کوراوغلونون باللیجا سفری
edit
آنا آنلاتیم
- کوراوغلونون باللیجا سفری
چنلیبئلین قارلی اۇجا داغلاری، سێلدیریم قايالاری آغ بۇلودلارین باغرینی دئشیردی. داغلار آراسیندا يئرلشن چنلیبئل کوراوغلونون مسکنی ایدی. ياز آغزی اۆستوندن قار اکسیک اولمايان تپه‌لرین باشیندا بۇلودلار اوينار، شیمشکلر چاخار، گؤي گۇرولدار، چنلیبئل لئيسان ياغیشی‌نین آلتیندا اؤز داشلارینی، ياماجلارینی يۇياردی. بیر آزجا کئچمه‌میش بۇلودلار چکیلر، گۆنش چێخاردی. بیرجه ساعت بۇندان قاباق قۇجاغیندا قارا بۇلودلار اويناشان چنلیبئل ديَیشیب باشقا بیر عالم آلاردی. اۇغولداشیب بیری-بیریسی ایله ساواشان تپه‌لر باریشاردی. آرالاریندا اۇزانان قاری ننه جئجیمی بۇرايا باشقا بیر گؤزللیک وئرردی. ککلیکلر قاققیلداشار، بیلدیرچینلر قێي وۇرار، بۆلبوللر کوراوغلونون سسینه سس وئرردی. سێلدیریملارین باغریندان قاينايان بۇلاقلارین تؤکولدويو اتکلرده گۆل-گۆلو، بۆلبول-بۆلبولو چاغیرار، لپه‌لر بنؤوشه‌لره گؤز وۇراردی. بۇرا کور‌اوغلو قوروغو ایدی. کوراوغلونون ایپه-ساپا ياتمايان اؤزو کیمی دلی آتلاری بۇرادا اوتلاردیلار.
- ياز آغزی ایدی. کور‌اوغلو بیر آز راحتلانسین دئيه، دۆراتی دا ایلخیيا
- قاتدیرمیشدی. دۆرات ایلخیداکی خام دلی آيقیرلارلا چچیکلشیر، وۇروشور، يولا
- گئتمیردی کی، گئتمیردی. بیر گۆن، بئش گۆن آخیردا آيقیرلار جانا دويوب،
- گۆنلرین بیرینده دۆراتنان کۆشتويه قالخدیلار. قێراتدان باشقا دۆراتین
- قاباغینا هانسی آت چێخا بیلردی کی! دیشی ایله اونلاری قێزیل آل قانا بۇلايیب
- ایلخیينان برابر قاباغینا قاتدی. دۆرات ایلخینی چنلیبئلدن آشاغی تؤکوب
- قوولاماغا باشلادی. ایلخی داغلار آشدی، دۆزلر کئچدی، ياماجلار دێرماشدی،
- يئنیشلر يئندی، آخیردا گلیب باللیجالی قارا خانین بیچنه‌يینه دولدو.
- قارا خان کور‌اوغلو ایله دۆشمن ایدی. اؤز آداملارینا تاپشیرمیشدی کی،
- کوراوغلونون آتی، مالی اونون تورپاغینا کئچسه هايلايیب داملاسینلار. قاراخانین
- آداملاری کوراوغلونون ایلخیسینی قوروقدا گؤروب هايلايیب آپاردیلار.
- کور‌اوغلو چنلیبئلده اوتورموشدو. بیر ده ایلخیجی باشی آلوولو گلدی کی، بس
- ایلخی يوخدو.
- کوراوغلونون ایلخیسی ایتسین گؤر نه اولار؟.. دلی کور‌اوغلو جوشدو، گؤزلری
- اويناماغا باشلادی. بیر دلی نره چکدی. بۆتون چنلیبئل تیتره‌دی. داغلار،
- داشلار، ماغارالار سس-سسه وئردی. بۆتون دلیلر تؤکولوب گلدیلر. آلدی
- کور‌اوغلو گؤرک نه دئدی:
- هويدو دلیلریم، هويدو اوغوللار،
- هارداسا دۆراتیم تاپیلسین گرک!
