Wt/azb/کور‌اوغلونون ایستانبول سفری

< Wt‎ | azb
Wt > azb > کور‌اوغلونون ایستانبول سفری
Koroglu by A. Hajiyev Stamp of USSR, Epic poems of USSR nations. Azerbaijan epic poem "Koroglu", 1989

کور‌اوغلونون ایستانبول سفری edit

  آنا آنلاتیم

  • کور‌اوغلونون ایستانبول سفری

کور‌اوغلو دلی حسنله آرخا-آرخايا وئریب چنلیبئلده يۇرد-يۇوا سالمیشدی. تاي ایش گلیب او يئره چاتمیشدی کی، چنلیبئلین هندوریندن بیر کاروان دا کئچه بیلمیردی. کور‌اوغلونون آدی بۆتون عالمه يايیلمیشدی. دۆنيانین هر طرفیندن ایگید اوغلانلار اونون دسته‌سینه گلیردی. قێزلار، گلینلر اونون حسرتینی چکیردیلر. بۇ سس-صدا گلیب ایستانبولا دا چاتمیشدی. ایستانبول خوتکاری‌نین قێزی نیگار خانیم دا گؤرمزه-بیلمزه عشق باده‌سینی ایچیب بیر کؤنولدن مین کؤنوله کور‌اوغلويا عاشق اولموشدو. آمما يازیق قێز آتاسی‌نین، بیر ده کی بیر نامرد قارداشی وار ایدی، اونون قورخوسوندان لب ترپه‌دیب نفس چکه بیلمیردی. کور‌اوغلونون دردینی اۆرگینه سالیب پايیز يارپاغی کیمی گۆندن-گۆنه سارالیب سولوردو. دئيیرلر ایستانبول کندلری‌نین بیرینده بللی احمد آدیندا يئنیيئتمه، جاوان بیر اوغلان وار ایدی. بللی احمدین بێغ يئری تزه‌جه ترله‌يیردی. آمما، نئينیرسن، سن گل کی، قۆووتده-هۆنرده رۆستم پهلوانا باج وئرمزدی. بللی احمد نه قدر کی، ایگید ایدی، بیر او قدر ده الی آچیق، کؤنلو-گؤزو توخ ایدی. تاپدیغینی تک يئمزدی. ائله کی، کور‌اوغلو صداسی گلیب بۇرالارا چاتدی، بللی احمد چوخ گؤتور-قويدان سونرا چاریخلاری‌نین باغینی برکیدیب، آغامی الله ساخلاسین دئيیب، چنلیبئله طرف يولا دۆشدو. چوخ گئتدی، آز گئتدی، او نئجه دئيرلر دره-تپه دۆز گئتدی، بیر جۆمه‌نین گۆنونده گلیب ایستانبولا يئتیشدی. بلی، ائله تزه‌جه بازارا گیرمیشدی، او يان بۇ يانا باخیردی کی، گؤردو هامی قاچیر. اؤزو ده هئچ دۆکانی باغلايیب ائلمیر. بیر سۇ ایچیم ساعتدا بۆتون بازار قالدی باشینا. بللی احمد مات-مهتتل دايانمیشدی. بیر ده گؤردو بۇدو بیر چولاق تاجیر قێچینی يئل تۇتموش قوجا قاتیر کیمی هايتیياهايتیيا قاچیر.

  • تئز اونون قاباغینی کسیب سوروشدو:
  • – آي عمی، بۇ جاماعتا نه اولوب؟ بۇ نه قاچهاقاچدی؟
  • تاجیر اونا دقتله باخیب دئدی:
  • – گؤرونور قریب آدامسان.
  • بللی احمد دئدی:
  • – بلی قریبم، بۇ گۆن گلمیشم.
  • تاجیر قێچی‌نین بیرینی سۆرويه-سۆرويه باشلادی دانیشماغا کی، بس خوتکار
  • گئدیب مککه زیارتینه، هر جۆمه گۆنوندن جۆمه گۆنونه خوتکارین
  • قێزی نیگار خانیم مسجیده گئدیر. او، ائودن چێخاندا جار چکیب جاماعتا
  • خبر وئریرلر کی، گرک هامی ائوه گئتسین. گرک اونون بويونو هئچ کس
  • گؤرمه‌يه. دۆکانلارین هئچ بیریسینی باغلاماغا دا ایجازه يوخدو.
  • تاجیر دیلی تۇتولا-تۇتولا بۇ سؤزلری دوغرايیب تؤکدو. تلسدیگیندن
  • چولاق قارغا کیمی آتدانا-آتدانا قاچیب گؤزدن ایتدی.
  • بللی احمد باخدی کی، دوغرودان جار چکیلیردی. فیکیرلشدی کی، آده،
  • من بللی احمد اولام، بیر کلک قۇروب خوتکار قێزینی گؤره بیلمه‌يم،
  • بۇ هئچ بیر کیتابا-دفتره سێغیشماز.
  • جلد بیر اطرافا گؤز گزدیریب باخدی کی، ياخیندا بیر گؤيرتی-سبزوات
  • دۆکانی وار، قاپیسی دا آچیقدی. ياواشجا اؤزونو وئردی دۆکانا. قاپینی چکدی،
  • اؤزو ده پیشتاختانین آلتینا گیریب تاختانین دئشیگیندن گؤز قويماغا باشلادی.
  • بلی، گؤزله ها گؤزله آخیردا دسته‌نین اۇجو آچیلدی، قاراچیلار، فرراشلار
  • کئچندن سونرا بللی احمد بیر ده باخدی کی، بۇدو نیگار خانیم يئتمیش
  • ایکی قلمنن اؤزونه زیينت وئریب قێرخ اینجه‌بئل قێزین آراسیندا يۆز-ناز
  • قمزينن ساللانا-ساللانا گلیر.
  • نیگار خانیم دۆکان-بازارا تاماشا ائلیيه-ائلیيه گلیردی. ائله کی، بللی
  • احمد گیزلنن دۆکانین قاباغینا چاتدیلار، نیگار خانیم يانینداکی
  • قێزلارا اۆز تۇتوب دئدی:
  • – بۇ نه سیردی؟ بۆتون دۆکانلار قالیب باشلی-باشینا. بؤيوک سررافلار
  • اؤز جواهیراتلارینی صاحبسیز قويوب گئدیبلر. هئچ دۆکانلارینی باغلامايیبلار،
  • بۇ تروز دۆکانی نیيه باغلیدی؟ يقین بۇرادا بیر حیکمت وار.
  • من گرک اورايا باخام.
  • بللی احمد بۇ سؤزلری ائشیدیب قورخودان دۇردو زاغ-زاغ اسمه‌يه کی،
  • ایشدی، اير خوتکار قێزی گلیب منی بۇرادا گؤرسه، دده‌‌می قبیردن چێخاراجاق.
