Wt/azb/کوراوغلوینان بولو بی

< Wt‎ | azb
Wt > azb > کوراوغلوینان بولو بی
Koroglu by A. Hajiyev Stamp of USSR, Epic poems of USSR nations. Azerbaijan epic poem "Koroglu", 1989

کوراوغلوینان بولو بی

edit

  آنا آنلاتیم

  • کوراوغلوینان بولو بی

خوتکار بۆتون پاشالارا حؤکم ائله‌میشدی کی، کور‌اوغلونو يا اؤلدورسونلر، يا دیری تۇتوب اونون يانینا گؤندرسینلر. پاشالار بۇ ایشدن يامان ال-آياغا دۆشموشدولر. جامال پاشانین دا جانینی قورخو آلمیشدی. بیر گۆن، بئش گۆن فیکیر، خيال، آخیردا بۇ گۆن قوشون سرکرده‌لرینی باشینا يێغیب مسئله‌‌دن اونلاری حالی ائله‌دی. کور‌اوغلونو تۇتماق آدی گلنده بۆتون سرکرده‌لر باشلارینی آشاغیيا سالدیلار. جامال پاشا گؤردو يوخ، بئله اولماياجاق. آخیردا علاجسیز قالیب دئدی: – کیم گئدیب دلی کور‌اوغلونون باشینی، يا دا اؤزونو گتیرسه قێزیم دۆنيا خانیمی اونا وئره‌جم. سرکرده‌لرین ایچینده بولو بَي آدلی بیریسی وار ایدی. بولو بَي چوخدان ایدی کی، جامال پاشانین قێزی دۆنيا خانیمی آلماق فیکرینده ایدی. آنجاق نه قدر خرج قويموشدو، پۇل تؤکموشدوسه ده، قێزین اۆرگینی اله گتیره بیلمه‌میشدی. ایندی ایشیق يئری گؤروب فۆرصتی فوتا وئرمه‌يیب يئریندن قالخیب دئدی: – من گئدیب کور‌اوغلونو تۇتوب گتیره‌رم. آنجاق بۇ شرطله کی، ازل عهدینیزه عمل ائله‌يه‌سینیز. سونرا دا قجرالینی منه يولداش وئره‌سینیز. قجرالی عرضینجاندا مشهور پهلوانلاردان ایدی. پاشا راضیلاشدی.

  • – قجرالی!
  • قجرالی آياغا قالخیب دئدی:
  • – من گئده‌رم، آمما گرک مئهتر مۇرتوزو دا بیزه قوشاسینیز.
  • مئهتر مۇرتوز يئددی ایل کور‌اوغلويا مئهترلیک ائله‌میشدی. اونا گؤره
  • ده کور‌اوغلونو ياخشی تانیيیردی.
  • بلی، جامال پاشا بۆتون شرطلره راضی اولدو. بولو بَي قجرالی ایله
  • مئهتر مۇرتوزو گؤتوروب، باشیندا دا چوخلو قوشون، چنلیبئله يولا دۆشدو.
  • بۇنلار گئتمکده اولسونلار، سیزه کیمدن خبر وئریم، کور‌اوغلونون دوستو
  • عرضینجانلی بیر تاجیردن. تاجیر بۇ احوالاتی ائشیدن کیمی بیر آت میندی، کسه بیر
  • يول ایله بولو بَيدن قاباق اؤزونو چنلیبئله يئتیردی. ائله کی، تاجیر کور‌اوغلونو
  • احوالاتدان خبردار ائله‌يیب گئری دؤندو، کور‌اوغلو دلیلری يێغیب دئدی:
  • – پاشالار، بَيلر، خانلار منیم الیمدن زارا گلیب، منیم قورخومدان
  • گئجه‌لر ائولرینده ياتا بیلمیرلر. هئچ اینانمیرام کی، بولو بَي
  • منیم اۆستومه گلسین.
  • دلیلرین ایچیندن عیسیبالی يئریندن قالخیب دئدی:
  • – کور‌اوغلو، نه قدر ایگید اولسان احتیاطی الدن قويما، احتیاط کی وار
  • ایگیدین بزيیدی. ایزن وئر ياراقلاناق، ياساقلاناق، دۆشمنین قاباغینا
  • چێخاق.
  • کور‌اوغلو راضی اولمادی. مجلیس قۇردوردو، دلیلر ایله يئيیب-ایچیب کئفه
  • باشلادی. او طرفدن بولو بَي باشیندا قوشون گئجه-گۆندوز آت سۆروب
  • گلیب چنلیبئله يئتیشدی.
  • مئهتر مۇرتوز کور‌اوغلونون ياغی قوروغونو گؤرن کیمی تانیدی. دئدی:
  • – بولو بَي، بۇ قوروق کور‌اوغلونون ياغی قوروغودو. بۇرا کور‌اوغلونون
  • اويلاغیدی. بۇرا چنلیبئلین اتيیدی. منی اؤلدورسن ده بۇرادان او
  • يانا گئده‌سی دئيیلم. قورخورام، کور‌اوغلو دده‌‌مه اود وۇرار.
  • بولو بَي بیر آز فیکیرلشیب امر ائله‌دی کی، آتدان دۆشسونلر. بولو بَي،
  • قجرالی، مئهتر مۇرتوز، قوشون اهلی هامیسی دۆشوب، آتلاری کور‌اوغلونون
  • ياغی قوروغونا بۇراخدیلار، اؤزلری ده بیر طرفده اوتوروب دینجلمه‌يه
  • باشلادیلار.
  • سحر تئزدن ایدی. کور‌اوغلو ياساقسیز-ياراقسیز قوشابولاغین آلتینداکی
  • قايانین يانینا چێخمیشدی. بیر ده باخدی کی، بیر بؤلوک يهرلی-يۆينلی آت
  • ياغی قوروغونو باشینا گؤتوروب. کور‌اوغلو ائله اورادان تاي هئچ کسه خبرزاد
  • وئرمه‌میش ياغی قوروغونا يۆيوردو. قوروغا ائننده بیردن-بیره
  • بولو بَيله اۆز-اۆزه چێخدی. بولو بَي کور‌اوغلونون تهر-تؤهورونه باخیب
  • دئدی:
  • – کیمسن، بۇرادا نه گزیرسن؟
  • کور‌اوغلو دئدی:
  • – من قوروقچويام.