- آمان چکسین ياغیلاریم الیمدن،
- مۆخننت اوباسی چاپیلسین گرک!
- دۇروب مرد مئيداندا گؤستررم هۆنر،
- قنیملر نرمدن ائلرلر هزر.
- قێرارام، ساغ-سولا وۇرارام شئشپر،
- قوشون قايالارا سپیلسین گرک!
- قوچ ایگید يالیيار اؤزو اؤز قانین،
- کور‌اوغلو، هر يانا ایشلر فرمانین،
- ایندی بَي، پاشانین، خوتکارین، خانین
- دریسینه سامان تپیلسین گرک!
- دلیلردن بیر پاراسی کور‌اوغلويا اۆرک وئرمه‌يه، اونو يوشوتماغا
- باشلادیلار کی، آي کور‌اوغلو، چوخ فیکیر ائله‌مه، آتلار تاپیلار، ایتمز. قورخودان
- کیم سنین ایلخینا گؤزونون اۇجو ایله باخا بیلر. بیر ده کی، تاپیلماياندا
- دا، قوي تاپیلماسین. دۆنيادا آتمی يوخدو. بَيلرین، پاشالارین بۆتون
- آتلارینی گتیرریک. دۆرات ایتیبسه، قێرات دۇرور. نیيه بیکئف اولورسان؟
- دلیلر کور‌اوغلويا نه قدر اۆرک وئردیلرسه ده، کور‌اوغلويا اثر
- ائله‌مه‌دی. آجیغیندان دوداقلارینی گمیریب بێغلارینی چئينه‌يیردی.
- نیگار خانیم گؤردو کوراوغلونون آجیغی سويويان آجیق دئيیل. گئتدیکجه
- شیر کیمی قێزیشیر. آخیردا قولونو بوينونا دولويوب دئدی:
- – آي کور‌اوغلو، حیرصلننده اؤزوندن چێخارسان. آجیقلانیب دوداغینی
- گمیرمکدن نه چێخار؟ آتلاری تاپماق لازیمدی. ایندی تدبیرین ندی اونو
- دئ. نیگارین سؤزلریندن سونرا کور‌اوغلو دئيه‌سن بیر آز يۇمشالدی. اونون
- جاوابیندا گؤرک نه دئدی:
- ایندی بیر مرد دلی گرک،
- تاپسین منیم دۆراتیمی.
- آلسین دۆشمانین الیندن،
- مینیب گلسین کۆر آتیمی.
- کیشنه‌يیب مئيداندا گزن،
- هردن ساغا-سولا سۆزن،
- دۆشمانین باشینی اۆزن،
- بیر اسره‌میش نر آتیمی.
- کور‌اوغلويام، يول گۆده‌رم،
- دۆشمان باغرینی دیده‌رم،
- آتلانیب اؤزوم گئده‌رم،
- چکین منیم قێراتیمی!
- کور‌اوغلو بئله دئينده تانریتانیماز ایره‌لی يئریگیب دئدی:
- – قوچ کور‌اوغلو، ایزین وئر آتلاری آختارماغا من گئدیم.
- کور‌اوغلو تانریتانیمازا ایزن وئریب دئدی:
- – تک گئتمه، دلیلردن يانینا آل.
- تانریتانیماز بئش دلیينن آتلانیب ایلخینی آختارماغا گئتدی. بۆتون
- چنلیبئلی آياقدان سالدیلار. داغی، داشی بیر-بیرینه وۇردولار. ایلخیدان بیر
- اثر تاپمادیلار کی، تاپمادیلار. دۆنيا کوراوغلونون گؤزونده قارالیردی.
