زرنیشان خانیمین چنلیبئله گلمه یی edit
آنا آنلاتیم
- زرنیشان خانیمین چنلیبئله گلمه یی کوراوغلو داستانی
بلی، اۇستاد دیلی مۆبارک اولار. ایندی سیزه هاردان خبر وئریم، کیمدن خبر وئریم، چارداخلی چنلیبئلده قوچ کور‌اوغلودان. کور‌اوغلونون کئفی کؤک، داماغی چاغ ایدی. اوغوللاری ائيوازلا حسن ساغسولوندا قولونا قۆووت، دیزینه تاقت، گؤزونه ایشیق ایدی. حسن داغیستاندان گلندن سونرا ائله بیل چنلیبئلین زیينتی بیره-بئش آرتمیشدی. حسن مشقلری ان چوخ دمیرچیوغلو ایله ائدیردی. حسنین آت مینمه‌سی، يهرده شاهین کیمی اوتورماسی، نیزه اويناتماسی، قالخان تۇتماسی، قێلینج وۇرماسی، گۆشت تۇتماسی، توپپوز ائندیرمه‌سی کور‌اوغلونو قۆرره‌لندیریردی. کوراوغلو نیگار خانیملا مشقه باخیردی.
- مشقدن سونرا ائيوازلا حسن نیگار خانیمین يانینا گلدیلر.
- اول-اول آنالارینا باش ايدیلر، سونرا آتالاری‌نین قارشیسیندا امره
- مۆنتظیر داياندیلار. کوراوغلو عاریف آدام ایدی. درحال ایشی باشا دۆشدو،
- نیگار خانیمین اۆزونه باخدی. نیگار خانیم کور‌اوغلونون قم درياسینا
- قرق اولدوغونو گؤروب، گؤزونو اطرافینا گزدیردی. جمعی چنلیبئل دلیلری
- اونلاری ائله قومارلامیشدی کی، ائله بیل هامی نیگار خانیمدان بیر “ه”
- جاوابی گؤزله‌يیردی. نیگار خانیم الینی-الینه وۇردو. دلیلرین نره‌سیندن
- يئر-گؤي لرزه‌يه دۆشدو. چنلیبئلده بیر مجلیس قۇرولدو کی، رۇزیگارین
- گؤزو هله بئله شاديانالیق گؤرمه‌میشدی. پیياله‌لر آبی-کؤوثرله دولدو.
- ائيوازلا حسن نۇش ائتدیلر. دلی مئهتر دۆراتی، عرباتی مئيدانا
- گتیردی. ائيوازلا حسن آلتدان گئيینیب اۆستدن، اۆستدن گئيینیب آلتدان
- قێفیللاندیلار. ائيواز دۆرون، حسن عرباتین قانتارغاسینی برکیتدی. بیر
- گؤز قێرپیمیندا آياقلارینی اۆزنگیيه قويوب، قێرغی کیمی يهره
- ايلشدیلر. مجلیسین دؤوره‌سینده گردیش ائدیب، کوراوغلو ایله نیگار
- خانیمدان حالاللیق دیله‌دیلر. نیگار خانیم اوغوللاری‌نین سفرینه بیر سؤز
- دئمسه ده، ياز بۇلودو کیمی دولموشدو. ایره‌لی يئریدی، حالاللیق ائدیب، ایزیندی
- – دئدی. دۆراتلا عربات نیگار خانیمین سؤزونه بند ایمیش کیمی شاهه
- قالخدیلار، داغیستانا يؤن آلدیلار.
- اۇستادلار دیلی يۆيرک اولار، دئمیشلر. سفرین اۆچونجو گۆنو شنلیک
- چێراقلارینی اؤلزیدن واختیندا جۆت قارداشلار آغقايانین قارتالی کیمی
- دمیرقاپی دربندده عرب پاشانین هيتینده آتدان ائندیلر. مؤمینه
- خانیمین اوغلو حسن گئدندن سونرا گؤزلری‌نین قوراسینی او قدر سێخمیشدی
- کی، جانیندا جان، دیزینده تاقت قالمامیشدی. سارالیب ساپا، اینجه‌لیب
- ایپه دؤنموشدو. ایينه‌نین گؤزوندن ساپلاناردی. زیل قارانلیقدا اوغلونون
- سسینی تانیسا دا، هيتده دايانانلاردان هانسی‌نین اوغلو اولدوغونو آنشیرا
- بیلمه‌دی. ائيوازی باغرینا باسیب دۇز کیمی يالادی. دئدی:
- – دوققوز آي، دوققوز گۆن، دوققوز ساعت، دوققوز سانیيه عذاب اذیتینی
- چکدیگیم، يۆيورويونون باشینی کسدیگیم دیرگیم-دیله‌يیم اوغول،
- آدام دا آناسینی گؤزو ياشلی قويارمی؟ سن گئدندن سونرا ایختیيار
- بابانی آتانین دۆشمنلری اؤلدوردولر. گؤزلریم سنی آختاردی، اوغول-اوغول
- دئمکدن دیلیم دۆيون باغلادی.
- ائيوازلا حسن مؤمینه خانیمین قولونا گیریب ایچری کئچدیلر.
- مؤمینه خانیم اوغلونو چێراغین ایشیغیندا تانیدی. آنا-بالا ياز سارماشیغی
- کیمی بیر مدت بیر-بیرینه ساریشدی. گؤز گرک ایدی، بۇ صحنه‌‌نی اوخشايیب
- تاماشا ائديدی.
- گئجه‌دن خئيلی کئچندن سونرا ائيواز مطلبین اۆستونه گلدی. دئدی:
- – آناجان، آتا-آنامیز سنی چنلیبئلده جمعی دلیلرین، خانیملارین
- آغبیرچيی گؤرمک ایسته‌يیر. اؤزون اۆچون نه عزیزدی خزینه‌دن گؤتور، ایختیياریندادی.
- صؤحبت اۇزاندی. ائيواز دۇروب دۆراتلا عرباتی يئمله‌دی. دان يئری
- سؤکولنده ائيوازلا حسن ياتاقلارینا اۇزاندیلار. او ياتان اۆچ گۆن، اۆچ
- گئجه ياتدیلار. آيیلاندا گؤردولر کی، مؤمینه خانیم ائله ديَیشیب، گؤز
- ایسته‌يیر تاماشا ائتسین. بۇ اۆچ گۆنده ائله بیل مؤمینه خانیمین بۆتون گنجلیگینی
- اؤزونه قايتارمیشدیلار. رنگی يالاف-يالاف يانیر، آي خجالتیندن
- اۆزونو بۆروموش، گۆن اۇتاندیغیندان بۇلودلارین آرخاسینا کئچمیشدی. زربافتالی
- قێرچین دون مؤمینه خانیما ائله ياراشیردی کی، ائله بیل جمعی هۇریلر
- اونون قارشیسیندا حسابا دۇراجاقدی. ائيوازلا حسن توققانین آلتینی
- برکیتدیلر. ائيواز دئدی:
- – آناجان، يولچو يولدا گرکدی. وعده ناخلفلیک ایگیده قباهتدی.
- مؤمینه خانیم چکیده يۆنگول، وزنده آغیر خزینه‌ده نه وارسا
- يۆکونو تۇتوب، قفله-قاتیرا يۆک وۇردوردو.
- مال ساغینی واختی قفله-قاتیر عرب پاشانین منزیلیندن قالخدی.
- حسن اۇشاقلیق دوستو، دمیرقاپی دربندده ایگیدلیکده، سخاوتده آد
- قازانان يهر اۇستاسی فتحعلینی چاغیرتدی. دمیرقاپی دربندین خانلیغینی
- اونا هواله ائدیب، جاماعتین دولانیشیغینی اونا تاپشیردی.
- قفله-قاتیر چنلیبئله يؤن آلدی. آز گئتدیلر، آلچاقلی، اۇجالی داغلار
- آشدیلار، بیر نئچه گۆندن سونرا اونلار ياغی قوروغونا چاتاندا گۆن بیر
- سیجیم بويو قالخمیشدی. دلیلر مؤمینه خانیمین پیشوازینا ياغی
- قوروغوندا دۇردولار. چنلیبئله چاتاندا مؤمینه خانیم گؤزلرینه
- اینانمادی. هر يئرده دلیلر، خانیملار قايیر-قايیر قايناشیردی. مؤمینه
- خانیمی هره بیر جۆر تسووور ائدیردی.
- مؤمینه خانیم آتدان ائننده قددی-قامتی، سۆراهی بويو، مغرور
- يئریشی ائله بیل چنلیبئله يئنی بیر زیينت وئردی. چنلیبئل خانیملاری
- مؤمینه خانیمین گؤزللیگیندن خجالت تری تؤکدولر. جمعی دلیلرین
- آناسی نیگار خانیم بئله مؤمینه خانیمین گؤزللیگیندن پوزولدو. آلا
- گؤزلری ایختیيارسیز پیياله کیمی دولدو. نیگار خانیمین ياز بۇلودو کیمی
- دولدوغونو گؤرن کوراوغلو تئللی سازین بمینی بم، زیلینی زیل کؤکله‌يیب
- باغرینا باسیب آلدی گؤرک نه دئدی:
- گل سنه سؤيله‌يیم، آي خوتکار قێزی،
- آغلاما، نیگاریم، او دا ياریمدی.