  • بولو بَي دئدی:
  • – کیمین قوروقچوسوسان؟
  • دئدی:
  • – کور‌اوغلونون قوروقچوسويام. قوروقدا آت گؤردوم، گلدیم کی، چێخاردیم
  • سیزه راست اولدوم.
  • بۇ سؤزده مئهتر مۇرتوز گلیب چاتدی. مئهتر مۇرتوز کور‌اوغلونو
  • گؤرن کیمی تانیدی. دالی-دالی چکیلیب کور‌اوغلونون گئری يانینا کئچدی.
  • اورادان بولو بَيه گؤز وۇردو کی، ائوین يێخیلسین. يالان دئيیر، قوروقچو،
  • زاد ندی، کور‌اوغلونون اؤزودو.
  • بولو بَي حؤکم ائله‌دی، قوشون بیردن تؤکولوب کور‌اوغلونو تۇتدولار.
  • کور‌اوغلونون نه آتی، نه يانیندا بیر ياراغی-ياساغی يوخدو. باخدی کی، يوخ
  • ایشلر شۇلوقدو. او، بۇرادا کور‌اوغلو اولدوغونو بوينونا آلسا، سسسیز-صداسیز
  • باشینی کسه‌جکلر. دئيیرلر کی، کور‌اوغلو نه قدر ایگید، مرد ایدیسه، بیر
  • او قدر ده عیار ایدی. يئری گلنده اؤزونو باشقا قێلیغا سالیب دۆشمنی
  • آلدادیردی. بیر ده بئله بیر خاصيتی وار ایدی کی، دۆشمن الینه دۆشنده
  • اؤلسه ده، کور‌اوغلو اولدوغونو بوينونا آلمازدی کی، اؤزونون، دلیلرین، چنلیبئلین
  • آدی باتماسین. اودو کی، ایندی ده بولو بَي اونو نه قدر دؤيدوسه
  • کور‌اوغلو اولدوغونو بوينونا آلمادی کی، آلمادی. ياخیندا بیر گؤل وار ایدی،
  • آخیردا بولو بَي کور‌اوغلونو او گؤله سالدیردی کی، بلکه کور‌اوغلو اولدوغونو
  • بوينونا آلا. او يئنه ده کور‌اوغلو اولدوغونو بوينونا آلمادی. آخیردا
  • بولو بَي شۆبهه‌يه دۆشدو کی، بلکه ائله دوغرودان دا بۇ، کور‌اوغلو دئيیل.
  • بولو بَي دۆشدو فیکره کی، اۇزاق يئردن گلمیشیک. بۇنو آپارریق
  • کور‌اوغلو اولماز، پاشانین يانیندا يالانچی چێخیب بیابیر اولاریق. آخیردا
  • اۆزونو اونا تۇتوب دئدی:
  • – گل سن خوشلوقلا بوينونا آل کی، کور‌اوغلوسان. يوخسا بۇ ساعت سنی
  • اؤلدوررم.
  • بئله دئينده آلدی کور‌اوغلو گؤرک نه دئدی:
  • بولو، ناحاق گل، ائيله‌مه يامانلیق،
  • اینان بولو، من کور‌اوغلو دئيیلم.
  • ایننن بئله ياخشیلیغین گۆنودو،
  • اینان بولو، من کور‌اوغلو دئيیلم.
  • کور‌اوغلو بیر ایگید، اصلی، ذاتی وار،
  • هم ناموسو، آری، هم قئيرتی وار،
  • دمیر جیلوو آلتدا عرباتی وار،
  • اینان بولو، من کور‌اوغلو دئيیلم.
  • گل سنه سؤيله‌يیم آي قجرالی،
  • هله ائشیتمه‌يیب قوچ عیسیبالی،
  • گلسه بۇ قوشونا وئرمز مجالی،
  • اینان بولو، من کور‌اوغلو دئيیلم.
  • کور‌اوغلو دئيیلم، يێرتما ياخانی،
  • جیيریمی عشق اودونا ياخانی،
  • ایگیدین اولمازمی قێلینج، قالخانی،
  • اینان بولو، من کور‌اوغلو دئيیلم.
  • کور‌اوغلو دئدیگین بیر بل-بللیدی،
  • چنلیبئلده دؤوران قۇرآن دلیدی،
  • اؤز آدیم رؤوشندی، آتام آلیدی،
  • اینان بولو، من کور‌اوغلو دئيیلم.
  • بولو بَي مئهتر مۇرتوزو يانینا چاغیریب دئدی:
  • – سن دئيیردین بس بۇ کور‌اوغلودو، بۇ کی، کور‌اوغلو دئيیلمیش.
  • قجرالی بیر طرفدن مۇرتوزون اۆستونه دۆشدو کی، سن بیزی آلدادیرسان.
  • مۇرتوز دئدی:
  • – اير کور‌اوغلو بیر ایسه، سیز آختاردیغینیز دا او ایسه، کور‌اوغلو بۇدو.
  • بولو بَي آغزیندان کؤپوک داشلانا-داشلانا امر ائله‌دی کی، قوشون
  • آتلانیب يولا دۆشسون. کور‌اوغلو گؤردو کی، يوخ، بۇنو آپاراجاقلار. باشینی
  • قالدیریب دئدی:
  • – ایندی سن منی آپاریب پاشايا وئره‌جکسن کی، گۇيا من کور‌اوغلويام،
  • سن ده منی تۇتوبسان؟
  • بولو بَي:
  • – بس نئجه؟
  • کور‌اوغلو گۆلوب دئدی:
  • – ياخشی سنین آغلین يوخدو، بۇ آدامین سؤزونه اینانیرسان. پاشانین دا
  • آغلی يوخدو، يا منیم دیلیم يوخدو کی، اونو باشا سالیم. نیيه پاشا کوردو
  • کی، من ياراقسیز-ياساقسیز بیر آدامام. قوچ کور‌اوغلونو بئله آسانلیقلا
  • تۇتماق اولماز؟ هامیسینی آچیب پاشايا دئيیب سندن شیکايت ائلیيه‌جه‌يم.
