دورنا تئلی
edit
آنا آنلاتیم
- دورنا تئلی - کؤراوغلو داستانی
ائيواز چنلیبئله گلندن بری تئللی نیگارین اۆرگی يئرینه گلمیشدی. تاي اۆرگینده هئچ بیر دردی يوخ ایدی. قوچ کوراوغلو کیمی ار بیر يانیندا، ائيواز کیمی اوغول بیر يانیندا، بَيلره، پاشالارا قان اۇددوران دلیلر ده کی، گؤزونون قاباغیندا. کئف، لذت، داماق بیریدی کی، او دا نیگاردايدی. هردن چنلیبئلین لالهلی، نرگیزلی اتکلرینه باخیب اؤز-اؤزونه دئيیردی: “گؤرهسن بۆتون آروادلارین آراسیندا هئچ منیم کیمی خوشباختی وارمی؟”. کوراوغلونون داماغی اوندان دا چاغ ایدی. او، هم اؤزونه اوغول گتیرمیشدی، هم ده آرخا، کؤمک گتیرمیشدی. ائيواز چوخ چکمهدی کی، جانلارا ديَن ایگید بیر اوغلان اولدو. دلیلرین هامیسی بۇ ایگیدلیيه گؤره اونا حؤرمت ائلهيیردیلر. هامینین گؤزونده اول کوراوغلو ایدی، سونرا نیگار، سونرا دا ائيواز. دئيیرلر کی، کوراوغلو بوش واختلاری همیشه دلیلرله مشق ائلهيیب تعلیم کئچردی. آت مینمک، نیزه آتماق، قێلینج وۇرماق، قالخان تۇتماق، اوخ آتماق اونلارین پئشهسی ایدی. هئچ ائله گۆن اولمازدی کی، دلیلر ایچینده تزتزه آداملار اونلارا قوشولماسین. اونلار دا بۇ تعلیمدن اؤيرهنیردیلر. اۇستاد بئله دئيیر کی، يئنه بیر گۆن دلیلر چنلیبئلده بؤلوک-بؤلوک اولوب مشق ائلهيیردیلر. ائيواز دا ياراقلی-ياساقلی بیر دسته ایله آتلانیب داوا مشقینه چێخمیشدی. دلیلر مشق ائلهيه-ائلهيه کوراوغلويا ساری آت چاپیردیلار. ائيواز عرباتین اۆستونده دلیلرین قاباغینجا گلیردی. کوراوغلونون اونون باشینا تاخدیغی دۇرنا تئلی ده پاپاغیندا ایدی. کوراوغلو ائيوازی بئله گؤرنده اۆرگی تئللندی، قوللاری آچیلدی، اۆزونو نیگار خانیما تۇتوب، آلدی گؤرک نه دئدی:
- نیگار خانیم، سنه دئيیم،
- بۇ گلن ائيواز، بۇ گلن.
- دیلی دوداغیيی يئيیم،
- بۇ گلن ائيواز، بۇ گلن.
- ائيوازیم اون بئش ياشیندا،
- قۆدرت قلمی قاشیندا،
- دۇرنا تئلی وار باشیندا،
- بۇ گلن ائيواز، بۇ گلن.
- مئيداندا ایگیدلر مردی،
- قاباقدا ار اوغلو اردی،
- داوا گۆنو قێزمیش نردی،
- بۇ گلن ائيواز، بۇ گلن.
- میسری قێلینج دستیندهدی،
- عرباتین اۆستوندهدی،
- شیرین جانین قصدیندهدی،
- بۇ گلن ائيواز، بۇ گلن.
- جمعی دلیلرین خاسی،
- مئيداندا وار مرد داواسی،
- کوراوغلونون تک بالاسی،
- بۇ گلن ائيواز، بۇ گلن.
- نیگار خانیم دئدی:
- – کوراوغلو، دوغرودان دا دۇرنا تئلی ائيوازی ياخشی تۇتور. دۇرنا تئلی
- دلیلری بئله تۇتاندا گؤر بیزی نئجه تۇتار. گؤندر دلیلری گئتسینلر بیزه
- ده دۇرنا تئلی گتیرسینلر.
- کوراوغلو هله نیگار خانیما جاواب وئرمهمیشدی کی، ائيواز دلیلرله
- گلیب يئتیشدی. نیگارین کوراوغلويا دئدیگی سؤزلری ائشیدیب، دئدی:
- – دۇرنا تئلی ندی کی، اوندان اؤتری آنامین قلبینی سێندیریرسان؟ ایزن وئر
- گئدیب باغداتدان اونا دۇرنا تئلی گتیریم.
- کوراوغلو دینمهمیش دمیرچیوغلو يئریندن دئدی:
- – آي کوراوغلو، ائيواز تک گئتمهسین، ایزن وئر من ده اونونلا گئدیم.
- بللی احمد دئدی ایزن وئر، من ده گئدیم.
- چوخدان ایدی کی، دلیلر صفره چێخمامیشدیلار. بۇ بۇردان دئدی، من
- ده گئتمک ایستهيیرم، او اوردان دئدی، ایزن وئر من ده گئدیم. کوراوغلو
- بیلمهدی کی، هانسینا جاواب وئرسین، هانسینی دۇرنا تئلینه گؤندرسین. هله
- کوراوغلو اؤزو ده دۇرنا تئلینه گئتمک ایستهيیردی. نیگار خانیم کوراوغلونون
- دلیلری باشسیز قويوب گئتمهيینه راضی اولمايیب دئدی:
- – يوخ، اؤزون قال، گؤزون دلیلرین اۆستونده اولسون. قوي دۇرنا تئلینه
- ائيوازگیل گئتسینلر.