  • يازیق قورخودان گؤيرتی تاغی‌نین ایچینه سوخولوب گیزلندی. نیگار خانیم
  • قێرخ اینجه‌بئل قێزلا ایچری گیریب باخدی کی، بیر نفر شخص باشینی گؤيرتیتنین
  • ایچینه سوخوب گیزله‌نیب. بیر تپیک وۇروب قێشقیردی کی، باخین گؤرون بۇ کیمدی،
  • بۇرادا گیزله‌نیب. قێزلار بللی احمدی باياقدان قامارلادیلار. بللی
  • احمد مین انوايی-مۆسیبتله، بیر تهر کی، اؤزونو اونلارین الیندن
  • قۇرتاریب نیگارین آياقلارینا يێخیلدی کی: “خانیم، قۇربانین اولوم، آمانین
  • بیر گۆنودو، بیر قلتدی ائله‌میشم، قويما بۇنلاری، باشیمدا تۆک قالمادی”.
  • قێزلار ائله تؤکولوشموشدولر اونون اۆستونه کی، ائله بیل قارغا لئشه
  • تؤکولوب. چیمدیکله‌ين کیم، دیشله‌ين کیم، باشینی يولان کیم. نیگار
  • خانیمین اونا يازیغی گلیب سوروشدو:
  • – ياخشی، دئ گؤروم بۇرادا نه قلت ائله‌يیرسن؟
  • بللی احمد نیگار خانیمین جاوابیندا دئدی:
  • – خانیم، واللاه، بالله من قریب، نابلد بیر آدامام. بۇرا بۇ گۆن
  • گلمیشم. ائله بازاردا گزیردیم. بیر ده گؤردوم قاچهاقاچ دۆشدو، قریبلیک
  • پیس شئيدی، خانیم. بیلمه‌دیم هارا قاچیم. آخیردا قاچیب بۇرايا گیردیم.
  • نیگار خانیم سوروشدو:
  • – اده، آدین ندی؟ هارالیسان؟
  • – خانیم، سنه قۇربان اولوم، آدیم بللی احمددی. اؤزوم ده عرضوروم
  • طرفیندنم.
  • نیگار خانیم عرضورومون آدین ائشیتجک تئز سوروشدو:
  • – ياخشی، دئيیرلر کی، چنلیبئلده کور‌اوغلو آدیندا بیر ایگید وار. هئچ
  • اونو گؤروبسن؟
  • بللی احمد باخدی کی، آها دئيه‌سن بۇرادا بیر ایش وار. يوخسا خوتکار
  • قێزی کور‌اوغلونو نیيه سوروشور. تئز اؤزونو دۆزلدیب دئدی:
  • – خانیم، من ائله قوچ کور‌اوغلونون دلیلریندنم.
  • نیگار خانیم بۇنو ائشیتجک کاغیذ گؤتوروب بیر نامه يازدی کی، بس
  • “کور‌اوغلو، من ایستانبول خوتکاری‌نین قێزی نیگار خانیمام. اير سن
  • دوغرودان دا ایگیدسنسه گل منی آپار”.
  • نامه‌نی بۆکوب مؤهورله‌دی، اوندان وئردی بللی احمده کی:
  • – بۇ نامه‌نی چاتدیر کور‌اوغلويا. او اير کیشیدیرسه گلیب منی آپارسین.
  • بللی احمد نامه‌نی اؤپوب جیبینه قويدو، سونرا دئدی:
  • – خانیم، بلکه اینانمادی.
  • نیگار خانیم قولوندان بازوبندینی ده آچیب اونا وئردی. اۆسته‌لیک بیر
  • ده بیر اوووج قێزیل وئردی کی، آتدان، زاددان آلیب، نامه‌نی تئز چاتدیرسین.
  • بللی احمد اورادان چێخیب اؤزونو بیرباش يئتیردی کاروانسارايا. تئز بیر
  • آت آلیب چنلیبئل دئيیب يولا دۆشدو. گئجه‌نی گۆندوزه قاتدی، گۆندوزو گئجه‌يه،
  • آز گئتدی، چوخ داياندی، چوخ گئتدی آز داياندی، بیر نئچه گۆندن سونرا
  • گلیب چنلیبئله يئتیشدی. کور‌اوغلويو تاپیب نیگارین نامه‌سینی وئردی اونا.
  • کور‌اوغلو نامه‌نی اوخويوب احوالاتدان حالی اولاندان سونرا امر ائله‌دی،
  • قێراتی يهرله‌دیلر. اوندان اۆزونو دلی حسنه تۇتوب قێشقیردی کی:
  • – اده، اورادان او زنجیرلری بۇرايا گتیر.
  • بللی احمد زنجیر آدینی ائشیدنده گئتدی فیکیره کی، يوخسا بۇ منی
  • چارمیخا-زادا چکمک ایسته‌يیر. ائله ائله ده اولدو. دلی حسن اونو ياخشیجا
  • زنجیرله‌دی. ال-آياغینی باغلايیب اۆستونه ده قاراول قويدو.
  • دئيیرلر کور‌اوغلونون بئله بیر خاصيتی وار ایدی. اونا کیم بئله-بئله
  • خبرلر گتیرسيدی قاباقجان اونو بئله‌جه زنجیرله‌يیب اۆستونده ده آدام
  • قويارمیش کی، اؤزو گئدیب گلینجن قاچیب ائله‌مه‌سین. ائله کی، گئدیب قايیتدی،
  • اير سؤز دۆز چێخدی، ياخشی خلت وئریب اؤزونه دلی ائلرمیش، يوخ اير
  • يالان چێخدی، اورتالیقدا حیله‌‌-میيله، اولدو، اوندا تاي الله گؤسترمه‌سین.
  • اوندا ایش قالاردی میسری قێلینجا.
  • بلی، ائله کی، قێرات حاضیر اولدو، دلیلر يئربيئردن دئدیلر کی، بس
  • کور‌اوغلو، گل بۇ صفره سن تک گئتمه، بۇ، خطرلی، قورخولو صفردی.
  • قوي هامیمیز بیرگه گئدک. کور‌اوغلو بۇ سؤزون اۆستوننن سازی دؤشونه
  • باسیب، دئدی:
  • ایگید گرک يار سئومه‌يه
  • اؤزو تک گئده، تک گئده.
  • مۆخننت قددین ايمه‌يه
  • اؤزو تک گئده، تک گئده.
  • نیگارین شیرین دیللری،
  • باغریما سانجیب میللری،
  • اۇزاق-اۇزاق منزیللری
  • اؤزو تک گئده، تک گئده.
  • قنیمینه قێلینج چالا،
  • اؤلکه‌سینه تالان سالا،
  • دۆشمنلر اۆسته باش آلا،
  • اؤزو تک گئده، تک گئده.
  • دالا پولاد ياراغینا،
  • دۆشه ایگید سوراغینا،
  • يۆز تۆلکونون قاباغینا،
  • اؤزو تک گئده، تک گئده.
  • کور‌اوغلويام، هاشا-هاشا،
  • گیررم خوتکارلا ساواشا،
  • قێرات دؤشلتمه‌يه پاشا،
  • اؤزو تک گئده، تک گئده.
  • کور‌اوغلو سازلا دئدیگی کیمی، سؤزله ده دئدی:
  • – دلیلریم، نیگار خانیمی گتیرمه‌يه اؤزوم تک گئده‌جه‌يم. سیز
  • قالین، چنلیبئلی دۆشمنلردن قورويون.
  • کور‌اوغلو قێلینج قۇرشادی، عمود آسدی، نیزه گؤتوردو، اۆستوندن ده بیر
  • ساز کئچیرتدی.