  • بولو بَي قالدی مهتتل کی، بۇنلارین هانسینا اینانسین. آخیردا کور‌اوغلونون
  • سؤزلرینه اینانیب امر ائله‌يیب اونون اللرینی آچدیردی. سونرا اۆزونو
  • اونا تۇتوب دئدی:
  • – دئيیرلر دلی کور‌اوغلو چوخ مرددیر، هئچ بیر شئيی گیزله‌دن دئيیل.
  • ایندی اولان اولدو، کئچن کئچدی. اللرین ده آچیقدی. ایندی دۆزونو دئ گؤرک
  • سن کیمسن؟ بۇ بوي، هئچ قوروقچو بوي-بۇخونونا اوخشامیر.
  • کور‌اوغلو دئدی:
  • – ایندی کی، بئله آدام کیمی سوروشورسان، بلی، من کور‌اوغلويام.
  • بولو بَي آياغا قالخماق ایسته‌ينده کور‌اوغلو دئدی:
  • – دايان، سن تاي منی تۇتا بیلمزسن. آنجاق دئ گؤروم منی نیيه
  • آپاریرسان؟
  • بولو بَي دئدی:
  • – عرضینجانلی جامال پاشا عهد ائله‌يیب کی، هر کیم کور‌اوغلونو تۇتوب
  • اونون يانینا آپارسا، اؤز قێزینی او آداما وئرسین. ایندی من سنی آپاریرام
  • کی، جامال پاشانین قێزی دۆنيا خانیمی آلیم.
  • کور‌اوغلو دئدی:
  • – من کور‌اوغلويام. اؤزوم ده دئدیگیمی ائله‌ينم. ایندی کی، سن او
  • قێزا عاشقسن، قوي گئدیم ياراغیمی گؤتوروم، آتیمی مینیم گلیم، آپار
  • منی پاشايا تهویل وئر، قێزی آل.
  • کور‌اوغلو اؤزونو چنلیبئله يئتیردی. قێلینج قۇرشادی، قالخان گؤتوردو،
  • عمود آسدی، نه دلیلره، نه خانیملارا بیر سؤز دئمه‌يیب، قێراتی مینیب بیرباشا
  • بولو بَيین يانینا گلدی. ائله کی، يئتیشدی دئدی:
  • – بولو بَي، من وئردیگیم وعده‌‌يه دوغرو چێخیب گلمیشم.
  • آنجاق سنینله بیر شرطیم وار. سن منی تۇتموشدون. ایندی ده کی، من
  • سنینله گئدیرم. سونرا ائله بۇ سنین قۇلاغیندا قالار. ائله بیلرسن کی،
  • گۇيا دوغرودان دا منی تۇتا بیلرسن.
  • گل قاباقجا سنینله بیر وۇروشاق، داوا ائله‌يک. سونرا هارايا دئسن
  • گئدک. اؤزو ده سینه‌مه اۆچ خانا سؤز گلیب، اونو دئيیم سونرا داوا ائله‌يک.
  • آلدی کور‌اوغلو، گؤرک نه دئدی:
  • الی بئلده دۇروب امر ائيلردین
  • کور‌اوغلونو تۇتان گۆنلر نئجه اولدو؟
  • هردن-هردن آسیب کسین سؤيلردین،
  • کور‌اوغلونو تۇتان گۆنلر نئجه اولدو؟
  • دئيیردین زامانا گئده‌جک بئله،
  • اۇيموشدون شیطانا، فیتنه‌يه، فئله،
  • هردن حؤکم ائله‌يیب باسیردین گؤله،
  • کور‌اوغلونو تۇتان گۆنلر نئجه اولدو؟
  • چنلیبئلده دؤوران قۇرآن دلیيم،
  • هديان سؤزه چوخ چتیندی ايیلم،
  • يئددی مین دلی‌نین کلته کلیيم،
  • کور‌اوغلونو تۇتان گۆنلر نئجه اولدو؟
  • کور‌اوغلويام، مۆخننته اۇيمارام،
  • قێساسیمی قیيامته قويمارام،
  • دۆشمنین قانیندان ایچسم دويمارام،
  • کور‌اوغلونو تۇتان گۆنلر نئجه اولدو؟
  • کور‌اوغلو آجیقلانمیشدی. ائله آجیقلانمیشدی، ائله جوشموشدو کی، بیلمیردی
  • بولو بَيه نه دئسین. اوندان هايیفینی نئجه آلسین. يئنه ده گؤتوردو گؤرک
  • نه دئدی:
  • هاي-هاي دئيیب قنیم اۆسته واراندا،
  • کلله گرک بۇ مئيداندا قالانسین.
  • مرد ایگیدلر قووغا گۆنو دۆشنده
  • شربت دئيه اؤز قانینا يالانسین.
  • قالدیررام مئيدانین گؤيه توزونو،
  • چێخاردارام يامانلارین گؤزونو،
  • گرک گؤرم دۆنيا خانیم اۆزونو،
  • عؤمور تزه‌لنسین، جان جیلوه‌لنسین.
  • کور‌اوغلويام، گدیکلری بۇسارام،
  • قانجیرقادان قانلی باشلار آسارام،
  • بولو بَي، سنه بیر قێلینج باسارام،
  • باغیرساغین جمعده‌يینه دولانسین.
  • کور‌اوغلو سؤزونو تامام ائله‌يیب قێراتی جؤولانا گتیردی. میسری قێلینجی
  • چکیب قوشونا جۇمدو. قوشون اهلی ها ائله‌يیب ال-آياق آچانا کیمی کور‌اوغلو
  • ساغدان وۇردو، سولدان چێخدی، سولدان وۇردو، ساغدان چێخدی. قوشونو قاتیمقاتیم
  • قاتلايیب الدن سالدی. دۆشمن داغیلیب قاچماغا باشلادی. کور‌اوغلو
  • قێراتی داللاریندان سالیب اؤزونو قجرالیيا يئتیردی، بیر عمود وۇروب اونو
  • آتدان يئره سالدی. بیر ده باخدی کی، بولو بَي آرانی شۇلوق گؤروب اکیلمک
  • ایسته‌يیر. تئز اؤزونو اونا يئتیریب، ایتله‌يیب آتدان سالدی، دۆشوب دیزی‌نین آلتینا
  • آلدی. گؤتوردو گؤرک نه دئدی:
  • قوللارینی باغلادارام،
  • بولو، من سنین، من سنین!