- کوراوغلو ائيوازا ایزن وئردی. يول اۇزاق اولدوغوندان تاپشیردی کی، قێراتی
- مینسین. ائيواز میسری قێلینج باغلادی، قالخان تاخدی. قێراتی چکیب يهرلهدی،
- ترلان کیمی قالخیب آتین اۆستونه ايلشدی. دمیرچیوغلو ایله بللی احمد
- ده داوا لیباسی گئيیندیلر، آتلاندیلار، اۆچو ده بیرلیکده يولا دۆشدولر.
- کوراوغلو دلیلره اۇزاق صفره گئدنده اؤزلری ایله ایچگی گؤتورمهيه ایزن
- وئرمزدی. آمما دمیرچیوغلو اوندان خلوت تۇلوقلاری شرابلا دولدوروب
- گؤتورموشدو. دلیلر آتلارینی سۆروب يولا دۆشدولر. دئ گۆنه بیر منزیل،
- تئييی-معنازیل آت سۆردولر، يول يوردولار، دره کئچدیلر، دۆز گئتدیلر،
- داغ آشدیلار، منزیل کئچدیلر آخیردا گلیب باغداد ائلینه چاتدیلار. آتلاری
- باغلارا اوتلاماغا اؤتوروب اؤزلری جالاندیلار دۇرنالارین جانینا. دۇرنالاری
- قێردیلار، تئللرینی بیر يئره اۆست-اۆسته يێغدیلار، اتلرینی ده اوجاق قالايیب
- کاباب چکدیلر. اولا دۇرنا اتینین کابابی، قارا اۆزومون شرابی، اؤزو ده
- هاردا-هاردا باغدادین گۆل-گۆلو چاغیران سرین باغلاریندا. چشمهلر ائله
- آخیردی کی، ائله بیل گؤز ياشیدیر.
- بئله صفالی بیر يئرده اۆچ نفر چنلیبئل دلیسی، دۇرنا کابابی، شراب
- دا کی، ائله بیل جئيران قانیدی...
- غرض يئدیلر، ایچدیلر، گؤزلری دۇمانلاندی، ياواش-ياواش مست اولوب
- اۆچو ده باشلارینی يئره قويدولار، يات کی، ياتاسان.
- بۇنلار بۇرادا مست-بیهوش ياتماقدا اولسونلار، سنه کیمدن دئيیم،
- باغداد پاشاسی آسلان پاشادان.
- بۇ طرفدن باغداد پاشاسی آسلان پاشايا خبر وئردیلر کی، اۆچ
- نفر آتلی گلیب آتلارینی باغا بۇراخیب، اؤزلری ده بۆتون دۇرنالاری قێریب
- چاتیبلار. آسلان پاشا حؤکم ائلهدی کی، بۇ ساعت اؤزلرینی ده، آتلارینی دا تۇتوب
- منیم يانیما گتیرین.
- قوشونا امر اولوندو، باغین دؤرد طرفینی گزدیلر. قێرات دۆشمنین
- ياخینلاشدیغینی گؤروب برک کیشنهدی. دمیرچیوغلو ایله بللی احمد
- قێراتین سسینه يۇخودان آيیلدیلار. گؤردولر کی، باغدا اوتون، آغاجین سانی
- وار، قوشونون سانی يوخدو. دمیرچیوغلو ایستهدی کی، داوا باشلاسین، بللی
- احمد راضی اولمادی کی، ائيواز اؤزونده دئيیل، بیز داوا باشلاساق بۇردان
- اۇزاقلاشاریق، ائيواز اله کئچر. دمیرچیوغلو گؤردو قوشون ياخینلاشیر،
- آمما ائيواز يۇخودان اويانمیر کی، اويانمیر. آخیردا آلدی، گؤرک نه دئدی:
- قوشون گلیب دؤرت يانیمیزی آلدیلار،
- بئله نه ياتمیسان، آيیل، ائيواز خان!..
- هر طرفدن مانسیرايا سالدیلار،
- آخیردا اولاریق زايیل، ائيواز خان!..
- قبول قێلما مۆخننتین سؤزونو،
- سنه عرض ائلهيم سؤزون دۆزونو،
- دۇر، گؤستر ياغیيا دؤنمز اۆزونو،
- گۆن کیمی عالمه يايیل، ائيواز خان!..
- اینصافدیرمی بللی احمد تۇتولا،
- قۇلاج قولو دال گردنده چاتیلا،
- دمیرچیوغلو قۇل آدینا ساتیلا،
- کوراوغلو دلیسی سايیل، ائيواز خان!..
- سازین سسینه، دمیرچیوغلونون سسینه ائيواز يۇخودان آيیلدی.
- يۆيوردولر کی، اؤزلرینی آتلارا يئتیرسینلر. باخدیلار کی، آتلار تۇتولوب. حالی
- بئله گؤرنده هر اۆچو قێزمیش نر کیمی نره چکیب اؤزلرینی وۇردولار
- دريايی-لشکره، ساغا وۇردولار، سولا وۇردولار، نه قدر قێردیلارسا نه
- قوشونون دالی کسیلیردی، نه ده کی، بیر يول تاپیب بیر طرفه چێخا بیلمیردیلر.
