کوراوغلونون دربند سفری
edit
آنا آنلاتیم
- کوراوغلونون دربند سفری
دمیرقاپی دربندده بیر عرب پاشا وار ایدی. عرب پاشانین مؤمینه آدلی بیر گؤزل قێزی وار ایدی. مؤمینه خانیم کوراوغلونون آدینی، ایگیدلیک تعریفینی ائشیتمیشدیسه ده، آنجاق اۆزونو گؤرمه‌میشدی. دئيیردی گؤره‌سن بۇ پاشالاری، بَيلری زارا گتیرن، کاروانلار وۇران، تاجیرلر سويان کور‌اوغلو نئجه ایگیددی؟ مؤمینه خانیم گؤرمزه-بیلمزه کور‌اوغلويا آشیق اولموشدو. مؤمینه خانیم بیر گۆن کور‌اوغلويا بئله بیر نامه يازدی:
- باشینا دؤندويوم آي قوچ کور‌اوغلو،
- اير ایگید ایسن گل آپار منی.
- حسرتیندن يوخدو صبریم، قاراریم،
- اینجیدیر سراسر آهی-زار منی.
- چنلیبئل اۆستونده عصره‌میش نرسن،
- دۆشمن قاباغیندا دايانان عرصه‌‌ن،
- تامام دلیلره ایگیت سرکرسن،
- آختارسان، تاپارسان دۆز ایلقار منی.
- دمیرقاپی دربند عجب تاماشا،
- باتیب گؤزللری آلا، قۇماشا،
- آدیم مؤمینه‌دی، آتام عرب پاشا،
- ایسته‌رم، اؤزونه ائله يار منی.
- مؤمینه خانیم نامه‌نی تامام ائله‌دی. آتاسی‌نین عیسی آدلی بیر نؤکری
- وار ایدی. قاراباشینی گؤندریب نؤکر عیسینی يانینا چاغیرتدی. نامه‌نی
- نؤکره وئردی، دئدی:
- – بۇ نامه‌نی آپار، چنلیبئلده قوچ کور‌اوغلويا وئر.
- عیسی نامه‌نی گؤتوروب يولا دۆشدو. گئجه-گۆندوزه سالیب اؤزونو چنلیبئله
- يئتیردی. مؤمینه‌نین نامه‌سینی کور‌اوغلويا وئردی، قايیتدی.
- کور‌اوغلو نامه‌نین مظمونوندان حالی اولدو. او ساعت قێراتی يهرلتدی.
- دلیلر، خانیملار دئدیلر:
- – آي کور‌اوغلو، هارايا ین وار؟
- کور‌اوغلو دئدی:
- – دمیرقاپی دربندده عرب پاشانین قێزی مؤمینه خانیم بوينوما
- دئيین سالیب، گرک گئدم اونو گتیرم.
- دلیلر دئدیلر، اوندا قوي بیز ده سنله گئدک. کور‌اوغلو راضی اولمادی.
- اؤزو تک آتلانیب دمیرقاپی دربنده يولا دۆشدو. هر يئردن کئچیب
- گلدی دربنده چاتدی. کور‌اوغلو قێرات دا يئده‌يینده بازاردا گزینیردی.
- جاماعت اونا، آتینا باخیب مات قالدیلار. عرب پاشايا خبر آپاردیلار کی،
- دربنده بیر آدام گلیب، نه اؤزو بیزیم يئرین آداملارینا بنزه‌يیر، نه
- آتی بیزیم آتلارا. عرب پاشا کور‌اوغلونو يانینا چاغیرتدیردی. عرب پاشا
- کور‌اوغلونو گؤرمه‌میشدی، اونو تانیمیردی، آنجاق آدینی ائشیتمیشدی. کور‌اوغلويا
- دئدی:
- – هارالیسان، نچیسن؟
- کور‌اوغلو دئدی:
- – من آشیقام، ایزین اولسا سازلا دئيه‌رم.
- آلدی کور‌اوغلو:
- عرب پاشا، سنه بیر عرض ائله‌يیم،
- يئریم خبر آلسان، مۇرادبيلیيم.
- ياغی دۆشمن مننن قووغا باشلاسا،
- ايری قێلینج الده دۆشمن قوولارام.
- باغ بسله‌يیب قێزیل گۆلون درمه‌سن،
- دریب، دریب يايلاق اۆسته سرمه‌سن،
- مطلبه گلمیشم، مطلب وئرمه‌سن
- سێغال وئریب میسری قێلینج توولارام.
