae 't is t'r wè. 't Meertens Instituut eit 'r banden van gemaekt, en d'n bin ok wetenschappelijke artikels van.

Op de Zeêuwse Wiktionary

De tweê taelen bestae vò 't groôste deêl uut Nederlandse woôrden. Die neme men 'ier nie op zòlang ulder vurm of gebruuk nie (wezenlijk) verschilt van de brontaele. Pas as 'n woôrd typisch Petjoh of Javindo is, komt 't daevò in anmerkienge.

Petjoh- en Javindo-woôrden komme wè mee regelmaet vò in d’Uitleenwoordenbank van Nicoline van der Sijs. In dat verband za je z'ier op Wiktionary ok 't meêste zieë: in uutleên-secties van lemma's over Nederlandse woôrden.