- آخیردا قوشون اونلاری بیر-بیرلریندن آيری سالیب، تکلهدی. آرالیغا سالیب
- اۆچونو ده تۇتدولار، قوللارینی باغلايیب، آتلاری ایله بیرلیکده آسلان پاشانین
- يانینا گتیردیلر. آسلان پاشا حؤکم ائلهدی کی، اؤزلرینی زیندانا سالیب،
- آتلارینی دا بازارا چکیب ساتسینلار. سونرالار کیمین هايفی وارسا گلسین، آلسین.
- آسلان پاشانین آداملاری دلیلری زیندانا سالیب آتلارینی دا بازارا
- آپاردیلار. بۇنلار بۇرادا قالسینلار، سنه کوراوغلونون دوستو بعضیرگاندان
- خبر وئریم.
- کوراوغلونون بیر بعضیرگان دوستو وار ایدی. نئچه ایللر کوراوغلو ایله دوستلوق
- ایشلتمیشدی. ایندی ماللارینی ساتماق اۆچون باغدادا گلمیشدی. بیر ده ائشیتدی
- کی، جار چکیرلر کی، کوراوغلونو تۇتوبلار. تئز بیر تهر اؤزونو زیندانا
- سالدی، گؤردو يوخ، تۇتولانلار کوراوغلونون دلیلریدی. ائيواز بعضیرگانی
- گؤرجک تانیدی، بیر تهر اونو باشا سالدی کی، بس قێراتی بازارا چکیب ساتاجاقلار،
- گئت چالیش، ساتین آل. کوراوغلويا خبر وئر!
- بعضیرگان اورادان چێخیب بیرباش بازارا گلدی. گؤردو بۇدو آتلاری ساتیرلار.
- بعضیرگان قێراتی ساتان دللالا ياناشیب دئدی:
- – ايه، بۇ شێلخورونا نئچه وئریم؟
- دللال دئدی:
- – گؤزلرینی سیل بیر ياخشی-ياخشی باخ. شێلخور ندی؟ بۇنا کوراوغلونون
- قێراتی دئيرلر.
- بعضیرگان دئدی:
- – ايه، باشینا آت تپمهيیب کی، قێرات ندی؟ بۇ يابی نیيه قێرات اولور؟
- دللال حیرصلهنیب “يابی ندی، اده، ترلاندی! ترلان گؤر نه چکیر؟!.”
- – دئيیب آتی حرکته گتیردی کی، جاماعت باخسین.
- گؤزونه دؤنوم قێرات گؤزونون بیرینی يۇمدو، قۇيروغونو قێسدی،
- اؤزونو وۇردو شێلخورلوغا.
- بعضیرگان دئدی:
- – ها گؤردون. يامان چکیر، اده، آي يئلبئيین.
- قوچ کوراوغلونون قێراتینی پاشالار مینه بیلمیردی. قورخودان بیر پهلیوان
- اونون يانینا گئده بیلمزدی. ایندی قێرات ائله اؤلو اولموشدو کی، گل
- گؤرهسن...
- بازار آداملاری تؤکولوب آتا باخدیلار. گؤردولر بیر گؤزو کور، قێسیق،
- يئریينده ده آزجا توپاللايان بیر آتدی.
- هامیسی بعضیرگانین سؤزونو تسدیقلهدی. غرض، بعضیرگان دللالی آلدادیب
- قێراتی اۇجوز قیيمته آلیب منزیلینه گتیردی. آتی بیر يانا باغلايیب
- قاباغینا يئم-زاد تؤکدو. شيیردینی گؤندریب بازاردان بیر باتمان قێر،
- بیر توپ دا بئز آلدیردی. ائله کی، قێر دا، بئز ده حاضیر اولدو بعضیرگان قاباقجا
- او کی، وار بئزی قێرلادی. سونرا بۇ قێرلا بئزی قێراتا مؤحکم-مؤحکم
- ساریيیب اؤزو ده میندی. قێر بعضیرگانی ائله تۇتدو کی، کندیر-قايیش کیمی. ائله
- کی، بعضیرگان آرخايینلاشدی کی، تاي آتدان يێخیلماياجاق، يۆيهنینی بۇراخدی.
- قێرات گؤتورولدو، نه گؤتورولدو. ائله بیل کی، چنلیبئلده بالا قويوب
- گلمیشدی. واللاه بیر گئدیردی، بیر گئدیردی کی، ایلدیریم دئيیم سنه يالاندی.
- آمما کیمدن دئيیم سنه بعضیرگاندان. يازیق بعضیرگاندا بعضیرگانلیق
- قالمامیشدی. کؤهنه بعضیرگاندا ائله بیرجه قۇرو نفس قالمیشدی. باياخ ها
- اؤزوندن گئتمیشدی. قێرات نه قدر يول گئتدی بعضیرگان بیلمهدی. بیر واخت
- بیر ده آت برکدن کیشنهدی. بعضیرگان گؤزلرینی آچیب گؤردو چنلیبئلدهدی.
- دلیلر قێراتین سسینی ائشیدیب تؤکولوب گلدیلر. باخدیلار واللاه قێرات
- بۇدو ایلان وۇرموش کیمی ائله گلیر کی، آز قالیر دێرناقلاری چاتلايا. آمما
- کی، تکدی. ائيواز دا اۆستونده يوخدو. آت بیر آز دا ياخینلاشاندا دقت
- وئریب گؤردولر آت صاحبسیزدی. آمما دئيهسن اۆستونده نه دیرسه بیر يامان
- شئي قارالیر. هامی فیکیر درياسینا جۇمدو کی، گؤرهسن بۇ نه سیردی.
