کوراوغلوینان عرب ریحان
edit
آنا آنلاتیم
- کوراوغلوینان عرب ریحان
کور‌اوغلونون ارزینجاندان ساغ-سلامات قايیدیب گلميی چنلیبئلده توي-بايرام اولدو. ائله بیل کی، دلیلرین اۆرکلری يئرینه گلدی. احوالاتی، نئجه کی، آشیق جۆنون گلیب خبر گتیرمیشدی، کور‌اوغلويا دانیشدیلار. کور‌اوغلو سوروشدو: – بس آشیق جۆنون هانی؟ هئچ گؤزومه ديَمیر. نیگار دئدی: – آشیق جۆنونو يئنه ده توقاتا گؤندرمیشیک کی، هاسان پاشانین ایشلریندن بیزی خبردار ائله‌سین. کور‌اوغلو گئتدی فیکره. دئدی: – گرک اونو قارسا گؤندريدینیز. من هاسان پاشانین قئيرتینه بله‌دم. او دا زربی-دستیمی گؤروب. او بیزیم اۆستوموزه گله بیلمز. آمما ریحان ایگید آدامدی. اؤزونون ده منده هايفی وار. کور‌اوغلو ارزینجاندان گلیب چنلیبئله چاتاندا قارانلیق قوووشوردو. ایندی ده اوتوروب او قدر صؤحبت ائله‌دیلر کی، لاپ گئجه گئجه‌دن کئچدی. آخیردا دلی حسن مجلیسی داغیتدی کی: – داي بسدی. دۇرون هره اؤز يئرینه! کور‌اوغلو يورغوندو، دینجینی آلسین. دلیلر دۇروب داغیلدیلار. کور‌اوغلو دا باشی‌نین آلتینی دیک ائله‌يیب ياتدی. ائله کی، سحر آچیلدی، هله هئچ گۆن چێرتلامامیشدان کور‌اوغلو يئریندن دۇردو. اۇشاقلاری يانینا آلیب چنلیبئلین بۆتون بندرگاهلارینی گؤزدن کئچیرتدی. باخدی کی، واللاه، دلیلر بندرگاهلاری ائله تۇتوبلار، ائله پۇسقولار دۆزلدیبلر، ائله سنگرلر باسیبلار کی، هاسان پاشا ندی، لاپ خوتکار اؤزو ده بۆتون دۆنيانی يێغیب چنلیبئله تؤکسه، يئنه ده بیر آدام بۇ يئرلردن کئچه بیلمز. ائله کی، کور‌اوغلو بندرگاهلارین هامیسینی گزیب قۇرتاردی، دئمه‌لیسینی دئدی، تاپشیریلماسینی تاپشیردی، اوندان دلی مئهتری
- چاغیریب دئدی:
- – منیم آشیق پالتاریمی گتیر!
- دلیلر سوروشدولار:
- – نئينیرسن آشیق پالتارینی؟
- کور‌اوغلو دئدی:
- – قارسا گئده‌جه‌يم. گرک گئدیب عرب ریحاندان خبر بیلم.
- دلیلر نه قدر ائله‌دیلر کی، سن گئتمه، هم سفردن تزه گلیبسن،
- هم ده بۇ ساعت چنلیبئلی باشسیز قويماق اولماز. اولمادی کی، اولمادی. آشیق
- پالتارینی گئيیندی، بیر ده بیر آت مینیب قارسا طرف يولا دۆشدو. آز گئتمیشدی
- بیلمیرم، چوخ گئتمیشدی بیمیرم، ائله تزه‌جه آلاجالار داغی‌نین اتکلرینه
- چاتیردی کی، بیر ده گؤردو، بۇدو، قارس طرفدن بیر آتلی گلیر. دقت
- ائله‌يیب باخدی کی، بۇ بیر جاوان اوغلاندی، نئجه دئيرلر، هله بێغ يئری
- تزه‌جه ترله‌يیر. اۆرگینده اؤز-اؤزونه فیکیرلشیب دئدی: “لاپ ياخشی اولدو.
- بۇنو داياندیریم، بیر احوال-پۆرسن اولوم، گؤروم قارسدا نه وار، نه
- يوخ”. چاغیردی کی:
- – آيه، بیر دايان گؤروم، هاردان گلیرسن؟
- اوغلان آتین باشینی چکدی کی:
- – قارسدان گلیرم.
- کور‌اوغلو سوروشدو:
- – سفرین هارادی؟
- اوغلان دئدی:
- – چنلیبئله گئدیرم.
- کور‌اوغلو دئدی:
- – چنلیبئلده نه ایشین وار؟
- اوغلان دۇروخدو. بیر آز فیکیرلشیب سونرا دئدی:
- – ائله-بئله گئدیرم. کور‌اوغلو ایله بیر آز ایشیم وار.
- کور‌اوغلو گؤردو کی، اوغلان سؤزلو آداما اوخشايیر. دئدی:
- – ياخشی، سنین کور‌اوغلو ایله نه سلام-صاباحین؟ بَيم تانیيیرسان؟
- اوغلان لووغالانا-لووغالانا دئدی:
- – تانیيیرسان ندی؟ کیشی ایله حاق-سلامیمیز وار. من ائله هفته‌ده،
- اون بئش ده بیر گئده‌رم اونون يانینا.
- کور‌اوغلو باخدی کی، گده بیر آز اؤزوندن دئيندی، آمما کی، دئيه‌سن
- پیس اوغلان دئيیل. اؤزو ده حؤکمن سؤزلو آدامدی. “هرچی بادا-باد”
- دئيیب، بیردن قايیتدی کی:
- – کور‌اوغلو منم. دئ گؤروم نه سؤزون وار؟
- کور‌اوغلو باخدی کی، اوغلان اونون سؤزونه اینانمیر. آشیق پالتاری‌نین
- ياخاسینی بالاجا آچدی. ائله کی، آلتدان ياراق-ياساق گؤروندو، اوغلان دئدی:
- – جان کور‌اوغلو، منی باغیشلا! يالاندان دئدیم کی، سنینله دوستام.
- آنجاق قصداً ائله دئيیردیم.
- کور‌اوغلو دئدی:
- – عيبی يوخدو. دئ گؤروم، منه نه سؤزون وار ایدی؟
- اوغلان دئدی:
- – جان کور‌اوغلو، منی قارس پاشاسی‌نین قێزی هۆرو خانیم سنین يانینا
- گؤندریب. بیل و آگاه اول! بۇدو، نئچه مدتدی تۆرکمانلی عرب ریحان
- گلیب ايلشیب قارسدا. قوشون ایراهلايیب کی، چنلیبئلین اۆستونه گله. قارس
- پاشاسی دا اونا سؤز وئریب کی، اگر چنلیبئلی آلا بیلسه، قێزی هۆرو خانیمی
- اونا وئره‌جک. ایندی هۆرو خانیم منی گؤندریب سنین يانینا کی، احوالاتدان
- سنی خبردار ائله‌يم.
- کور‌اوغلو باشلادی احوال تۇتماغا. اوردان سوروشدو، بۇردان سوروشدو،
- باخدی کی، اوغلان هئچ بیر شئي بیلمیر. ائشیتدیگی او ایمیش کی، اونو دا دئيیب.
- کور‌اوغلو گئتدی فیکره کی، نه ائله‌سین. گئری قايیتسین، يا ایره‌لی گئتسین. فیکرینده
- چوخ گؤتور-قوي ائله‌يندن سونرا اوغلاندان سوروشدو:
- – ياخشی، بیر منه دئ گؤروم، قارسدا سنین ائوین-زادین وارمی؟
- اوغلان دئدی:
- – وار، نئينیرسن؟
- کور‌اوغلو دئدی:
- – ایشدی، ایندی بیردن من قارسا گئتمه‌لی اولسام، منی بیر-ایکی گئجه
- ائوینده ساخلايا بیلرسنمی؟
- اوغلان دئدی:
- – کور‌اوغلو، او نه سؤزدو دئيیرسن؟ نیيه، من قاراچی دئيیلم کی،
- ائویم اولماسین. دؤولتیندن ائویم ده وار، قاباغیندا قۇللوق ائله‌مه‌يه بیر
- قوجا، گۆنو کئچمیش آنام دا وار. هامیسی، ائله من اؤزوم ده اۆسته‌لیک قۇرباندی
- سنه.
- کور‌اوغلو دئدی:
- – اوندا سۆر آتینی، گئدک!