- دلیلر هر نه قدر دلیل، نصیحت ائله‌يیردیلرسه، هئچ بیریسی قۇلاغینا
- گیرمیردی. دئيیلن سؤزلرین هئچ بیریسینی ائشیتمیردی. نیگار گؤردو يوخ،
- کور‌اوغلو اؤزونو، سؤزونو بیلمیر، درد اونو ائله آلیب کی، دۆنيا گؤزونده
- دئيیل. يئنه ده ایره‌لی يئریگیب قولونو اونون بوينونا سالدی. کور‌اوغلو ائله
- بیلدی کی، يۇخودان آيیلدی. دؤنوب نیگارا باخدی. آلدی گؤرک نه دئدی:
- نیگار، دۆراتین ایتميی،
- ياندیریر منی، ياندیریر.
- امه‌يیم زايا گئتميی،
- ياندیریر منی، ياندیریر.
- آلنیمداکی قالین قاتلار،
- دۆشمن گؤرسه باغری چاتلار،
- جاندان عزیز ياخشی آتلار،
- ياندیریر منی، ياندیریر.
- سینه‌مین دۆيونو، داغی،
- مۆخننت مئيدان آچماغی،
- کور‌اوغلويا ساتاشماغی
- ياندیریر منی، ياندیریر.
- کور‌اوغلو بۇرادا قالسین، سنه کیمدن دئيیم، قارا خانین نؤکرلریندن.
- ائله کی، قارا خان ایلخینی تۇتدو، باشلادی هر گۆن اؤزوندن دئمه‌يه
- کی، اير کور‌اوغلو مندن قورخماسايدی، آتلارین دالینجان گلردی. بۇنون
- بۇ حرکتی نؤکرلره آجیق گلدی. آخیردا نؤکرلردن بیریسی بۇ قرارا
- گلدی کی، گئدیب احوالاتی کور‌اوغلويا خبر وئرسین. نؤکر گئجينن
- چاریخلارینی برکیدیب، آغاجینی الینه آلیب، دۆشدو يولون آغینا. آز گئتدی،
- چوخ گئتدی گلیب چنلیبئله يئتیشدی. احوالاتی کور‌اوغلويا دانیشدی.
- کور‌اوغلو دقتله قۇلاق آسدی. ائله کی، قاراخانین نؤکری بۆتون
- احوالاتی دانیشیب قۇرتاردی، کور‌اوغلو امر ائله‌دی، اونون قوللارینی باغلايیب
- اۆستونه ده گؤزتچی قويدولار کی، قاچماسین.
- نؤکر مات-مهتتل قالمیشدی کی، اونون اللرینی نیيه باغلايیرلار.
- تانریتانیماز نؤکری بئله گؤرنده اونون قۇلاغینا دئدی:
- – اؤزونو ایتیرمه. بۇ دلی کوراوغلونون خاصيتیدی. تا او گئدیب گلنه‌جن
- سن بۇرادا قالاجاقسان. اير سؤزلرین دۆز چێخدی، اۆرگینی سێخما،
- سنه ائله بیر عوض وئره‌جک کی، قیيامته‌جن يادیندان چێخماياجاق. يوخ
- اگر يالان اولدو، اوندا تاي اؤزون بیل گؤر نه اولار.
- کور‌اوغلو چوخدان ایدی سفره چێخمامیشدی. قێرات تؤوله‌ده يئرنن-گؤينن
- اللشیر، میسری قێلینج حؤکم ائله‌يیردی کی، قێنینی پارچالاسین. کور‌اوغلو بیر
- نره چکیب سازی دؤشونه باسدی، گؤرک نه دئدی:
- آت بئلینده مرد دلیلر،
- باللیجايا سفریم وار!
- داوا گۆنو قۇرد دلیلر،
- باللیجايا سفریم وار!
- هۆنر ائلر قوچ اوغلو قوچ،
- قورخار، کئچمز يانیننان کؤچ.
- آلین اله میسری قێلینج،
- باللیجايا سفریم وار!