  • آناجیغین آغلادارام،
  • بولو، من سنین، من سنین!
  • گؤزلرینه کۆل قويارام،
  • اوووجونا پۇل قويارام،
  • نیشانلینی دۇل قويارام،
  • بولو، من سنین، من سنین!
  • مرد ایگیدلرین گؤزويم،
  • دلیلرین عزیزیيم،
  • ببیر اوغلونون اؤزويم،
  • بولو، من سنین، من سنین!
  • قێزیب سیننه چؤکرم،
  • الیف قددینی بۆکرم،
  • اۆستونه آلوو تؤکرم،
  • بولو، من سنین، من سنین!
  • کور‌اوغلويام، ایش بیتیررم،
  • سنی دۆنيادان ایتیررم،
  • باشین بدندن گؤتوررم،
  • بولو، من سنین، من سنین!
  • کور‌اوغلو سؤزونو تامام ائله‌يیب بولو بَيین سینه‌سی‌نین اۆستوندن دۇردو،
  • دئدی:
  • – ایندی من سنین ایختیياریندايام. پاشانین يانینا نئجه ایسته‌يیرسن،
  • ائله آپار.
  • بولو بَي گۆجله اۇفولدايا-اۇفولدايا يئریندن قالخدی. آداملاری ایله بیر
  • تهر کؤمکلشیب قێراتین اۆستونده کور‌اوغلونون قوللارینی گئری يانیندا
  • مؤحکم باغلادیلار. گؤتوروب يولا دۆشدولر.
  • عرضینجان داغلارینی آشیب شهره ياخینلاشدیلار. بولو بَي فیکیر ائيله‌يیب
  • اؤز-اؤزونه دئدی. کور‌اوغلونو بئله ساغ-سلامات جامال پاشانین يانینا
  • آپارسام، منیم اونو دالاشسیز-داواسیز تۇتوب گتیرمه‌يیمه اینانماياجاق،
  • پاشانی ایناندیرماق اۆچون گل اونو يارالا. ياواشجا گؤز-گؤز وۇروب
  • کور‌اوغلونون گئری يانینا کئچیب بیردن اونون باشینا بیر قێلینج وۇردو.
  • قوللاری باغلی کور‌اوغلونو قان گؤتوردو. اودو کی، تۇتدوغو ایشدن پئشیمان
  • اولدو. بولو بَيی اؤلدورمه‌دیگینه هئيیفسیلندی. آنجاق ایش-ایشدن کئچمیشدی.
  • بۇ دار زامانیندا چارداخلی چنلیبئل، دلیلر، نیگار خانیم يادینا دۆشدو.
  • آلدی گؤرک نه دئدی:
  • قارشی ياتان قارلی داغلار،
  • داغلار، سنده قاریم قالدی!
  • الیم يئتمز، اۆنوم چاتماز،
  • دال بۇداقدا ناریم قالدی!
  • منی تۇتدو بولو بَيلر،
  • آغیر زنجیر بوينوم ايلر،
  • هامی بیر-بیریندن يئيلر،
  • ایگید دلیلریم قالدی!
  • منی تۇتدو قم عجلی،
  • اؤلدورر وئرمز ماجالی،
  • هايیف قێرمادیم قجری
  • سینمده داغلاریم قالدی!
  • جانیم قێرات، گؤزوم قێرات!
  • سنی مینن آلار مۇراد،
  • آغجاقوزو، بیر ده دۆرات
  • باغلی بدؤيلریم قالدی!
  • ياخشیدی ایگیدین واری،
  • ناموسو، قئيرتی، آری.
  • نیگار قوچ کور‌اوغلو ياری،
  • نیگار کیمی ياریم قالدی!
  • گلیب يئتیشدیلر عرضینجانا. بولو بَي کور‌اوغلونو بیرباش آپاردی
  • جامال پاشانین يانینا. طبیل وۇرولدو، بۆتون عالم ایمارتین قاباغینا
  • يێغیلدی. جامال پاشانین قێزی قارا گؤزلو، شیرین سؤزلو، آلما ياناقلی، ياقوت
  • دوداقلی دۆنيا خانیم قۇللوقچوسونو چاغیریب نه سس-کۆي اولدوغونو
  • سوروشدو. قۇللوقچو گؤزلرینی سۆزه-سۆزه دئدی:
  • – خانیم، سنه قۇربان اولوم، تاي بۇندان آرتیق نه اولاجاق؟ بولو بَي
  • قوچ کور‌اوغلونو تۇتوب قولو باغلی پاشانین حۆضورونا گتیریب. اینشاللاه بیر
  • نئچه گۆنه کیمی تويوندو.
  • بۇ سؤزو ائشیدن کیمی دۆنيا-عالم دۆنيا خانیمین گؤزلرینده
  • قارالدی. دۆنيا خانیمین بولو بَيدن زندئيی-زهله‌سی گئدیردی. دئيیردی
  • کی، ایتی گؤروم، پیشیگی گؤروم، اونون مۆردشیر يۇموش اۆزونو گؤرمه‌يیم.
  • ایندی بیردن کور‌اوغلونون تۇتولدوغونو ائشیتدی، اۆرگی ائله سێخیلدی، ائله سێخیلدی
  • کی، بیلمه‌دی نه ائله‌سین. آنجاق قێزلار باشا دۆشمه‌سینلر دئيه دۇروب يئددی
  • قلمله اؤزونه زینت وئردی.
  • قێرخ اینجه‌بئل قێزینی دا يانینا آلیب کور‌اوغلويا تاماشا ائله‌مه‌يه گئتدی.
  • بلی، جامال پاشايا خبر چاتدی کی، بس قێزین دۆنيا خانیم ایزن
  • ایسته‌يیر. جامال پاشا رۇسخات وئردی، مجلیسین بیر طرفینده بیر پرده چکیلدی.