- دئدیگین سؤزلرین چێخدیمی ياددان؟
- آغلاما، نیگاریم، او دا ياریمدی.
- ایره‌لی گل تۇت الینله الینی،
- بۆلبول اولان آختارمازمی گۆلونو؟
- مندن اؤترو ترک ائيله‌دی ائلینی،
- آغلاما، نیگاریم، او دا ياریمدی.
- ياخشی باخ سن کور‌اوغلونون ذاتینا،
- قێلینج قالخانینا، پولاد قاتینا،
- بیر ائيواز عشقینه، حسن خاترینا،
- آغلاما، نیگاریم، او دا ياریمدی.
- سؤز تاماما يئتیشدی، نیگار خانیم ایره‌لی يئریدی. مؤمینه خانیما خوش
- گلدین دئيیب، مجلیسده کور‌اوغلونون سول طرفینده ايلشدیردی. مؤمینه
- خانیمین گلیشی شرفینه چنلیبئلده بیر کئف مجلیسی دۆزلدی کی، ایندیيه
- قدر دۆزه‌لن مجلیسلرین شاهی سايیلدی. دلیلر گئجه‌دن خئيلی
- کئچنه‌دک يئدیلر، ایچدیلر، کئفلر دۇرولدو، داماقلار چاغ اولدو.
- دئيیرلر، بئله شن-شۇخ مجلیسلردن سونرا کوراوغلو هئچ کسین جۆرت
- ائدیب قاپیسینی آچمادیغی قێرخینجی اوتاغا گئدرمیش. بیر ساعت اوردا تک-تنها
- اوتوردوقدان سونرا چێخارمیش. بۇ دفعه ده کوراوغلو همین اوتاغا گیردی. بیر
- ساعتدان سونرا اوتاقدان چێخاندا حسن گؤردو کی، کوراوغلو ائله حالدادی،
- ائله حالدادی بێچاق وۇرسان قانی چێخماز. گؤزلر قان چاناغی کیمی قێپقیرمیزی.
- حسن چوخ گؤتور-قوي ائتدی، هئچ نه باشا دۆشمه‌دی. او گۆندن
- سونرا حسن آتاسینی گؤزدن قويمادی. گؤردو کی، آتاسی سون گۆنلرده
- همین اوتاغا تئز-تئز گئدیر. هر دفعه ده پژمورده حالدا، گؤزلری نملی
- اوتاقدان چێخیر. کوراوغلو بیر دفعه ده اوتاغا گیرنده، حسن ده آستاجا
- اونون آرخاسینجا ایچری گیردی. حسن باخدی کی، آتاسی بالاجا بیر ساندیقچا
- آچدی، اورادان بیر قێز عکسی چێخارتدی، بیر ساعت اۆزونه تاماشا ائتدی، سونرا عکسی
- يئنیدن يئرینه قويماق ایسته‌دیکده، حسن آتاسی‌نین بیله‌يیندن ياپیشدی.
- حسن آتاسی‌نین الینده‌کی قێزین عکسینه باخدی. قێز نه قێز، آي پارچاسی. ائله
- بیل کی، اللهتالا خوش گۆنونده، خوش ساعتیندا، خوش دقیقه‌سینده قله‌مینی
- بۇ قێزین حۆسنونه چکیب. بیر باخان دئيیر، قوي بیر ده باخیم. حسنین
- کؤهنه ياراسی قؤور ائله‌دی. يادینا احمد خانین قێزی مئهری خانیم دۆشدو.
- آخی، مئهری ده بیر قێز ایدی، گؤزللیکده بۆتون هۇریلر اونون سانیندا دۇراردی.
- مئهری‌نین قددی-قامتی، سۆراهی بويو، دۇرنا کیمی جان آلان آلا گؤزلری،
- آلما کیمی قێرمیزی ياناقلاری، يۆز مین ایشوه ایله يئریشی، جئيران کیمی مغرور
- دۇروشو گؤزلری اؤنونده جانلاندی. مئهری خانیمین حسنله آيریلیغیندان
- سونرا چوخ خیففت چکمه‌سی، حسنین آتاسیندان ایجازه آلیب، احمد
- خانین يانینا قايیدارکن، قاپیدان قالخان جنازه‌نی گؤرمه‌سی، حسنین
- ياخا يێرتیب، اۆز جێرماسی، آغ گۆنونون گؤي اسکیيه دۆيولمه‌سی اۆرگی‌نین
- باشینی ياندیردی. اۆرگی کؤورلدی. گؤزلری ياز بۇلودو کیمی دولدو. آتاسی‌نین
- حالینا آجیدی.
- دئدی:
- – آتايی مهریبان! سؤيله، بۇ کیمدی؟ نه اۆچون هر دفعه بۇ اوتاغا
- گیریب او قێزین عکسینه باخدیقدان سونرا آغلايیرسان؟ مگر من اؤلموشم
- کی، قوچ کوراوغلو خیففت چکسین؟ يا بۇ سیرری منه آچمالیسان، يا دا آنامی
- دا گؤتوروب بۇ ساعت چنلیبئلی ترک ائده‌جه‌يم.
- کوراوغلو دئدی:
- – اوغول، گل داشی اته‌يیندن تؤک. بۇنو بیلمه‌سن ياخشیدی. ائله شئيلر
- وار کی، آداما دم گتیرر، ائله شئيلر ده وار کی، قم. بۇ عکسین گتیردیگی
- دم دئيیل، قمدی. من ایسه سنی قملی يوخ، دملی گؤرمک ایسته‌يیرم.
- حسن دئدی:
- – باباجان! دم ده، قم ده ائکیزدی. اوغلون باشی يا دمده، يا
- قمده گرک. سن اونون يئرینی، يۇردونو دئ، دالیسیننان ایشین يوخدو.
- کوراوغلو چوخ دئدی، حسن آز ائشیتدی. قێرساققیز اولوب باباسی‌نین ياخاسیندان
- ياپیشدی. کوراوغلو گؤردو حسن زلی کیمی ياپیشدیغیندان قوپان
- دئيیل، ال اۇزادیب دیواردان بۇلغورلو سازینی گؤتوردو. بمینی بم، زیلینی
- زیل کؤکله‌دی. اۆزونو اوغلونا تۇتوب گؤتوردو گؤرک نه دئدی:
- باشینا دؤندويوم، گۆل اۆزلو اوغول،
- قان آغلار، قان آغلار دیده‌لریمیز.
- يئددی ایلدی حسرتینی چکیرم،
- قان آغلار، قان آغلار دیده‌لریمیز.
- سنه سؤيله‌دیگیم سؤزون دۆزودو،
- سینمده‌کی محبتین کؤزودو،
- آغ شهرده قارا پاشا قێزیدی،
- قان آغلار، قان آغلار دیده‌لریمیز.
- ایگید اودو اؤز دردینی بیلدیره،
- دۆشمنی آغلادیب، دوستو گۆلدوره،
- کور‌اوغلويام، بۇ درد منی اؤلدوره،
- قان آغلار، قان آغلار دیده‌لریمیز.
- سؤز تاماما يئتدی. حسن آغايا قالخدی. ال-ال اۆسته باباسیندان سؤز
- ایسته‌مک اۆچون خاهیشه مۆنتظیر داياندی.
- کوراوغلو ایشی بئله گؤروب دئدی:
- – ایزیندی.
- حسن دئدی:
- – آتئيی مهریبان! آغ شهره اؤزوم گئده‌جم. يا او قێزی سنه گتیره‌جم،
- يا دا بۇ باشدان کئچه‌جم.
- کوراوغلو دئدی:
- – اوغول، سن منی دۆز باشا دۆشمه‌دین. من عکسه باخاندا اوندان
- اؤترو آغلامیرام کی، قارا پاشانین قێزینی سنه آنالیق گتیره بیلمیرم.
- اونا گؤره آغلايیرام کی، او قێزی چنلیبئله گلین گتیرمه‌يین واختی چاتیب.
- سنی ایسه هله آغیر سفرلرده برکدن-بوشدان چێخارمامیشام. آنان
- نیگاری گتیرمه‌يه گئدنده من آرتیق رؤوشن يوخ، کوراوغلو ایدیم. او
- واخت من آنان نیگار اۆچون ایستانبولا گئدرکن جمعی دلیلر منیمله
- گئتمک ایسته‌دیلر. من راضی اولمادیم. ایندی، اوغول، آتدی، آرواددی، پاپاقدی،
- کیشی اۆچون قئيرتدی. سفر آغیر، سنسه تجروبه‌سیز. اونونچون آغلايیرام.
- آتاسیندان بۇ سؤزلری ائشیدن حسن دئدی:
- – آتاجان، سینه‌مه بیر خانه سؤز گلیب، گؤر نه دئيیرم:
- ایگید گرک آتلانا،
- آتین مینه، آتلانا.
- مرد اودو کی، دؤيوشده،
- هر يارايا قاتلانا.
- ایندی، آتئيی-مهریبان! سێناق سنده، قۆووت منده. میزان سنده، عاغیل
- منده. بۇ مئيدان، بۇ دا من. نئجه ایسته‌يیرسن، ائله ده ایمتاهانا چک.
- کوراوغلو گؤردو حسندن ياخا قۇرتارا بیلمه‌يه‌جک. دئدی:
- – اوغول، منیم ده سینه‌مه بیر نئچه خانا سؤز گلیب. قوي اونو دا
- دئيیم، بلکه باشا دۆشه‌سن.