- اوغلان سئویندیگیندن بیلمه‌دی کی، نه ائله‌سین. باياق ها آتی وۇروب دۆشدو
- قاباغا. اوغلان قاباقدا، کور‌اوغلو دالدا آت سۆروب آخشاما بیر آز قالمیش
- اؤزلرینی يئتیردیلر قارسا. اوغلان مسجیدین يانیندا آتینی ساخلادی کی:
- – دۆش! ائویم بۇردادی.
- کور‌اوغلو دئدی:
- – يوخ، سن هله قاباقجا منی آپار هۆرو خانیمین يانینا. گرک
- اول-اول اؤيرنم گؤرم نه وار، نه يوخ. بلکه ایش ائله اولدو کی، هئچ
- قالا بیلمه‌دیم.
- اوغلان دئدی:
- – ياخشی، نه دئيیرم. ایختیيار صاحبیسن. اوندا سن، باخ، ائله بۇ کۆچه
- ایله يئری، من آتلاری باغلايیم تؤوله‌يه گلیم.
- کور‌اوغلو آتدان دۆشدو. آتی اوغلانا وئریب کۆچه ایله گئتمه‌يه باشلادی.
- ایندی کور‌اوغلو گئتمکده اولسون، اوغلان آتلاری چکدی تؤوله‌يه، باغلادی،
- يئمله‌دی، اوندان چێخدی آناسی‌نین يانینا کی:
- – تئز اول، تداروک گؤر، قوناغیم وار. من ده گئدیرم بازارا شئيمئي
- آلماغا.
- آناسی سوروشدو:
- – بالا، قوناغین کیمدی؟
- اوغلان دئدی:
- – داي هئچ کیمه دئيیب ائله‌مه‌يه‌سن هه، کور‌اوغلودو، تئز اول.
- بۇنو دئيیب اوغلان دۆزلدی کور‌اوغلونون دالینجان. ایندی او گئتمکده
- اولسون، بیز گؤرک کور‌اوغلو نه ائله‌دی.
- کور‌اوغلو کۆچه ایله گله-گله گلیب چێخدی بیر ایمارتین قاباغینا.
- باخدی کی، پنجره‌ده بیر قێز دۇروب، بیر قێز دۇروب کی، او نئجه دئيرلر،
- يئمه، ایچمه خطتی-خالینا، گۆل جمعالینا تاماشا ائله. اؤزون اؤلدورسه اولار
- اون دؤرد، اون بئش ياشی. آمما ائله بويلو-بۇخونلو، شستلی-بستلی بیر قێزدی
- کی، ائله بیل سرو آغاجیدی، قالخیب. قاشلار قارا، گؤزلر قارا، تئللر قارا،
- خاللار قارا، او نئجه دئيرلر، آيا دئيیر سن چێخما، من چێخاجاغام،
- گۆنه دئيیر سن چێخما، من چێخاجاغام. اولا بئله بیر گؤزل، اولا کور‌اوغلو.
- اۆرک جوشدو، کؤنول هوالاندی، سازی گؤشونه باسیب دئدی:
- باشینا دؤندويوم گۆل اۆزلو خانیم،
- خانیم، هانسی بختورین ياریسان؟!
- گؤرجک سنی يارا اولدو جیياریم،
- بیر دئ، هانسی بختورین ياریسان؟!
- سیياه ساچلار دال گردنه دۆزولو،
- قارا گؤزلر خۇمارلانیب سۆزولو،
- ائله باخما، ایندی جانیم اۆزولو،
- خانیم، هانسی بختورین ياریسان؟!
- کور‌اوغلو حاق دئيیب، حاقدان درس آلیب،
- تر ممنه کۆلک ديَیب هوولانیب،
- قارا گؤزلر شۇخ ياناقدان جان آلیب،
- يوخسا آي قێز، بالا قونموش آریسان؟!
- کور‌اوغلو اوخوماغیندا اولسون، سنه کیمدن دئيیم، هامان بۇ قێزدان.
- بۇ قێز کیم اولا، قارس پاشاسی‌نین قێزی هۆرو خانیم.
- هۆرو خانیم کور‌اوغلونو آشیق بیلدی. بیر طرفدن ده کی، کور‌اوغلو
- باشلادی قاشدان، گؤزدن دئمه‌يه، هۆرو خانیم رۆبندی سالدی اۆزونه.
- قارا ائله بیل لاله‌لی، نرگیزلی داغ باشینا قارا دۇمان چؤکدو. کور‌اوغلو
- اۆرگی ایپک رۆبند قێرمیزی ياناقلاری ائله قۇجاقلادی، ائله قۇجاقلادی کی،
- بئله شئيه تاب ائله‌يه بیلر؟ اودو ها سازی باسدی دؤشونه. دئدی:
- اوغرون-اوغرون تۆل آلتیندان باخان يار،
- قالدیر رۆبندینی، گؤروم گۆل اۆزون!..
- آشیقلاری عشق اودونا ياخان يار،
- قالدیر رۆبندینی، گؤروم گۆل اۆزون!..
- وۇرولموشام سارماشیقلی باغینا،
- بوستانینا، شامامالی تاغینا،
- آپار منی يار دئيیب اوتاغینا،
- قالدیر رۆبندینی، گؤروم گۆل اۆزون!..
- کور‌اوغلويام، من سؤزومدن دؤنمه‌رم،
- سمنده‌رم، آلیشمیشام، سؤنمه‌رم،
- سندن قئيری هۇری گؤرسم سئومه‌رم،
- قالدیر رۆبندینی، گؤروم گۆل اۆزون!..
- ائله بۇ دمده اوغلان گلیب يئتیشدی. باخدی کی، بلی، کور‌اوغلو ایله هۆرو
- خانیم تاپیشیبلار. اۆرگینده چوخ سئویندی کی، ائله ياخشی اولدو. داي من
- دايانمايیب گئده‌رم بازارا. يوخسا آخشامدی. بازار باغلانار. بیر شئي
- تاپا بیلمه‌رم، کور‌اوغلونون يانیندا خجالت اولارام. داي نه بیلسین کی،
- بۇنلار هئچ بیر-بیریسینی تانیمیرلار. نه هۆرو خانیم کور‌اوغلونو تانیيیر،
- نه ده کور‌اوغلو هۆرونو. ائله کی، اوغلان گلیب چاتدی، اول-اول الین
- دؤشونه قويوب کمال-ادبله هۆرو خانیما سلام وئردی. اوندان گۆلگوله
- کور‌اوغلويا ایشاره ائله‌دی. يانی کی، نئجه گؤردون بۇ قوچ اوغلانی؟ گئدیب
- لاپ اؤزونو گتیردیم. کور‌اوغلو سوروشدو:
- – آيه، بۇ قێز کیم اولا؟
- اوغلان دئدی:
- – هۆرو خانیمدی دا... پاشانین قێزی. بس سیز هله بیر-بیرینیزی تانیمیرسیز؟
- بۇ سؤزده هۆرو خانیم دا تله‌سیک پنجره‌دن چکیلیب چێخدی ائيوانا.
- ائله آغزینی آچیب دانیشماق ایستيیردی کی، بیر ده گؤردولر، بۇدو، عرب
- ریحانلا پاشا آتلی بۇ طرفه گلیرلر. قێز ائله بیرجه بۇنو دئيه بیلدی کی:
- – آتامگیل گلیرلر، تئز چکیلین!
- هۆرو خانیم سؤزونو دئيیب ائوه گیردی، اوغلان دا کور‌اوغلونو گؤتوروب
- تئز آرادان چێخدی. ائله کی، گلیب يئتیشدیلر مسجیدین قاباغینا، اوغلان دئدی:
- – جان کور‌اوغلو، ایندی پاشاگیل شهرده‌دیرلر. داي سنه چؤلده قالماق
- اولماز. سن زحمت چک گیر ائوده اوتور. من ده بازارا ديَیب قايیدارام،
- گئجه‌نی ياتاریق، سحر گؤرک نه ائله‌يیریک.
- کور‌اوغلو راضی اولدو. اوغلان کور‌اوغلونو گتیردی ائوه. اوغلانین آناسی
- قاباغا چێخدی. خوشگلدین ائله‌دی. يئر دۆزلتدی. ائله کی، کور‌اوغلو ايلشدی،
- اوغلان دئدی:
- – ایندی منه رۆسخت وئر، بیر بازارا ديَیم، گلیم.
- بۇنو، دئيیب، اوغلان ائودن چێخدی. ایندی کور‌اوغلو ائوده راحتلانماقدا
- اولسون، سنه کیمدن دئيیم، اوغلاندان.