- بۇنلار ائله بۇ فیکیرده قێرات گلیب دۆز کوراوغلونون قاباغیندا داياندی،
- اۆزونو گلدیگی طرفه تۇتوب ائله بیر نره چکیب کیشنهدی کی، داغ-داش
- لرزهيه گلدی. سونرا دؤنوب کوراوغلويا باخدی، آياقلارینی يئره دؤيمهيه
- باشلادی. کوراوغلو وفالی آتینین بوينونو قۇجاقلايیب اۆزوندن، گؤزوندن
- اؤپدو. باخیب گؤردولر کی، قێراتین اۆچتونده بیر آدام وار. آمما اؤزوندن
- گئدیب. بۇنو آچیب آتدان دۆشوردولر. باشینا سۇ-زاد تؤکوب اؤزونه گتیردیلر.
- باخدیلار کی، بعضیرگاندی. کوراوغلو اونو گؤرجک تانیدی، سوروشدو کی:
- – بعضیرگان، ائيواز هانی، يولداشلاری هارادا قالیب کی، سن قێراتی گؤتوروب
- گلیبسن؟
- بعضیرگان دئدی: – کوراوغلو! ائيوازی، دمیرچیوغلونو، بللی احمدی
- آسلان پاشا تۇتوب زیندانا سالیب. بۇ گۆنلرده دارا چکدیرهجک. دۇرما،
- تئز اؤزونو اونلارا يئتیر.
- کوراوغلو بعضیرگاندان بۇ سؤزو ائشیدیب اۆزونو دلیلره تۇتدو، آلدی،
- گؤرک نه دئدی:
- خبر وئرین دلیلریم اويانسین،
- تۇتولوبدو بیر ائيوازیم الدهدی!
- میسری قێلینج قێزیل قانا بويانسین،
- تۇتولوبدو بیر ائيوازیم، الدهدی!
- ياتمیشدیم آشکارا گؤردوم دۇشومو،
- ازلیندن من بیلیردیم ایشیمی،
- چکین، يهرلهيین چرلهمیشیمی،
- تۇتولوبدو بیر ائيوازیم، الدهدی!
- دۆشمنلریم تاماشايا دۇرارلار،
- شاد اولوبان کئيف مجلیسی قۇرارلار،
- کوراوغلو گئتمسه يقین قێرارلار
- تۇتولوبدو بیر سرداریم، الدهدی!
- دلیلر تلهسیک ياراقلاندیلار، آتلارینی يهرلهدیلر. کوراوغلو میسری
- قێلینجی بئلینه باغلادی. قالخان آسدی، عمود گؤتوردو، اۆستوندن ده بیر ساز
- کئچیریب قێراتا میندی. دلیلر ده باشیندا باغدادا طرف يولا دۆشدو. هر
- يئردن کئچیب گلدیلر باغدادین کنارینا يئتیشدیلر. شهره گیرمهيه آز
- قالمیشدی کی، بیر قوجا بیچینچیيه راست گلدیلر. گؤردولر قوجا تاخیل بیچیر.
- آمما گؤزوندن دولو کیمی ياش تؤکور. کوراوغلو ياخینلاشیب سوروشدو:
- – آي قوجا نیيه آغلايیرسان؟
- قوجا دئدی:
- – نئيلهيیرسن، سندن کی منیم دردیمه درمان اولماياجاق، چێخ
- يولونلا گئت.
- قوجا سؤزونو نه قدر يايیندیردیسا کوراوغلو ال چکمهدی. آخیردا
- قوجا سوروشدو:
- – ایندی کی، ال چکمیرسن، قاباقجا دئ گؤروم کوراوغلوينان دوستسان،
- دۆشمن؟
- کوراوغلو دئدی: – دوست اولاریق. نه وار کی، اونو نیيه خبر آلدین؟
- قوجا دئدی:
- – کوراوغلونون اۆچ دلیسی گلیب بۇرايا چێخیبدی. بۇ گۆن باغداددا
- اونلاری دار آغاجیندان آساجاقلار. اۆچ جاوان ایگید اوغلانلاردی. ائلهدیلر کی،
- شکیل کیمی، ائله دوغروسو اونلارین حالینا آغلايیرام.
- کوراوغلو قوجانی بئله مرد، ناموسلو گؤروب دلیلره حؤکم ائلهدی کی،
- قێلینجلاری چکیب قوجانین تاخیلینی بیچسینلر. دلیلر قێلینجلاری چکیب تاخیلا
- دولوشاندا قوجانین گؤزلری آلاجالاندی. ایکی الینی دیزینه وۇروب اؤز-اؤزونه
- دئدی:
- – واي ائوی يێخیلان جانیم! يقین بۇ کله-کؤتور اوغلو کله-کؤتور
- پاشانین آداملاریندان ایمیش. بۇ ساعت تاخیلی وئل-وئران ائلهيیب، منی ده
- اؤلدورهجکلر.
- آمما دقت ائلهيیب باخدی کی، بالام بۇنلار تاخیلی بیچیرلر. قوجا
- قالدی مات-مهتتل کی، گؤرهسن بۇنلار کیمدیلر. بۇ بئله فیکیرلرده
- اولسون، دلیلر تاخیلی بیچیب درز-درز باغلايیب بیر طرفه يێغدیلار. ائله کی،
- حاضیر اولدو کوراوغلو اۆزونو قوجا بیچینچیيه تۇتوب دئدی:
- – قوچ کوراوغلو ائله منم کی، وارام. ایندی آسلان پاشانین باشینا
- گؤيدن اود تؤکهجهيم. خزینهسینی داغیدیب پايلاياجاغام. بیر خۇرجون
- گؤتوروب خزینهنین قاپیسیندا اولارسان.