- آلدی کوراوغلو:
- باشینا دؤندويوم، مهریبان اوغول،
- گئتمه، اوغول، گئتمه آغ شهره سن.
- تزه‌جه تاپمیشام قندینن-نوغول،
- گئتمه، اوغول، گئتمه آغ شهره سن.
- آلدی حسن:
- باشینا دؤندويوم مهریبان آتا،
- آتا، گئتمه‌لیيم آغ شهره من.
- چاغیررام مؤولانی دادیما چاتا،
- آتا، گئتمه‌لیيم آغ شهره من.
- آلدی کوراوغلو:
- آغ شهرین پولادداندی يانیسی،
- هرلنسن تاپمازسان، بیردی قاپیسی،
- قاراولدو بؤيوک-کیچیک، هامیسی،
- گئتمه، اوغول، گئتمه آغ شهره سن.
- آلدی حسن:
- گرک آغ شهری اودا ياندیرام،
- هاسارلار داغیدیب، قاپی سێندیرام،
- قوشون قێریب، پاشاسینی اؤلدورم،
- آتا، گئتمه‌لیيم آغ شهره من.
- آلدی کوراوغلو:
- کور‌اوغلويام نیتیمی يئتیردیم،
- پاشالاردان باجی-خراج گؤتوردوم،
- يئددی ایلده بیر عکسینی گتیردیم،
- گئتمه، اوغول، گئتمه آغ شهره سن.
- آلدی حسن:
- کور‌اوغلوسان، سن آلینماز قالاسان،
- قويمام سنی قمه، ياسا دالاسان،
- حسن بَيم، ایندی منی سێنا سن،
- آتا، گئتمه‌لیيم آغ شهره من.
- آتا-بالا سؤزلرینی تامام ائيله‌دی. کوراوغلو گؤردو يوخ حسندن
- ياخا قۇرتارماق چتین ایشدی. آخیر علاجسیز قالیب حسنی آغ شهره يولا
- سالماق اۆچون ضیافت دۆزلتدی. نیگار کور‌اوغلونون ساغیندا، مؤمینه
- خانیم سولوندا ايلشدی. کوراوغلو آياغا قالخدی، دئدی:
- – دلیلریم، يئددی ایلدی قارا پاشانین قێزی زرنیشان خانیمین عکسینی
- چنلیبئلده آيریجا اوتاقدا گلینیم دئيه ساخلايیرام. من، عکسی دوستوم
- مئهترباشی آبدورراهمانین واسطه‌‌سیله الده ائده بیلمیشدیم. ایندیی ایسه
- سیزدن نه دانیم، کؤنلومه اوغول تويو دۆشوب. مصلحت سیزدن، رۆسخت
- مندن.
- دمیرچیوغلو دئدی:
- – آي کوراوغلو، ایگیدی داردا، تاجیری واردا سێنايارلار.
- ائيواز دئدی:
- – اوندا گرک من ده گئدم. دده‌‌لر دئمیش: “قارداش قارداشا تن
- گرک، تن اولماسا گئن گرک!”
- بللی احمد دئدی:
- – بئله اولماز، حسن بیزدن گۆجلو اولسا دا، هله برکه-بوشا دۆشمه‌يیب.
- بۇرادا تک قۆووتلی اولماقدان باشقا، دۆشدويو چتین وضعیتدن
- چێخماغی باجاران عاغیللی مصلحتچی ده گرکدی. دلی حسنین بۇ
- ایشده هامیدان سریشته‌سی چوخدو. او، يئرین آلتینی دا، اۆستونو ده بیلیر. تدبیر
- ده ایگیدین بیر ياراشیغیدی.
- نیگار خانیم دئدی:
- – دلیلر! من گؤرورم کی، کوراوغلو کیمی هامینیزین کؤنلونه توي
- دۆشوب. نه اولار، مۆبارکدی. آمما ایگید يار سئومه‌يه تک گئتمه‌لیدی.
- حسنین مشقی ده، آشیق کیمی مجلیس آپارماسی دا خوشا گلیر. اوخوماغی
- آشیق جۆنوندان دا گئری قالمازدی. بیر ده کی، حسنین ياغی قوروغونداکی
- زارافاتی نه تئز يادینیزدان چێخدی.
- آشیق جۆنون ائله بیل، نیگار خانیمین سؤزونه بند ایمیش. الینی قۇلاغی‌نین
- دیبینه آپاریب بیر باياتی چکدی، دئدی:
- عزیزیيم مردانه،
- سؤزوم دئدیم مردانه،
- قورخاغا اوغول دئمز
- قوچاق آتا، مرد آنا.
- نیگار خانیم دۆز دئيیر. حسن اۇستاد آشیقلاردان گئری قالمازدی، لفزی
- شیریندی. ساز هئچ کسی دار-داماندا قويمايیب. بضا اونون گؤردويو ایش
- بیر قوشونون گؤردويو ایشدن اؤتکون اولور.
- کوراوغلو پیياله دولدوردو. حسن ایره‌لی يئریگیب پیياله‌نی آتاسیندان
- قبول ائتدی. حسن پیياله‌نی نۇش ائدیب قۇرتارمامیش دلی مئهتر عرباتی
- مئيدانا چکدی. حسن اول-اول قسساب آلیيلا، زرقلم خانیملا،
- سونرا کوراوغلو، نیگار خانیم، آناسی مؤمینه خانیملا حالاللاشدی.
- عرباتین بئلینه قالخاندا کوراوغلو دئدی:
- – اوغول! آغ شهره سن بیر مال-قارا اؤروشه چێخاندا، بیر ده ناخیر
- آخشام قايیداندا گیره بیلرسن. آغ شهرده مئهترباشی آبدورراهمانی
- تاپارسان. آنجاق اونون ائوینه قوناق دۆشرسن. او، سنی منیم بۇلغورلو
- سازیمدان تانیياجاق. سنه نه دئسه، اونا عمل ائت. آغ شهرده اؤزونو هئچ
- کسه نیشان وئرمه. قوي هامی سنی آشیق کیمی تانیسین. دی، اۇغور اولسون!
- حسن عرباتی مئيداندا جؤولانا گتیریب، اۆز تۇتدو آغ شهره.
- اۇستاد دیلی يۆيرک اولار. حسن گۆنه بیر منزیل، تئي منزیل يولون دامارینی
- قێردی. عربات آغزینی نققاره کیمی آچیب يئل کیمی اۇچوردو. دان يئری
- قێزارار-قێزارماز حسن آغ شهره چاتدی. مال-قارا اؤروشه چێخاندا آغ
- شهرین قالا قاپیسیندان شهره گیردی. شهرده بیر قدر فێرلاندی.
- گؤردو بئله گئتسه مئهترباشی آبدورراهمانی چتین تاپاجاق. مال مئيدانی‌نین
- باش طرفینده يئرلشن نالبندین يانینا گلدی. نالبند درحال
- آياغا قالخدی کی، مۆشتریسینی دینله‌سین. حسن دئدی:
- – نالبند قارداش! آتیم بیر آز آزارلايیب. مئهترباشی آبدورراهمانی
- سالغا وئریبلر. اونون ائوینین يئرینی دئمزسن؟
- نالبند شيیردینی چاغیریب دئدی:
- – آ بالا، يانشاغی مئهترباشیگیله اؤتور، اؤزون ده تئز قايیت.
- حسنله شيیرد بیر-ایکی دولانباج کۆچه کئچیب مئهترباشی‌نین ائوینه
- چاتدیلار. شيیرد ایری چاخچاخلی قاپینی گؤستریب دئدی:
- – يانشاق! بۇ دا مئهترباشی‌نین ائوی.
- حسن جیبیندن بیر آز خێردا-قۇروش چێخاریب شيیردین اووجونا باسدی.
- ساغ اول دئيیب، دوققازا ياخینلاشدی. مئهترباشی گؤردو بیر آتلی دوققازدان
- ایچری گیردی، اونون بۇ بويدا، بۇ بۇخوندا دوستو، تانیشی اولمايیب. يانيؤره‌سیندن
- يانشاقدان چوخ کور‌اوغلويا اوخشايیر. ایره‌لی يئریدی. يانشاغین
- سلامینی آلدی. اوغلانین ادب-ارکانی خوشونا گلدی. آتی تالوارین آلتیندا
- راهلادی. يانشاغی ائوه دعوت ائتدی. چاي-چؤرک اورتايا گلدی، يئيیب، ایچدیلر.
- مئهترباشی دئدی:
- – بابا مئهتر! بیز يانشاقلار صؤحبتی سؤزله دئينده دیلیمیز اود
- تۇتوب يانیر، اگر ایزین وئرسيدین سؤزومو سازلا دئيردیم.
- مئهترباشی:
- – ایزیندی، يانشاق!
- حسن بۇلغورلو سازی کؤينکدن چێخاردی، سازین بمینی بم، زیلینی
- زیل کؤکله‌دی. گؤتوردو گؤرک مئهترباشی آبدورراهمانا اؤزونو نئجه
- نیشان وئردی:
- گل سنه سؤيله‌يیم، مهریبان عمی
- بابام منی بۇ دیيارا گؤندریب.