  • دۆنيا خانیم اؤز قێرخ اینجه‌بئل قێزی دا باشیندا گلیب پرده‌نین دالیندا
  • ايلشدی. قوللاری باغلی، باشی يارالی کور‌اوغلونو دا جامال پاشانین قاباغیندا
  • ساخلامیشدیلار. دۆنيا خانیم باخدی کی، واللاه بۇ بیر ایگید اوغلاندی
  • کی، بولو ندی هئچ مین نفر بولو کیمی آدام اولسا اونو تۇتا بیلمز. اؤزؤزونه
  • دئدی: – “آشنا، بۇ هئچ بئله دئيیل کی، بئله اولسون. بۇ بولو گیرن
  • کول دئيیل. بولونون من دابباخدا گؤنونو تانیيیرام. بۇرادا يقین بیر
  • فێریلداق وار”. آمما تاي بیر سؤز دئمه‌يیب يئرینده‌جه اوتوردو کی، گؤرسون
  • ایشین آخیری نئجه اولاجاق. آمما بولو بَيین کئفی او نئجه دئيرلر، لاپ ایته
  • هۆروردو. بیر يئللنه-يئللنه گلیب دولانیردی کی، اتکلری گؤز چێخاردیردی.
  • جامال پاشا دۆشموشدو فیکیر درياسینا کی، نه ائله‌سین. بیلمیردی کور‌اوغلونون
  • اؤزونو خوتکارین حۆضورونا گؤندرسین، يا اؤلدوروب باشینی گؤندرسین.
  • چوخ فیکیر، خيالدان سونرا بۇ قرارا گلدی کی، هله‌لیک کور‌اوغلونو
  • زیندانا سالیب خوتکارا نامه گؤندریب اونو ایشدن خبردار ائله‌سین.
  • کور‌اوغلونو گتیریب دۆنيا خانیمین ایمارتی‌نین قاباغیندا بیر قۇيو
  • وار ایدی، سالدیلار اورايا.
  • بلی، ائله کی، کور‌اوغلونو قۇيويا سالدیلار. بولو بَي جامال پاشانین
  • يانینا گئدیب زمین-ادب اؤپندن سونرا دئدی:
  • – پاشا ساغ اولسون! قوچ کور‌اوغلونو دیری-دیری تۇتوب گتیردیم. خوتکارین
  • يانیندا سنین اۆزونو آغ، باشینی اۇجا ائله‌دیم. ایندی “الهدی مینلوفا”،
  • وئردیگین وعده‌‌يه عمل ائله!
  • پاشا دئدی:
  • – بولو بَي، سؤزوم سؤزدو، قێزیم دۆنيا خانیم سنیندی. آنجاق قوي
  • گؤرک قاصید خوتکاردان نه خبر گتیریر. سونرا توي تداروکونه باشلاياریق.
  • سنه ائله بیر توي ائله‌يه‌جه‌يم کی، رۇزیگارین گؤزو بئله توي گؤرمه‌میش
  • اولسون.
  • بولو بَي جامال پاشانین سؤزوندن آرخايینلايیب توي تداروکونده
  • اولسون، سنه کیمدن خبر وئریم، دۆنيا خانیمدان. دۆنيا خانیم آخیر
  • بولو بَيی ایستمیردی، هر نه قدر ائله‌يیردیسه، اۆرگی اونا ياپیشمیردی کی،
  • ياپیشمیردی. اونو گؤرنده ائله بیل گؤزونه تیکان باتیردی. او ائله گۆمان
  • ائله‌میشدی کی، قوچ کور‌اوغلو اونو اؤلدورر. ياخاسی اونون الیندن قۇرتارار.
  • ایندی ده کی، وۇردو، بئله اولدو. دئيیر سن سايدیغینی ساي، گؤر فلک نه سايیر.
  • کیمین آغلینا گله بیلردی کی، بولو بَي گئدیب کور‌اوغلونو تۇتوب گتیره‌جک.
  • اودو کی، يازیق قێز دیزلرینی قۇجاقلايیب قم درياسینا قرق اولموشدو.
  • چوخ فیکیر-خيالدان سونرا گؤردو کی، اونون بیرجه نجات يولو وار. او دا
  • اودو کی، کور‌اوغلو خلاص اولسون. چۆنکی دۆنيا خانیم يقین-اليقین بیلیردی
  • کی، بۇرادا بیر حیله‌‌ وار. اير قوچ کور‌اوغلو خلاص اولسا بۇ حئیفی بولودا
  • قويماياجاق. اوندا دا کی، دۆنيا خانیمین جانی بولو بَيین مۆردشیر
  • يۇموش اۆزوندن قۇرتارار.
  • بلی، دۆنيا خانیم بۇ فیکیرله او قدر گؤزله‌دی کی، قارانلیق دۆشدو.
  • دۆنيا خانیم ياواشجا آياغا دۇردو، باشدان گئيینیب آياقدان قێفیللاندی،
  • آياقدان گئيینیب باشدان قێفیللاندی. ایمارتدن چێخیب اؤزونو وئردی قۇيونون
  • باشینا. کور‌اوغلو قالمیشدی قۇيودا.
  • دۆنيا خانیم بیر ایپ ساللادی کی، بس باغلا بئلینه چکیم، سنی چێخاردیم.
  • کور‌اوغلو ائله کی، ایپ ساللايانین دۆنيا خانیم اولدوغونو بیلدی، گۆلوب
  • دئدی:
  • – آي دۆنيا خانیم، سنده او گۆج، هۆنر هاردايدی کی، منی چکیب
  • بۇرادان چێخاردا بیله‌سن.
  • غرض، اۇزون باش آغریسی اولماسین، دۆنيا خانیم بیر آز يئمکدن،
  • ایچمکدن ایپه باغلايیب قۇيويا ساللادی. اؤزو ده سوروشدو کی:
  • – بس بیر آدامین وارمی کی، دالینجا گله؟
  • کور‌اوغلو دئدی:
  • – دۆنيا خانیم، منیم دالیمجا گلسه يا ائيواز گلر، يا دمیرچیوغلو،
  • يا دلی حسن، يا دا کی عیسیبالی.