- چنلیبئلدن بۇ دیيارا گلمیشم،
- يازدیغینیز او ایلقارا گلمیشم.
- کور‌اوغلويام، نازلی يارا گلمیشم،
- گرک گؤزللری سئچیب بويلايام.
- سؤز تامام اولدو. عرب پاشا کور‌اوغلونو تانیدی، نه مطلبه گلدیگینی
- ده بیلدی. وزیرینی يانینا چاغیردی، دئدی:
- – وزیر، کور‌اوغلو قێزیم مؤمینه‌نی ایسته‌يیر، بۇ باره‌ده فیکرین ندی؟
- وزیر دئدی:
- – پاشا ساغ اولسون، چنلیبئلدن بۇرايا گلیب، گرک وئره‌سن، وئرمه‌سن
- زورلا آپاریب هامیمیزی دا قێرار. بیر قێزدان اؤتری بۇ قدر قانا
- باعث اولماق، ماهالی تالاتماق اولماز. ياخشیسی بۇدو کی، قێزینی وئر، اؤزونو
- ده قوشونا سرکرده ائله.
- عرب پاشا وزیری‌نین مصلحتینه راضی اولدو. توي ائله‌يیب، قێزی مؤمینه‌نی
- کور‌اوغلويا وئردی. کور‌اوغلو بۇرادا خئيلی قالاسی اولدو. عرب پاشانین
- خاهیشینه گؤره دؤل اۆچون قێراتی ایلخیيا قاتدیلار. قێرات بیر واخت ایلخی‌نین ایچینده
- اولدو. آنجاق اوندان کهرنیشان بیر ماديان دؤل تۇتدو، بالايا قالدی.
- بۇ طرفدن کور‌اوغلو بیر مدت مؤمینه‌نین يانیندا قالدی.
- گۆنلرین بیر گۆنو چنلیبئل، دلیلر يادینا دۆشدو. مؤمینه‌يه دئدی:
- – من گئدیرم، چنلیبئل يئيه‌سیزدی، دلیلر يولومو گؤزله‌يیر، آل بۇ
- بازوبندی ساخلا، قێزیم اولسا اوننان دولانار، اوغلوم اولسا قولونا باغلا،
- گلر منی تاپار.
- کور‌اوغلو بازوبندی مؤمینه‌يه وئردی، اوننان حالاللاشدی. قێراتی، گتیرتدی،
- يهرله‌دی میندی، چنلیبئله يولا دۆشدو. کور‌اوغلو چوخدان ایدی کی، دلیلردن،
- خانیملاردان آيریلمیشدی، کؤنلو اونلاری چوخ ایسته‌يیردی. قێراتی يئلدن
- يئيین، سۇدان ایتی سۆروردو. قێرات داغلاری، دره‌لری آشدی، يوللاری، ياماجلاری
- کئچدی، کور‌اوغلونو چنلیبئله يئتیردی. کور‌اوغلو دلیلرله گؤروشدو، اؤپوشدو،
- حاللارینی سوروشدو. نیگار خانیم گؤردو کور‌اوغلو بوش گلیب، دئدی:
- – آي کور‌اوغلو، مؤمینه‌نی نیيه گتیرمه‌دین؟
- آلدی کور‌اوغلو:
- جانیم نیگار، گؤزوم نیگار،
- آغلار قالدی يار، نه دئيیم؟
- سنه قۇربان اؤزوم نیگار،
- کؤنلومده آه-زار، نه دئيیم؟
- آيریلاندا جاندان اولدوم،
- من دیندن، ایماندان اولدوم.
- هم هۇری-قیلماندان اولدوم،
- دۆنيا منه دار، نه دئيیم؟
- کور‌اوغلويام ملول اولدوم،
- قۆربت ائلده زلیل اولدوم،
- مؤمینه‌يه دلیل اولدوم،
- ترلان اولماز سار، نه دئيیم.
- بۇنلار بۇرادا قالسینلار، سنه دربندده مؤمینه‌دن خبر وئریم.
- دوققوز آي، دوققوز گۆن، دوققوز ساعت تامام اولدو. مؤمینه‌نین کور‌اوغلودان
- بیر اوغلو دۆنيايا گلدی. اۇشاغین آدینی حسن بَي قويدولار.