- آهو-فقانیندان چوخ چکیر قمی،
- بابام منی بۇ دیيارا گؤندریب.
- آبدورراهمان:
- باشینا دؤندويوم آي جاوان اوغلان،
- بابان کیمدی، اونو منه دئيیرسن؟
- دئ، نیيه آغلايیب چوخ چکیر فغان،
- بابان کیمدی، اونو منه دئيیرسن؟
- حسن:
- پاشا، خوتکارلاردان خراج آلیبدی،
- ایندی گؤرسن سارالیبان سولوبدو،
- بۇ شهرده اینتیظاری قالیبدی،
- بابام منی بۇ دیيارا گؤندریب.
- آبدورراهمان:
- تک قوچ کور‌اوغلودو ایگید، آد آلان،
- پاشالار مۆلکونه تالانلار سالان،
- بس او کیمدی سارالیبان هم سولان،
- بابان کیمدی، اونو منه دئيیرسن؟
- حسن باخدی کی، مئهترباشی دئيه‌سن يا هددیندن آرتیق عاریف، ياخود
- دا قاناجاقدان بیر بالاجا کارسالادی. اودو کی، اؤزو-اؤزونه دئدی: گل بۇنا
- “آتوستو” اۆزرینده بیر کوراوغلو باياتیسینی نره چک، سونرا تخللوسونو
- ایسناد وئر. دئدی:
- – مئهترباشی سنه يازیغیم گلیر، قۇلاغینا بیر لوپا پامبیق تێخا.
- يازیقسان. سونرا منی وايقانلی گؤرمه.
- بۇنو دئيیب حسن بیر دلی نره چکدی. ائله بیل گؤي ياریلدی، ایلدیریم
- چاخدی:
- يئردن دۇرسا کوراوغلو،
- تورون قۇرسا کوراوغلو،
- قان سئل کیمی تؤکولر،
- بیر قێي وۇرسا کوراوغلو.
- يار يولوندا من ده قولو باغلیيام،
- آه چکیبن، سینم اۆستو داغلیيام.
- آدیم حسن، قوچ کوراوغلو اوغلويام،
- بابام منی حۆضورونا گؤندریب.
- آبدورراهمان:
- آبدورراهمانام، بیل مئهترلیک پئشمدی،
- خوش گلیبسن، سنه قۇربان باشیمدی،
- کوراوغلو دا عزیزیم، قارداشیمدی،
- ایندی بیلدیم، بابان کیمدی دئيیرسن.
- حسن سازلا دئدیگینی سؤزله مئهترباشینا دئدی. مئهترباشی دئدی:
- – اوغول، سنی ایمتاهانا چکمک يئرسیزدی. اونسوز دا کوراوغلو بۇلغورلو
- سازی آنجاق ان عزیز آدامینا وئره بیلر. آمما اوغول، من بیلن اونون
- حسن آدلی اوغلو يوخدو. من تانیدیغیم اوغلونون آدی ائيوازدی.
- حسن دئدی:
- – ائله‌دی، عمی. من دمیرقاپی دربندلی عرب پاشانین قێزی
- مؤمینه خانیمدان اولان اوغلويام. آدی منه آتام يوخ، بابام وئریبدی.
- – هه، ایندی بیلدیم. آمما اوغول، نه باده بۇرالاردا اؤزونون کور‌اوغلونون
- اوغلو اولدوغونو، چنلیبئلدن گلدیگینی آغزیندان قاچیراسان. قارا
- پاشا دیری-دیری درینه سامان تپر. مطلبین ده منه آيدیندی. زرنیشان
- خانیمین عکسینی بیز يئددی ایله چالیشیب الده ائده بیلدیک. نیتین خوش اولسا
- دا، اونون اؤزونو الده ائتمک چوخ مۆشکول ایشدی.
- حسن دئدی:
- – عمیجان، سن اونون يئرینی، يۇردونو منه سالغا وئر، قالانیندا ایشین
- يوخدو، اؤزوم دۆزلده‌رم. مئهترباشی گؤردو کی، حسن چوخ قێردیرماسینا
- گئدیر. بۇنا هئچ تانری تؤرپوسو ديَمه‌يیب، ائله اؤز دئدیگینی دئيیر.
- مئهترباشی دئدی:
- – اوغول، عاغیل-عاغیلدان سۆيوشوکلو اولار. فاتما قاری ایله مصلحتلشک.
- بئله ایشلرده اونون سریشته‌سی چوخدو.
- مئهترباشی قونشولارینداکی فاتما قارینی چاغیرتدیردی. فاتما قاری
- ایچری گیرنده حسنین بوي-بۇخونو، خطتی-خالی خوشونا گلدی. اۆرگینده
- برکاللاه سنی دوغانا، الله ساخلاسین – دئدی. قاری قوناغا خوش گلدین
- دئيیب تاختین بیر طرفینده اوتوردو.
- حسن باخدی کی، فاتما قاری لاپ آشیق جۆنونون دئدیگی کیمیدی.
- – قاریلار دۆرلو اولور، قاری وار ایمان قۇرآن، قاری وار ایلان وۇران، قاری
- وار ایپيی، قاری وار کؤپيی، قاری وار هولدوروم هوپ، قاری وار کولدوروم
- کۇپ، قاری وار بالاغی باتداق، قاری وار دابانی چاتداق. بۇ قاری چوخبیلمیشدی.
- اۆز-گؤزوندن زهر ياغسا دا ایپيیدی، ایمان قۇرآندی. دیل تاپماق اولار.
- مئهترباشی دئدی:
- – قاری ننه، سنه بیر ایشیمیز دۆشوب. ال بیزیم، اتک سنین.
- قاری دئدی:
- – ه، مئهترباشی! من بايتار دئيیلم، نالبند دئيیلم. سنین
- منه نه ایشین دۆشه‌جک؟ آتلاریيین نالی تؤکولوب نالبند چاغیر، ساققو
- اولوب، قوتور دۆشوب نه چوخدو آغ شهرده بايتار.
- مئهترباشی گؤردو قاری مطلبدن اۇزاقلاشدی. دئدی:
- – فاتما قاری، بۆتون ایلخی قۇربان اولسون سنین بیر آغ ساچینا. بیزیم
- دردیمیز آت دردی دئيیل. سن قارا پاشانین ائوینه گئدیب، گلیرسن. نئجه
- ائده بیلریک زرنیشان خانیمی بیزیم بۇ جاوان اوغلانلا بیر دفعه گؤروشدوره‌سن؟
- فاتما قاری زرنیشانین آدینی ائشیتجک، ائله بیل اونو ایلان چالدی. يئریندن
- دیک آتیلدی. آز قالدی قاپینی قويوب باجادان چێخسین. حسن قاری‌نین
- قارشیسینی کسدی.
- – ننه‌جن، بیز سنه بیر شئي ائله‌مه‌دیک. سؤزدو سوروشدوق. کؤمک
- ائتسن ده، ائتمه‌سن ده اؤز ایشیندی. بیز سنین آغ‌بیرچک ایمانینا پناه
- گتیردیک. قاری باخدی زرنیشان خانیما لايیق بیر اوغلان وارسا دا ائله بۇدو.
- آمما اؤزونو سێندیرمادی، دئدی:
- – اوغول، سن قوناقسان. بۇ گۆن بۇرداسان، صاباح الله بیلیر هاردا،
- آمما مئهترباشی آغلینی ایتیریب. آغ شهرده زرنیشان خانیمین آدینی
- تۇتانی دیری-دیری دیوارا هؤرورلر. جانینا يازیغین گلسین. نه قدر سؤز
- قارا پاشايا چاتمايیب، پله-پۆسه‌نی بۇردان يێغیشدیر. هله بۇ نئچه ایلده
- زرنیشان خانیمین اۆزونو بیرباشی پاپاقلی ایننی-جیننی گؤرمه‌يیب. اگر
- گؤرمه‌يه جۆرت ائدن اولوبسا، اونو باخدیغی يئرده قۇلاقلاریندان دیوارا
- مێخلايیبلار.
- مئهترباشی دئدی:
- – آي فاتما قاری، بیز سندن تدبیر دیله‌دیک، داها سندن اؤلوم
- ایسته‌مه‌دیک. رحمتلیگین قێزی، بیز هله‌لیک اؤلمه‌يه تلسمیریک. سنه نه
- اولوب؟
- حسن ال آتیب جیبیندن بیر اوووج آخچا چێخارتدی. قاری‌نین اووجونا
- باسدی، دئدی:
- – ننه، هله‌لیک ال خرجلیگیندی. نمرین سونرا.
- قاری باخدی آخچالارین هامیسی قێزیلدی. گؤزو کلله‌سینه چێخدی، دئدی:
- – اوغول، زرنیشان خانیم هر جۆمه‌دن جۆمه‌يه بۆلبوللو باغا سئيرنگاها
- چێخیر. من هر جۆمه آخشامی اونون ال-آياغینا خێنا قويماغا
- گئدیرم. عکسین وارسا منه وئر. کیم بیلر، خێنا قوياندا چالیشارام کی،
- يئره دۆشسون. زرنیشان خانیم سوروشسا دئيه‌رم کی، نومدی. اگر بیر
- شئي اؤيرنسم، آخشام سنه دئيه‌رم – دئيیب، قاری خۇداهافیسلشیب گئتدی.