- قوجا سئویندیگیندن بیلمیردی کی، نه ائلهسین. آخیردا بیر تهر کی،
- اؤزونو جمعلهيیب دئدی:
- – بالا، شهره بئله گیرمه. آسلان پاشا خبر تۇتار، سیز يئتیشنه
- قدر دلیلری آزدیرار، قوي باشینداکی دلیلر دؤرت بیر دؤرت بیر اولوب
- آداملارا قاریشسینلار، شهره ائله گیرسینلر.
- بیچینچی قوجانین سؤزو کوراوغلونون خوشونا گلدی. آنجاق هله شهره
- چوخ قالیردی. بیر آز دا گئتمیشدیلر بیر ده گؤردولر کی، بۇدو قاباقدان بیر
- آتلی تلهسیک آتینی سۆروب چؤله طرف گئدیر. دلی حسن آتا بیر مهمز
- وۇروب اؤزونو چاتدیردی آتلیيا. باخدی کی، بۇ آتلی اينینده چۇخا، آياغیندا
- باشماق، قانوووز آرخالیغین اۆستوندن ده بئلینده تیرمه شال اولان
- ائنلیکورک، قارنی يوغون بیر کیشیدی. آتین ترکینده بیر خۇرجون، خۇرجونون
- بیر گؤزونده چؤرک، بیر گؤزونده بیر سرنیج قاتیق وار ایدی. اؤزو ده دئيهسن
- کیشی چوخ تلهسیردی.
- دلی حسن دئدی:
- – آ کیشی، بیر دايان گؤروم، بئله هارايا گئدیرسن؟
- کیشی جاواب وئردی کی:
- – چؤلده بیچینچیلریمیز وار، اونلارا چؤرک آپاریرام. نه سؤزون وار،
- تئز اول دئ تلهسیرم. گرک تئز قايیدام شهره.
- دلی حسن دئدی:
- – ياخشی، شهرده نه وار کی بئله؟ خئيیر اولا.
- کیشی دئدی:
- – آسلان پاشا بۇ گۆن کوراوغلونون اۆچ دلیسینی آسدیراجاق. بؤيوک
- شاديانالیق اولاجاق. ایندی تلهسیرم کی، تئز او شاديانالیغا چاتا بیلم.
- دلی حسن کیشیدن ائله بۇ سؤزو ائشیتجک الینی آتیب کیشینین خێرتدهيیندن
- تۇتوب دیک آتین اۆستوندن گؤتوردو. ائله ائلهجه گتیردی کوراوغلونون
- حۆضورونا. کوراوغلو باخدی کی، کیشی چوخدان جهنمه واصیل اولوب.
- سوروشدو کی:
- – بۇنو نیيه بوغدون؟
- دلی حسن احوالاتی دانیشدی. کوراوغلو باخدی کی، دئمک بۇ گۆن ائيوازگیلی
- دوغرودان دا آساجاقلار. اۆرگی غضبله دولوب آلدی، گؤرک نه دئدی:
- اۇجا-اۇجا داغ باشیندا
- ياز بیر يانا، قێش بیر يانا.
- تیترشیر آغزیم ایچینده،
- دیل بیر يانا، دیش بیر يانا.
- نه ائدک، دلیلر، ائدک!
- دۆشمنین باغرینی دیدک!
- خان ائيوازا کؤمک ائدک!
- دؤرد بیر يانا، بئش بیر يانا.
- هر نه اولدو منه اولدو،
- قاينادی پايمانام دولدو،
- گؤردون کی، دۆشمن گۆج گلدی،
- قوو بیر يانا، قاچ بیر يانا.
- کوراوغلونون يوخ علاجی،
- مصردن گلیر خراجی،
- چکنده میسری قێلینجی،
- لئش بیر يانا، باش بیر يانا.
- کوراوغلو دلیلری دؤرد بیر-بئش بیر ائلهدی. دئدی:
- – جاماعتا قاریشین، شهره گیرین. آمما تا کی، من اللریمی بێغیما
- چکمهمیش، داوايا باشلامايین.
- کوراوغلو بۇنو دئيیب اؤزو تک باشینا چیينینده ده ساز شهره گیردی.
- بۇ بۇرادا قالسین، سنه کیمدن دئيیم، آسلان پاشادان.
- آسلان پاشا دار آغاجی قۇردورموشدو. دلیلری ده دار آغاجینین يانینا
- گتیرتمیشدی. جللاد قاباقجا ائيوازی دار آغاجینا گتیردی. قوللارینی چێرمالايیب
- ایپی حاضیرلاماغا باشلادی. دمیرچیوغلو ایشی بئله گؤرنده گؤزلرینی
- ياش تۇتدو، آلدی، گؤرک نه دئدی:
- هانی منیم قوچ کوراوغلوم،
- گله گیره بۇ مئيدانا!
- چکنده میسری قێلینجی،
- قبزهسی قانا بويانا!
- قێرات بیر بۇردان آتیلا،
- مۆخننت، اؤلکن چاپیلا!
- کوراوغلو بۇردا تاپیلا،
- هرهنیز قاچا بیر يانا!