- اوغلان بازارا چاتاندا دۆکانلار باغلانماق عۆذره ایدی. او، قاباقجان
- اؤزونو وئردی بیر باققال دۆکانینا کی:
- – عمی، باشینا دؤنوم، تئز اول، منه ایکی باتمان دۆيو وئر! قوناغیم وار.
- دۆيونو باققالدان آلیب، تؤکدو توربايا. دالینا آلیب اؤزونو يئتیردی
- قسسابا. گؤردو ياخشی ات وار، آمما يامان دا باساباسدی. باشلادی آداملاری
- او يان-بۇ يانا ایتله‌يیب اؤزونه يول آچماغا. اونا بیر يۇمروق، بۇنا
- بیر دۆرتمه، آخیردا آداملاردان بیری حیرصلندی کی:
- – نه اولوب. قاچاقاچ دئيیل کی؟ دايان دا!..
- اوغلان دئدی:
- – دايانا بیلمیرم. آلیناسی شئيلریم وار. دۆکان-بازار باغلانیر.
- قوناغیم وار.
- دئدیلر:
- – نه اولسون؟ سنین قوناغین گؤيدن-زاددان گلمه‌يیب کی...
- آداملار چوخ دئدیلر، اوغلان آز ائشیتدی، ائله دئيیشه-دئيیشه اؤزونو سالدی
- دۆکانا. جاماعت گؤردو يوخ، بۇ، حياسیزلیغا سالیب آلماق ایسته‌يیر. قسسابا
- دئدیلر کی، اونا ات وئرمه‌سین. قسسابین دا ترس داماری تۇتدو. اوغلان
- نه قدر ائله‌دیسه، دئدی:
- – اولماز کی، اولماز. گرک بۇ آدامین هامیسی قۇرتارا، سونرا سنه ات
- وئرم.
- اوغلانین علاجی کسیلیب آخیردا قسسابین قۇلاغینا دئدی:
- – ائوین يێخیلسین، بیلسن کی، منیم قوناغیم کیمدی، هئچ بئله ائله‌مزسن.
- قسساب دا بیر دۆببه‌نین، آدام اله سالانین بیری ایدی. سوروشدو کی:
- – کیمدی قوناغین؟ دئ بۇ ساعت سنی يولا سالیم. يوخسا عرب ریحاندی؟
- يا پاشادی؟
- اوغلان دئدی:
- – يوخ، اونلار دئيیل. داي هئچ کس بیلمه‌سین، قوناغیم قوچ کور‌اوغلودو.
- قسساب شاققیلدادی. دئدی:
- – جاماعت، بۇنون قوناغی کور‌اوغلو ایمیش.
- هامی گۆلوشدو. قسساب گۆله-گۆله دئدی:
- – بۇ ساعت سنی يولا سالاجاغام. دئ گؤروم، نه قدر ایسته‌يیرسن؟ بیر
- گیرونکه، يا آلتی میسقال؟
- اوغلان دئدی:
- – بیر گیرونکه ندی؟ سنه آغزیمدا سؤز دئيیرم. بیر باتمان ات چک!
- گؤردولر يوخ، اوغلان دئيه‌سن زارافات ائلمیر. دالیندا دا دۆيو-زاد
- وار. غرض، قسساب اوغلانین اتینی وئریب، يولا سالدی.
- جاماعت آراسینا سؤز دۆشدو کی، بس کور‌اوغلو گلیب قارسا. اؤزو ده فیلانکه‌سین
- ائوینده قوناقدی. دئ اینانان، اینانمايان باشلادی دانیشماغا. آتالار
- دئيیبلر، بیر سیرر کی، اوتوز ایکی دیشین آراسیندان چێخدی، داي اونو ساخلاماق
- اولماز. بیر آندا بۆتون اطرافا سس يايیلدی. خبردن-خبره، خبردنخبره،
- سؤز آخیردا گلیب چاتدی عرب ریحانلا پاشانین قۇلاغینا.
- پاشا خبری ائشیتجک دۇردو آياغا کی:
- – قوشون گؤتوروب، گئدک کور‌اوغلونو تۇتاق!
- عرب ریحان دئدی:
- – يوخ. بۇنا کور‌اوغلو دئيرلر. ائله بئله اونو تۇتماق چتین ایشدی. بۆتون
- قوشونو قێریب تلف ائله‌ير، اؤزو ده آرادان چێخار.
- پاشا دئدی:
- – بس نه ائله‌يک؟
- عرب ریحان دئدی:
- – سن هئچ اؤزونو اوندا قويما. ائله بیل کی، بیز هئچ بۇ سؤزو ائشیتمه‌میشیک.
- قوي قارانلیق دۆشسون. ائله کی، هامی ياتدی. گئجه‌نین بیر ياریسی قوشون
- گؤتوروب، ائله يورغان-دؤشيی‌نین ایچینده تۇتاریق. آيری هئچ بیر علاجی يوخدو.
- اوندان عرب ریحان امر ائله‌دی شهرین اطرافینی جیته‌مه قوشون تۇتدو.
- اؤزلرینه ده تاپشیردی کی، سحره قدر نه کناردان شهره آدام قويسونلار،
- نه ده شهردن کنارا. ائله کی، تدبیرلرینی گؤروب قۇرتاردیلار،
- اوندان اوتوروب باشلادیلار گؤزلميه. او قدر گؤزله‌دیلر کی، اولدو گئجه‌نین
- ياریسی. اوندان دۇروب قوشون گؤتوروب تؤکولدولر ائوین اۆستونه. کور‌اوغلو، هئچ
- بیر شئيدن خبری يوخ، شیرین يۇخودا، بیر ده بئش-آلتی آدام تؤکولدو اۆستونه.
- سراسیمه يئریندن قالخیب اونو او يانا، بۇنو بۇ يانا، باخدی کی، ائو دولودو
- آداملا. هامیسی دا ياراقلی-ياساقلی. اطرافینا باخیب، گؤردو نه قێلینجی يئرینده
- دئيیل، نه اوخو. دئ گۆچ وئردی يۇمروغا، بیرینی، ایکیسینی، بئشینی اونونو؛
- گؤردو يوخ، اولماياجاق. دارتیب بیری‌نین الیندن قێلینجینی آلیب دؤشندی
- اوتاقداکیلارین جانینا. آخیردا کی بیر تهر اؤزونه يول آچیب ائودن چێخدی.
- باخدی کی، هيت دولودو. يولو هر طرفدن تۇتوبلار. قارانلیق، اؤزو
- ده کی، نابلد. آغزی دۆشدو بیر طرفه. نه قدر گئتدی، نئجه گئتدی بیلمه‌دی،
- بیر ده اونو گؤردو کی، قاباغینا بالاجا بیر قاپی گلدی. قوشون دا
- دالدان گلیر. داي علاجی کسیلدی، آچیب قاپینی گیردی ایچریيه. سن دئمه،
- بۇرا میناره‌يه چێخماق اۆچون يول ایمیش. داي هارايا چاتاجاق؟ قوشون دا ائله
- بیل کی، بیلیرمیش. او ساعت کسدیلر قاپی‌نین آغزینی. کور‌اوغلو ائله اونو بیلدی کی،
- قاپینی چکدی. تئز ال آتیب میناره‌نین پیللکنلریندن بیر-ایکی بؤيوک سال
- قوپاریب سالدی قاپی‌نین دالینا. اوندان داي اورادا دايانمايیب، بیرباشا
- قالخدی میناره‌نین تپه‌سینه کی، گؤرسون نه وار، نه يوخ؟ خبر چاتدی عرب
- ریحانا کی، بس کور‌اوغلو چێخدی میناره‌يه. عرب ریحان او ساعت امر
- ائيله‌دی. میناره‌نین دؤرد اطرافینی قوشون بۆرودو. کور‌اوغلو میناره‌ده، قوشون
- يئرده باشلادیلار سحری گؤزله‌مه‌يه.
- ایندی بۇنلار گؤزله‌مکده اولسونلار، سنه کیمدن خبر وئریم، بیزیم
- اوغلاندان، یعنی ائوین صاحبیندن. ائله کی، قوشون دولدو هيته، اوغلان
- مسئلای باشا دۆشدو. بیلدی کی، پاشالار خبر تۇتوبلار. اؤزونو ایتیرمه‌يیب
- دۇردو، قارانلیقدا اؤزونو آداملارین آراسینا وۇروب چێخدی کۆچه‌يه. دئ آستا
- قاچان نامرددی. بیرباش اؤزونو سالدی هۆرو خانیمین يانینا. هۆرو خانیم
- دا اوياقدی. هۆرو خانیم اونو گؤرجک سوروشدو:
- – نه وار؟ بۇ نه قوشونکئشلیکدی؟ يوخسا کور‌اوغلودان خبر تۇتوبلار؟
- اوغلان احوالاتی دانیشدی. هۆرو خانیم دئدی:
- – ياخشی ائيله‌يیبسن کی، قاچیبسان. يوخسا سن ده اله کئچردین.