- مئهترباشی دئدی:
- – اوغول، حسن. فاتما قارینی يامان يئرده ياخالادین. او، ایمانیندان
- کئچر، قێزیل آخچالاردان کئچمز. ایندی ائشیت، قارا پاشانین بیر آتی وار.
- آدینا آشقاردور دئيرلر. او آتی اله گتیره بیلمه‌سک هئچ بیر ایش گؤره
- بیلمریک. هله جۆمه گۆنونه وار. ایندی سن پاي-پیيادا بۆلبوللو باغا
- طرف گئت. يئرینی-يۇردونو مانشیرلا. ائله ائت کی، هئچ کس سندن شۆبهه‌لنمه‌سین.
- يوخسا ایشلر شۇلوق اولار. قاش قايیردیغیمیز يئرده، گؤز تؤکریک.
- اۇستاد دیلی يۆيرک اولار. آرادان بیر آز کئچمیشدی کی، فاتما قاری تنگنفس
- اؤزونو يئتیردی مئهترباشیگیله. دیل بوغازا قويمادی. ائله اۆتلک
- دانیشدی کی، ائله بیل آغزینا کیشمیشلی سۆدلو آش تؤکموشدولر. نه هاندان، نه
- هانا قاری سؤزونه آرا وئردی.
- مئهترباشی دئدی:
- – آي رحمتلیگین قێزی، نه اولوب؟ بیر اینسان کیمی دانیشسانا.
- قاری دئدی:
- – آي اوغول، ائله زرنیشان خانیمین آياغینا تزه‌جه خێنا قويوردوم کی،
- عکسین تێپپ ائله‌يیب يئره دۆشدو. سايمازيانا عکسی يئردن گؤتوروب، اؤپوب
- گؤزومون اۆسته قويدوم. سونرا عکسی قوينوما قويماق ایسته‌يیردیم کی،
- زرنیشان خانیم دئدی:
- – قاری، وئر گؤروم او نه عکسیدی؟
- دئدیم:
- – ننن جانینا فدا اولسون، نؤکرین حسندی، نومدی. بۇرالاردان
- چوخ-چوخ اۇزاقلاردا، قاف طرفلرده اولور. قوجا ننه‌سینی اۇنوتمايیب،
- يادا سالیب. ال بويدا عکسینی گؤندریب. بۇ جۆمه گۆنو قوناق گله‌جک.
- زرنیشان عکسه تفررینجه باخدی. شکیلده قاری‌نین صیفتی‌نین جیزگیلری
- آراسیندا هئچ بیر اوخشارلیق علامتی گؤرمه‌دی. دئدی:
- – قوجا کافتار، نه قدر درینه سامان تپدیرمه‌میشم، بۇ مۆرتد
- پزونگین کیم اولدوغونو سؤيله‌مه‌لیسن.
- اوغول، ایسته‌دیم کی، خانیمین فیکرینی آزدیریم، بیر شئي چێخمادی. آخیردا
- دۆزونو دئمه‌لی اولدوم. دئدیم:
- – خانیم، اللهدان گیزلی اولمايانی سندن نه گیزله‌دیم. بۇ بیر
- اوغلاندی کی، بوي-بۇخونونا باخاندا پاپاق دۆشور. دئيیرسن بیر ده باخیم.
- الله اوندان هئچ نَيی اسیرگه‌مه‌يیب. کیم اولدوغونو بیلمیرم. مئهترباشی‌نین
- قوناغیدی. هاردانسا قریب-قۆربت ائلدن سنی دئيیب گلیب. يان
- يؤره‌سیندن اونا اوخشايیر.
- او کیمدی؟ – دئيه زرنیشان خانیم بوغازیمدان ياپیشدی. دیلیم توپوق
- چال-چالا کوراوغلو دئيه بیلدیم. اوغول، زرنیشان خانیم منه بیر شیلله
- چکدی کی، گؤزومدن اود پارلادی. دئدی:
- – ایلان وۇران قاری، دۆزونو دئ، بۇ ایشی باشقا بیر آدام دا بیلیرمی؟
- دئدیم:
- – خانیم، ایمانسیز اؤلوم، اۆستومده سۇ تاپیلماسین، اوجاق قالانماسین،
- اگر بۇ سیرری بیر آدام بیلیرسه.
- دئدی:
- – ياخشی، شکیل قالسین. قوناغینا دا دئ کی، قوي بۇ جۆمه بۆلبوللو
- باغا گلسین.
- ایندی اوغول، سن اوبا ياتاندان سونرا بۆلبوللو باغا گئت. اؤزونه پۆنهان
- بیر يئر سئچ. گۆن شاخیياندا زرنیشان خانیم کۆلفرنگیده اولاجاق. قێزلار
- ایسه اؤز يئرلرینه دینجلمه‌يه گئده‌جکلر. فۆرصتی فؤوته وئرمزسن.
- اؤزونو درحال سالارسان کۆلفرنگه.
- حسن قاریيا بیر قدر ده خرجلیک وئریب يولا سالدی. ائل-اوبا شیرین
- يۇخودا ایکن حسن قاری دئدیگی کیمی ائله‌دی. گۆن شاخیياندا حسن اؤزونو
- زرنیشانین کۆلفرنگیسینه وئردی. حسن باخدی کی، زرنیشان بیر قێزدی،
- زۆلئيخا اونون الینه سۇ تؤکمه‌يه ياراشماز. قێز دئيیرم، قێزدیرما دئمیرم.
- آغیز پۆسته، بۇرون هیند فێندیغی، سینه سمرقند کاغیذی، گؤز پیياله،
- ماه جامالی برق وۇروب يانیر. باخدیقجا آدامین گؤزونون شوقونو آپاریر.
- دیققه‌سی مینار، ال وۇرما سێنار، باخ کناردا دۇر، ملر-مۆسکون کیمی
- بوينونو بۇر. حسن شکله باخدی، قێزا باخدی. زرنیشان خانیمین گؤزللیگی
- اونو اودا ياخدی. گؤزلر گؤزلره ساتاشدی، اۆرکلر سؤز آلیب دانیشدی.
- زرنیشان خانیم اؤزونو سێندیرمايیب دئدی:
- – اده، گاوور اوغلو يانشاق، سن هارا، بۇرا هارا؟ بۇرا قۇش گلسه
- قاناد، قاتیر گلسه دێرناق سالار. بیر قاشیق قانیندانمی، يوخسا شیرین
- جانیندانمی کئچیبسن؟ چوخداندی کی، ايلنجه‌سیز قالمیشدیق. ایندی امر
- ائده‌رم، صاباح سنی مئيداندا محشر آياغینا چکرلر. واختسیز اؤزونو
- بوزاردان املیک کیمی درینی بوغازیندان چێخارارلار. سامان تپیب قالا
- قاپیسیندان آسارلار. سنین کیمی هئيوره يانشاقلارین بیر ده بۆلبوللو
- باغا گیرمه‌سی اۆچون درس اولار.
- حسن دئدی:
- – خانیم، باغیشلا. منیم دریم او قدر ده آسان سويولماز.
- دریمه سامان تپمک اۆچون قۇرد اوغلو قۇرد گرک. ایزین وئر، سینه‌مه بیر
- نئچه خانا سؤز گلیب اونو دئيیم. سونرا ایستر اؤلدور، ایستر دارا چکدیر. باش
- منیم، فرمان سنین.
- زرنیشان خانیم يانشاقی سێناماق اۆچون ائله قێشقیردی کی، سسینه دايه‌سی
- گلدی. زرنیشان احتیاطسیزلیق ائتدیگیندن پئشیمان اولدو. اۆرگینده اؤزؤزونو
- دانلادی. نه ائده بیلردی. ایش-ایشدن کئچمیشدی. دئدی:
- – باغبانی سسله. باباما خبر وئرسین. بۇ هئيوره‌نی تۇتسونلار.
- هددینی اونا بیلدیرسینلر.
- دايه باخدی کی، خانیم قئيزله‌نیب، دئدی:
- – عؤمور-گۆنومون بزيی، تلسمه. يانشاقدی، بلکه ده بیلمه‌يیب،
- هئيوره‌لیک ائدیب. اونسوز دا اونون عجلی سنین الینده‌دی. قوي بیر-ایکی خانا
- سؤز اوخوسون. بلکه هئچ يانشاق دئيیل. گاوورون بیریدی، پزونگلیگینه
- سالیب.
- زرنیشان باخدی کی، دايه‌سی ده بۇ ایگیدین اله کئچمه‌سینی ایستمیر. اۆرگیندن
- اولماسا دا، کؤنوللو-کؤنوللسوز دئدی:
- – هئيوره يانشاق، دايه‌مه قۇربان اول. من اؤلومون اۆچون تلسمیرم.
- اؤلوم قاباغی آمانداسان. اوخو، ایزیندی.
- حسن بۇلغورلو سازی آلدی سینه‌ی ساندیغا.
- آلدی حسن:
- گؤزللر چێخیبدی سئيرنگاهینا،
- بنزه‌يیر جنّته بۇ باغلار ایندی.
- من قۇربانام گؤزللرین شاهینا،
- بنزه‌يیر جنّته بۇ باغلار ایندی.
- زرنیشان خانیم سیياه ساچیندان اۆچ تئل آيیردی، تۇرونجو ممه‌لری
- اۆزرینده ساز ائدیب گؤتوردو گؤرک جاوابیندا نه دئدی:
- يانشاق، دلیسنمی، يوخسا دیوانه؟
- دۆشموسن اؤلومون بازارینا سن.
