Wt/azb/کور‌اوغلوينان دلی حسن

< Wt‎ | azb
Wt > azb > کور‌اوغلوينان دلی حسن
Koroglu by A. Hajiyev Stamp of USSR, Epic poems of USSR nations. Azerbaijan epic poem "Koroglu", 1989

کور‌اوغلوينان دلی حسن edit

  آنا آنلاتیم

  • کور‌اوغلوينان دلی حسن- کوراوغلو داستانی

گۆنلرین بیر گۆنو کور‌اوغلو قێرات مینیب چنلیبئلین اته‌يینده‌کی يولا چێخمیشدی. بیر ده باخدی بۇدو، بیر دسته ياراقلی-ياساقلی آتلی گلیر. آمما آتلیلارین قاباغیندا بیر اوغلان گلیر کی، دۆنيالارا ديَر. اۆزوندن، گؤزوندن ایگیدلیک ياغیر. اوغلان کور‌اوغلونو گؤرجک، دسته‌سینه هاي وۇردو. آتلیلار او ساعت کور‌اوغلونو آرايا آلدیلار. کور‌اوغلو داياندی. گؤزله‌دی کی، گؤرسون ایشین آخیری نه اولاجاق. اوغلان آتی جؤولانا گتیردی، سۆزدوروب دۆز کور‌اوغلونون قاباغیندا داياندی. سونرا بیر کور‌اوغلويا باخدی، بیر آتینا باخدی، سوروشدو: – ايه، دئ گؤروم کیمسن؟ بۇ يئرلرده نه گزیرسن؟ کور‌اوغلو دئدی: – يولدان کئچنم. اوغلان بیر ده کور‌اوغلونون آتینا باخیب سوروشدو: – بۇ آتی هارادان آلیبسان؟ کور‌اوغلو دئدی: – من سنه مصلحت گؤرورم اؤز يولونلا دۆز گئده‌جن. يوخسا ياخشی اولماز. اوغلان بۇ سؤزدن غضبلندی. حیرصله آتینین باشینی چکدی. آت ایکی دال آياقلاری اۆستونه قالخدی. اۆزونو کور‌اوغلويا تۇتوب دئدی: – گؤرونور کی، سن منی تانیمیرسان؟ اگر تانیسايدین بئله دانیشمازدین. منه دلی حسن دئيرلر. بۇ يوللاردان کیم کئچسه، منه باج-خراج وئرمه‌لیدی. کور‌اوغلو اونو تانیدی. بیلدی کی، آتاسی‌نین دئدیگی دلی حسندی. بیر ده دقتله آتینا، اؤزونه باخدی. گؤردو يوخ، دلی حسن دوغرودان دا ایگید اوغلاندی. کور‌اوغلو آتاسی اؤلن گۆندن بری اونو آختاریردی. اونونلا دوستلاشماق، البیر اولماق فیکرینده ایدی. آنجاق بیلیردی کی، بۇ ایش ائله-بئله باش تۇتماياجاق. داوا-دالاشسیز مسئله‌‌ دۆزلمه‌يه‌جک. فیکیر اونو گؤتوردو کی، ایندی نه تهر ائله‌سین.