- سونرا اوغلانا دئدی:
- – ياخشی، دۆزونو دئ گؤروم، کور‌اوغلونون بۇرادا اولماغینی بیر آدامازادا
- دئمه‌يیبسن کی؟
- اوغلان بیر گئتدی فیکیره. ایندی باشا دۆشدو کی، بۇ ایشلر هامیسی اونون اؤز
- تاقسیریدی. احوالاتی، نئجه کی، اولموشدو، قسسابا نئجه دئمیشدی، قسساب
- جاماعتا نئجه دئمیشدی، هامیسینی دانیشدی.
- هۆرو خانیم هئچ بیر سؤز دئمه‌دی. دینمز-سؤيله‌مز باشینی سالدی
- آشاغیيا. اوغلان باخدی کی، واللاه، هۆرو خانیم ائله حیرصله‌نیب کی، او نئجه
- دئيرلر، بێچاق وۇرسان قانی چێخماز.
- دۇردو آياغا کی:
- – من ده گئدیرم. قوي منی ده تۇتسونلار، ایکیمیزی ده بیر يئرده
- آسسینلار. من بۇ ناموسسوزلوغو گؤتوره بیلمه‌رم کی، منیم اۇجومدان
- او کیشی تۇتولسون، من ساغ قالام.
- هۆرو خانیم دئدی:
- – ياخشی گئتدین، سنی ده تۇتدولار. بۇندان کور‌اوغلويا نه منفت
- اولاجاق؟
- اوغلان دئدی:
- – بس نه ائله‌يیم؟
- هۆرو خانیم دئدی:
- – گئت، گؤزله. ائله کی، سحر آچیلدی، شهرین کناریندان قوشونو گؤتوردولر،
- بیر دنه يۆيرک آت مینیب، اؤزونو يئتیر چنلیبئله. احوالاتی خبر وئر.
- سؤز اوغلانین بئينینه باتدی. اورادان اؤزونو وئردی شهرین کنارینا.
- بیر يئرده گیزله‌نیب، او قدر گؤزله‌دی کی، شهر داروازالاری آچیلدی. بیر
- دنه آت مینیب اؤزون وۇردو يولا. ایندی اوغلان گئتمه‌يینده اولسون، سنه
- دئيیم کور‌اوغلودان.
- ائله کی، هاوا ياواش-ياواش باشلادی بوزارماغا، کور‌اوغلو گؤردو بیر
- اۇجا میناره‌نین باشیندادی، قوشون دا دؤرد بیر طرفی تۇتوب. قالدی معطل
- کی، نه ائله‌سین. آشاغی دۆشسون؟ نه ياراغی، وار، نه آتی. بۇرادا قالسین، نه
- واختاجان قالسین؟ اۆرگی قۆبار ائله‌دی. دلیلر يادینا دۆشدو. دئدی:
- میسری قێلینج الده تنگ اولانلاریم،
- قوچاق ایگیدلریم يانیمدا گرک!
- کسیله کلله‌لر، بوش قالا لئشلر،
- دال خانچاللار دۆشمان قانیندا گرک!
- آلیب پیياله‌نی ایچن ساغیدان،
- قوخمايین هر يئتن قانلی ياغیدان،
- هوي دئينده آغیر تۆپلر داغیدان
- خان ائيوازیم بۇ گۆن يانیمدا گرک!
- آت سۆزوب اؤزونو منه يئتیرن،
- کور‌اوغلويا يۆز مین قۇللوق بیتیرن،
- سکسک پۇتو بیر الینده گؤتورن
- دمیرچیوغلو بۇ گۆن يانیمدا گرک!
- قوللارینا دمیر پولاد تاخدیران،
- دۆشمانلاری گیروه‌لردن باخدیران،
- سۇ يئرینه قێزیل قانلار آخدیران،
- دلی حسن بۇ گۆن يانیمدا گرک!
- کور‌اوغلو چاغیریر گئنه سفری،
- يوخ ایمیش دۆنيانین سونو، ثمری،
- قێرارام دسته‌نی، وۇررام نفری،
- ارنلرین پیری يانیمدا گرک!
- کور‌اوغلو اوخودوقجا سحر ده ياواش-ياواش آچیلیردی. آخیردا هر طرف
- ایشیقلاندی. سیس، دۇمان چکیلیب گئتدی. کور‌اوغلو میناره‌نین باشیندان چنلیبئله
- طرف باخدی. آمما هرجی ائله‌دی، چنلیبئلی گؤره بیلمه‌دی. داغلار،
- ائله بیل کی، قصداً آرانی کسمیشدی. کور‌اوغلو دئدی:
- گؤيدن بیر جۆت سونا ائندی،
- آيلی داغین آراسینا.
- يار کی ياردان کۆسر اولدو
- آغلار، سێزلار، چاراسی نه؟
- قێزیل آلمانی دیشله‌سین،
- اطرافینی گۆموشله‌سین،
- يول دۆشسون، کاروان ایشله‌سین
- نیگار يارین اوباسینا.
- کور‌اوغلويا اولان اولدو،
- قاينادی پئيمانام دولدو،
- دلیلریم مندن اولدو،
- داغلار دۆشدو آراسینا.
- ائله کی، سحر آچیلدی، گۆن چێخیب داغلارا يايیلدی، اۇزاقدان، داغلارین باشی‌نین
- اۆستوندن چنلیبئل داغلاری‌نین قارلی باشلاری گؤروندو. بۇ، کور‌اوغلونو
- قۇبارلاندیردی:
- اۇزاق-اۇزاق داغ باشیندا
- تالا-تالا قار گؤرونور.
- نه دلیلر، نه چنلیبئل،
- نه آلاگؤز يار گؤرونور.
- اطرافیم تیر، کامان، اوخدو،
- دلیلر يانیمدا يوخدو،
- من يالغیزام، دۆشمان چوخدو،
- قاچماق منه آز گؤرونور.
- دیوانه کؤنلوم شاد اولماز،
- لاچین کؤنلوم اووسون آلماز،
- باخیرام، ائيواز گؤرونمز،
- دۆنيا منه دار گؤرونور.
- بۇ سینم يارالی دۆشدو،
- داغلارین مارالی دۆشدو،
- يار مندن آرالی دۆشدو،
- ترلان اۇچماز، سار گؤرونور.
- کور‌اوغلونون ملول چاغی،
- دۇرولماز کئيفی، داماغی.
- بار گتیریب گۆرجو باغی،
- دال بۇداقدا نار گؤرونور.
- عرب ریحان کور‌اوغلونون بئله دردلی-دردلی اوخوماغینی ائشیدیب چوخ
- شاد اولدو. پاشانی دا گؤتوروب، گلدی میناره‌نین آياغینا. چاغیریب دئدی:
- – کور‌اوغلو، صاباحین خئيیر اولسون! الله هئچ کسین بورجونو هئچ کسده
- قويماز. ياخشی يئرده دۆشوبسن الیمه.
- کور‌اوغلو دئدی:
- – عرب ریحان، سنین منیمله خۆصوصی حاق-حسابین وار. داي بۇ
- قوشونو-زادی نیيه يێغیبسان بۇرا؟ يول وئر دۆشوم، وۇروشاق. يا سنه
- وئرن الله، يا منه.
- عرب ریحان دئدی:
- – يوخ، کور‌اوغلو! بۇ دا اولمادی کئچن سفرکی. من ایندی سنی ساغسالامات
- اورادان دۆشورتسم هامی منه آخماق دئير.
- کور‌اوغلو دئدی:
- – بس فیکرین ندی؟
- عرب ریحان دئدی:
- – فیکریم اودو کی، گرک اؤزون تسلیم اولاسان، چێخیب اورادا قوللارینی
- باغلايالار، سونرا دۆشورده‌لر آشاغیيا.
- کور‌اوغلو دئدی:
- – ياخشی، تسلیمم. چێخ، باغلا قوللاریمی.
- عرب ریحان دئدی:
- – يوخ، من يوخ. من اورايا چێخمارام.
- کور‌اوغلو دئدی:
- – ياخشی، بۇيورسون، کیم چێخیر، چێخسین.