  • دلیلرله حالال-حۆممت ائله‌يیب سلاماتلاشدی. دلی حسنی اونلارین
  • اۆستونه بؤيوک قويدو. سونرا ترلان کیمی تۇللانیب قێراتی مینیب يول باشلادی.
  • ائله کی، قێرات يۆيه‌نین بوش گؤردو، ایلدیریم کیمی سۆزوب دؤرد گۆنلوک
  • يولو بیر گۆنده گلیب آخشام اۆسته ایستانبولا يئتیشدی. قارانلیق دۆشموشدو.
  • کور‌اوغلو قێراتی سۆروب بیر قاپینی دؤيدو. قاپیيا قوجا بیر آرواد گلدی.
  • کور‌اوغلو دئدی:
  • – آي باجی، قریبم، منی بۇ گئجه‌لیيه قوناق ائله‌يرسنمی؟
  • آرواد دئدی:
  • – نیيه قوناق ائلمیرم. دۆش قال.
  • کور‌اوغلو دۆشدو. قێراتی تؤيله‌يه چکدی. اؤزو ده آروادین ائوینه گیریب
  • بیر طرفده اوتوردو. آرواد چؤرک گتیردی. کور‌اوغلو يئمکدن سونرا
  • صؤحبت آچیب آرواددان کیم اولدوغونو سوروشدو.
  • آرواد دئدی:
  • – قوجا، دۇل بیر آروادام. آي بالا، آمان-زامان گؤزومون آغی-قاراسی
  • بیرجه اوغلوم وار. خوتکار قێزی نیگار خانیمین نار باغیندا باغباندی.
  • کور‌اوغلو بۇ ایشی ياخشی فال حساب ائله‌يیب چوخ سئویندی. دئيه‌سن ایشلر
  • ياخشی گتیردی. ائله باجادان دۆشن کیمی قیسمتین اۆستونه دۆشموشدو.
  • غرض، کور‌اوغلو اوردان-بۇردان سؤز-صؤحبت سالیب اؤيرندی کی، بس خوتکار
  • مککه زیارتینه گئدیب. سونرا قاریدان اوغلونو سوروشدو کی، بس اوغلون
  • هارادادی؟
  • قاری دئدی:
  • – خوتکار قێزی خانیم هر آيدا، اون بئش گۆنده بیر قێرخ اینجه‌بئللی قێزلا
  • نار باغینا گزمه‌يه چێخیر. ایندی صاباح يوخ، او بیریسی گۆن وعده‌‌سیدی. باغا
  • گزمه‌يه گله‌جک. اودو کی، اوغلوم باغی يؤر-يؤنده‌مه سالیر.
  • کور‌اوغلو نه قدر اوتوروب گؤزله‌دیسه، قاری‌نین اوغلو گلیب چێخمادی.
  • آخیردا آرواد دۇردو کی، “بس اوغلان گلمه‌دی، يقین گئجه‌نی باغدا قالاجاق،
  • يئر سالیم ياتاق”.
  • کور‌اوغلو باخدی کی، آرواد بۇنون يئرینی ائوین يۇخاری باشیندا سالیب، اؤز
  • يئرینی قاپی‌نین آغزیندا.
  • دئدی:
  • – سن ائله ائله‌مه. منیم يئریمی قاپی‌نین آغزیندا سال.
  • آرواد گئتدی فیکره. اصلینده آرواد ائله کور‌اوغلونون خوتکاردان، خوتکارین
  • قێزیندان سؤز-صؤحبت آچماغیندان، بیر دخی سیر-صیفتیندن، ياراقسابه‌سیندن
  • بیر آز شککه دۆشموشدو. ایندی ده بئله دئميی کی، “منیم
  • يئریمی قاپی آغزیندا سال”، آروادی لاپ داغداغیيا سالدی، دئدی:
  • – يوخ، بالا، من قوجا آروادام. گئجه‌لر تئز-تئز بايیرا-باجاغا
  • چێخیرام.
  • کور‌اوغلو دئدی:
  • – هئچ عيبی يوخدو. سن ائله منی آياقلايیب دا کئچه بیلرسن. قورخما،
  • قابیرغالاریم سێنماز. آمما بیردن ایشدی من چؤله-زادا چێخمالی اولسام،
  • سن گرک خۇرد-خشیل اولاسان.
  • غرض، نه باشینیزی آغریدیم، کور‌اوغلونون يئری سالیندی، قاپی‌نین آغزیندا.
  • قوچ کور‌اوغلو باياخ ها ائله يئرینه گیرجک گئتدی يۇخويا. خورولتو دۆنيانی
  • گؤتوردو. آمما آروادین گؤزونه يۇخو گئتمه‌دی کی، گئتمه‌دی.
  • گئجه‌نین بیر عالمینده کور‌اوغلو اوياندی. باخدی کی، آرواد ياتمايیب
  • سوروشدو:
  • – آي آنا، نیيه ياتمیرسان؟
  • آرواد دئدی:
  • – نه بیلیم، آي بالا، يۇخوم قاچیب.
  • کور‌اوغلو سوروشدو:
  • – آي آنا، بلکه مندن قورخورسان؟
  • – يوخ، آنجاق ائله بئله...
  • کور‌اوغلو گؤردو يوخ آرواد دئيه‌سن سؤزلو آداما اوخشايیر.
  • دئدی:
  • – آنا، سن اولاسان اوغلونون جانی دۆزونو دئ، گؤروم نیيه ياتمیرسان؟
  • آروادین دار دۆنيادا عزیز-خلف بیرجه اوغلو واردی. اودو کی، تاي بۇ
  • آندین اۆستوندن کئچه بیلمه‌يیب مثلای آچدی کی:
  • – واللاه آي بالا... ائله بئله اۆرگیمه داغداغا گلیب کی، گؤره‌سن سن
  • کیمسن. هئچ بیزیم يئرلرین آدامینا اوخشامیرسان.
  • کور‌اوغلو سوروشدو:
  • – ياخشی، آي آنا، سنین فیکرینجه من کیم اولا بیله‌رم.
  • آرواد دئدی:
  • – آي بالا، باخیرام سنه... نه بیلیم واللاه، دئمه‌يه ده اۇتانیرام...
  • سن ائله دئيه‌سن نظرگلدی پهلیوانسان.
  • – يوخ، آنا، تاپا بیلمه‌دین.
  • – اوندا يقین عرب ریحانسان.
  • – يوخ، يئنه تاپا بیلمه‌دین.
  • – اوندا، گیزیروغلو مصطفی بَي دئيیلسن کی؟
  • – يوخ، آنا، او دا دئيیل.
  • – بالا، اوندا واللاه آز قالیرام... آي بالا، بیردن سن او کور‌اوغلو
  • اولارسان ها...
  • – باخ، ایندی تاپیبسان.
  • آروادین سسی چێخمادی. کور‌اوغلو بیر-ایکی دفعه‌‌ اونو سسله‌دی گؤردو يوخ،
  • سس يوخدو. آخیردا دۇروب آروادین يانینا گلدی، گؤردو نه، بۇ گۆن
  • اؤلوبسن، دۆنن. آرواد تیر-تاب دۆشوب اؤزوندن گئدیب. تئز بیر آز سۇدانزاددان
  • تؤکوب اونو آيیلتدی. آرواد ائله اؤزونه گلجک دۇردو آياغا کی،
  • قاچسین. کور‌اوغلو تۇتدو اونون بیله‌يیندن.