  • دۆنيا خانیم اورادان ياواشجا قايیدیب ائوه گلدی. صاباحیسی مئهتری
  • يانینا چاغیریب، اووجونا بیر چنگه قێزیل باسیب تاپشیردی کی، قێراتدان ياخشی
  • مۇغايات اولسون. بئله‌لیکله، مئهتر قێراتدان، دۆنيا خانیم اؤزو ده کی،
  • کور‌اوغلودان مۇغايات اولماغا باشلادیلار.
  • بۇنلار بۇرادا قالماقلاریندا اولسونلار، سنه چنلیبئلده دلیلردن
  • خبر وئریم. دلیلر بیر گۆن گؤزله‌دیلر کور‌اوغلو گلمه‌دی، ایکی گۆن گؤزله‌دیلر
  • کور‌اوغلو گلمه‌دی. اۆچونجو گۆنو بیر يئرده يێغیلدیلار کی، گؤرن بۇ
  • هارايا گئتدی.
  • عیسیبالی دئدی:
  • – تاجیرین سؤزو گئرچک ایمیش. يقین بولو بَي گلدی، کور‌اوغلونو تۇتوب
  • عرضینجانا آپاردی.
  • عیسیبالی بۇنو سؤيله‌يیب آياغا قالخدی. اۆزونو دلیلره تۇتوب دئدی:
  • – بۇگون بیر ایگید ایسته‌رم،
  • وارسام، وارا منیم ایله.
  • قریب قۆربت ياد اؤلکه‌ده
  • قالسام، قالا منیم ایله.
  • کور‌اوغلونون يوخ علاجی،
  • مصردن آلیر خراجی،
  • دۆشمنه ايری قێلینجی
  • چالسام، چالا منیم ایله.
  • عیسیبالی، وئر اؤيودو،
  • کؤرپه ایکن اي سؤيودو،
  • کور‌اوغلو کیمی ایگیدی
  • بۇلسام، بۇلا منیم ایله.
  • دلیلر دئدیلر:
  • – بیز اونون دالینجا گئدن دئيیلیک. قوي هارادا قالیر، قالسین. اؤزو
  • ياخشی بیلیر کی، پاشالارین، بَيلرین هامیسی اونا ياغیدی. بیر فۆرصت آختاریرلار
  • کی، تۇتسونلار. يانینا يولداش گؤتورمه‌میش، گئده‌جيی يئرین سمتینی، سوراغینی
  • دئمه‌میش نیيه چێخیب گئدیر!؟
  • دلیلر آجیق ائله‌میشدیلر. عیسیبالی گؤردو کی، دلیلر آجیق ائله‌يیبلر، تاي
  • بیر سؤز دئمه‌يیب، اؤزو آياغا قالخدی. ياراقلانیب، چکدی دۆراتی يهرله‌دی.
  • میندی، تک-تنها کور‌اوغلونو آختارماغا گئتدی. گئجه‌نی گۆندوزه قاتدی،
  • گۆندوزو گئجه‌يه، او نئجه دئيرلر، آز گئتدی، اۆز گئتدی، دره تپه دۆز
  • گئتدی، آخیر گلیب عرضینجانا يئتیشدی.
  • عیسیبالی شهره چاتاندا سحر تئزدن ایدی، هله دۆکانلار باغلی ایدی.
  • گؤز گزدیردی، گؤردو مئيدانین آشاغی طرفینده بیر علاف دۆکانینی يئنیجه
  • آچیر. باخدی کی، دۆکاندا چوخلو آرپا چۇواللاری وار، هئچ نێرخینی خبر
  • آلمامیش چۇوالین بیر بؤيويونو گؤتوروب دۆراتین قاباغینا قويدو.
  • دۆکانچی دئدی:
  • – آي قوچاق، چکدیریب قدرینی بیلمه‌میش، پۇلونو وئرمه‌میش آرپانی
  • آتینا نیيه يئدیریرسن؟
  • عیسیبالی دئدی:
  • – قدرینی بیلمک ندی؟ پۇل ندی؟ من ایندیيه کیمی آرپايا پۇل
  • وئرمه‌میشم، ایندیمی وئره‌جه‌يم؟
  • دۆکانچی گؤردو يوخ، بۇ پۇل-زاد وئرن دئيیل. چۇوالین بیر قۇلپوندان
  • ياپیشیب آتین قاباغیندان چکمک ایسته‌دی. عیسیبالی دئدی:
  • – آرپانی گؤتورمه، آت داماغ اولار.
  • دۆکانچی ال چکمه‌دی. آخیردا عیسیبالی اونا بیر سیلله هرله‌دی، دۆکانچی‌نین
  • آياغی باشیندان آشدی. قالخماق ایسته‌ينده بیر سیلله ده ائله وۇردو کی،
  • دۆکانچی‌نین سسی خێرپ کسیلدی، اؤزوندن گئدیب دۆشدويو يئرده قالدی. عیسیبالی
  • آياغینی اونون سینه‌سینه قويوب ایسته‌دی چکسین جۆجه بوغازی کیمی بوغازینی
  • اۆزوب آتسین، اونا کیمی دۆکانینی يئنیجه آچمیش دۆکانچیلار تؤکولدولر،
  • يالوار-ياپیش ائله‌يیب دۆکانچینی اونون الیندن آلدیلار.
  • دۆنيا خانیم چوخدان يول گؤزله‌يیردی.
  • عیسیبالینی گؤروب تهر-تؤهروندن يقین ائله‌دی کی، بۇ کور‌اوغلونون
  • دلیلرینده‌دی، دئدی:
  • – ائي اوغلان، کیمسن؟ هاردان گلیب هارا گئدیرسن؟ کیمی آختاریرسان؟
  • دۆنيا خانیمین جاوابیندا آلدی عیسیبالی گؤرک نه دئدی:
  • نه خان گؤردوم بۇرادا، نه ده بیر پاشا،
  • وئره کور‌اوغلودان منه بیر خبر.
  • ياغی دۆشمنلری باغلادیم داشا،
  • وئره کور‌اوغلودان منه بیر خبر.