- عرب ریحان باخدی کی، بۆ دوغرودان دا آخماق فیکیردی. هئچ کس
- قورخودان اورايا چێخماز. امر ائله‌دی کاماندارلار گلدیلر. کور‌اوغلو
- باخدی کی، عرب ریحان اونو اوخا باسماق ایسته‌يیر. دئدی:
- – آيه، من سنی بیر عاغیللی آدام بیلیردیم. آمما سن لاپ سارساقسانمیش.
- ياخشی، من میناره‌نین ایچینه گیرندن سونرا اوخ منه نه ائله‌يه‌جک؟
- عرب ریحان گؤردو يوخ، بۇ دا آخماق فیکیردی، کور‌اوغلو دوغرو دئيیر.
- دئدی:
- – ياخشی، عيبی يوخدو. اوخ دا آتماریق. ائله سن اوتور اورادا، بیز ده داياناق
- بۇرادا. آخیردا آجیندان، سۇسوزوندان اؤلرسن، لئشینه صاحب اولاریق.
- کور‌اوغلو باخدی کی، بۇ چوخ پیس تدبیردی. اگر دوغرودان بئله ائلسه‌لر،
- آجیندان، سۇزوندان اؤله‌جک. گئتدی فیکره کی، نه ائله‌سین. چوخ گؤتور-قويدان
- سونرا گؤردو کی، قورخوتماقدان باشقا چاره‌سی يوخدو. دئدی:
- – ياخشی، سن منی او قدر آخماق حساب ائله‌يیرسن کی، من تکتنها
- دۇروب گلم بۇرايا. منیم آدامیم ایندی چنلیبئله چاتیب. چوخ
- چکمز کی، يئددی مین يئددی يۆز يئتمیش يئددی دلی آلار قارسین اۆستونو.
- گؤروم اوندا نه ائله‌يه‌جکسیز.
- بۇ سؤزدن پاشا دا، عرب ریحان دا دۆشدولر قورخويا. پاشا ائله بیل
- ياتمیشدی، آيیلدی. چاغیردی کی:
- – ايه، بیر باخین گؤرون او قاری‌نین اوغلو حرامزادا هارادادی؟ او هئچ
- منیم گؤزومه ديَمه‌دی. بلکه ائله اونو گؤندریب خبره.
- دۆشدولر اورا اوغلان، بۇرا اوغلان، اوغلان هاياندا ایدی؟ تاپا بیلمه‌دیلر
- کی، تاپا بیلمه‌دیلر. مسئله لاپ آيدین اولدو. پاشا تۇتدو عرب ریحانین
- ياخاسیندان کی:
- – تئز اول، نه ائله‌يیرسن، ائله! دلیلر شهره دولسا، داشی داش اۆسته قويمازلار.
- عرب ریحان امر ائله‌دی، کۆلونگچولر، قازماچیلار گلدیلر، حؤکم
- ائله‌دی کی، بۇ ساعت باشلايین میناره‌نین دیبینی قاضیماغا. اوندا يا اؤزو
- قورخودان تسلیم اولار، يا دا کی، میناريله بیر يئرده يێخیلیب اؤلر. او،
- اؤلندن سونرا دلیلرله دانیشماق آساندی.
- کۆلونگچولر باشلادیلار میناره‌نین دیبینی قاضیماغا. کور‌اوغلو گؤردو
- کی، يوخ، ایش شۇلوخلاشدی. فیکیرلشدی کی، عيبی يوخدو. قوي قاضیسینلار. ائله کی،
- گؤردوم میناره دوغرودان دا يێخیلیر، دۆشوب دۇرارام لاپ آشاغیدا، قاپی‌نین
- يانیندا. گؤرک اوندان سونرا کیم پئشیمان اولاجاق. اگر بۇرادان
- سلامات چێخارام، من بیله‌رم نئيليرم.
- بلی، کۆلونگچولر قاضیماقدا اولسونلار، کور‌اوغلو دا گؤزله‌مکده
- ائشیت، ایندی سنه کیمدن دئيیم، اوغلاندان.
- اوغلان آتی ائله سۆرموشدو کی، چنلیبئلین اته‌يینه چاتاندا، آت يێخیلیب
- چاتلادی. دلیلر پۇسقودان چێخیب، اونو تۇتدولار، بیرباش چنلیبئله گتیردیلر.
- دلی حسن سوروشدو:
- – کیمسن؟ هارادان گلیرسن؟
- اوغلان بۆتون احوالاتی باشدان-آياغا دانیشدی. اؤزو ده باشلادی يالوارماغا
- کی:
- – تئز اولون. يوخسا کور‌اوغلونو اؤلدوررلر.
- دلیلر نیگار خانیمدان سوروشدولار:
- – نیگار خانیم، سؤز سنیندی. دئ گؤرک، نئجه ائله‌يک؟
- نیگار خانیم دئدی:
- – بۇ ساعت چنلیبئلی باشسیز قويماق اولماز. من دئيیرم بئله
- ائله‌يک. دلی حسن مین دلی ایله اؤز يئرینده قالسین. دمیرچیوغلو دا مین
- دلی ایله اؤز يئرینده. قالان دلیلری ائيواز گؤتوروب کور‌اوغلونون دالینجا
- گئتسین.
- اوندان اۆزون دلی حسنه تۇتوب سوروشدو:
- – سن نه دئيیرسن؟
- دلی حسن ده، دمیرچیوغلو دا، ائيواز دا هامیسی نیگار خانیمین
- فیکرینی بَيندی. او ساعت دلیلر آتلاندی. بیزیم اوغلانا دا بیر آت وئردیلر،
- میندی، دۆشدو قاباغا. دئ سۆرهاسور، سۆرهاسور، گلیب يئتیشدیلر قارسین
- اطرافینا. ائيواز دئدی:
- – بیز اگر بئله شهره گیرسک، کور‌اوغلويا خطر يئتیررلر.
- حؤکم ائله‌دی، دلیلردن يئددی يۆز نفری آيریلدی. هر يۆزو وئردی بیر
- دستباشیيا. يۆز نفر ده اؤزو گؤتوردو. قالان دلیلره تاپشیردی کی، شهری
- مۆحاصیره‌‌يه آلیب گؤزله‌سینلر. داوا قێزیشاندا هر طرفدن دولسونلار.
- يئددی يۆز دلی، آلتی دستباشی، بیر ده اوغلان دؤرده‌مه، سیگیرمقیلینج
- آتلاری سۆردولر شهره. کئشیکچیلری قويمادیلار کی، نفس آلسینلار. کئچیب
- گیردیلر شهرین ایچینه. هر دسته باشلادی بیر کۆچه ایله گئتمه‌يه. ائيواز
- اؤزو ده اوغلانی گؤتوروب، يۆز نفر دلی ایله دۆشدو کۆچه‌لرین بیرینه. بۇ
- کۆچه هانسی کۆچه اولا، هانسی کۆچه اولا، هامان او کۆچه اولا کی، کور‌اوغلو گئدیب
- هۆرو خانیما راست گلمیشدی. ائله بیر آز آت سۆرموشدولر کی، هۆرو خانیمین
- ایمارتی گؤروندو. اوغلان باخدی کی، هۆرو خانیم دۇروب پنجره‌ده يولا
- باخیر. تئز آتا بیر تازیيانه چکیب اؤزونو يئتیردی اونون برابرینه کی:
- – هۆرو خانیم، مۇشتولوغومو وئر! خان ائيوازین اؤزونو دلیلرله
- گتیرمیشم. بۇ ساعت عرب ریحانا بیر توي تۇتسونلار کی...
- هۆرو خانیم بئله باخاندا گؤردو بۇدو، سیگیرمقیلینج بیر دسته آتلی
- گلیر کی، هره‌سی مین جانا ديَر. آمما قاباقلاریندا بیر اوغلان گلیر، بیر
- اوغلان گلیر کی، ائله بیل اون دؤرد گئجه‌لیک آيدی. بیلدی کی، بۇ خان ائيوازدی،
- هۆرو خانیم ائيوازین تعریفینی چوخ ائشیتمیشدی. آمما اؤزونو هئچ
- گؤرمه‌میشدی. باخدی کی، واللاه، بۇ بیر اوغلاندی، بیر اوغلاندی يۇسیف-زاد
- ندی بۇنون يانیندا. بیر اۆرکدن مین اۆره يه وۇرولدو ائيوازا. قارا
- ساچلاردان اۆچ تئل آيیریب، باسدی تۇرونج ممه‌لرین اۆستونه. دئدی:
- دئ، سن هاندا، بۇرا هاندا،
- آدی بللی خان ائيوازیم؟!
- میسری قێلینج دۇرماز قێندا،
- آدی بللی خان ائيوازیم!