  • – آي آرواد، هارا قاچیرسان؟ من آدام زاد يئين دئيیلم کی، نیيه
  • مندن قورخورسان؟
  • – نیيه سندن قورخورام؟ من هله چوخ ایگید آروادام کی، سنین
  • آدینی ائشیدنده قورخودان باغریم چاتلامايیب. الله سنین ائوینی يێخسین.
  • سنین آدینی ائشیدنده پاشالار قارین آغریسینا دۆشور. سنین يولون
  • يومرولسون. هارادان گلیب منیم ائویمه چێخدین؟
  • کور‌اوغلو بیر آز گۆلوب، آروادی ساکیتلشدیردی. اۆرک-دیرک وئردی. اوندان
  • چێخاردیب بیر اوووج دا قێزیل وئردی کی، بۇ سیرری گرک هئچ يئرده آچماياسان.
  • يوخسا کۆپه گیریب يئددینجی گؤيه چێخسان، بالیق اولوب دريايا جۇمسان،
  • يئنه ده الیمدن قۇرتارا بیلمزسن.
  • آرواد دئدی:
  • – خئيیر، آرخايین اول. شجاعتینه بله‌دم. سنی تانیمايانا لعنت.
  • هئچ گؤر سن گئدندن ده بیر-ایکی آي سونرايا من هئچ يورغان-دؤشکدن
  • دۇرا بیله‌جه‌يم کی، بیر سؤز ده دانیشام. منده سن اۆرک-گؤبک
  • قويوبسان کی؟..
  • غرض، کور‌اوغلو آروادا بیر آز دلیل-دلايیل ائلیيندن سونرا يئرینه
  • گیردی. آمما ائله بیل کی، آروادین يئرینه گتیریب بیر کیسه بیره تؤکموشدولر.
  • ياتا بیلمیردی کی، بیلمیردی. آخیردا چاغیردی کی:
  • – آي اوغول، بس آخی، هئچ بیر دئمه‌دین بۇرايا نیيه گلیبسن؟
  • کور‌اوغلو باخدی کی، لاپ يئریدی. دئدی:
  • – آنا، خوتکارین قێزی نیگار منه سیفاریش گؤندریب کی، گلم اونو
  • آپارام. من ده اونون اۆچون گلمیشم.
  • آرواد دئدی:
  • – باخ، بۇ اولدو. دوغرودان دا، نیگار خانیم ائله سنه ياراشان جاندی.
  • الله مۆبارک ائله‌سین. آمما، آي بالا، اونو سن نئجه آپاراجاقسان؟
  • کور‌اوغلو دئدی:
  • – بۇ ایشده گرک سنین اوغلون منه کؤمک ائله‌يه.
  • آرواد سئوینجک دئدی:
  • – او منیم بۇ الیمین ایچینده. آغزی ندی کی، ائله‌مه‌سین. اینشاللاه
  • صاباح کئچر، او بیریسی گۆن نار باغیندان بیرباش...
  • غرض، گئجه‌نی ياتدیلار. سحر اولدو. کور‌اوغلو دۇروب آتی يئمله‌دی،
  • سۇلادی، راحتلادی، آروادا پۇل وئردی کی، شئي-شۆي آلسین خؤرک حاضیرلاسین،
  • هم ده گئدیب اوغلونو چاغیرسین، اؤزو ده اۆز قويدو مئيدانا طرف. آنجاق
  • گئتمه‌میشدن اۆست-اۆسته آروادا تاپشیردی کی، دیلینی دیشلری‌نین دالیندا
  • ساخلاسین، يوخسا بوينونون آردیندان چێخار.
  • غرض، آرواد اؤز ایشلرینده اولسون، سیزه کیمدن دئيیم، کور‌اوغلودان.
  • بلی، کور‌اوغلو بۇردان بیرباش گلدی بیر اۇستانین يانینا. اونا بیر اوووج
  • قێزیل وئریب خوتکارین آدینا بیر مؤهور قايیرتدیریب قويدو جیبینه.
  • اورادان چێخیب گئدیردی، بیر ده گؤردو بۇدو بیر میرزه چشمه‌يینی تاخیب
  • بۇرنونون اۇجونا، ايلشیب بیر سکی‌نین اۆستونده مۆشتری گؤزله‌يیر. کور‌اوغلو
  • میرزه‌نین يانینا گلیب دئدی:
  • – میرزه، منیم بیر قوجا ننم وار. بۇدو بیر نئچه آيدی کی، اؤلوم
  • يورغان دؤشه‌يینده‌دی. هر نه ائله‌يیریکسه ساغالمیر. ایندی منه سنی دئيیبلر
  • کی، سن چوخ ياخشی دۇعا يازیرسان. سنه قۇربان اولوم، گئدک ننه‌مه
  • بیر دۇعا ياز.
  • میرزه‌نین گؤزلری بۇغا گؤرموش دانا گؤزلرینه دؤندو. جلد آياغا
  • قالخدی، قلم-داواتینی گؤتوروب بیر الینده ایمانی، بیر الینده تۇمانی
  • دۆشدو کور‌اوغلونون يانینا. بلی، گلیب آخیردا يئتیشدیلر قاری‌نین هيتینه.
  • میرزه باخدی کی، هيتده بیر قوجا قاری وار. کور‌اوغلويا باخیب دئدی:
  • – اوغلان، بس سن دئيیردین ننم ناخوشدو. بۇدو ننن هيتده
  • گزیر کی.
  • کور‌اوغلو باياق ها داروازانی باغلامیشدی. میرزه‌نین لاپ يانینا گلیب
  • دئدی:
  • – میرزه، اير جانینا حئیفین گلیرسه، چێخارت کاغیذ-قله‌مینی خوتکارین
  • دیلیندن قێزی نیگار خانیما بیر نامه ياز.
  • – نه نامه؟
  • میرزه‌نین اللری اسه-اسه بیر پارچا کاغیذ چێخارتدی. کور‌اوغلو باشلادی
  • دئمه‌يه:
  • – خوتکارین دیلیندن قێزی نیگارا ياز کی: “بۇ نامه‌نی سنه وئرن
  • آدام منیم چوووشومدو. منیم باریگاهیمدا منه اولان حؤرمت
  • گرک اونا دا اولا”.
  • میرزه آلتدان-آلتدان کور‌اوغلويا باخا-باخا نامه‌نی يازیب قۇرتاردی.
  • تئز ایسته‌دی کی، آغزینی باغلاسین، کور‌اوغلو دئدی:
  • – وئر گؤروم نه يازمیسان.
  • میرزه‌نین رنگ اۇروفو قاچدی. باشلادی ککله‌مه‌يه کی، بس سهو
  • ائله‌میشم، وئر تزه‌دن يازیم.
  • کور‌اوغلو اوخويوب گؤردو میرزه يازیب کی، “نیگار خانیم، بۇ آدام
  • قۇلدوردو. اورايا چاتجاق تۇتوب آسدیرارسان”.