- حسن بَي بؤيودو، اون سککیز ياشینا چاتدی. اوغلانین بويو بۇخونو، سۆرسوفتی،
- خوي-خاصيتی عيناً کور‌اوغلويا اوخشايیردی. گؤزلری اويور-اويور
- اوينايیردی، هئچ دینج دۇرماقلا ایشی يوخ ایدی. بۇنو دؤيوردو، اونو سؤيوردو،
- هامینی الیندن زارا گتیرمیشدی. بۇ دینج دۇرماماغی‌نین اۆستونده اللماياق
- اولدوغو اۆچون هامی اونا کۆردوغلو دئيیردی. عرب پاشا بیر نئچه
- دفعه اونو يانینا چاغیریب اؤيود، نصیحت وئردی، باشا گلمه‌دی. او يئنه اؤزو
- بیلدیگینی ائله‌دی. بیر گۆن اوينادیغی يئرده سؤزو چپلشدی، بیر کئچه‌لی برک
- دؤيدو. آغزی‌نین-بۇرنونون قانینی بیر-بیرینه قاتدی. کئچل اونون الیندن
- قۇرتاریب بیر يانا چکیلدی، دئدی:
- – من سنه نه ائله‌میشم، منی نیيه دؤيورسن، آي آتاسیندان
- خبرسیز. سنین آتان يوخدو، کیم بیلیر آنان کیمدن قازانیب.
- بۇ سؤز کۆردوغلونا اوخ ديَن کیمی ديَدی، داغدان آغیر گلدی. کۆردوغلو
- اورادان بیرباشا آناسی‌نین يانینا يۆيوردو، دئدی:
- – آنا، منیم آتام کیمدی؟
- مؤمینه خانیم کوراوغلونون اوغلو اولدوغونو دئمک ایسته‌مه‌دی. گؤزونون
- آغی-قاراسی بیر اوغلو ایدی. يانیندان بۇراخماماق اۆچون دئدی:
- – اوغول، سنین آتان يوخدو.
- کۆردوغلو دئدی:
- – آنا، دئ گؤروم، منیم آتام کیمدی؟ دوغروسونو دئمه‌سن سنی
- ده، اؤزومو دئ اؤلدوره‌رم.
- آخیردا مؤمینه‌نین علاجی کسیلیب دئدی:
- – اوغول، سنین آتان خانلارا، بَيلره قان اۇددوران، چنلیبئلده اويلاغی
- اولان سرکر قوچ کور‌اوغلودو.
- کۆردوغلو دئدی:
- – به ایندیيه کیمی آتام اولماغینی نیيه مندن گیزلتمیشدین؟
- مؤمینه دئدی:
- – قورخوردوم گئدیب تاپا بیلمه‌يه‌سن، دۆشمن الینه دۆشه‌سن.
- کۆردوغلو آتاسی‌نین يانینا گئده‌سی اولدو. آناسیندان رۆسخت ایسته‌دی.
- آناسی ازل ایسته‌دی رۆسخت وئرمه‌سین، گؤردو دۇراسی دئيیل، گئده‌جک. آخیردا
- علاجسیز قالیب رۆسخت وئریب دئدی:
- – گئت باباندان دا رۆسخت آل.
- کۆردوغلو اورادان باباسی‌نین يانینا گلیب دئدی:
- – بابا، منه رۆسخت وئر، چنلیبئله، آتام کوراوغلونون يانینا
- گئدیرم.
- عرب پاشا دئدی:
- – اوغول، سن هارا، چنلیبئل هارا، گئدیب آتانی تاپا بیلمزسن، پاشالار،
- خانلار هامیسی کور‌اوغلويا دۆشمندی، تۇتارلار سنی اؤلدوررلر. گئتمه،
- قال، ياشیم کئچیب قوجالمیشام، منیم يئریمده پاشا اول.
- کۆردوغلو راضی اولمادی. عرب پاشا گؤردو کی، کۆردوغلو قالماياجاق.
- آخیردا رۆسخت وئردی، دئدی:
- – خزینه‌دن پۇل گؤتور، ایلخیدان اؤزون بَينن بیر آت تۇت، مین ائله گئت.