- قوو کیمی جانینی سالیبسان اودا،
- دؤزمزسن بۇ عشقین آزارینا سن.
- آلدی حسن:
- يانشاقلارین پئشه‌سیدی سؤز دئمک،
- بالی قندی قاتیب شیرینجه يئمک،
- ياساقدیمی بۇ يئرلری دئ، گزمک؟
- دؤنوبدو گۆلشنه بۇ باغلار ایندی.
- آلدی زرنیشان خانیم:
- يانشاقسان، يامانجا، آمما دیللیسن،
- من بیلیرم قریب، اۇزاق ائللیسن،
- آدین ندی، دئ هانسی مکانلیسان؟
- دۆشرسن بابامین نظرینه سن.
- آلدی حسن:
- آدیم حسن بَيدی، شیرین دیللیيم،
- قولو قۆووتلیيم، دلیقانلیيام.
- کوراوغلو نسلیيم، چنلیبئللیيم،
- دۆشوب دیيارینا گۆزاریم ایندی.
- آلدی زرنیشان خانیم:
- بۇ يئرلرین صؤحبتیيم، سازیيام،
- يۆز قێز ایچره گؤزللرین گؤزويم،
- زرنیشانام، قارا پاشا قێزیيام،
- سؤيله، نیيه گلدین گۆزاریما سن؟
- سؤز تاماما يئتدی. زرنیشان خانیم دئدی:
- – حسن، ائشیتدیگیمه گؤره کوراوغلو يئددی ایلده عکسیمی زورلا الده
- ائدیب. اینشاللاه، ایندی ده يئددی ایل سنین ياسینی تۇتار. خوتکار قێزی الینه خێنا
- قويماق عوضینه باشینا قارا باغلار. جاوانسان، جانینا يازیغین گلسین.
- نه قدر کی، قانین قارا پاشانین الینده قلتان اولمايیب، سۆروک اپپه‌يینی
- گؤتوروب بۇردان گئت. زرنیشان خانیم بۇ سؤزلرینن حسنی ایمتاهان
- ائدیردی، گؤرسون اونا يار شیریندی، يوخسا جان.
- حسن باخدی کی، زرنیشان خانیم اونو حربه-زورباسی ایله ایمتاهانا
- چکیر. اودو کی، اؤزونون ایگیدلیگینی اونا ایسناد وئره‌رک دئدی:
- مرد اوغولون نیشانه‌سی
- قانیندا گرک ایگیدین.
- چکمه‌يه اؤزگه‌دن میننت،
- جانیندا گرک ایگیدین.
- بیر ایگیدین اولسا سانی،
- وۇرار قێلینج، تؤکر قانی،
- گۆرزو، نیزه‌سی، قالخانی،
- قولوندا گرک ایگیدین.
- ایگید اودو اولا گۆجو،
- آلا قالالاری، بۆرجو،
- اووخارلی میسری قێلینجی،
- بئلینده گرک ایگیدین.
- کور‌اوغلونون بالاسیيام،
- هر سؤزونو قاناسیيام،
- دئدیگینی داناسیيام،
- سؤزو دۆز گرک ایگیدین.
- من حسنم، قۇردوغلويام،
- دۆشمنیمه درد اوغلويام،
- نسیلجن، بیل، کور‌اوغلويام،
- آرخاسی گرک ایگیدین.
- سؤز تاماما يئتدی.
- حسن باخدی کی، زرنیشان خانیمین دیلی دئدیگینی اۆرگی دئمیر. اؤزؤزونه
- دئدی: کوراوغلو دئمیش، گل سن بۇنون اۇشاقلیغینی، جاوانلیغنی،
- قوجالیغینی يادینا سال، بلکه اۆرگی يۇمشالا.
- آلدی حسن:
- اۆچ ياشیندان بئش ياشینا واراندا،
- يئنیجه آچیلمیش گۆله بنزرسن.
- بئش ياشیندان اون ياشینا واراندا،
- آریدان ساچیلمیش بالا بنزرسن.
- زرنیشان خانیم اؤزونو ساخلايا بیلمه‌دی، شاققاناق چکدی. دئدی:
- – ايه، گاوور اوغلو يانشاق. جۆمله گۆندوغاندان گۆن‌باتان بۇغا
- بوينو بۇران، ایگید پهلوانلار قولونو قێران ارنلر منیم دردیمدن
- اؤلور. سن ده باشلامیسان منه اۆچ ياشیندان، بئش ياشیندان اوخوماغا.
- حسن باخدی کی، مطلبی زرنیشان خانیما چاتمادی. دئدی:
- – خانیم، سازی، سؤزو دینلرلر. ایلک کلمه‌دن آداما گۆلمزلر.
- هله گؤر اۇستاد سونراکی حالینا نه دئيیر.
- آلدی حسن:
- اون دؤردونده سئودا يئنر باشینا،
- اون بئشینده جاوان گیرر دۇشونا،
- چۆنکی يئتدین ایگیرمی دؤرد ياشینا،
- بوز-بۇلانیق آخان سئله بنزرسن.
- اوتوزوندا ککلیک کیمی سکرسن،
- ایگیدلیک ائيله‌يیب قانلار تؤکرسن،
- قێرخیندا ال حرامیندان چکرسن،
- سوناسی اوولانمیش گؤله بنزرسن.
- اللیسینده الیف قددین چکیلر،
- آلتیمیشیندا اؤن دیشلرین تؤکولر،
- يئتمیشینده قددین، بئلین بۆکولر،
- کاروانی کسیلمیش يولا بنزرسن.
- سکسه‌نینده سینیر يئنر دیزینه،
- دوخسانیندا قۆبار قونار گؤزونه،
- کوراوغلو دئر، چۆنکی يئتدین يۆزونه،
- اۇجا داغ باشیندا کولا بنزرسن.
- سؤز تاماما يئتدی. حسن باخیب گؤردو کی، دايه ایله زرنیشان خانیم
- بیر-بیرینی ائله قۇجاقلايیبلار کی، ایللر-آيلار حسرتلیسی کیمی. دم وئریبلر
- گؤز ياشینا. آنلادی کی، سؤز يئرینه دۆشدو. دئدی:
- – زرنیشان خانیم، من قوچ کور‌اوغلويا سؤز وئرمیشم. اؤلدو وار،
- دؤندو يوخ، واخت دارالیر. سن تدبیرینی دئ.
- زرنیشان گؤردو حسن سؤزونده بۆتؤودو. هده-قورخو يئری دئيیل.
- دئدی:
- – ایندی واختدی، آيریلمالیيیق. آخشام اۆستو دايم دالینجا گله‌جک.
- مئهترباشی آبدورراهمان آتامین آشقاردور آتینین تؤيله‌سینی ياخشی تانیيیر.
- آتین تؤيله‌دن چێخاریلماسینا او تدبیر تؤکر.
- حسن زرنیشان خانیملا، دايه ایله حالال-حۆممت ائله‌يیب بۆلبوللو
- باغداکی پۆنهان يئرینه چکیلدی. بیر آزدان باغ بوشالدی. حسن اؤزونو
- وئردی مئهترباشی‌نین ائوینه.
- مئهترباشی دئدی:
- – اوغول، حسن. نئجه گلدین، اوغلانسان، يا قێز؟
- حسن دئدی:
- – آبدورراهمان عمی، اوغلانام.
- سونرا دا او باشینا گلنلرین هامیسینی مئهترباشیيا ناغیل ائله‌دی.
- آخشاما حاضیرلیق گؤرولدو. دايه حسنه دئدی کی، گؤتور چارشووو،
- زرنیشان خانیم بیزی سارايدا گؤزله‌يیر.
- شئنلیک شیرین يۇخودا ایکن تداروک گؤرولدو. زرنیشان دا حسن کیمی
- آلتدان گئيینیب، اۆستدن، اۆستدن گئيینیب آلتدان قێفیللاندی، ياراقلاندی،
- ياساقلاندی.
- مئهترباشی آبدورراهمان دا قالا قاپیسی‌نین آغزیندا عرباتلا حسنی
- گؤزله‌يیردی. حسن مئهترباشی‌نین دئدیگی کیمی زرنیشانی گؤتوروب آشقاردورون
- تؤوله‌سینه يؤن آلدی. تؤولباشیيا بیر کیسه قێزیل وئریب دئدی:
- – تؤولباشی، آل بۇ آخچالاری، يئددی آرخدان دولانانینا بئله بسدی. آتی
- تؤوله‌دن چێخارانا کیمی دینمه، دانیشما.
- تؤولباشی تئز کیسه‌نی قوينوندا گیزلتدی. حسن تؤوله‌يه گیرنده ایسته‌دی
- آغزینی آچیب قێشقیرسین. زرنیشان خانیم لئي کیمی اونون باشی‌نین اۆستونو کسدی.
- الینده‌کی قامچی‌نین دستيی ایله کیشی‌نین باشینا ائله وۇردو کی، يازیق مئيید
- کیمی يئره سریلدی. حسن آشقاردورو تؤوله‌دن چێخاراندا گؤردو کی، تؤولباشی
- يئره سریلیب. زرنیشان خانیمین اۆزونه باخدی. زرنیشان خانیم دئدی:
- – بئله ياخشیدی، سس-کۆيدن اۇزاق اولاریق.