  • کور‌اوغلو بیر ايری-ايری میرزه‌يه باخدی. میرزه قورخوسوندان کاغیذی
  • جێریب تزه‌دن نامه‌نی يازیب کور‌اوغلويا وئردی. کور‌اوغلو باخدی کی، ایندی
  • دۆز يازیب قايیرتدیردیغی خوتکار مؤهورونو ده نامه‌يه وۇروب جیبینه
  • قويدو. سونرا میرزه‌يه دئدی:
  • – میرزه، من سنه ياخشیجا حؤرمت ائلیيه‌جکدیم. سن کی، منه
  • کلک گلدین، سنه تاي آيری جۆر حؤرمت ائله‌مک گۆناهدی. آل، بۇ سنین
  • زحمت حاقین.
  • بۇنو دئيیب کور‌اوغلو میرزه‌نین ایکی قاشی‌نین اورتاسیندان بیر ترسه يۇمروق
  • دۆيونله‌دی. آرواد قێشقیرماق ایسته‌ينده کور‌اوغلو دؤنوب گؤزونون
  • اۇجو ایله اونا ائله باخدی کی، آرواد باياق ها قاچیب گیردی ائوه. کور‌اوغلو جلد
  • میرزه‌نین عباسینی، اممامه‌سینی سويوندوروب اونو گئيیندی، الینه ده بیر
  • تسبئح آلیب دۆزلدی خوتکارین باریگاهینا طرف. قاپیچیلار اونون الینده
  • خوتکارین مؤهورلو نامه‌سینی گؤرجک ایکی قات اولوب تورپاغا دۆشدولر.
  • قاپیلار تايباتاي آچیلدی. کور‌اوغلو ایچریيه کئچه-کئچه قێشقیردی:
  • – هانی نیگار؟ منیم قاباغیما چێخسايدی، آياقلارینا سويوق ديَردی؟
  • بۆتون باریگاه اهلی قورخودان باشلادیلار زاغ-زاغ اسمه‌يه. بئلبئله
  • کور‌اوغلو قێرخ قاپیدان کئچیب نیگار خانیمین هيتینه گیردی. نیگار
  • خانیم قێرخ اینجه‌بئل قێزلا پنجره‌نین قاباغیندا اوتورموشدو. باغا
  • تاماشا ائله‌يیردی. اونو گؤرجک شیخ بیلیب تئز قێزلاردان بیریسینی گؤندردی
  • کی، گئتسین گؤرسون کیمدی، مطلبی ندی؟
  • کور‌اوغلو قێزی گؤرجک ائله بیر نره چکدی کی:
  • – هانی نیگار؟ نیيه منیم قاباغیما چێخمیر؟ خوتکارین يانیندان
  • گلمیشم.
  • قێز اونو بیر اوتاغا آپاریب اؤزو ده تئز قاچیب نیگارا خبر وئردی. ائله
  • کی، نیگار قێرخ اینجه‌بئل قێزلا اونون يانینا گلدی، کور‌اوغلو باخدی کی، بللی
  • احمد دوغرو دئيیب. نیگار دوغرودان دا ائله اونا لايیق نیگاردی. هله
  • اۆزونو گؤرمه‌میشدی. ائله بوي بۇخونوننان عاشق اولدو. ایشاره ائله‌دی کی،
  • قێزلار چێخسین، سنه گیزلین سؤزوم وار، خوتکار تاپشیریب.
  • قێزلار هامیسی چێخدی. ائله کی، نیگارلا کور‌اوغلو تک قالدیلار کور‌اوغلو
  • عبانی، اممامه‌نی تۇللادی. نیگار باخدی کی، چاووش دؤندو اولدو بیر ایگید
  • اوغلان، چیينینده ساز. ائله قالدی مات کی، بۇ ندی؟ کور‌اوغلو ایکی الینی دؤشونه
  • قويوب نیگار خانیما سلام وئردی. نیگار سلامی آلمادی. کور‌اوغلو بیر ده
  • سلام وئردی. نیگار يئنه ده سلامی آلمايیب ایسته‌دی کی، گئری دؤنسون.
  • آلدی کور‌اوغلو:
  • سلام وئردیم، سلام آلماز،
  • گؤروم کسسین سلام سنی.
  • آخچاسیز، پۇلسوز عاشقم،
  • پۇلوم يوخدو آلام سنی.
  • گۆللو باغلاردا گزرسن،
  • جاهیللار باغرین ازرسن،
  • يۇخا کاغیذا بنزرسن،
  • تۇتماز قلم، يازام سنی.
  • خزینم يوخ، آغزین آچام،
  • دؤولتیم يوخ، تؤکم ساچام،
  • علاج بۇدو آلام، قاچام،
  • چنلیبئله سلام سنی.
  • هانسی داغلارین قاریسان؟
  • هانسی باغلارین باریسان؟
  • نیگار، کور‌اوغلو ياریسان،
  • بیلیر کۆللی-عالم سنی.
  • نیگار خانیم باخدی کی، بۇ آدام کیمدیسه بۇنا عشق اعلان ائله‌يیر. نه
  • قدر ائله‌دیسه اؤزونو ساخلايا بیلمه‌يیب اۇجادان بیر قه-قهه چکیب
  • گۆلدو، اۆزونو اونا تۇتوب دئدی:
  • – سن بیر عاشق، من بیر خوتکار قێزی، سنین وارین، پۇلون وارمی کی، منی
  • آلاسان؟
  • نیگار خانیمین جاوابیندان آلدی کور‌اوغلو گؤرک نه دئدی:
  • اۇجا-اۇجا داغلار باشی،
  • چنلی ده اولور، چنسیز ده اولور.
  • جهد ائله بیر ایشده تاپیل
  • سنلی ده اولور، سنسیز ده اولور.
  • آغ اۆزده بۇسه تک گرک،
  • ارنلر عیسی تک گرک،
  • گؤزللر نیسا تک گرک،
  • تئللی ده اولور، تئلسیز ده اولور.
  • کور‌اوغلونون آتی اولسا،
  • دمیر، پولاد قاتی اولسا،
  • بیر ایگیدین ذاتی اولسا،
  • پۇللو دا اولور، پۇلسوز دا اولور.
  • نیگار خانیم باخدی کی، بۇ چوخ کور‌اوغلو، کور‌اوغلو دئيیر. دقتله بئله
  • باخاندا گؤردو کی، اؤز بازوبندی کی، وئرمیشدی بللی احمده، اونون سازی‌نین
  • دسته‌سینده‌دی. بیلدی کی، بۇ، کور‌اوغلودو. باخدی کی، کور‌اوغلو دوغرودان دا
  • کور‌اوغلودو. هۇشو باشیندان ائله داغیلدی کی، اۆز-گؤز هامیسی آچیلدی. کور‌اوغلو
  • تئز اونو دیک گؤتوردو. ائله قاپیدان چێخارتماق ایسته‌يیردی کی، نیگار دئدی:
  • – يوخ، کور‌اوغلو بئله اولماز. سن منی بۇ قدر قوشونون ایچیندن
  • چێخاردیب آپارا بیلمزسن.
  • کور‌اوغلو دئدی:
  • آلا گؤزلو نیگار، سنی
  • من چنلیبئله آپاررام.
  • چکرم قێرات ترکینه،
  • دؤنه‌رم يئله آپاررام.