- کۆردوغلو گئتدی خزینه‌دن پۇل گؤتوردو، ایلخی‌نین ایچینه گلدی، هانسی آتی
- تۇتدو میندی، داوام گتیره بیلمه‌يیب بئلی قێریلدی. قێراتدان مايا تۇتموش
- کهرنیشان ماديانین بیر بالاسی اولموشدو. بؤيوموشدو، ایلخی‌نین ایچینده
- ایدی. او زاماندان بۇ زامانا هئچ کیمه تۇتولموردو. کۆردوغلو کمند
- آتدی، همین آتی تۇتدو. گتیردی گۆجله يهری بئلینه باسیب میندی. سۆردو
- دربند بازارینا چێخدی. قێلینجی يوخ ایدی. فتحعلی آدلی بیر اۇستانین يانینا
- گلدی. آتدان دۆشدو، قێلینج ایسته‌دی. فتحعلی اونا بیر نئچه قێلینج گؤستردی.
- کۆردوغلو قێلینجلاری الینه آلدی، بیر-بیر باسدی قێردی، او يانا آتدی. اۇستا
- گؤردو، بۇ هئچ هێر-زێر قانمیر، دئدی:
- – آي اوغول، من بیر کاسیب آدامام، بیر بؤيوک کۆلفتی بۇنونلا دولاندیریرام،
- نیيه قێلینجلاری قێردین، تؤکدون، منیم اۇشاخلاریمی آج قويدون،
- بس سن نه ایسته‌يیرسن، سنه نئجه قێلینج لازیمدی؟
- کۆردوغلو ازل چێخارتدی قێردیغی قێلینجلارین پۇلون وئردی، سونرا اۆزونو
- اۇستايا تۇتوب، گؤرک نه دئدی:
- جانیم اۇستا، منه بیر قێلینج قايیر،
- نه اۇزون، نه گؤدک بیر قرار اولا.
- دسته‌سی شیرمايی، اؤزو قوشا نوي،
- وۇراندا اۆرکدن خبردار اولا.
- خوراسان پولادین ياخشیسیندان سئچ،
- ياخشیسی اولماسا يامانیندان کئچ،
- هر نَيه وۇراندا دايانمايا هئچ،
- يا فیل، يا کرکه‌دن، يا دا کل اولا.
- ایراقدی منزیلیم، اۇزاقدی آرا،
- سۇيو چوخ سرت اولا، ایرنگی قارا،
- ياری جێلخا پولاد، ياری نالپارا،
- قارا عقرب کیمی زهریمار اولا.
- حسن بَي کاماندار، اؤتورمز اووو،
- کیمدی بۇ دۆنيادا بابامین بابی؟
- قايیتمايا آغزی، ایتی قێلووو
- هر نَيه ديَنده تاریمار اولا.
- اۇستا مطلبی آنلادی. کۆردوغلونا نئجه قێلینج لازیمدی بیلدی. او ساعت
- خوراسان پولادی‌نین ياخشیسیندان سئچیب بیر قێلینج قايیردی، دئدی:
- – آل، بۇ سن ایسته‌ين قێلینجدی.
- کۆردوغلو قێلینجی گؤتوردو، بئلینه باغلادی، اۇستانین حاقینی وئردی.
- آتینی میندی، عرب پاشانین يانینا گلدی، دئدی:
- – بابا، ایلخیدان بۇ آتی تۇتدوم، خوشونا گلیرمی؟
- عرب پاشا گؤردو کۆردوغلو تۇتدوغو آت کوراوغلونون قێراتی‌نین بالاسیدی،
- دئدی:
- – اوغلو، چوخ ياخشی آتدی، ياخشی يول.
- کۆردوغلو باباسی ایله حالاللاشیب آناسی‌نین يانینا گلدی. آلدی گؤرک نه
- دئدی:
- جانیم آنا، گؤزوم آنا،
- رۆسخت وئر، من گئدر اولدوم.
- سنه قۇربان اؤزوم آنا،
- رۆسخت وئر، من گئدر اولدوم.
- مؤمینه خانیم:
- جانیم اوغول، گؤزوم اوغول،
- اللها تاپشیردیم سنی.
- سنه قۇربان اؤزوم، اوغول،
- اللها تاپشیردیم سنی.
- کۆردوغلو:
- نصیحتلرین تۇتارام،
- قانین قانلارا قاتارام،
- گئدیب آتاما چاتارام،
- رۆسخت وئر، من گئدر اولدوم.
- مؤمینه خانیم:
- کور‌اوغلودو آتان ذاتی،
- چنلیبئلده وار بۇساتی،
- بازوبنددی آماناتی،
- اللها تاپشیردیم سنی.