- حسن آشقاردورون بئلینه قالخان کیمی زرنیشان خانیمی ترکینه
- آلدی. آتی قالا قاپیسینا طرف سۆرمک ایسته‌دیکده تؤولباشی قێشقیردی:
- – قاراوول، قاراوول...
- سس-کۆي يايیلدی. قاراووللار هر يئرده بندی بره‌نی کسدیلر.
- زرنیشان خانیم دئدی:
- – حسن، ایشلر شۇلوخدو. علاج آشقاردورا قالیب. آتا بیر قامچی چک.
- حسن آشقاردورا ائله بیر قامچی چکدی کی، آت ياي کیمی دارتیلیب قالا
- قاپیسی‌نین اۆستوندن آشیریلدی. قاپی آچیلیب قوشون چێخاناجان مئهترباشی
- عرباتین اۆزنگیسینی باسدی. حسن قێرغی کیمی عرباتین يهری‌نین قاشیندا
- اوتوردو. قوشون حسنله زرنیشان خانیمین دالینجا آت سالدی. حسن دئدی:
- – زرنیشان خانیم، دئيه‌سن قوشون بیزدن ال چکمه‌يه‌جک. بیر ده
- کی، چنلیبئلده دلیلر ائله بیلر کی، من اوغورلوق ائدیب سنی قاچیرمیشام.
- سن بیر آز گؤزله، من قوشونلا حاق-حسابی چۆرودوم.
- زرنیشان خانیم دئدی:
- – سن قارا پاشانی تانیمیرسان. اونون قوشونونون سايی، حسابی يوخدو.
- سن تک، اونلار چوخ. سۆر، يولچو يولوندا گرک.
- حسن دئدی:
- – يوخ، زرنیشان خانیم! بس ائشیتمه‌میسن:
- عاریف اولان سؤز قانا،
- سؤز آنلايا، سؤز قانا،
- يۆز مین تۆلکو يێغیلسا،
- نئيله‌ير بیر آسلانا؟
- بۇ سؤزلری دئيندن سونرا حسن عرباتین باشینی قانیردی. اؤزونو
- قوشونا وۇردو. ساغدان وۇروب سولدان، سولدان وۇروب ساغدان چێخدی. قوشونو
- قاتدام-قاتدام ائتدی. ایشی بئله گؤرن قارا پاشا مئيدانا آت سۆردو.
- آلدی قارا پاشا:
- سنه دئيیم، عجم اوغلو،
- اوغلان، قايتار آشقاردورو.
- قوشون وئرر سنه يولو،
- اوغلان قايتار آشقاردورو.
- آلدی حسن:
- سنه دئيیم، قارا پاشا،
- پاشا، وئرمم آشقاردورو.
- قوشون وئرسه منه يولو،
- پاشا، وئرمم آشقاردورو.
- آلدی قارا پاشا:
- ایگید تۇتماز اۇشاق ایشین،
- تۇتوب کسدیره‌رم باشین،
- قۇرد-قۇشا يئم اولار لئشین،
- اوغلان، قايتار آشقاردورو.
- آلدی حسن:
- آشقاردورو گتیرمیشم،
- من مطلبی بیتیرمیشم.
- زرنیشانی گؤتورموشم،
- پاشا، وئرمم آشقاردورو.
- قارا پاشا گؤردو کی، بۇ پهلوانی سؤزله باشا سالماق چتیندی. فیکیرلشدی
- کی، گل يئنیلمز پهلوان پولادی ایسناد وئر. بلکه قورخوب آشقاردورو،
- زرنیشان خانیمی قايتارا.
- آلدی قارا پاشا:
- امر وئرسم پولاد گلر،
- آنان، باجین آغلار قالار،
- قارا پاشا باغرین دلر،
- اوغلان، قايتار آشقاردورو.
- آلدی حسن:
- هر هاديانا باخماز حسن،
- پولادسان، پاشاسان، نسن؟
- مین ایگیده تک من بسم،
- پاشا وئرمم آشقاردورو.
- سؤز تاماما يئتدی. مئيدان يئنیدن قێزیشدی. بیر طرفدن حسنله
- عربات، او بیری طرفدن ده زرنیشان خانیم يئنیدن اؤزلرینی قوشونا
- تپدیلر. قارا پاشا گؤردو کی، قوشونون باشی بوستان کلیگی کیمی يئرله
- يئکسان اولور.
- پاشا امر وئردی اوخ آتانلارا:
- – نئجه اولورسا-اولسون، عجم اوغلونو يارالی تۇتمالی، زرنیشانلا آشقاردورو
- اوخدان گؤزله‌مه‌لی.
- ایشی بئله گؤرنده حسن دئدی:
- – زرنیشان خانیم، اوخ آتانلار نامرد اولار. کیشیلیک قئيرتی چاتیب
- البياخا دؤيوشه گیرمزلر. دمیرچیوغلو دئيردی کی، بئله حاللاردا اوخ
- مسافه‌سیندن اۇزاقلاشمالی، دۆشمنی چکیيه چکمه‌لی. من قوشونون
- ساغ جیناهینی ياراجاغام. اورادا جیناهی ساخلايان سنین قارداشلاریندی.
- الله يا اونلارا وئرر، يا دا منه. آشقاردورو عرباتین دالینجا سۆر.
- حسن قوشونون ساغ جیناهینی ياریب زرنیشانین آلتی قارداشینی قانینا
- قلتان ائله‌دی. قوشونون قومارغاسیندان يئنیجه چێخمیشدیلار کی، هاچاباش
- اوخ حسنین کۆرگیندن ديَیب دؤشونون آلتیندان چێخدی. زرنیشان آشقاردورو
- عرباتا يانلادی، آشقاردورا آجی بیر قامچی چکدی. آتلار بیر گؤز قێرپیمیندا
- يئل کیمی اۇچدولار. زرنیشانگیل سێلدیریملی بیر داغ اته‌يینه گلیب
- چێخدیلار. زرنیشان اطرافی آختاردی. بؤيوک بیر کاها تاپدی. آتلاری کاهايا
- سۆردو. حسنی اۇووقلا آتدان ائندیردی. هاچاباش اوخون اۇج حیصه‌‌سینی قێلینجلا
- کسیب، سۆمبه‌سینی کۆرگیندن دارتیب چێخارتدی. حسن اود تۇتوب يانیردی.
- قان چوخ ایتیرمیشدی. زرنیشان ياسه‌من ساچینی يارانین اۆستونه باسیب
- حسنین باشینی دیزی‌نین اۆستونه قويدو. حسنین بۇ حالینا دؤزمه‌ين
- زرنیشان يانیقلی بیر باياتی چکدی:
- عزیزیيم يار قانا،
- يار اوخويا، يار قانا.
- يارالی بیر ترلانام،
- سێغینمیشام يارغانا.
- زرنیشان خانیمین اۆرگی سويوماقدانسا، بیر آز دا کۆکره‌دی. آلدی گؤرک
- نه دئدی:
- قادیر مؤولام، سندن کؤمک دیله‌رم،
- حسن يارالیدی، درمان ایسته‌رم.
- نئشتر آلیب باغریم باشین دیده‌رم،
- حسن يارالیدی، درمان ایسته‌رم.
- هر مۆشکول ایشلری بیتیرن سنسن،
- دینسیزی ایمانا گتیرن سنسن،
- حضرتی حسرته يئتیرن سنسن،
- حسن يارایلیدی، درمان ایسته‌رم.
- قارا پاشا سۇسايیبدی قانینا،
- اوخ ديَیبدی، اود دۆشوبدو جانینا،
- نئجه گئدیم کور‌اوغلونون يانینا،
- زرنیشانام، خۇدا، درمان ایسته‌رم.
- زرنیشان دايه‌سیندن ائشیتمیشدی کی، داغلاردا بیتن ککلیک اوتو ایله
- ساریچیچيی ازیب، ارگن قێز دؤشونده‌کی مايا ایله قاریشدیریب اوخ، نیزه، قێلینج
- ياراسی اۆسته قويسان، يارا تئز ساغالار. تئز دۇروب اطرافدان بیر قالاق ککلیک
- اوتو، ساری‌چیچک توپلادی. اونلاری داش اۆزرینده ازدی. اۆزونو يانا چئویریب
- تۇرونج ممه‌لرینی بۆللور کؤينه‌يیندن چێخارتدی. بیر سێخدی هئچ نه گلمه‌دی،
- ایکی سێخدی دؤشو آغریدی، اۆچ سێخدی دؤشوندن قان ایرین کیمی مايا چێخدی.
- اونو ازدیگی اوتلا قاریشدیریب حسنین ياراسی اۆستونه ملهم قويدو. حسن
- اۆچ گۆن، اۆچ گئجه يۇخويا گئتدی. زرنیشان خانیم باخدی کی، بۇدو گؤي
- اۆزونده بیر دسته دۇرنا قاتاری هاوالانیب گئدیر. بیر قریب-قریب اؤتن
- دۇرنالارا، بیر ده باشینی دیزی اۆستونه قويدوغو يارالی حسنه باخدی. اۆرگی
- قۇبار ائيله‌دی. گؤتوردو اؤز حالینی دۇرانلاردان چنلیبئله بئله ایسمارلادی:
- قاتار-قاتار اۇچان دۇرنا،
- اۇچوشونا قۇربان اولوم.