  • مایلم گؤزو، قاشینا،
  • دۆشه‌رم، تر ساواشینا،
  • دۇروب دولاننام باشینا،
  • تۇتارام دیله، آپاررام.
  • تۆلک ترلان قورخماز ساردان،
  • کؤنول آيریلماز نیگاردان،
  • سنی زور ایله خوتکاردان،
  • آلارام بئله، آپاررام.
  • سايمارام خوتکاری، خانی،
  • قوشونا وئرمم آمانی،
  • مئيدان ایچینده آل قانی،
  • دؤندررم سئله، آپاررام.
  • کور‌اوغلو گلسه داماغا،
  • ضربه‌‌ دؤزمز سۇلطان، آغا،
  • قێراتی چاپدیررام داغا
  • چارداقلی بئله آپاررام.
  • نیگار دئدی:
  • – ایگیدلیگیندن دم وۇرما. زورلا ایش اولماز. ياخشیسی بۇدو کی، جاماعت
  • شۆبهه‌لنمه‌میش بۇ عبا-قبانی گئيیب بۇرادان چێخ گئت. صاباح کئچر، او
  • بیریسی گۆن من نار باغینا گزمه‌يه چێخاجاغام. قاچیردا بیلسن، منی
  • اورادان گؤتوروب قاچیردارسان.
  • غرض، کور‌اوغلو يئنه ده عبا-قباسینی گئيیب، قاپیدان چێخیب اؤزونو
  • قاری‌نین ائوینه سالدی. باخدی کی، آروادین اوغلو دا گلیب، اونو گؤزله‌يیر. دئ
  • خوش بئش، اون بئش ايلشدیلر. خؤرک يئيیب توققانین آلتینی مؤحکمله‌دندن
  • سونرا اوغلان اۆزون کور‌اوغلويا تۇتوب کیم اولدوغونو سوروشدو.
  • کور‌اوغلو نیگاری گؤرندن سونرا ائله حالدا دئيیلدی کی، سۇالا سؤزله
  • جاواب وئرسین. اودو کی، سازی دؤشونه باسیب دئدی:
  • جاوان اوغلان، اؤلکه‌نیزه اۆز تۇتوب،
  • بیر قێز سوراغینا گلدیم، ها گلدیم.
  • اوسمان گؤزه‌لی‌نین دۆشدوم عشقینه،
  • آچیق قاباغینا گلدیم، ها گلدیم.
  • قێراتی چاپدیریب يوللاردا يوردوم،
  • دۆشمن قارشیسیندا مردانه دۇردوم،
  • آدیم رؤوشن ایگید، چنلیبئل يۇردوم،
  • لاچین اويلاغینا گلدیم، ها گلدیم.
  • اسکیک اولماز کور‌اوغلونون قووغاسی،
  • دۆشر پاشالارلا جنگی، ساواشی،
  • ایستانبول شهرینده خوتکار بالاسی،
  • نیگار فراغینا گلدیم، ها گلدیم.
  • اوغلان دئدی:
  • – آي ایگید، سن تک اوغلانسان. عثمانلی قوشونونون ایچیندن نیگاری
  • نئجه چێخاریب آپاراجاقسان؟
  • کور‌اوغلو دئدی:
  • – سن منی باغا بۇراخ، نئجه آپاراجاغیمدا ایشین اولماسین.
  • اول-اول باغمان بیر آز چکیندی. ائله کی، بیر طرفدن آناسی، بیر
  • طرفدن ده کور‌اوغلو دۆشدولر اونون اۆستونه، اوغلان راضیلاشدی. گئجه‌نی
  • ياتیب سحر اولجاق کور‌اوغلو دۇردو، قێراتی يهرله‌يیب باغمانلا بیرلیکده
  • نار باغینا گلدیلر. کور‌اوغلو آتی بیر طرفده باغلادی، اؤزو ده گیزله‌نیب
  • باشلادی نیگار خانیمین يولونو گؤزله‌مه‌يه. آز کئچدی، چوخ کئچدی کور‌اوغلو
  • بیر ده گؤردو بۇدو نیگار خانیم قێرخ اینجه‌بئللی قێزلا گلیر. کور‌اوغلو قێزی
  • گؤرجک آز قالدی هۇشو باشیندان داغیلسین. نیگار خانیم دا کور‌اوغلونون
  • باغدا اولدوغونو باشا دۆشدو. قێزلاری باشیندان داغیدیب اؤزونو او گیزلنن
  • طرفه وئردی. کور‌اوغلو پۇسقودان چێخان آسلان کیمی اونون يولونو کسدی.
  • نیگار داياندی. کور‌اوغلو اونون الیندن تۇتدو کی، چکسین. نیگار دئدی:
  • – ياخشی، بس سن منی ایندی نه ایله چنلیبئله آپاراجاقسان؟
  • کور‌اوغلو سازی گؤتوروب دئدی:
  • قێراتا چکدیررم بیر جۆت اۆزنگی،
  • اۇجا داغ باشیندا تۇتارام جنگی،
  • قێررام عثمانلینی، هیندی، فیرنگی،
  • ایستانبولدا قێلینج چاللام، اینشاللاه.
  • قێراتیمی بسله‌میشم قهرینده،
  • گؤزل گؤرمه‌میشم سنین تهرینده،
  • قێلینج چکیب ایستانبولون شهرینده،
  • خوتکاری تاختیندان ساللام، اینشاللاه!
  • قاریشمايین کور‌اوغلونون ایشینه،
  • دوو گللم دۆشمنین اللی بئشینه،
  • قۇزغون قونار ياغیلارین لئشینه،
  • ياغیدان قیصاصیم، آللام، اینشاللاه!
  • نیگار خانیم دئدی:
  • – آخیر او نئجه آتدی کی، بیزیم ایکیمیزی ده بۇ قدر قوشونون ایچیندن
  • چێخاردیب آپارا؟
  • آلدی کور‌اوغلو:
  • اۇجا داغ باشیندا يئل کیمی اثر،
  • بۇ گۆنومده منه اۆرک قێراتیم.
  • بیر آيلیق منزیلی بیر گۆنده کسر
  • کؤهلن بسله‌میشم، گؤرک قێراتیم.
  • يوللارین توزونو گؤيه قالدیرار،
  • مۆخننت اۆستونو بیردن آلدیرار،
  • مئيدانین ایچینده دۆشمن سالدیرار،
  • اولار يیيه‌سینه دیرک قێراتیم.
  • قوچ کور‌اوغلو قونار اولسا يهره،
  • ياغی دۆشمنلری سالار قهره،
  • آخوردا آرپاسین قويماز سحره
  • دارا دۆشسم، منه کؤمک قێراتیم.
  • نیگار دئدی:
  • – ایندی کی، بۇ قدر قێرات-قێرات دئيیرسن گئدک گؤرک او نئجه آتدی؟
  • کور‌اوغلو نیگاری قێراتین يانینا گتیردی. نیگار باخیب گؤردو آت دوغرودان
  • دا ياخشی آتدی. کور‌اوغلو آتین يۆيه‌نینی آغاجدان آچیب دئدی:
  • – نیگار خانیم، بۇنون اۆستونه مینمه‌میش ياخشی، پیسلیگینی گؤره بیلمزسن.