- کۆردوغلو:
- شیرین سؤزوم زۆلال ائله،
- قارا قاشین هیلال ائله،
- آنا، سۆدون حالال ائله،
- رۆسخت وئر، من گئدر اولدوم.
- مؤمینه خانیم:
- مؤمینه‌يم، سؤزوم زۆلال
- گؤزوم گؤيچک، قاشیم هیلال،
- سۆدوم اولسون سنه حالال،
- اللها تاپشیردیم سنی.
- سؤزلری تاماما يئتیشدی. مؤمینه خانیم کوراوغلونون اونا وئرمیش
- اولدوغو بازوبندی گتیریب اوغلونون قولونا باغلادی، دئدی:
- – يوللاردا اولمايا-بیلمه‌يه دئيه‌سن، من کوراوغلونون اوغلويام.
- آتانین دۆشمنی چوخدو، سنی اؤلدوررلر. منی گؤزو يوللاردا قويما.
- کۆردوغلو آناسی ایله ده حالاللاشیب چنلیبئله طرف يول باشلادی. کۆردوغلو
- اۆچ گۆن-اۆچ گئجه آت سۆروب گلدی احمد پاشانین شهرینه يئتیشدی.
- احمد پاشانین آداملاری کۆردوغلونو گؤروب پاشانین يانینا آپاردیلار.
- پاشا کۆردوغلونون آتینا، اؤزونه باخیب دئدی:
- – نچیسن، هاردان گلیب هارايا گئدیرسن؟
- آلدی کۆردوغلو:
- احمد پاشا، منیم يولوم
- داغیستاندان گلر اولدو.
- واردی قێلینج وۇران قولوم،
- درد باغریمی دلر اولدو،
- قالخانیم تۇتارام باشا،
- الیمدن چکرسن هاشا،
- داغیستاندا عرب پاشا
- نامرد مرده گۆلر اولدو.
- حسن بَيم، گللم دیله،
- مصر قێلینج آللام اله،
- گۆزاریمدی چنلیبئله،
- عرب آتیم بیلر اولدو.
- سؤز تاماما يئتیشدی. احمد پاشا آداملارینا دئدی:
- – بۇ نه دیللی-دیللی دانیشیر. تۇتون، قويمايین گئتسین.
- پاشانین آداملاری کۆردوغلونو تۇتماق ایسته‌دیلر. کۆردوغلو قێلینجینی
- چکیب اونلارین هره‌سینی بیر يانا قووالادی، آتینی سۆروب آرادان چێخدی،
- چنلیبئله طرف اۆز قويدو. بیر داغین باشیندا ایکی بزیرگانا راست گلدی.
- گؤردو بزیرگانلارین ياخشی شئيلری وار. کۆردوغلو بزیرگانلارین نه کی،
- ماللاری وار ایدی، اللریندن آلدی، اؤزلرینی بوش يولا سالدی. بزیرگانلار
- قاچیب ياخینداکی شهرین پاشاسی جعفر پاشايا شیکايت ائله‌دیلر. جعفر
- پاشا باشیندا آداملاری آتلاندی. کۆردوغلونون قاباغینی کسدی، دئدی:
- – بزیرگانلاری نیيه سويدون، کیمسن، هارايا گئدیرسن؟
- آلدی کۆردوغلو:
- – گل سنه سؤيله‌يیم، آي جعفر پاشا،
- يؤن چئویریب چنلیبئله گئدیرم.
- دۆشمنلر الیمدن چکرلر هاشا،
- يؤن چئویریب چنلیبئله گئدیرم.
- آت اوينادیب چنلیبئله چاتارام،
- آسلان کیمی دره‌لرده ياتارام،
- کمند آتیب ایندی سنی تۇتارام،
- يؤن چئویریب چنلیبئله گئدیرم.
- آنامین يولوندا قولو باغلیيام،
- آتامدان آيریيام سینه داغلیيام.
- آدیم حسن، کوراوغلونون اوغلويام،
- يؤن چئویریب چنلیبئله گئدیرم.
- پاشا حؤکم ائله‌دی، باشینداکی آتلیلار کۆردوغلونو تۇتسونلار. آتلیلار
- کۆردوغلونا هۆجوم ائله‌دیلر. کۆردوغلو ال قێلینجا ائله‌يیب آتلیلارا جۇمولدو.
- آتلیلار داوام گتیره بیلمه‌يیب هره‌سی بیر طرفه قاچدی.