- دمیرچیوغلونو دیندیر،
- سۇچونو بوينونا میندیر،
- بیز ایکی دلینی اؤلدور،
- گل، سن قێيما ائيواز خانا!
- دمیرچیوغلو سؤزونو تامام ائلهينده کوراوغلو گؤزلری قێزمیش اؤزونو
- مئيدانا سالدی. آسلان پاشا دا مئيداندا ایدی. کوراوغلونون چیينینده ساز
- گؤروب دئدی:
- – ايه، آشیقسانمی؟
- کوراوغلو دئدی: – آشیغام.
- آسلان پاشا دئدی:
- – اوندا کوراوغلونون دلیلرینی آسدیرماقدان قاباق بیر اوخو، کئفیمیز
- آچیلسین.
- کوراوغلونون باشیندا گلن دلیلر آداملارین آراسیندا ایدی. داوا
- باشلاماق اۆچون کوراوغلونون ایشارهسین گؤزلهيیردیلر. هامیسی ائله ایدیلر کی،
- دوداقلارینی گمیریب، بێغلارینی چئينهيیردیلر. کوراوغلو دلیلره باخیب
- گؤتوردو، گؤرک نه دئدی:
- دلیلریم، بۇ گۆن داوا گۆنودو،
- مۆخننس اؤلکهسی تالانماق گرک!
- قوچ ایگیدلر ياراسیندان بللنر،
- شربت تک قانینی يالانماق گرک!
- مرد ایگیدلر نره چکسین داوادا،
- شاهین کیمی شیکار تۇتسون يۇوادا،
- میسری قێلینج جؤولان وۇرسون هاوادا،
- باغیرساق جمعدهيه دولانماق گرک!
- کوراوغلو ایچنده دۆشمن قانینی،
- مرد مئيداندا نرهسیندن تانینی،
- قێرین وزیرینی، تۇتون خانینی،
- لئش-لئشین اۆستونه قالانماق گرک!
- آسلان پاشا دئدی:
- – آي آشیق، سن ائله اؤلوب اؤلدورمکدن دئيیرسن. بۇ ندی؟ نیيه
- قێشقیریرسان؟ بیر آز آلچاقدان اوخوسانا!
- کوراوغلو آسلان پاشانین جاوابیندا دئدی:
- – قۇلاس آس، اوخويوم.
- آجیغیندان قان کوراوغلونون بئينینه وۇرموشدو، گؤزلری قێپقیرمیزی
- قێزارمیشدی. دار آياغیندا دايانان ائيوازا باخیب آلدی گؤرک نه دئدی:
- جانیم پاشا، گؤزوم پاشا،
- پاشا قوي، گلسین ائيوازی!
- بۇدو سانا سؤزوم پاشا،
- پاشا، قوي گلسین ائيوازی!
- گؤيدن ایلدیریم تؤکدوررم،
- يۇردوندا بوستان اکدیررم،
- تورپاغین داغا چکدیررم،
- پاشا، قوي گلسین ائيوازی!
- ايلشیب پاشالار، بَيلر،
- سینمدن باش وئریب میللر،
- کوراوغلو ایلتیماز ائيلر،
- پاشا، قوي گلسین ائيوازی!
- کوراوغلو اوخوماغیندا اولسون، پاشا دا قۇلاق آسماغیندا، سنه کیمدن
- خبر وئریم، گیزیروغلو مصطفی بَيدن. باغداد طرفیندن گیزیروغلو
- مصطفی بَي آدیندا بیر ایگید وار ایدی. گیزیروغلونون باشیندا دا قێرخ
- آتلیسی وار ایدی. اؤزو ده کوراوغلو ایله دۆشمن ایدی. آتالار دئيیبلر کی، ایکی
- قوچون کللهسی بیر قازاندا قايناماز. او ایگید، بۇ ایگید. گیزیروغلو مصطفی
- بَي چوخدان ایدی کی، باشینین آتلیلاریيلا برابر او داغ سنین، بۇ دره
- منیم کوراوغلونو آختاریردی. اونونلا داوا ائلهمک ایستهيیردی. بیردن
- خبر چێخدی کی، بس آسلان پاشا کوراوغلونون اۆچ دلیسینی تۇتوب اؤزلرینی ده
- بۇ گۆن آسدیراجاق. بۇ ایش گیزیروغلونا خوش گلمهدی. بیر هاي وۇروب
- دستهسینی باشینا يێغیب دئدی:
- – آسلان پاشا کوراوغلونون اۆچ دلیسینی تۇتوب، بۇ گۆن دارا چکدیرهجک.
- من کوراوغلوينان دۆشمنم. بۇ اؤز يئرینده، آمما آسلان پاشانین بۇ
- نامردلیگینه يول وئره بیلمنم. گئدک اونلاری قۇرتاراق.
- گیزیروغلو بیلمیردی کی، کوراوغلو اؤزو ده باغدادا گلیب. دستهسینی
- گؤتوروب شهره گلدی، گلیب مئيداندان بیر آز آرالی داياندیلار. باخدی
- کی، کوراوغلو آشیق پالتاریندا مجلیسدهدی. دايانیب باخماغا باشلادی. بۇ،
- بۇرادا قالسین سنه کیمدن دئيیم صدرزمدن. آسلان پاشانین
- صدرزمی کوراوغلودان شۆبههلنمیشدی. آغزینی آسلان پاشانین قۇلاغینا
- ياپیشدیریب دئدی:
- – پاشام ساغ اولسون، بۇ آدام يا کوراوغلودو، يا دا کی... ائله کوراوغلودو
- کی، وار.