- جوشار دلی کؤنول، جوشار،
- جوشوبان هددیندن آشار،
- خان ترپنر، قوشون قاچار،
- آدی بللی خان ائيوازیم!
- بلکه گلمیسن سوراغا،
- داشین آتیلار ایراغا،
- هۆرو آپارسین اوتاغا،
- آدی بللی خان ائيوازیم!
- سؤز تاماما يئتیشدی. آلدی ائيواز اونون جاوابیندا دئدی:
- اۇزاق ائللردن گلمیشم،
- دیندیرمه، منی دیندیرمه!
- ياری منزیلده قالمیشام،
- دیندیرمه، منی دیندیرمه!
- من بۆلبولم، گۆلوم آلام،
- او درددن سارالیب، سولام،
- بیر آغاسی ایتمیش قۇلام،
- دیندیرمه، منی دیندیرمه!
- سئچه‌رم سۇلطانی، خانی،
- آخیدارام قێزیل قانی،
- ائيواز، قوچ کور‌اوغلو هانی؟
- دیندیرمه، منی دیندیرمه!
- ایندی ائشیت کور‌اوغلودان. کۆلونگچولر میناره‌نین دیبینی او قدر قازمیشدیرلار
- کی، میناره آز قالیردی يێخیلسین. کور‌اوغلو ایشی بئله گؤروب، دۆشوب
- لاپ آشاغیدا کسمیشدی میناره‌نین قاپیسینی. ائله بۇ دمده بیر ده قۇلاغینا
- بیر سس گلدی. دقتله قۇلاق وئریب گؤردو اوخويان ائيوازدی. هر شئي
- ياددان چێخدی. نه قورخو قالدی، نه هۆرکو. دیک چێخدی میناره‌نین باشینا.
- سئویندیگیندن بیر دلی نره چکیب دئدی:
- شۆکور اولسون بیر اللها،
- بۇ گلن ائيواز سسیدی.
- منی يادینا سالیبدی،
- بۇ گلن ائيواز سسیدی.
- گیرر مئيدانا خان کیمی،
- دولار گؤزلری قان کیمی،
- بیر آلیجی ترلان کیمی،
- بۇ گلن ائيواز سسیدی.
- ایندی باغلادار قولونو،
- قێرار ساغینی، سولونو،
- يادا سالیب کور‌اوغلونو،
- بۇ گلن ائيواز سسیدی.
- کور‌اوغلو هله سؤزونو تامام ائله‌مه‌میشدی کی، شهرده وۇرهاوور
- قوپدو. عرب ریحان بئله باخاندا گؤردو واللاه، بۇدو، بیر دسته سیگیرمقیلینج
- آتلی ائله گلیر، ائله گلیر کی، ائله بیل بیر دسته ترلاندی اؤرده‌يه،
- قازا گلیر. تئز کئچدی مئيدانین بۇ بیری طرفینه کی، قوشون بؤيوکلرینی
- چاغیرسین. باخدی کی، بیر بئله دسته ده بۇ طرفدن گلیر. بئله دؤننده
- گؤردو بۇدو، بیر دسته آتلی دا بۇ بیری کۆچه‌ده، اولار بیر اۆچ يۆز-دؤرد يۆز
- عسکری قاتیب قاباغینا قارقا-قۇزغون کیمی قووا-قووا گتیریر. عرب
- ریحان اؤزونو ایتیردی. بیلمه‌دی نه ائله‌سین. ائله بۇ دمده قارس پاشاسی‌نین
- قوشون بؤيويو اؤزونو يئتیردی کی:
- – نه دۇروبسونوز؟ دلیلر شهره اتدن دیوار چکیبلر. باشینیزین
- چاره‌سینی ائله‌يین.
- عرب ریحان دئدی:
- – گؤرورم. قوي گلسینلر. سن قوشونو حاضیر ساخلا! ائله کی، اونلار
- گلیب بۇرايا دولدولار، سن داللارینی کس!
- قوشون بؤيويو دئدی:
- – نه داللارینی کس؟ بۇنلار ندی کی؟ بئش-آلتی مین دلی شهرین
- اطرافینی تۇتوب. بۇنلار ائلچیلردی بئله گلیرلر.
- عرب ریحان باخدی کی، بیر سۇ ایچیم ساعتدا دلیلر مئيدانین اطرافینی
- آلدیلار.
- بۇ دمده بیر دلی نره سسی گلدی. عرب ریحان دؤندو کی، بۇدو بیر
- دسته گلیر، قاباقلاریندا دا ائيواز.
- ائيواز عرب ریحانی گؤرجک تانیدی. دئدی:
- – يا بۇدو کی، بۇ ساعت کور‌اوغلونو وئر، يا بۇدو کی، بیر هاي وۇروب
- شهرین تورپاغینی توربا ایله داشیتدیراجاغام.
- عرب ریحان دا ایگید آدام ایدی. يئریدی قاباغا دئدی:
- – ائيواز، کور‌اوغلو باخ، اودو میناره‌ده.
- ائيواز بئله باخاندا کور‌اوغلونو گؤردو. عرب ریحان دئدی:
- – ایندی بۇرا باخ!
- بۇنو دئيیب عرب ریحان میناره‌نین دیبینه ایشاره ائله‌دی. ائيواز باخدی
- کی، میناره ائله هاندا-هاندادی يێخیلسین. ایکی يۆزه‌جن کۆلونگلو آدام دا
- حاضیر دايانیب امر گؤزله‌يیر. عرب ریحان دئدی:
- – کور‌اوغلو منیم الیمده‌دی. بیرجه دفعه ایشاره ائله‌سم میناره
- گئده‌جک. ایندی سن گلمیسن اونو قۇرتارماغا. ياخشیسی، بۇدو کی، نه سنین
- قوشونون قێریلسین، نه ده منیم. گل بۇ مئيداندا ایکیمیز وۇروشاق، سن
- منی اؤلدوردون، کور‌اوغلو دا سنین، هر شئي ده سنین. نه ائله‌يرسن
- اؤزون بیلرسن، يوخ، من سنی اؤلدوردوم، گئنه ده نه ائله‌يه‌رم اؤزوم
- بیله‌رم.
- ائيواز بیر عرب ریحانا باخدی، بیر دؤنوب کور‌اوغلويا باخدی، بیر ده
- بئله دؤننده باخدی کی، هۆرو خانیم گلیب مئيدانین بیر طرفینده
- دايانیب بۇنلارا باخیر. ائله بیل دۆنيا-عالم ائيوازین باشینا فێرلاندی. بیر
- دلی نره چکیب مئيدانی دولانماغا باشلادی. کور‌اوغلو دا میناره‌دن
- باخیردی. گؤردو يوخ، دئيه‌سن ائيواز وۇروشماق ایسته‌يیر. کور‌اوغلو عرب
- ریحانین گۆجونه بلد ایدی. بیلیدی کی، ائيواز اونون اؤهده‌سیندن گله
- بیلمه‌يه‌جک. اودو کی، قێشقیریب دئدی:
- – ائيواز، مبادا مئيدانا گیره‌سن. اگر ایگیددی، قوي مننن
- وۇروشسون.
- گؤردو يوخ، ائيواز هئچ ائشیتمیر. دئدی:
- – آيه، میناره‌نین يێخیلاجاغیندان منه زیان يوخدو. قورخما، قوي
- اۇچورسونلار.
- ائيواز هارا، سؤز ائشیتمک هارا؟ ائله ایدی، ائله ایدی کی، دؤنموشدو بیر
- آسلان بالاسینا، زنجیر گمیریردی. بیر دفعه مئيدانی گردیش ائله‌يیب اۆزونو
- تۇتدو عرب ریحانا. دئدی:
- مردسن، گل مئيدانا، پاشا!
- ساواشاق ایندی سننن من.
- گؤر گۆجومو، ائيله هاشا،
- ساواشاق ایندی سننن من.
- گؤتوررم الیمه نیزه،
- مردلر احسن دئسین بیزه،
- دۇراق مئيداندا اۆز-اۆزه،
- ساواشاق ایندی سننن من.
- دئمه منه بۇ هديانین،
- يقین بیل کی، آللام جانین،
- قێلینجلا تؤکرم قانین،
- ساواشاق ایندی سننن من.
- گرک دوست، دۆشمانین سئچم،
- چتین اولار قورخام قاچام،
- ایسته‌رم کی، مئيدان آچام،
- ساواشاق ایندی سننن من.
- من ائيوازام، دۇرموشام مرد،
- يامان اۆره يه اوللام درد،
- ایگیدسنسه اول مئيدانگرد،
- ساواشاق ایندی سننن من.