- کۆردوغلو داوادان ال چکیب يولونا داوام ائله‌دی. ایکی گۆن، ایکی گئجه
- آت سۆردو، يولدا بیر قوجايا راست گلدی. گؤتوردو گؤرک قوجادان نه خبر
- آلدی:
- – قوجا بابا، من دولانیم باشینا،
- سؤيله کور‌اوغلودان منه بیر خبر!
- گؤرن چنلیبئلده قۇرورمو دؤوران؟
- سؤيله کور‌اوغلودان منه بیر خبر!
- قوواس کیمی دريالارا دالارام،
- مۆخننت يۇردونا تالان سالارام.
- ياغی دۆشمنلردن قێساس آلارام،
- سؤيله کور‌اوغلودان منه بیر خبر!
- حسن بَي ده ایگید، جاوان ياشیندا،
- اؤلدورر نامردی مرد ساواشیندا،
- چنلیبئلده دلیلری باشیندا،
- سؤيله کور‌اوغلودان منه بیر خبر!
- سؤز تامام اولدو. قوجا دئدی:
- – اوغول، چنلیبئله ياخینلاشیبسان، بیر آز آت سۆرسن، يئتیشرسن.
- کۆردوغلو اورادان کئچدی، آتینی سۆروب يول گئتمه‌يه باشلادی. گۆن
- ايیلن زامان گلدی چنلیبئله يئتیشدی. کۆردوغلو يول گلیب يورولموشدو.
- دۆشدو آتینی قوروغا بۇراخدی، اؤزو ده دیرسکلندی.
- دلیلردن بیر نئچه‌سی، ائيواز، دمیچریوغلو، عیسیبالی آت بئلینده مشق
- ائله‌يیردیلر. قوروقدا بیر آتلی آدام گؤردولر. ائيواز دئدی:
- – سیز بۇرادا دۇرون، من گئدیم، گؤروم او آدام کیمدی.
- ائيواز آتینی سيیردیب کۆردوغلونون يانینا گلدی، دئدی:
- – آي آدام، کیمسن، نه هۆنرله آتینی بۇ قوروغا بۇراخیبسان؟
- کۆردوغلو دینمز-سؤيله‌مز يئریندن قالخدی. چکیب ائيوازی آتدان
- سالدی. قوللارینی باغلادی، يئره يێخدی. يولداشلاری گؤزله‌دیلر، گؤردولر
- ائيواز گلمه‌دی، اونون دالیسینجا دمیرچیوغلو گلدی، ائيوازی قولو باغلی
- گؤروب، کۆردوغلونا هۆجوم ائله‌دی. کۆردوغلو ماجال وئرمه‌يیب چکدی، اونو
- دا آتدان سالدی، قوللارینی دالدان باغلادی، ائيوازین يانینا اۇزاندیردی.
- عیسیبالی گؤزله‌دی، گؤردو ائيواز ایله دمیرچیوغلو قايیتمادیلار. بۇ دفعه او
- دا آتینی سيیردیب گلدی، يولداشلارینی قولو باغلی گؤردو. کۆردوغلونون
- اۆستونه يؤنلدی. کۆردوغلو اونو دا آتدان سالدی، قوللارینی باغلادی. ائيواز
- ایله دمیرچیوغلونون يانینا يێخدی.
- دلیلر اۇزاقدان بۇنو گؤردولر، قاچیب کوراوغلونون يانینا گئتدیلر،
- احوالاتی اونا سؤيله‌دیلر. کور‌اوغلو قێلینج باغلادی، قالخان آسدی، عمود
- گؤتوردو، کۆردوغلونون يانینا گلدی. دلیلر کور‌اوغلويا گؤز ائله‌دیلر کی،
- اولمايا-بیلمه‌يه ال قالدیرارسان، آدینی دئيه‌سن، اؤزونو نیشان وئره‌سن.
- هامیمیزی قێردیرارسان. کور‌اوغلو کۆردوغلونا ياخینلاشیب دئدی:
- – اوغول، هاردان گلیب هارا گئدیرسن؟
- کۆردوغلو دئدی:
- – داغیستاندان گلیب چنلیبئله گئدیرم.
- کور‌اوغلو دئدی:
- – اوندا بۇردا نه گزیرسن؟
- کۆردوغلو دئدی:
- – به، بۇرا چنلیبئل دئيیلمی؟
- کور‌اوغلو دئدی:
- – يوخ، بۇرا چنلیبئل دئيیل، بۇرادان چنلیبئله بیر منزیل يولدو.