  • کور‌اوغلو بۇنو دئيیب ترلان کیمی سێچرايیب آتین بئلینه میندی. سول الینی
  • ده آتیب نیگاری دیک گؤتوروب ترکینه قويدو. نیگار ایشی بئله گؤروب قێشقیردی کی:
  • – اده، بیر قوي گؤرک، بیر دانیشاق، مصلحتلشک سونرا.
  • کور‌اوغلو آتی سێچرادیب باياق ها باغدان چێخدی کی:
  • – قێز، نه فیکیر، نه مصلحت. مصلحت ائله بۇدو کی، وار.
  • بلی، کور‌اوغلو ایله نیگار قێراتین اۆستونده يئل کیمی سۆروب گئتمکده
  • اولسونلار، سیزه کیمدن دئيیم، نیگار خانیمین قارداشیندان.
  • ایستانبول خوتکاری‌نین بۆرجو سۇلطان آدیندا بیر اوغلو وار ایدی. ائله کی،
  • خبر چێخدی، هاي-کۆي دۆشدو کی، نیگار خانیمی گؤتوروب قاچدیلار، بۆرجو
  • سۇلطان آتی مینیب قوشونا هاي وۇردو. قوشون آتلانانا قدر بۆرجو سۇلطان
  • اؤزو آتا بیر-ایکی تازيانا چکیب يولا دۆزلدی.
  • کور‌اوغلو نیگار دا ترکینده يئلدن قانات تاخیب اۇچان قێراتین اۆستونده
  • گل ها گل، گلیب بیر چمنگاها چێخدیلار. بیر طرفدن کور‌اوغلو گئجه‌نی
  • ياتمامیشدی دئيین يامان يۇخوسوز ایدی. بیر طرفدن ده نیگاری بئله
  • داواسیز-شاواسیز آپارماق قوچ کور‌اوغلويا آغیر گلیردی. اودو کی، آتدان
  • دۆشدو، آتی يانچیدار ائله‌يیب اوتلاماغا بۇراخدی. نیگاری دا گؤتوروب بۇلاغین
  • باشینا گلدی. نیگار نه قدر ائله‌دی کی، گل گئدک، آتامین قوشونو گلیب
  • بیزی تۇتار، سنی اؤلدورر، منی ده گئری قايتارارلار، کور‌اوغلو اونو ائشیتمه‌دی.
  • کور‌اوغلو دئدی:
  • – قورخما، بیزیم دالیمیزجا هئچ کس گلمه‌يه‌جک.
  • ائله کی، نیگار ايلشدی، کور‌اوغلو باشینی اونون دیزی‌نین اۆستونه قويوب
  • دئدی:
  • – نیگار خانیم، من بیر آز ياتیم. سنین گؤزون قێراتدا اولسون، ائله
  • گؤردون اوتدان آغزین چکیب، آياقلارینی يئره دؤيوب ناراحاتلیق ائله‌يیر، بیل
  • کی، دۆشمن گلیر. اوندا منی اويادارسان.
  • کور‌اوغلو بۇنو دئيیب باشینی آلاگؤز نیگارین دیزینه قويوب يۇخولادی.
  • آرادان بیر آز کئچمیشدی، نیگار بیر ده باخدی کی، واللاه قێرات بیر
  • حرکتده‌دی، بۇ حرکتده‌دی کی... ائله بیل کی، واخت ائله‌يیر، آتین باغری
  • چاتلاسین. نیگار تئز کور‌اوغلونو اوياتدی کی:
  • – دۇر، گؤر آت نیيه ائله ائله‌يیر؟
  • کور‌اوغلو دئدی:
  • – قورخما، بیر شئي يوخدو. دۆشمن گلیر.
  • کور‌اوغلو جلد آتی میندی، نیجاری دا گؤتوروب ترکینه قويدو. بیر ده
  • باخدیلار کی، بۇدو اۇزاقدان بیر آتلی ائله گلیر، ائله گلیر کی، ایلدیریم کیمی.
  • نیگار اونو گؤرجک دئدی:
  • – قارداشیم گلیر.
  • کور‌اوغلو دئدی:
  • – قوي گلسین، گؤرک نه دئيیر.
  • ائله اونلار بۇ سؤزده ایدیلر کی، بۆرجو سۇلطان گلیب چاتدی. نیگاری کور‌اوغلونون
  • ترکینده گؤرجک بوغازیندان قووقال تیکانی گلمیش اؤکوز کیمی
  • باغیریب دئدی:
  • – قێزی الدن قوي!
  • کور‌اوغلو دئدی:
  • – خوتکار اوغلو، حیرصلنمه. قێزی آپاران يوخدو، گل آپار.
  • بۆرجو سۇلطان اوندان بۇ سؤزو ائشیدیب بیر آز دا جۆرتلندی.
  • – نئجه گل آپار! گرک سنی اؤلدوروب قێزی سونرا آپارام!
  • کور‌اوغلو گۆله-گۆله دئدی:
  • – چوخ گؤزل، من ده راضیيام. آنجاق دئيه‌سن چوخ تلسمیسن، آتین
  • قارینالتیسینی ياخشی برکیتمه‌میسن. اونو دۆزلت سونرا داوا ائله‌يک.
  • بۆرجو سۇلطان ايیلدی کی، آتین قارینالتیسینا باخسین. کور‌اوغلو اونون
  • بوينونون آردیندان بیر يۇمروق وۇروب آتدان يئره سالدی. آلیجی قۇش کیمی
  • سینه‌سینه چؤکدو. خنجرینی چێخارتدی کی، باشینی کسسین، نیگار آغلادی کی:
  • – کور‌اوغلو، اونو منه باغیشلا. تک بیرجه قارداشیمدی.
  • کور‌اوغلو بۆرجو سۇلطانین سینه‌سی‌نین اۆستوندن دۇروب دئدی:
  • – گئت، سنی نیگارا باغیشلادیم. آنجاق بیر ده گیریمه کئچسن اؤلدوره‌جه‌يم.
  • اونلار يئنیدن قێراتا مینیب چنلیبئله طرف يول باشلادیلار. بۆرجو
  • سۇلطان او قدر گؤزله‌دی کی، قوشون گلیب چاتدی. هامیسی بیرلیکده کور‌اوغلونون
  • دالینجا دۆشدولر.
  • کور‌اوغلو بیر ده باخدی کی، بۇدو قوشون گلیر. تئز قێراتین باشینی دؤندریب
  • داياندی. باشلادی گؤزله‌مه‌يه. نیگار گؤردو کی، کور‌اوغلو داوا ائله‌مک
  • ایسته‌يیر. دئدی:
  • – کور‌اوغلو، ازل منی گؤتوروب قاچمايايدین. ایندی کی، آپاریرسان
  • قايیتما، سۆر آپار گئت. آتامین قوشونو چوخدو، سن تکسن. اونلارلا باجارمازسان،
  • داوا ائله‌مه.
  • – من سنی چنلیبئله بۇ جۆر آپارا بیلمه‌رم. دلیلر دئيرلر
  • کور‌اوغلو گئتدی خوتکارین قێزینی قاچیردیب گتیردی. گرک داوا ائله‌يم،
  • قوشون قێرام، قان تؤکم، پاشا اؤلدورم، سنی ائله آپارام.