  • ائله بۇ فیکیرده ایدی کی، دلی حسن بیر ده قێشقیردی:
  • – ايه، سنه آتدان دۆش دئمیرممی؟ يوخسا عجلین چاتیب؟
  • کور‌اوغلو آراملا دئدی:
  • – دلی حسن، سسینه قۆووت وئرمه، ایگید دیل آچماز، ال آچار.
  • دلی حسن دئدی:
  • – ايه، سن کیمسن کی، منیم قاباغیمدا بئله يئکه-يئکه دانیشیرسان؟
  • – دايان، دئيیم کیمم.
  • بۇنو دئيیب، کور‌اوغلو آتین باشینی چکدی. آت ائله قالخدی کی، دێرناغی‌نین
  • آلتیندان قوپان داش بیر نئچه آدام بويو دلی حسنین باشی‌نین اۆستوندن
  • کئچیب، او طرفه دۆشدو. کور‌اوغلونون اطرافینی بۆروموش آتلیلار چاخناشمايا
  • دۆشدولر. کور‌اوغلو سازی چیينیندن آشیریب دؤشونه باسدی، دئدی:
  • مندن سلام اولسون عجم اوغلونا،
  • مئيدانا گیرنده، مئيدان منیمدی!
  • قێراتیم کؤهلندی، اؤزوم قهرمان،
  • چالارام قێلینجی، دۆشمن منیمدی!
  • مئيدانا گیرنده مئيدان تانیيان،
  • حاقین وئرگیسینه من ده قانیيام.
  • بیر ایگیدم، ایگیدلرین خانیيام،
  • بۇ اطرافدا بۆتون هر يان منیمدی!
  • آدیمی سوروشسان، بیل، رؤوشن اولو،
  • آتادان، بابادان جینسیم کور‌اوغلو؛
  • منم بۇ يئرلرده بیر دلی، دولو،
  • گۆندوغاندان تا گۆن‌باتان منیمدی.
  • دلی حسن بیر کور‌اوغلويا باخدی، بیر دؤنوب باشی‌نین آداملارینا
  • باخدی، هۆندوردن بیر شاققاناق چکیب گۆلدو. آتلیلار دا گۆلوشدولر.
  • اونلارین بۇ گۆلوشميی کور‌اوغلويا ديَدی. بیر ایسته‌دی میسری قێلینجی چکیب،
  • اؤزونو اونلارا گؤسترسین. سونرا لعنت شیطانا دئيیب، آلدی سازی گؤرک نه
  • دئدی:
  • ایگید مئيدانا گیرنده،
  • قاينايیب جوشماماق گرک.
  • اگر اولسا حاق وئرگیسی،
  • قیسمتدن قاچماماق گرک.
  • باخمارام دۆشمن هايینا،
  • حاق بلا وئرسین، خايینا،
  • ایگید ایگیدین پايینا
  • کؤنده‌لن دۆشمه‌مک گرک.
  • قوچ کور‌اوغلو چێخار دۆزه،
  • باخمارام اللیيه، يۆزه.
  • من دلیدن اؤيود سیزه،
  • هددیندن آشماماق گرک.
  • کور‌اوغلونون بئله يئکه-يئکه نصیحت وئرميی دلی حسنه لاپ آجیق
  • گلدی. باشی‌نینین آداملارینا هاي وۇروب، کور‌اوغلويا هۆجوم ائله‌مک ایسته‌دی.
  • کور‌اوغلو دئدی:
  • گل سنه سؤيله‌يیم، آي دلی حسن،
  • آند ایچمیشم بۇ گۆن دؤيوش اولماسین.
  • يوخسا آسلان کیمی جۇشا گله‌رم،
  • آند ایچمیشم بۇ گۆن دؤيوش اولماسین.
  • مرد ایگیدلر مۆخننتدن سئچیلسین،
  • قاری دۆشمن دره‌لره تؤکولسون،
  • بیزیم آرامیزدا مۆنسیف تاپیلسین،
  • آند ایچمیشم بۇ گۆن دؤيوش اولماسین.
  • چکرم قێلینجی، کسه‌رم يولو،
  • منم ایگیدلرده بیر دلی، دولو
  • هله جوشمايیبدی بۇ قوچ کور‌اوغلو،
  • آند ایچمیشم بۇ گۆن دؤيوش اولماسین.
  • دلی حسن ائله بیلدی کی، کور‌اوغلو اوندان قورخور. گئری قانریلیب، باشی‌نین
  • آداملارینا دئدی:
  • – ايه، من ده ائله بیلمیشم کی، بۇ دوغرودان دا ایگیددی. سن دئمه،