  • آج قۇرد منم، قنیم اۆسته اۇلارام،
  • مۆخننتی اؤز قانینا بۇلارام،
  • قێلینج چکیب اؤلکه‌سینی تالارام،
  • وئره کور‌اوغلودان منه بیر خبر.
  • اولان يوخدو منیم دردیمدن حالی،
  • هئچ باشیمدان گئتمز اونون خيالی،
  • کور‌اوغلويا قۇربان قوچ عیسیبالی،
  • وئره کور‌اوغلودان منه بیر خبر.
  • دۆنيا خانیم دئدی:
  • – سن آختاران کور‌اوغلو بۇرادادی. من چوخداندی کی، سنی گؤزله‌يیرم.
  • دۆش آتینی تؤوله‌يه چک، اؤزون ده ایچریيه گل.
  • عیسیبالی گؤردو دۆنيا خانیم دوغرودان دا تعریفلی گؤزلدی. هئچ کئچیله‌سی
  • دئيیل. دۆشدو، آتینی تؤوله‌يه چکدی، گؤردو قێرات دا بۇ تؤوله‌ده باغلانیبدی.
  • کور‌اوغلو طرفدن اۆرگی بیر آز آرخايینلاشدی. قايیتدی دۆنيا خانیمین
  • يانینا گلدی. دۆنيا خانیم يئمک، ایچمک گتیردی. عیسیبالی يئدی، ایچدی،
  • باشینی دۆنيا خانیمین دیزی اۆستونه قويوب ياتدی. او طرفدن عیسیبالی‌نین
  • وۇردوغو دۆکانچی اؤزونه گلدی. قالخدی بیرباش گئتدی جامال پاشانین
  • يانینا کی، بس کور‌اوغلونون بۇرايا بیر دلیسی گلیب چێخیب، دۆکانی-بازاری
  • داغیتدی آز قالمیشدی کی، منی ده اؤلدوره، قاچیب الیندن قۇرتاردیم.
  • جامال پاشا حؤکم ائله‌دی. قوشون آتلانیب يوللاری، بندلری، بره‌لری
  • کسدی. دۆنيا خانیم ایشدن خبر تۇتدو. ایسته‌دی عیسیبالینی ایشدن حالی ائله‌سین.
  • باخدی کی، عیسیبالی چوخ آغیر ياتیب، بئله شئيلرله اوياناسی دئيیل. اوندا آلدی،
  • گؤرک نه دئدی:
  • ياغی دۆشمن دؤرد بیر يانی آلیبدی،
  • اويان عجم اوغلو، دۇر گئت بۇ يئردن!
  • سنین دردین بۇ جانیمدا قالیبدی،
  • اويان عجم اوغلو، دۇر گئت بۇ يئردن!
  • دۆنيا خانیمین سسینه عیسیبالی يۇخودان اويانیب گؤردو قێز آغلايیر،
  • آلدی گؤرک دۆنيا خانیمین جاوابیندا نه دئدی:
  • آغلاما، آغلاما، آي دۆنيا خانیم،
  • اؤلر عجم اوغلو، گئتمز بۇ يئردن!
  • سنه قۇربان اولسون بۇ شیرین جانیم،
  • اؤلر عجم اوغلو، گئتمز بۇ يئردن!
  • دۆنيا خانیم:
  • هاي-هاي دئيیب گدیکلره ياتاندی،
  • جومرد دۆشمنلری آتدان آتاندی،
  • بولو بَيدی، کور‌اوغلونو تۇتاندی،
  • اويان عجم اوغلو، دۇر گئت بۇ يئردن!
  • عیسیبالی:
  • هاي-هاي دئيیب تؤوله‌لرده ياتاندی،
  • هانسی دۆشمنلری آتدان آتاندی؟
  • کور‌اوغلونو آل دیل ایله تۇتاندی،
  • اؤلر عجم اوغلو، گئتمز بۇ يئردن!
  • دۆنيا خانیم:
  • چوخدو آرالیقدا منیم يامانیم،
  • سننن آيری گؤيه چێخار آمانیم،
  • سنه قۇربان اولسون بۇ دۆنيا خانیم،
  • اويان عجم اوغلو، دۇر گئت بۇ يئردن!
  • عیسیبالی:
  • ایگید گرک قۆربت ائلده ياسلانا،
  • چتین میسری قێلینج قێندا پاسلانا،
  • مین تۆلکو نئيله‌ير بیر آج آسلانا؟
  • اؤلر عجم اوغلو، گئتمز بۇ يئردن!
  • سؤزلری تاماما يئتیشدی. عیسیبالی دۆنيا خانیما اۆرک وئریب دئدی:
  • – دۇر گئدک، کور‌اوغلونون ساخلاندیغی يئری منه گؤستر.
  • عیسیبالی دۆنيا خانیملا کور‌اوغلو اولان قۇيونون باشینا گلدی. هله
  • قۇيويا چاتمامیشدیلار کی، عیسیبالی گؤردو بیر اوخوماق سسی گلیر. هۇشکوشلا
  • قۇلاق وئریب، گؤردو کور‌اوغلو قۇيودان بۇ سسلری اوخويور:
  • اۇجا داغلارین باشیندان
  • يولوم آي مدت، آي مدت!..
  • يامان يئرده تۇتدو منی
  • اؤلوم، آي مدت، آي مدت!..
  • بئلیمده يوخدو قێلینجیم،
  • مۆخننته چاتمیر گۆجوم،
  • نه يورغان وار، نه ده جئجیم،
  • ظۆلوم، آي مدت، آي مدت!..
  • هانی نیزم، هانی آتیم؟
  • کسیلدی شانی-شؤوکتیم،
  • چنلیبئل کیمی سرحددیم،
  • ائلیم، آي مدت، آي مدت!
  • سینم اودلاندی کؤز کیمی،
  • میسکین اولارمی بیز کیمی؟
  • دادا يئته ائيواز کیمی
  • دلیم، آي مدت، آي مدت!..
  • آلتیما دؤشردیم خالی،
  • يوخدو منیم کیمی دلی،
  • بۇ گۆنومده عیسیبالی
  • گلیمی، آي مدت، آي مدت!..
  • عیسیبالی دئدی:
  • – کور‌اوغلو، قم چکمه، يئتیشدیم.