- کۆردوغلو ائله بیلدی کی، يولدا راست اولدوغو قوجا اونا يالان ساتیب
- آللادیب، چنلیبئلی دۆز نیشان وئرمه‌يیب.
- آلدی گؤرک نه دئدی:
- داغیستاندان چێخدیم باهار فصلینده،
- گزه-گزه بۇ دیيارا يئتیشدیم،
- باج وئرمه‌دیم، دۆشمنلردن باج آلدیم،
- چوخون سالدیم آهی-زارا، يئتیشدیم.
- آنامدان آيریلدیم، من گلدیم بئله
- دۆشمنین قانینی دؤندردیم سئله،
- گزه-گزه گلدیم بۇ چنلیبئله.
- چکسه‌لر ده منی دارا، يئتیشدیم.
- حسن بَيم، هر يارايا دؤزه‌رم،
- قێلینج الده، قالخان بئلده گزه‌رم،
- دلیلرین من يان-يانا دۆزه‌رم،
- سن اولارسان گۆنو قارا، يئتیشدیم.
- سؤز تامام اولدو. کور‌اوغلو گؤردو بۇ، خوشلوقلا دلیلری بۇراخماياجاق.
- آجیقلاندی، میسری قێلینجی چکیب کۆردوغلونا هۆجوم ائله‌دی. کۆردوغلو
- ایله وۇروشدولار. قێلینجدان مۇراد حاصیل اولمادی، ال عمودا آتدیلار. عموددان
- دا بیر کار آشمادی. بیر-بیری‌نین بئلینه ال آتدیلار، تۇتاشدیلار، بیر خئيلی
- گۆلشدیلر، يورولدولار، بیر-بیریلرینه زور ائله‌يه بیلمه‌دیلر، آرالاندیلار،
- هره‌سی بیر ياندا اوتوردو. يورغونلوقلارینی آلدیلار. قالخیب يئنیدن تۇتاشدیلار.
- کۆردوغلو بۇ دفعه زور وئریب کوراوغلونون دیزلرینی يئره گتیردی، بیر
- ده زور وئریب کۆرگینی يئره گتیردی، سینه‌سینه چؤکوب دئدی:
- – سؤيله گؤروم، قوجا، سن کیمسن؟
- کور‌اوغلو دئدی:
- – باشیمی کسسن ده ازل سن کیم اولدوغونو دئمه‌سن، من کیم
- اولدوغومو دئمه‌رم.
- کۆردوغلو کوراوغلونون سینه‌سیندن قالخدی. اونو بۇراخیب دئدی:
- – گل، اؤزونو بوش يئره اینجیتمه، کیم اولدوغونو نیشان وئر.
- آلدی کور‌اوغلو گؤرک نه دئدی:
- کور‌اوغلو:
- نئيله‌يیرسن مندن آد خبر آلیب –
- دۆشمن قانین يئره جالايان منم!
- قوشونلار تالايیب، تۆپلر داغیدان،
- دۆشمانی اۆست-اۆسته قالايان منم!
- کۆردوغلو:
- قئيزه گلیب هردن نره وۇراندا،
- دلیلر قول-قولا باغلايان منم!
- قێلینج چکیب مرد مئيدانا واراندا،
- سینه‌لر چال-چارپاز داغلايان منم!
- کور‌اوغلو:
- ایگید اولان هئچ آيریلماز ائلیندن،
- ترلان اولان سونا وئرمز گؤلوندن.
- شاهلار زارا گلیب جومرد الیندن
- لئش-لئشین اۆستونه قالايان منم!
- کۆردوغلو:
- قاچیرتدیم قووغادا مئيداندان پاشا،
- قوووب تاجیرلری دولدوردوم داشا،
- آخیردا الیمدن چکرسن هاشا،
- باشی-باش اۆستونه تێغلايان منم!
- کور‌اوغلو:
- کور‌اوغلو دئيیلم، اونا مثالام،
- هم رۆستمی-زالام، هم ده سالسالام،
- نئچه خوتکارلاری تاختیندان سالان،
- قنیملر اۆستونده اۇلايان منم!
- کۆردوغلو:
- حسن بَيم، مرد مئيداندا قالارام،
- قنیملر باشینا قێلینج چالارام،
- ياغی دۆشمنلردن قێساس آلارام،
- سئچیبن گؤوهری ساخلايان منم!