- ائيواز سؤزونو تامام ائله‌يیب آتی وۇردو، عرب ریحان دا اؤز آتینی
- جؤولانا گتیردی. کور‌اوغلو گؤردو داي آيری علاج يوخدو، بیر دلی نره چکیب
- دئدی:
- ائيوازیم میننده دۆرات بئلینه،
- گرک گؤيده قۇشلار قاناد ساخلاسین،
- داوا گۆنو هر کیم دۆشسه الینه،
- قاباغیندا دیز چؤکوبن آغلاسین.
- شێغیيیب دۆشمانا قددینی بۆکر،
- گیرنده شهره بۆرج-باری سؤکر،
- پاشالار باشیندا آجی تۇرپ اکر،
- ایگید گرک ضربه‌‌سینی هاخلاسین.
- مرد بؤيويوب مرد آغاسی، مرد خانی،
- تۇتاجاق شؤهرتی جۆمله-جاهانی،
- گزه‌جک مصری، شامی، اوسمانی،
- ایگید گرک قاباغیندا تابلاسین.
- غرض، عرب ریحانلا ائيواز باشلادیلار داوايا. شئشپردن، گۆرزدن
- مۇراد حاصیل اولمادی، ال ائله‌دیلر قێلینجا. قێلینجلار سێندی، تؤکولدو، ال
- ائله‌دیلر نیزه‌يه، نیزه‌دن ده کار چێخماياندا آتدان دۆشوب باشلادیلار
- کۆشتويه. ایلان کیمی سارماشدیلار بیر-بیرینه. کوتان کیمی باشلادیلار مئيدانین
- تورپاغینی سؤکمه‌يه. ائيواز جاوان، برکه-بوشا دۆشمه‌میش آدام،
- عرب ریحان مین ایلین پهلوانی. داي، او نئجه دئيرلر، پهلیوانلیق
- علمی‌نین بیر دلمه-دئشیگی يوخ ایدی کی، عرب ریحان اورايا باش وۇرمامیش
- اولا. نئچه-نئچه آدلی پهلیوانلار باسمیشدی. او نئجه دئيرلر، آد چێخارتمیشدی.
- گیرله‌يیب ائيوازین چیگین دامارلارینی سالدی جنگینه. ائيوازین
- گؤزلری باشلادی قارالماغا. ائله بیل کی، دۆنيا، عالم دۇردو باشینا هرلنمه‌يه.
- کور‌اوغلو باخدی کی، ائيواز گئدیر. اۆرگی تابلامادی. ائله بیر نره
- چکدی کی، داغ-داش تیتره‌دی، دئدی:
- جانیم ائيواز، گؤزوم ائيواز،
- بیر بری دؤن، باخ بۇ يانا!
- آماندی قوچ دلیلریم
- قويما دؤنسون قلبی قانا!
- اوندان اۆزونو مئيداندا دۇران هۆرو خانیما طرف تۇتوب دئدی:
- دايانیبدی او، خان کیمی،
- باخیر سنه سۇلطان کیمی،
- قالخ، آلیجی ترلان کیمی
- تزه‌دن گیر بۇ مئيدانا!
- قێلینجین آغزی زاغلیدی،
- دوستونون يولو باغلیدی،
- کور‌اوغلو قلبی داغلیدی،
- قويما باتسین چن-دۇمانا!
- ائله بیل کی، کور‌اوغلونون سؤزلریندن ائيوازا قۆووت گلدی. بیر گۆج
- وئریب عرب ریحانین الیندن قۇرتاردی. دلیلرین احسن سسی گؤيه اۇجالدی.
- ائيواز بیر دفعه مئيدانی هرله‌نیب دئدی:
- کور‌اوغلو بۇيوروب بۇيروغو،
- گرک من سنین، من سنین.
- چکیب قوپاردام بوينونو
- گرک من سنین، من سنین.
- بیر آج قۇردام، گلدیم بۇرا،
- ايری قێلینج بوينون وۇرا،
- گؤز‌آلتینی آلام سورا
- گرک من سنین، من سنین.
- ائيوازام، گرک يئتیرم،
- هۆرويه قۇللوق بیتیرم،
- آدین دۆنيادان ایتیرم
- گرک من سنین، من سنین.
- سؤزونو قۇرتاریب قێزمیش نر کیمی اؤزونو آتدی عرب ریحانین اۆستونه.
- ائله بیرینجی همله‌ده عرب ریحانی وۇروب سردی يئره. داي آمان وئرمه‌يیب
- دۆشدو اۆستونه. بۇ دفعه ده ائيواز عرب ریحانین چیگین دامارلارینی
- کئچیرتدی بارماقلارینا. عرب ریحانین آغزی باشلادی کؤپوکلنمه‌يه،
- کور‌اوغلو ایشی بئله گؤرنده دئدی:
- ياخشی يئرده آخشاملادین،
- عرب اوغلو، عرب اوغلو.
- بوينونا کفن دولادین،
- عرب اوغلو، عرب اوغلو.
- دؤيول بیر ده باج وئره‌سی،
- ایندی آلار جان کیره‌سی،
- سنسن يئر-يۇردون بیره‌سی،
- عرب اوغلو، عرب اوغلو.
- تانی کور‌اوغلو سويونو،
- گؤر جیدا تکی بويونو،
- آچدی باشینا اويونو،
- عرب اوغلو، عرب اوغلو!
- ائيواز بیردن عرب ریحانین چیگینلرینی بۇراخیب ياپیشدی بئل کمریندن.
- بیر “يا مدد!” – دئيیب دیک قالدیردی گؤيه، وۇروب يئره، چؤکدو
- سینه‌سینه.
- مئيدان قاریشدی بیر-بیرینه. “احسن، احسن!” سسیندن قۇلاق تۇتولدو.
- کور‌اوغلو میناره‌دن اۆزون عرب ریحانا تۇتوب دئدی:
- اۇجا داغلارین باشیندا
- دۇمان اولو، چیسکین اولو.
- قار ياغیبان گیرده باغلار
- آجی يئللر اسکین اولو.
- بیر ایگیدین ذاتی اولسا،
- قولونون قۆووتی اولسا،
- مئيدان گؤرموش آتی اولسا،
- زۆلفوقاری کسکین اولو.
- ایگیده يولداش اولماسا،
- بیر قوشونا باش اولماسا،
- هۇ دئيیب ساواش اولماسا،
- آغیر لئشکر باسقین اولو.
- آلیجی قۇشلار اللرده
- اوولاغی اولار گؤللرده،
- قریب ایگید، ياد ائللرده
- دینه بیلمز، میسکین اولو.
- اؤگونمه قۇزوم، اؤگونمه،
- داشلار آلیبان دؤکونمه،
- هۇ دئيیب مئيدانا گیرمه،
- ال وار الدن اۆستون اولو.
- بۇنو دئيیب، کور‌اوغلو ایشاره ائله‌دی. ائيواز خنجری چکیب دايادی عرب
- ریحانین بوغازینا. اوندا دؤندو کور‌اوغلويا طرف کی، گؤرسون اونون فیکری
- ندی. کور‌اوغلو دئدی:
- – ائيواز، من بیر دفعه اونو مردلیکله باسیب، مردلیکله ده بۇراخمیشدیم.
- آمما او بۇنون عوضینده منه نامردلیک ائله‌دی. نامردی ده
- گرک بۇ دۆنيادا ياشاماسین.
- ائيوازا ائله بۇ سؤز بس ایدی. باياق ها خنجری چکیب، باشی لئشدن ائله‌دی،
- لئشی باشدان.
- او ساعت دلیلر میناره‌نین قاپیسینی آچدیلار. کور‌اوغلو چێخدی بايیرا.
- عرب ریحانین قوشونو سرکرده‌لرینی اؤلموش گؤروب تسلیم اولدولار.
- دلیلر هامیسی دولدولار شهره.
- پاشانی نه قدر آختاردیلار، تاپا بیلمه‌دیلر. او نئجه دئيرلر، اولدو
- بیر پارچا ياغلی اپپک، چکیلدی گؤيه. کور‌اوغلو دئدی:
- – عيبی يوخدو. بۇ دا بیر جۆر ایگیدلیکدی. بۇ جۆر آداملارین ایگیدلیگی
- اوندو. دوققوزو قاچماقدی، بیری هئچ گؤزه گؤرونمه‌مک. داي آختارمايین!