- هديان سؤزه بلی دئمم،
- مۆخننت مالینی يئمم،
- قوي دۆشمان بیلسین من کیمم،
- باللیجايا سفریم وار!
- شئشپریم سۇسايار قانا،
- دۆشمانناریم گلر جانا،
- قان اۇددوررام قارا خانا،
- باللیجايا سفریم وار!
- کور‌اوغلويام، بۇدو سؤزوم،
- مۆشکول ایشه نئجه دؤزوم،
- هئچ قووغادان دويماز گؤزوم،
- باللیجايا سفریم وار!
- کور‌اوغلو قۇش کیمی تۇللانیب قێراتین بئلینه میندی. آت بیر دفعه فێنخیریب،
- ایکی دال آياقلاری اۆسته قالخیب، دسته‌نین قاباغینا دۆشدو. دسته باللیجايا
- اۆز قويدو. داغلاری، داشلاری دۆز ائله‌دیلر. ایلدیریم کیمی آت سۆروب بیر
- گئجه‌ده باللیجايا چاتدیلار. کور‌اوغلو دلیلری شهرین کناریندا قويوب،
- اؤزو ایلخیجی پالتاری گئيینیب، آلتدان میسری قێلینج باغلادی. شهره گیردی.
- گزه-گزه، دولانا-دولانا، آخیردا گلیب قارا خانین يانینا يئتیشدی.
- قارا خان بیر ده باشینی قالدیریب گؤردو کی، قاباغیندا بیر اوغلان دايانیب،
- ائله بیر رۆستم زالدی. آمما پالتاریندان دئيه‌سن ایلخیچیيا اوخشايیر.
- بیر دقتله اونو آياقدان باشا سۆزوب سوروشدو:
- – سؤيله گؤروم کیمسن؟ هارادان گلمیسن؟
- کور‌اوغلو دئدی:
- – من کوراوغلونون ایلخیچیسیيام، چنلیبئلدن گلیرم.
- قارا خان دئدی:
- – ائله بازبوروتوندان اوخشايیرسان، سنی اؤزومه ایلخیچی ائله‌يه‌رم.
- کوراوغلونون ایلخیسینی گتیرمیشم، اونلاری اوتارارسان.
- کور‌اوغلو گؤردو نؤکر دوغرو دئيیرمیش. آنجاق هئچ بیر سؤز دئمه‌يیب
- گؤزله‌دی. قارا خان بێغلارینی بۇروب دئدی:
- – دئ گؤروم کور‌اوغلو ایله من نئجه‌يم؟ اومو ایگیددی، يوخسا من؟
- قارا خانین جاوابیندا آلدی کور‌اوغلو گؤرک نه دئدی:
- مئيدانا گیرنده پلنگ پنجه‌لی،
- داغیدار ائلینی گلسه، قارا خان!
- قێراتین اۆستونده قێلینج اوينادار،
- لال ائلر دیلینی گلسه، قارا خان!..
- منم دئيیب يئکه دانیشما بئله،
- گؤرمه‌میسن زربی دستینی هله،
- قالدیرار باشینا، قێرار گۆرز ایله
- يقین بیل بئلینی، گلسه، قارا خان!..
- تالار دؤولتینی، آلار مالینی،
- داغیدار پۇلونو، ياشیل، آلینی،
- يێخار ائوین، يامان ائلر حالینی
- سوودورار کۆلونو گلسه، قارا خان!..
- چتین قوچ کور‌اوغلو قورخا، اۆشونه،
- يئتر ياغیلارین يئددی، بئشینه،
- هايقیراندا قاتار قێرات دؤشونه،
- باغلايار قولونو گلسه، قارا خان!..
- کوراوغلونون بۇ سؤزوندن قارا خانین آجیغی تۇتدو، دئدی:
- – سنه دئدیم منی تعریفله، سنی اؤزومه ایلخیچیلیغا گؤتوروم، داها
- دئمه‌دیم کی، کور‌اوغلونو منیم اۆستومه چک.