- سؤز تامام اولدو. بیر ده تۇتاشدیلار. يئنه کۆردوغلو کور‌اوغلونو
- يێخدی، دئدی:
- – بۇ ایکینجیدی، بیر ده يێخسام اؤلدوره‌جه‌يم.
- بۇنلار بۇرادا قالسینلار، سنه نیگار خانیمدان خبر وئریم. دلیلردن
- بیری قاچیب نیگار خانیما خبر آپاردی کی، بیر آتلی گلیب چێخیب
- دمیرچیوغلونو، ائيوازی، عیسیبالینی تۇتوب قوللارینی باغلايیب، کور‌اوغلونو
- دا ایکی دفعه يێخیب، بیر ده يێخسا اؤلدوره‌جک.
- نیگار خانیم تله‌سیک اؤزونو اورايا يئتیردی. گؤردو کور‌اوغلو ایله کۆردوغلو
- اۆچونجو دفعه‌‌دی تۇتاشیبلار. نیگار نه قدر ائله‌دی اونلاری بیر-بیریندن
- آرالاسین، کور‌اوغلو آرالانمادی، دئدی:
- – داوانی تامام ائله‌يک.
- کور‌اوغلو ایله کۆردوغلو خئيلی گۆلشدیلر. آخیردا کور‌اوغلو بیر دلی
- نره چکدی، کۆردوغلونو گؤتوردو يئره وۇردو. سینه‌سینه چؤکدو، میسری
- قێلینجی چکدی کی، باشینی کسسین. نیگار خانیم قويمادی. ایره‌لی يئریگیب الیندن
- آلدی. کور‌اوغلو دئدی:
- – اوغول، سنی اؤلدورمه‌دیم بۇراخدیم. لعنت شیطانا دئ، اؤزونو نیشان
- وئر.
- گؤتوردو کۆردوغلو گؤرک نه دئدی:
- آنادان اولاندا جومرد اولموشام،
- شیرین لهجه‌لیيم خوش نیشانلیيام.
- مئيداندا دۆشمنه قانلار آغلادان
- بیليی قۆووتلی، گؤزو قانلیيام.
- جاوانکن اؤزومو چؤللره سالدیم،
- قم منی چۇلغادی، دريايا دالدیم،
- هر يئرده نامرددن قیصاصیم آلدیم،
- مردلر آراسیندا آدلی، سانلیيام.
- بیر درد بیلن يوخدو دردیم چاغلیيام،
- دوست يولوندا من ده قولو باغلیيام،
- حسن بَيم، کوراوغلونون اوغلويام،
- يئریم خبر آلسان داغیستانلیيام.
- سؤز تامام اولدو. کور‌اوغلو دئدی:
- – يالان سؤيله‌يیرسن، منی آلداتماق ایسته‌يیرسن، سن کوراوغلونون
- اوغلوسانسا، قولوندا بازوبند اولمالیدی.
- کۆردوغلو قولونداکی بازوبندی آچدی، کور‌اوغلويا گؤستردی. کور‌اوغلو
- گؤردو اؤزو وئردیگی بازوبنددی. آلدی گؤرک نه دئدی:
- باشینا من دؤنوم، گۆل اۆزلو اوغول،
- کور‌اوغلو دئيیلن ایگید منم، من!
- دلی پاشالاری تاختیندان سالان،
- کور‌اوغلو دئيیلن ایگید منم، من!
- مۆخننت اولوبدو قاباغیمدا خار،
- خوتکارا يۇردونو ائيله‌میشم دار،
- سؤيله مؤمینه‌دن نه خبرین وار؟
- کور‌اوغلو دئيیلن ایگید منم، من!
- صدافرین قايناغینا، جوشونا،
- ياغی دۆشمن گله بیلمز تۇشونا،
- کور‌اوغلويام، اوغول، دؤنوم باشینا
- کور‌اوغلو دئيیلن ایگید منم، من!
- سؤز تامام اولدو. آتا-اوغول بیر-بیرلرینی تانیدیلار. قۇجاقلاشدیلار،
- گؤروشوب اؤپوشدولر. دلیلرین قوللارینی آچیب چنلیبئله گلدیلر. چنلیبئلده
- گۆن کئچیرمه‌يه، عؤمور سۆرمه‌يه باشلادیلار.
قایناق‌لار
- Azadliq . org