- آسلان پاشا هئچ اونا باخمايیب دئدی:
- – اشی، سن ده... کوراوغلو بۇرادا نه قايیریر. قويمازسان اوخوسون.
- گیزیروغلو مصطفی بَي باخدی کی، گۆن کئچیر، آمما کوراوغلو ائله
- مجلیسده گزیب اوخويور. فیکیرلشدی کی، بلکه کوراوغلونون دلیلری هله
- گلیب چێخمايیب، تک داوا ائلهمکدن قورخور. گۆن يۇبادیر. قوي بۇرادا
- اولماغیمی اونا بیلدیریم.
- گیزیروغلو مصطفی بَي شئشپرینی الینه آلدی، نیشان ائدیب آتدی. شئشپر
- گلیب مجلیسین يانینداکی مسجیدین گۆمبزینه ديَدی. پاشا دیک آياغا
- قالخیب چێغیردی کی:
- – او ندی؟ اونو کیم آتدی؟
- کوراوغلو باخدی کی، صدرزم اکیلمک ایستهيیر. تئز سازی دؤشونه باسیب
- پاشايا دئدی:
- – پاشا قۇلاق آس!
- لاف ائيلهمه، آسلان پاشا،
- صدرزم قاچدی ساندیم.
- هاواداکی هۇماي قۇشلار
- يۇواسیندان اۇچدو ساندیم.
- مئيداندا ایگیدلیک ساتدی،
- گلمهدی، گۆنو يۇباتدی،
- گیزیروغلو شئشپر آتدی،
- شئشپر يئره کئچدی ساندیم.
- کوراوغلويام، بیلمم نهدن،
- قارا باغریم اولدو زدن،
- ائيوازدیمی دارا گئدن؟
- يارالاریم دئشدی ساندیم.
- ائله کی، کوراوغلو سؤزونو دئيیب قۇرتاردی، بیر دلیلره باخیب دئدی:
- هويدو، دلیلریم هويدو،
- يئریگین مئيدان اۆستونه!
- هاواداکی شاهین کیمی،
- تؤکولون آل قان اۆستونه!
- قويون بدؤيلر کیشنهسین،
- میسری قێلینجلار ایشلهسین،
- کیمی تناب قێلینجلاسین،
- کیمینیز دۆشمان اۆستونه!
- کوراوغلو چکر هاشینی،
- بَيلر ائلر تاماشانی،
- من اؤزوم آسلان پاشانی،
- هرهنیز بیر خان اۆستونه.
- کوراوغلو اوخويا-اوخويا الینی بێغینا چکدی. دلیلر هر طرفدن الی
- قێلینجلی تؤکولدولر. داوا باشلاندی. آرا قێزیشمیشدی، هر دلی بیرینین اۆستونه
- يئریدی. کوراوغلو آسلان پاشانین اۆستونه هۆجوم ائلهدی. دلیلر ده قوشونون
- اۆستونه تؤکولدولر. کوراوغلو میسری قێلینجی چکیب آسلان پاشانین بوينونو
- وۇروب يئره سالدی. دلیلر تنابلاری قێلینجلادیلار. ائيوازین، دمیرچیوغلونون،
- بللی احمدین قوللارینی آچدیلار. دمیرچیوغلو دار آغاجینین بیرینی
- چێخارتدی، الینه آلیب اؤزونو دۆشمن قوشونونا وۇردو. خان ائيوازلا بللی
- احمد ده قوشونا جۇمدولار. داوا بیر قێزیشدی، بیر قێزیشدی کی، رۇزیگارین
- گؤزو بئله داوا گؤرمهمیشدی.
- ایگیدلر وۇروشدو، قورخاقلار قاچدی. مردله نامرد سئچیلدی، مرد
- اوغول بسلهين آنالارین باشی اۇجالدی، نامرد بسلهين آنالار يئره گیردی.
- داوانین شیرین يئرینده گیزیروغلو مصطفی بَي اؤز دستهسی ایله گلیب چاتدی.
- ایکی طرفدن آسلان پاشانین قوشونونو آرايا آلدیلار. قوشوندان قێریلان
- قێریلدی، قاچان قاچدی، داغیلدی.
- دۆشمن باسیلاندان سونرا گیزیروغلو باشیندا دستهسی گئری قايیتدی.
- بۇ طرفدن کوراوغلو اؤزونو پاشانین خزینهسینه يئتیردی. بیر تپیک وۇردو،
- خزینهنین قاپیسی تايباتاي آچیلدی. کوراوغلو بیر ده باخدی کی، بیچینچی قوجا
- الینده بیر خۇرجون کسدیریب خزینهنین قاپیسینی.
- کوراوغلو دئدی:
- – قوجا، گیر خزینهدن خۇرجونونو دولدور آپار.
- تاي قوجانین حالینی سوروشما. اؤزونو خزینهنین ایچینه سالیب خۇرجونونو
- خێرجیم-خێرجیم دولدوروب دۆزلدی يولا.