- غرض، دلیلر آتلاری میندیلر. هامی حاضیرلاندی. کور‌اوغلو هاي وۇردو
- کی، يولا دۆشسونلر. دسته حرکته گلدی. کور‌اوغلو باخدی کی، ائيواز هله
- هئچ آتا مینمه‌يیب، هئچ دئيه‌سن مینمک فیکرینده ده دئيیل. سوروشدو کی:
- – ائيواز، نه گؤزله‌يیرسن؟ نیيه مینمیرسن؟
- ائيواز جاواب وئرمه‌دی. کور‌اوغلو بیر ده سوروشدو. ائيواز يئنه ده
- جاواب وئرمه‌دی. کور‌اوغلو اۆچونجو دفعه سوروشاندا ائيواز سازی گؤتوردو.
- گؤزلرینی دولاندیریب بیر دفعه اطرافا باخدی، دئدی:
- اۇجا داغلارین باشیندا،
- آلا-دمگیل قار گؤرونور.
- منیم بۇ دلی کؤنلومه
- بیر آلاگؤز يار گؤرونور.
- گؤروندو دوستومون کندی،
- اميدیم لبیندن قندی،
- آچیلدی کؤکسونون بندی،
- قوينوندا جۆت نار گؤرونور.
- کور‌اوغلو دؤنوب ائيوازین باخدیغی طرفه باخاندا نه گؤردو؟ گؤردو
- هۆرو خانیم قۇلاش ساچلاری تؤکوب گرده‌نینه، بوينونو قويوب چیينینه، ائله
- باخیر، ائله باخیر کی، ائله بیل بیر دنه يارالی جئيراندی. کور‌اوغلو مسئلیی
- باشا دۆشدو. ائله بۇ فیکیرده ایدی کی، نه ائله‌سین.
- ائيواز آلدی سؤزون او بیری خانه‌سینی، دئدی:
- من ائيوازام، دؤزممه‌رم،
- آل گئيینیب بضامه‌رم،
- چنلیبئلده گزنمه‌رم،
- دۆنيا منه دار گؤرونور.
- مسئله کور‌اوغلو اۆچون آيدین اولدو. داي فیکیرلشمه‌يه يئر قالمادی.
- آتا بیر قێرمانج وۇردو، هۆرونون يانینا چاتاندا الینی اۇزادیب دیک گؤتوردو،
- قويدو ترکینه، دۆزلدی يولا. ائيواز دا قالخیب آتی میندی، دۆشدو کور‌اوغلونون
- دالینا.
- غرض، دسته شهردن چێخیب چنلیبئله طرف يولا دۆزلدی. بیر آز گئتمیشدیلر،
- بیر ده باخدیلار کی، اوغلان، ترکینده ده بیر نفر گئدیر. کور‌اوغلو
- چاتیب سوروشدو:
- – دوستوم، سن هارا؟
- اوغلان دئدی:
- – چنلیبئله. داي بۇندان سونرا من قارسدا دۇروش گتیره بیلمه‌رم.
- کور‌اوغلو دئدی:
- – بس او ترکینده‌کی کیمدی؟
- اوغلان دئدی:
- – آنامدی. ائله يئرلی-دیبلی بیردفه‌لیک کؤچورم.
- بلی، اوردا اۇزون-اۇزون يول ایله، بۇردا مۆختسر دیل ایله، دسته گلیب
- چنلیبئله چاتدی.
- داي پیشواز، نه پیشواز. گؤروش، نه گؤروش... کور‌اوغلو حؤکم ائله‌دی هۆرو
- خانیمین آياغی‌نین آلتیندا يئددی يۆز يئتمیش يئددی قۇربان کسدیلر.
- کور‌اوغلو دئدی:
- – گرک ائيوازا ائله بیر توي ائله‌يم کی، رۇزیگارین کؤزو بئله توي گؤرمه‌میش
- اولا.
- دلیلر دئدی:
- – کور‌اوغلو، ایندی توي واختی دئيیل.
- کور‌اوغلو دئدی:
- – ائله اصل توي واختی ایندیدی. هاسان پاشا ایسته‌يیردی کی، بولو بَيین، بیر
- ده عرب ریحانین الی ایله ایش دۆزلتسین. بولو بَيی دارماداغین ائله‌يیب،
- نیشانلیسی دۆنيا خانیمی گتیرمیشم. عرب ریحانی دا جهنمه واصیل
- ائله‌يیب، هۆرو خانیمی گتیرمیشم. اینشاللاه توقاتی دا داغیدیب هاسان
- پاشانین اؤزونو چنلیبئله گتیره‌جه‌يم.
- مجلیس قۇرولدو، توي باشلاندی. کور‌اوغلو باخدی کی، ائيواز مجلیسده
- يوخدو. سوروشدو:
- – هانی ائيواز؟
- دلی حسن دئدی:
- – آخیر عادت وار. سن اونون آتاسیسان. سن رۆسخت وئرمه‌سن، او گلمز.
- کور‌اوغلو سازی باسدی دؤشونه، دئدی:
- چاغیرین ائيوازی، گلسین مجلیسه،
- وئرین شیرین باده، جانا نۇش اولسون!
- قۇرون نرتاختانی، گلین اويناياق،
- آتین آغ زرلری شئشی بئش اولسون!
- بیر خلت بیچه‌رم ائيواز بويوندان،
- اینجیمه‌رم خاصيتی-خويوندان،
- کسین تۇنجولاردان، قێرین قويوندان،
- يئيین دلیلریم، کئيفلر خوش اولسون!
- اۇجا داغلار باشین آلماسین دۇمان،
- کور‌اوغلو کؤنلونه گلمه‌سین گۆمان،
- وئررم او ایگیده بئش يۆز مین تۆمن،
- قانچیرقادا گلن قانلی باش اولسون!
- دلی حسن ایله دمیرچیوغلو ائيوازی گتیردیلر مجلیسه، کور‌اوغلو بیر
- ائيوازا باخدی، بوي-بۇخونونا، شستی-بستینه نظر سالدی. پالتار، گئيیم،
- ياراق-ياساق، دۇرنا تئلی ده باشیندا.
- کور‌اوغلونون اۆرگی آتلاندی. سازی باسدی دؤشونه، دئدی:
- گئيینیب الوان سراسر،
- ياشیل اۆستدن آللار ائيواز.
- قانلی قمزن گۆنده ائيلر
- هاي دئمه‌دن قانلار، ائيواز!
- حۆسنون آيدان آلدی باجی،
- گۆن اۆسته قويدو خراجی،
- شکر تلخدی، نابات آجی،
- لبلریندی باللار، ائيواز!
- کور‌اوغلويام، من ده وارام،
- اولماز قنیمه يالوارام،
- جاهارگوشه جۆمله آلام،
- سنه قۇربان ماللار، ائيواز!
- سؤز تاماما يئتدی. کور‌اوغلو ائيوازا يئر گؤستردی. ائله بۇ دمده خبر
- گلدی کی، نیگار خانیم ایزن ایسته‌يیر، هۆرو خانیمی مجلیسه گتیرسین.
- کور‌اوغلو ایزن وئردی. خانیملار هۆرو خانیمی گتیردیلر مجلیسه، کور‌اوغلو
- باخدی کی، هۆرو خانیم هئچ ائيوازدان گئری قالان دئيیل. نیگار خانیم هۆرونو
- بیر گئيیندیریب، کئجیندیرمیشدی، بیر زیينت وئرمیشدی کی، گل گؤره‌سن.
- هۆرو خانیم کور‌اوغلونو گؤرنده اۇتاندی، گلینلیک تئللرینی يێغیشدیردی.
- کور‌اوغلو آياغا دۇروب، سازی گؤتوردو، اؤزو دؤوران آچیب مجلیسه گیردی، دئدی:
- هۆرو، اللهی سئویرسن،
- قوي تؤکولسون شۇخ تئللرین!
- گل ساخلاما دال گردنده،
- قوي تؤکولسون شۇخ تئللرین!
- سن بیر ياشیلباش سوناسان،
- باعیثسن مین بیر قانا سن.
- نه اولا سؤزوم آناسان،
- قوي تؤکولسون شۇخ تئللرین!
- کور‌اوغلونون دیرلیگیله،
- دلیلرین بیرلیگیله،
- خان ائيوازین ارلیگیله،
- قوي تؤکولسون شۇخ تئللرین!
- دئيیرلر کی، ائيوازین تويو دۆز قێرخ گۆن، قێرخ گئجه چکدی. حسن پاشا
- عرب ریحانین قێرخینی وئرن گۆن، ائيواز دا هۆرو خانیملا مۇراد وئریب،
- مۇراد آلدی.
قایناق‌لار
- Azadliq . org