  • بۇ يانشاق گوزه‌نین بیریسی ایمیش. تۇتون، يئکه-يئکه دانیشدیغینا گؤره
  • آتینی الیندن آلین، اؤزونه ده بیر-ایکی وۇروب يولا سالین.
  • کور‌اوغلو باخدی ایش داواسیز کئچمه‌يه‌جک. میسری قێلینجی چکیب، آلدی
  • گؤرک نه دئدی:
  • آجیقلانما، دلی حسن،
  • میسری قێلینجا قاتارام.
  • آتیلارام شئشپر کیمی،
  • باغرین باشینا باتارام.
  • نامرد ندی اؤزون اؤيه؟
  • مئيداندا مرد ایگید سؤيه؟
  • قاچیب چێخار اولسان گؤيه،
  • کمند تۇللايیب تۇتارام.
  • نه باخیرسان کۆسور کیمی؟
  • يارپاق نئجه اسیر کیمی؟
  • ایندی سنین يئسیر کیمی
  • قوللارین دالدا چاتارام.
  • هايقیریب آچسام مئيدانی،
  • سۇ تک آخیدارام قانی،
  • دستله‌يیب بَيی، خانی،
  • قێرات دؤشونه قاتارام.
  • قوچ کور‌اوغلو اؤز کاریندا،
  • يالان اولماز ایلقاریندا.
  • چکیب حلب بازاریندا
  • سنی قۇل دئيیب ساتارام.
  • کور‌اوغلونون بۇ سؤزوندن دلی حسن قێزیشدی. اؤزو چکیلدی بیر کناردا
  • دۇردو، باشینداکی آداملارا حؤکم ائله‌دی کی، کور‌اوغلونو تۇتسونلار.
  • دلی حسنین دسته‌سی کور‌اوغلويا هۆجوم ائله‌دی. کور‌اوغلو آتی جؤولانا
  • گتیریب، قێشمیز شیر کیمی اونلارین اۆستونه جۇمدو.
  • بیر ياندان کور‌اوغلو، بیر ياندان قێرات آز واختدا دسته‌نی قاتیمقاتیم
  • قاتلايیب الدن-آياقدان سالدیلار. دسته‌دن قێریلان قێریلدی، قالانلار
  • دا قاچیب داغیلدیلار. کور‌اوغلو دسته‌نی داغیلمیش گؤروب، قێراتی ایلدیریم
  • کیمی سۆزدوردو، چکیلیب بیر ياندا دۇران دلی حسنین اۆستونه سۆردو.
  • اۆزونو اونا تۇتوب، آلدی گؤرک نه دئدی:
  • قێراتی گتیردیم جؤولانا، ایندی
  • وارسا ایگیدلرین مئيدانا گلسین!
  • گؤرسون من دلی‌نین ایندی گۆجونو،
  • بويانسین اندامی آل قانا، گلسین!..
  • قورخوم يوخ پاشادان، سۇلطاندان، خاندان،
  • گلسین منم دئين، کئچیردیم ساندان،
  • ارلر دالدالانیب قورخماسین قاندان،
  • آت سۆرسون، قووغايا مردانا گلسین!..
  • کور‌اوغلو ايیلمز ياغیيا، يادا،
  • مردین اسکیک اولماز باشیندان قادا.
  • نره‌لر چکرم من بۇ دۆنيادا،
  • گؤستررم محشری دۆشمانا، گلسین!..
  • دلی حسنله کور‌اوغلو داوا ائله‌يه‌سی اولدولار. قێلینجلارینی چکیب، بیربیرینه
  • هۆجوم ائله‌دیلر. قێلینجدان مۇراد حاصیل اولمادی، عمودا ال آتدیلار.
  • عموددان مۇراد حاصیل اولمادی، نیزه‌يه ال اۇزاتدیلار. نیزه‌دن ده کار
  • آشمادی. آخیردا آتدان دۆشدولر، گۆلشمه‌يه باشلادیلار. دلی حسن ایله
  • کور‌اوغلو چوخ گۆلشدیلر، گاه او بۇنا گۆج گلدی، گاه بۇ اونا گۆج گلدی. قوچ
  • کور‌اوغلو آخیردا بیر دلی نره چکیب دلی حسنی گؤتوروب يئره وۇردو.
  • دیزینی سینه‌سینه دايادی، الینی قێلینجا آتاندا، دلی حسن بیر آه چکدی.
  • کور‌اوغلو دئدی:
  • – بیر قاشیق قانیندان قورخوب نیيه آه چکیرسن؟
  • کور‌اوغلونون جاوابیندا دلی حسن دئدی:
  • – ائي ایگید، من جانیمدان قورخوب آه چکمیرم. عهدیم وار ایدی.