- قارا خان کوراوغلونون بئله دیری دانیشماغیندان قورخويا دۆشموشدو.
- فیکیرلشدی آشنا، بۇ ائله اؤللم، اؤلدوررمدن دئيیر. ایلخیچی بئله اولماز. بۇ
- يقین يا کور‌اوغلو اؤزودو، يا دا کی، اونون دلیلریندن بیریدی. قارا خان
- هاوانی بۇلود گؤروب اکیلمک ایسته‌دی.
- کور‌اوغلو آمان وئرمه‌يیب اونو ياخالادی. ایلخیچی پالتارینی سويونوب کنارا
- آتدی. بیر نره چکدی کی، قارا خانین قۇلاقلاری باتدی. قارا خان ایشی بئله
- گؤروب آداملاری کؤمه‌يه چاغیردی. او طرفدن ده دلیلر کوراوغلونون
- نره‌سینی ائشیدیب سیگیرمه قێلینج هر ياندان تؤکولدولر. آرا قاریشدی. داوا
- باشلادی. داوانین شیرین يئرینده کور‌اوغلو اؤزونو قارا خانا يئتیردی. میسری
- قێلینج هاوادا پاریلدايیب، ایلدیریم يئره سوخولان کیمی قارا خانین تپه‌سینده
- گؤزدن ایتدی. قارا خانین آداملاری خانلارینی اؤلموش گؤروب داوام
- گتیره بیلمه‌دی. قێریلان قێریلدی، قالان قاچدی، داغیلدی. دلیلر قیيمتدن
- آغیر، وزندن يۆنگول شئيلرینی گؤتوردولر. دۆراتلا برابر ایلخینی دا
- قاباقلارینا قاتیب چنلیبئله يولا دۆشدولر. داغی آشیب، دۆزو کئچیب گلدیلر
- چنلیبئله چاتدیلار. نیگار خانیم قاباغا چێخیب، قێراتین باشینی تۇتدو.
- کور‌اوغلو آتدان دۆشدو. تئز امر ائله‌دی قارا خانین نؤکرینی گتیردیلر.
- اونا بیر آت، بیر ده بیر قێلینج باغیشلايیب، دلیلرین ایچینه قاتدی.
- مجلیس قۇرولدو، کئيفلر دۇرولدو. ساقی دولاندی، رۇح تزه‌لندی. نیگار
- الینده باده کوراوغلونون يانینا گلدی، دئدی:
- – آي کور‌اوغلو، بیلیرم سن سفردن داواسیز-شاواسیز قايیتمازسان. دئ
- گؤروم باللیجا سفرین نئجه کئچدی؟ کیمله قاباقلاشدین. کیمله دالاشدین.
- کور‌اوغلو باده‌نی آلیب ایچدی، اۆچتئللی سازینی دؤشونه باسیب دئدی:
- نه سۆزورسن آلا گؤزو،
- سانا دئيیم، تئللی نیگار.
- مجلیسیمین شیرین سؤزو،
- سانا دئيیم، تئللی نیگار.
- باللیجادا آچدیم مئيدان،
- مۆخننت دیله‌دی آمان،
- قاباغیمدان قاچدی دۆشمان
- يانا دئيیم، تئللی نیگار.
- قوچ دلیلریم دالاشدا،
- ار اۆرکلری تالاشدا،
- چکدیم قێلینج تر ساواشدا
- خانا، دئيیم، تئللی نیگار.
- نرم داوادا، قێزمیش نر،
- دۆنيايا گؤستردیم هۆنر،
- بوياندی الیمده شئشپر،
- قانا، دئيیم، تئللی نیگار.
- مۆخننتین اۆزو گۆلمز،
- نامرد دوستون قدرین بیلمز،
- کور‌اوغلو هۆنری گلمز
- سانا دئيیم، تئللی نیگار.
قایناق‌لار
- Azadliq . org