- جێققالارین بۇرما-بۇرما،
- جێققانیزا قۇربان اولوم.
- نامرد مطلبه يئتمه‌سین،
- ياغی سیزی اینجیتمه‌سین،
- آوازین قمگین ائتمه‌سین،
- آوازینا قۇربان اولوم.
- زرنیشان دا يارین اؤير،
- باغری‌نین باشینی اويار،
- چنلیبئله سلام دئير،
- سلامینا قۇربان اولوم.
- سؤز تامام اولدو. قهر زرنیشانی بوغدو. آلا گؤزلر باهار بۇلودو
- کیمی سیفقاریدی.
- زرنیشانلا حسن کاهادا قالسین. ایندی سیزه هارادان، کیمدن خبر
- وئریم، کور‌اوغلودان. کوراوغلو ياتمیشدی. يۇخودا گؤردو کی، چێنقیللی داغدادی.
- قانچیر اولوب، آغزیندان لاختا-لاختا قان گئدیر. هؤولنک يۇخودان
- اوياندی. ائله بیر دلی نره چکدی کی، ائله بیل گؤي گۇروللادی، ایلدیریم چاخدی.
- بیر گؤز قێرپیمیندا دلیلر ياراقلی-ياساقلی کوروغونون امرینه
- مۆنتظیر داياندیلار. کوراوغلو سازی سینه‌سینه باسیب دئدی:
- نره چکدیم دلیلریم اويانسین،
- يارالیدی، بیر حسنیم داردادی.
- قوچ دلیلر يان-يؤرمده دايانسین،
- يارالیدی، بیر حسنیم داردادی.
- سؤکولسون آغ شهرین قالاسی، بۆرجو،
- مهو اولسون، تالانسین پاشانین تاجی،
- قويماياق پاشادا گرک بۇ بورجو،
- يارالیدی، بیر حسنیم داردادی.
- کور‌اوغلويام، من بیلیردیم ایشیمی،
- ياخشی ياتدیم، يامان گؤردوم دۇشومو،
- گرک گتیره‌سیز دۆشمن باشینی،
- يارالیدی، بیر حسنیم داردادی.
- سؤز تاماما يئتدی. يئددی مین، يئددی يۆز يئتمیش يئددی دلی آتا
- سۆوار اولدو. کوراوغلو دئدی:
- – ائيواز خان، بللی احمد، عیسیبالی، حالايپوزان، تۆپداغیدان، قورخوقانماز،
- کوسا صفر! قوشونو چکین آغ شهره. قارا پاشانین يۇردوندا
- بوستان اکین. وار-دؤولتی‌نین اۆچده بیرینی شهرین السیز-آياقسیزلارینا
- پايلايین. قالانی قنیمتیمیزدی.
- سؤز کور‌اوغلونون آغزیندان قۇرتارار-قۇرتارماز دلیلر بوغاناق اولوب
- آغ شهره طرف اۆز قويدولار.
- دمیرچیوغلو، دلی حسن، دلی مئهتر، آشیق جۆنون دمیر گمیریردی.
- کوراوغلو باخدی کی، ایش بئله گئتسه چنلیبئلده هئچ کس قالماز. دئدی:
- – دمیرچیوغلو، بۇ دفعه چنلیبئلی آشیق جۆنونلا سنه تاپشیریرام.
- دلی حسن، دلی مئهتر منیمله گئده‌جکلر.
- کوراوغلو چێنقیللی داغ دئيیب قێراتین جیلووونو بوشالتدی. قێرات يئل کیمی
- گؤتورولدو. گۆنه بیر منزیل، تئي منزیل چێنقیللی داغا يئتیشدی. قێرات
- عرباتین هنیرتیسینی دۇيدو. آياغینی يئره دؤيوب کیشنه‌دی. کوراوغلو دئدی:
- – آختارین اطرافی. قێرات بوش-بوشونا کیشنه‌مز. دلیلر چێنقیللی داغی
- الک-ولک ائله‌دیلر. بیر ده باخدیلار کی، بۇدو سرپ قايالیقدا عربات،
- يانیندا دا بیر آت وار کی، گؤز ایسته‌يیر تاماشا ائله‌سین. کوراوغلو دلیلرله
- کاهايا ائندیلر. باخدیلار کی، بیر قێز حسنین باشینی آلیب دیزی اۆسته،
- ياراسینا ملهم قويور.
- حسن گؤردو کی، کور‌اوغلودو، يانیندا دا دلیلر، دئدی:
- – کئچ يان طرفه، بابام گلدی.
- زرنیشان خانیم ائله بیلدی کی، حسن دئيیر بابان گلدی. رۆبندینی
- اۆزونه سالیب تئز آشقاردورون يهرینه ايلشدی. گؤزلری قان چاناغی کیمی
- دولدو. سیگیرتمه قێلینج قوشونا طرف آت سۆردو، دئدی:
- آغ ساققاللی آتام منیم،
- اؤلدوره‌جم بابا، سنی.
- قويمورسان مۇرادا چاتام،
- اؤلدوره‌جم، بابا، سنی.
- حسن باخدی کی، زرنیشان کوراوغلو ایله جنگه گیریر. يارالی-يارالی بیر
- تهر دیرسکله‌نیب، بۇلغورلو سازی دیله گتیردی، دئدی:
- سنه دئيیم مهریبانیم،
- قێز آيیبدی، بابام گلیر.
- سنه قۇربان منیم جانیم،
- قێز، آيیبدی، بابام گلیر.
- آلدی زرنیشان خانیم:
- منی سالدین يامان اودا،
- آلتی قارداش وئردیم بادا،
- يارالیدی يار کاهادا،
- اؤلدوره‌جم، بابا، سنی.
- آلدی حسن:
- فلک منه قارا يازدی،
- خوش گۆنومو نئجه پوزدو،
- اوخودوغون نه آوازدی،
- قێز، آيیبدی، بابام گلیر.
- آلدی زرنیشان خانیم:
- زرنیشانام، اوللام دلی،
- اؤللم، قويمارام ایره‌لی،
- داها سنه دئمم بلی،
- اؤلدوره‌جم، بابا، سنی.
- زرنیشان قێزمیش آسلانا دؤنموشدو، دلیلر ایسه آرتیق کاهانی حاقلاماقدا
- ایدیلر. حسن باخدی کی، ایشلر شۇلوخدو. زرنیشان اؤلوب، اؤلدورمکدن
- دانیشیر. بیر تهر آياغا قالخیب ائله بیر دلی نره چکدی کی، چێنقیللی
- داغ لرزه‌يه گلدی.
- آلدی حسن:
- حسن بَيدی، قۇردوغلودو،
- ایگیدلیکده مرد اوغلودو،
- بۇ گلن قوچ کور‌اوغلودو،
- قێز، آيیبدی، بابام، گلیر.
- سؤز تاماما يئتیشدی. زرنیشان خانیم آنلادی کی، گلن اونون باباسی
- دئيیل، حسنین باباسی کور‌اوغلودو. حيا ائدیب آشقاردوردان دۆشدو، بیر
- طرفه چکیلدی، اۆز بۆرودو.
- کوراوغلو اۆزونو دلی حسنه تۇتوب دئدی:
- – آيه، دلی حسن، بۇ قێز نه دئيیر؟ منیم کی، قێز ائولادیم يوخدو.
- بۇ نه بابا، بابا سالیب؟
- حسن ایره‌لی يئریدی. قوچ کوراوغلو و دلیلرله گؤروشوب اؤپوشدو، دئدی:
- – آتئيی مهریبان! زرنیشان خانیم سنی آنیشیرا بیلمه‌میشدی. ائله
- بیلیب کی، گلن باباسی قارا پاشادی.
- کوراوغلو زرنیشان خانیمین آلنیندان اؤپدو. سونرا دا دلیلر ایله اۆز
- قويدولار چنلیبئله طرف. ياغی قوروغونا يئنیجه چاتمیشدیلار کی، باخدیلار
- بۇدو، او بیری طرفدن ده ائيواز خان بؤيوک بیر کاروانلا ياغی
- قوروغونا ياخینلاشیر.
- قوشون چنلیبئله چاتاندا گؤردولر کی، دمیرچیوغلو بیر مجلیس دۆزلدیب،
- بیر مجلیس دۆزلدیب، رۇزیگارین گؤزو هله بئله بیر مجلیس گؤرمه‌يیب.
- يئددی مین يئددی يۆز يئتمیش يئددی دلی خانیملارلا مجلیسده
- ايلشدیلر. کوراوغلو آياغا دۇروب دئدی:
- – چنلیبئل گلینی زرنیشان خانیمین گلیشی مۆناسیبتی ایله قێرخ گۆن،
- قێرخ گئجه توي وۇرولسون. گلی‌نین آياغینا يئددی مین يئددی يۆز يئتمیش
- يئددی اؤيج قۇربان کسیلسین. يئددی ایل عکسی ساخلانان اوتاق ایسه تزه بَيله
- گلینه لايیق بزه‌دیلسین.
- اۇستادلارین سؤيله‌مه‌سینه گؤره آشیق جۆنون بۇ تويو ائله کئچیریب کی،
- گؤز ایسته‌يیرمیش تاماشا ائتسین.
قایناق‌لار
- Azadliq . org