  • عهدیمه چاتمادیم.
  • کور‌اوغلو سوروشدو:
  • – عهدین نه ایدی؟
  • دلی حسن دئدی:
  • – من عهد ائله‌میشدیم کی، هر کیم منی باسسا، اونونلا دوست، قارداش
  • اولام. اؤلنه قدر اونون يانیندا قالام. ایندی سن منی باسدین، آنجاق
  • اؤلدورورسن، عهدیمه چاتا بیلمیرم.
  • دلی حسنین بۇ سؤزو کور‌اوغلونو سئویندیردی. آياغا قالخدی، دلی
  • حسنین قولوندان ياپیشیب قالدیردی، الینی اۆچ دفعه‌‌ اونون دالینا وۇردو.
  • دلی حسن اونون قێلینجی‌نین آلتیندان کئچدی، اؤلنه‌جن اونا قارداش
  • اولوب، قۇللوغوندا دۇرماغا آند ایچدی. اوندان سونرا اۆزونو کور‌اوغلويا
  • تۇتوب دئدی:
  • – قوچ کور‌اوغلو، دۆز يئددی ایلدی کی، من بۇ يوللارین آغاسیيام. ایندیيه
  • قدر هله بیر آدام منیم قاباغیما چؤپ سالا بیلمه‌يیب. بۇ يئددی ایلین
  • عرضینده بیر بعضیرگان منه باج وئرمه‌میش بۇ هندوردن کئچه بیلمه‌يیب.
  • بَيلردن، خانلاردان، تاجیرلردن آلیب يێغدیغیم مال-دؤولتین،
  • قێزیل-گۆموشون، جاواهیراتین هامیسینی ساخلامیشام. ایگیدلر آراسیندا اولان
  • عادته گؤره ایندی اونلارین هامیسی سنه چاتیر. بۇيور، گئدک مالینا صاحب
  • اول!
  • کور‌اوغلو قاباقجا اونا اینانمادی. شۆبهه‌لندی کی، بلکه حیله‌‌ قۇروب
  • اونو توپا سالماق ایسته‌يیر. سونرا فیکیرلشیب اؤز-اؤزونه دئدی: “عيبی يوخدو،
  • ائله بئله ياخشیدی. بۇ باشدان يوخلايیب، سێناقدان چێخاردارام. قوي
  • مرددیرسه ده ایندیدن بیلینسین، مۆخننتدیرسه ده ایندیدن بیلینسین”.
  • اؤزو قێراتی میندی، سونرا دا اۆزونو اونا تۇتوب دئدی:
  • – مین آتینی، سۆر، گئدک!
  • دلی حسن قاباغدا، کور‌اوغلو دالدا آز گئتدیلر، اۆز گئتدیلر، گلیب
  • بیر سێلدیریم قايانین دیبینه چاتدیلار.
  • قايانین دیبی يامان کول-کوسلوق ایدی. دلی حسن آتینی کول-کوسلوغا
  • وۇردو. کور‌اوغلو دا اونون دالینجا. ائله بیر آز گئتمیشدیلر کی، قاباقلارینا
  • بیر ماغارا چێخدی. دلی حسن آتدان دۆشدو. سونرا قێراتین جیلوووندان
  • ياپیشیب دئدی:
  • – چاتمیشیق. ایندی آتدان دۆش، ایچری گیرک.
  • کور‌اوغلو يئنه ده دلی حسنی قاباغینا سالیب ماغارايا گیردی. باخدی
  • کی، بۇرادا او قدر قێزیل-گۆموش وار کی، ائله بیل يئددی پادشاهین خزینه‌سی
  • بۇرادادی. کور‌اوغلو ماغارانی تامام-کمال گزدی. هامیسینی گؤزدن
  • کئچیردی. سونرا دلی حسنه دئدی:
  • – قوي بۇنلار ائله بۇراداجا قالسینلار. ایندی بۇنلار بیزه لازیم دئيیل.
  • آمما ائله کی، چنلیبئلده يۇرد-يۇوا سالدیق، باشیمیزا دلیلر، ایگیدلر
  • يێغیلدی، اوندا بۇنلار بیزه لازیم اولاجاق.
  • دوغرودان دا ائله اولدو.
  • بۇ گۆندن کور‌اوغلونون باشینا ياواش-ياواش آداملار يێغیشماغا
  • باشلادی. چوخ چکمه‌دی کی، چنلیبئل قوچاق اوغلانلارین، ایگیدلرین مسکنی
  • اولدو.

  قایناق‌لار

  1. Azadliq . org