  • عیسیبالی کمندینی آچدی، قۇيويا ساللادی. کور‌اوغلو کمندین اۇجونو
  • بئلینه باغلايیب ترپتدی. عیسیبالی ایله دۆنيا خانیم چکدیلر، کور‌اوغلونو
  • قۇيودان چێخارتدیلار. کور‌اوغلو عیسیبالی ایله قولبويون اولدو، گؤروشوب، اؤپوشدو.
  • عیسیبالی دئدی:
  • – کور‌اوغلو، اؤپوشمک واختی دئيیل، قوشون هر يانی کسیب، تئز اول گؤرک
  • نه ائله‌يیریک.
  • کور‌اوغلو ایله عیسیبالی اؤزلرینی آتلارا يئتیردیلر. کور‌اوغلونون قێلینجینی،
  • قالخانینی گتیریب وئرنده کور‌اوغلو دئدی:
  • – دۆنيا خانیم، سنی بۇردا قويوب گئتمه‌يه‌جيیک. حاضیرلاش، قیيمتده
  • آغیر، چکیده يۆنگول نَيین وار گؤتور، بیزینن گئدک.
  • دۆنيا خانیم مئهتره دؤرد آت يهرله‌دیب چکدیردی. نه کی قیيمتلی
  • شئيلری واردی، خۇرجوننارا دولدوروب آتلارین اۆچونه يۆکله‌دیلر. آتین بیرینه
  • ده دۆنيا خانیم اؤزو میندی.
  • کور‌اوغلو باخدی کی، هر طرف کسیلیب، آلدی گؤرک نه دئدی:
  • میسری قێلینج، لزگی قمه
  • من سنی تر ساخلامیشام،
  • دولاشما جۆببه-جوشانا
  • دۆشمنه وار ساخلامیشام!
  • جومردلره ياخینارام،
  • خندک اوخدان ساخینارام،
  • مین ایگیده تپینه‌رم،
  • جاندا هۆنر ساخلامیشام!
  • دولاندیم قۆربت ائللرده،
  • تعریفیم گزدی دیللرده،
  • چارداخلی چنلیبئللرده،
  • عصره‌میش نر ساخلامیشام!
  • قوچ کور‌اوغلو ائلر خطا،
  • ایندی سن باخ بۇ بۇساتا،
  • جانیم قۇربان عرباتا،
  • اوينار، کیشنر ساخلامیشام!
  • کور‌اوغلونون نره‌سینی ائشیدنده قوشون اهلی‌نین جانینا لرزه دۆشدو.
  • کور‌اوغلو بیر ياندان، عیسیبالی بیر ياندان، دۆشمنه هۆجوم ائله‌دیلر. بیر
  • وۇرهاوور اولدو کی، رۇزیگارین گؤزو هله بئله وۇرهاوور گؤرمه‌میشدی. دۆشمن
  • داوام گتیره بیلمه‌يیب قاچماغا اۆز قويدو. آخیر کی، کور‌اوغلو،
  • عیسیبالی، يانلاریندا دا دۆنيا خانیم عرضینجاندان چێخیب، چنلیبئله طرف
  • يول باشلادیلار. بیر قدر گئتمیشدیلر کی، بیر ده کور‌اوغلو گؤردو داللارینجا
  • بیر بؤلوک آتلی گلیر. کور‌اوغلو دئدی:
  • – عیسیبالی سیز گئدین، من قايیدیم بۇنلارین جاوابینی وئریم.
  • بۇنو دئيیب کور‌اوغلو گئری دؤندو. بیر دلی نره چکیب اؤزونو قوشونا
  • وۇردو. قێراتی سۆروب الینده میسری قێلینج اونلارین جانینا دۆشدو. او کی،
  • قێرمالی ایدی قێردی. اۆسته‌لیک بیر دسته آتلینی دا اسیر ائله‌يیب قێراتین قاباغینا
  • قاتدی. گلیب عیسیبالیگیله چاتدی. باخدی مئهتر مۇرتوز دا بۇ آتلیلارین
  • ایچینده‌دی. اونو عیسیبالیيا گؤستریب دئدی:
  • – بلدچیلیک ائله‌يیب منی تۇتدوران بۇ ایدی.
  • عیسیبالی ایسته‌دی اورداجا مۇرتوزون ایشینی تامام ائله‌سین. کور‌اوغلو قويمادی،
  • دئدی:
  • – الی‌بوش گئدریک. بۇنلاری چنلیبئله تؤهفه آپاراق.
  • اسیرلر ده قاباقلاریندا گلیب چنلیبئله ياخینلاشدیلار. ائله کی، داغلار
  • کور‌اوغلونون گؤزونه گؤروندو، آلدی گؤرک نه دئدی:
  • بیر زامانلار صفا سۆروب گزردیم،
  • اوندا سندین منیم قارداشیم، داغلار!
  • نه زامان کی، ياغی دۆشمان گلنده
  • سنده چوخ اولوردو ساواشیم، داغلار!
  • تالادیم شاهلاری، هله آز دئدیم،
  • تۆرفه گؤزللره ایشوه، ناز دئدیم،
  • نئچه تاجیر، تۆججار سنده گیزله‌دیم،
  • آچمادین سیرریمی، سیرداشیم، داغلار!
  • کور‌اوغلويام، گزدیگیمی تاپیردیم،
  • قايالار باشیندا قالا ياپیردیم،
  • آغ سۆفره‌دن املیک قۇزو قاپیردیم،
  • يئيیب قۇرتلار ایله اۇلاشیم، داغلار!
  • کور‌اوغلو سؤزونو تامام ائله‌دی.
  • او طرفدن دلیلر کور‌اوغلونون گئج گلدیگینی گؤروب دالینجا گلیردیلر
  • کی، بیردن يولدا قاباقلاشدیلار. گؤروشوب اؤپوشدولر، برابر چنلیبئله
  • قايیتدیلار. يول يورغونلوقلاری چێخدی. بیر ياخشی مجلیس قۇروب توي
  • ائله‌دیلر. دۆنيا خانیمی عیسیبالیيا وئردیلر.

  قایناق‌لار

  1. Azadliq . org