  • کور‌اوغلو بۇنو دئيیب نیگار خانیم دا ترکینده میسری قێلینجی چکیب
  • قايیتدی، اؤزونو عثمانلی قوشونونا وۇردو.
  • کور‌اوغلو بۇرادا داوا ائله‌مکده اولسون سیزه چنلیبئلده دلیلردن
  • خبر وئریم. کور‌اوغلو گئدندن سونرا دلیلر دئدیلر:
  • – کور‌اوغلو تک گئتدی، سونرا اله کئچر تۇتولار، باشسیز قالاریق. دالینجا
  • گئتمک گرکدی.
  • دلیلردن بیر نئچه‌سی چنلیبئلده قالدی. قالانی آتلاندی، کور‌اوغلونون
  • دالینجا يولا دۆشدو. دلیلر او واخت يئتیشدیلر کی، قێزغین داوا ایدی. کور‌اوغلو
  • ساغا-سولا قێلینج وۇروردو. دلیلر نره چکیب اؤزلرینی عثمانلی قوشونونا
  • وۇردولار. قوشون اهلی دلیلرین هۆجوموندان قورخوب کور‌اوغلونون باشیندان
  • داغیلدیلار.
  • کور‌اوغلو گؤز گزدیردی. دلیلری قێزغین داوا ائله‌ين گؤردو، کؤنلو
  • آچیلدی، اۆرگی آتلاندی. آلدی گؤرک ترکینده آغلايان نیگار خانیما نه دئدی:
  • آغلاما، تئللی نیگاریم،
  • گلدی دلیلریم، گلدی.
  • خوتکار قێزی، گؤزل ياریم،
  • گلدی دلیلریم، گلدی.
  • دۆشمنه قێلینج چکمه‌يه
  • باشلاری بیچیب تؤکمه‌يه
  • پاشالار قددی بۆکمه‌يه
  • گلدی دلیلریم، گلدی.
  • قۇربانام مردین آدینا،
  • دوستونو سالار يادینا،
  • بۇ گۆن بیر ار ایمدادینا،
  • گلدی دلیلریم، گلدی.
  • الده شئشپری، قالخانی،
  • ياغیيا وئرمز آمانی،
  • اؤلدورمه‌يه بَي، پاشانی،
  • گلدی دلیلریم، گلدی.
  • ایگیدین کسمز قووغاسی،
  • همیشه اولار داواسی،
  • کور‌اوغلونون قوچ آرخاسی،
  • گلدی دلیلریم، گلدی.
  • کور‌اوغلونون نره‌سینه دلیلر داها دا قێزیشدیلار. کور‌اوغلو بیر ياندان،
  • دلیلر بیر ياندان خوتکارین قوشونوندان چوخ قێردیلار. قوشون دلیلرین
  • هۆجومونا داوام گتیره بیلمه‌دی، قاچیب داغیلدی. کور‌اوغلو ترکینده نیگار
  • خانیم، باشیندا دا دلیلر چنلیبئله يوللاندی. اۇزاق يئرلری کئچیب، يوللاری،
  • ياماجلاری آشیب گلدیلر چنلیبئله چاتدیلار. نیگار خانیم گؤردو،
  • چاتدیقلاری يئر اۇجا داغلارین باشی، گۆللو-چیچکلی بیر اويلاقدی، دئدی:
  • – کور‌اوغلو، چنلیبئل بۇدورمو؟
  • نیگار خانیمین جاوابیندا آلدی قوچ کور‌اوغلو گؤرک نه دئدی:
  • چیسکینلی داغلارین باشی،
  • نیگار، چنلیبئل بۇدو، بۇ!
  • ایگیدلر آچار ساواشی
  • نیگار، چنلیبئل بۇدو، بۇ!
  • چکیب بعضیرگان سويدوغوم،
  • قفله‌لری بوش قويدوغوم،
  • پاشالار گؤزو اويدوغوم،
  • نیگار، چنلیبئل بۇدو، بۇ!
  • اۆست يانی داغ، تپه، دره،
  • مۆخننتلر دۆشر گیره،
  • مرد ایگیده اولار بره،
  • نیگار، چنلیبئل بۇدو، بۇ!
  • خوتکارلار باتا بیلمه‌ين،
  • جومردلر تۇتا بیلمه‌ين،
  • کؤکسونه ياتا بیلمه‌ين،
  • نیگار، چنلیبئل بۇدو، بۇ!
  • اۇجالاردان اۇجا داغی
  • هرگیز گله بیلمز ياغی،
  • کور‌اوغلو تک ار اويلاغی
  • نیگار، چنلیبئل بۇدو، بۇ!
  • چنلیبئله هاي دۆشدو. دلیلر هامیسی آت مینیب کور‌اوغلونون قاباغینا
  • چێخدیلار. نیگار خانیمی آتدان دۆشوروب، کجاوه‌يه میندیردیلر. شنلیک
  • باشلاندی. کور‌اوغلو ایله نیگاری مجلیسین باش طرفینده اوتورتدولار.
  • هامی‌نین کئفی ساز ایدی. آمما هئچ کیمین کئفی بللی احمدین کئفینه
  • چاتمازدی. خلت خلت اۆستوندن تؤکولوردو. هره اؤز قۆووه‌سینه گؤره
  • اونا خلت وئریردی. بۇنو گؤرن نیگار خانیم کور‌اوغلودان سوروشدو:
  • – آي کور‌اوغلو، بس سن نیيه بللی احمده خلت وئرمیرسن؟
  • کور‌اوغلو دئدی:
  • – منیم خلتیم اودو کی، اونو آزاد ائله‌يیب دلیلیيه گؤتورموشم. نه
  • واخت کی، چنلیبئل دلیسی اولماغا لايیق اولدوغونو گؤستردی، مندن خلتی
  • اوندا آلاجاق.
  • بۇ سؤزون جاوابیندا بللی احمد دئدی:
  • – کور‌اوغلو، من چنلیبئله قورخودان، آجلیقدان گلمه‌میشم. من
  • ایگید اولماسايدیم آدیما بللی احمد دئمزدیلر. اینشاللاه واخت گلر
  • سندن ده خلتیمی آلارام.
  • مجلیس اهلی اونون بۇ سؤزونه احسن دئدی. کور‌اوغلو بیر نیگارا باخدی،
  • بیر دلیلره باخدی، اۆرگی تئللندی، آدلی گؤرک نه دئدی:
  • ایستانبولدان بۇتا آلیب گلمیشم،
  • ایستانبولدا آرزومانیم قالمادی.
  • چنلیبئل اويلاغیم، قێرات داياغیم،
  • آت مینمکده آرزومانیم قالمادی.
  • قێراتی چکمه‌سم داغلار سؤکولمز،
  • بزمندین چکمه‌سم ساغری اؤرتولمز.
  • قاباغیندان قاچان دۆشمن قۇرتولماز،
  • قیصاص آلدیم، آرزومانیم قالمادی.
  • کور‌اوغلويام، چنلیبئلده اوتوررام،
  • هاردا گؤزل گؤرسم، آللام، گتیررم.
  • دلیلری مۇرادینا يئتیررم،
  • گؤزللرده آرزومانیم قالمادی.

  قایناق‌لار

  1. Azadliq . org