- ائله کی، داوا قۇرتاردی، هامیسی بیرلیکده کئفلری ساز، داماقلاری چاغ
- آتلانیب چارداخلی چنلیبئله يولا دۆشدولر. کوراوغلو بیلیردی کی، گیزیروغلو
- مصطفی بَي ائله بئله چێخیب گئتمهيهجک. حؤکمان اونون يولونو
- کسهجک، اونونلا وۇروشاجاق، اؤزو ده دلیلرین يانیندا. چۆنکی بیلیردی کی،
- گیزیروغلو مرد آدامدی. او آنجاق کوراوغلونون اؤزو ایله حاق-حساب
- کسمک ایستهيیر. يوخسا اصلینده اونونلا دۆشمنچیلیگی يوخدو. اودو کی،
- قصداً دلیلریندن گئریيه قالمیشدی. قێراتی بیر چاي قێراغی ایله ياواشياواش
- سۆروردو. او طرفدن ده گیزیروغلو مصطفی بَي دوغرودان دا
- کوراوغلونون يولونو کسمیشدی. کوراوغلو گلیب اونون يانینا چاتماغا آز
- قالمیشدی. قێرات کیشنهيیب گؤتورولدو.
- گیزیروغلو مصطفی بَي آلاپاچانی اونون دالینا سالدی. قێرات آلاپاچانین
- سسینی ائشیتجک يئریندهجه داياندی. کوراوغلو دؤنوب گیزیروغلونو
- يانیندا گؤردو. کوراوغلو همهوش ائلهيیب ال آچانا قدر گیزیروغلو اونون
- باشیندان بیر عمود ائله وۇردو کی، کوراوغلو آتدان بیرباش ياخینداکی چايا
- يێخیلدی. گیزیروغلو سێچرايیب يئنه ده اونون باشینین اۆستونو آلدی. کوراوغلو
- چايدان چێخدی. گیزیروغلونا ال وئردی. سونرا آتینی مینیب دینمز-سؤيلهمز
- يولونا داوام ائلهدی. بیر آز گئدیب دلیلره چاتدی. آمما بۇ ایشی يولدا
- دلیلره آچمادی. آتلاری سۆروب گلدیلر چنلیبئله چاتدیلار. کوراوغلو
- قێراتدان، دلیلر ده اؤز آتلاریندان تؤکولدولر. ایچکی مجلیسی قۇرولدو.
- دلیلر اوتوروب کئفه باشلادیلار. بۇنلار کئفده اولسونلار، سنه کیمدن
- دئيیم، گیزیروغلوندان. گیزیروغلو ائله کی، اؤز آداملارینین يانینا قايیتدی،
- هامیسی دئدیلر کی، کوراوغلودان قورخوب قاچیبسان. گیزیروغلو نه قدر
- دئدی کی، قورخمامیشام، وۇروشدوق. آنجاق نه او منی باسا بیلدی، نه ده
- من اونو. دسته اینانمادی. آخیردا گیزیروغلو هرسلهنیب دئدی:
- – اینانمايیرسینیز گئدک چنلیبئلده بیر ده وۇروشاق. اؤزونوز گؤرون.
- هامیسی بیرلیکده چنلیبئله گلدیلر. آمما گیزیروغلونون فیکری بۇ
- ایدی کی، کوراوغلو ایله وۇروشاندا ائله ائلهسین هئچ بیریسی باسیلیب خار اولماسین.
- بلی، ائله کی گلیب چنلیبئله چاتدیلار، باخدیلار کی، مجلیس قۇرولوب. دلیلر،
- خانیملار، کوراوغلو اؤزو هامی کئفه مشغولدو، گیزیروغلو اؤز آداملارینا
- دئدی:
- – بۇ کئفی پوزماق نامردلیکدی. گلین گؤزلهيک، قۇرتارسینلار، سونرا.
- هامی راضیلاشدی. بیر طرفده دۇروب گؤزلهمهيه باشلادیلار.
- نیگار خانیم ائيوازی ساغ يانیندا ايلشدیرمیشدی. بیلمیردی کی، اوغلونو
- اؤلومدن قۇرتاردیغینا گؤره کوراوغلويا نئجه راضیلیق ائلهسین. باخیب-باخیب
- دئدی:
- – آي کوراوغلو، سن کی، بئله ایگیدلیکلر گؤستریرسن، گؤرن بۇ دۆنيادا
- سنین کیمی ایگید تاپیلارمی؟
- کوراوغلو بیر فیکیرلشدی، آلدی، گؤرک نه دئدی:
- آنالار اوغول دوغوبدو،
- گیزیروغلو مصطفی بَي.
- بۇ دۆنيايا تک گلیبدی،
- گیزیروغلو مصطفی بَي.
- نیزهسینین اۇجو قانلی،
- دلیلری دمیر دونلو،
- بیر ایگیددی آدلی-سانلی
- گیزیروغلو مصطفی بَي.
- بیر آتی وار آلاپاچا،
- آمان وئرمیر قێرات قاچا،
- نیزهسینین اۇجو هاچا،
- گیزیروغلو مصطفی بَي.
- بیر آتادان کاش اولايدیق،
- بیر-بیریندن خوش اولايدیق،
- دوغماجا قارداش اولايدیق،
- گیزیروغلو مصطفی بَي.
- هاي گئينده هايا باسار،
- هۇي دئينده هۇيا باسار،
- کوراوغلونو چايا باسار،
- گیزیروغلو مصطفی بَي.
- گیزیروغلو مصطفی بَي کوراوغلودان بۇ سؤزو ائشیدیب باشینین آداملاری
- ایله اونون يانینا گلدی.
- دئدی:
- – کوراوغلو، سن دوغرودان دا کوراوغلوسان. مرد ایگیدسن، بۇ گۆندن
- سونرا آرادا اولان دۆشمنچیلیگی آتدیم، سنینله قارداش اولدوم. باشیمداکی
- دستمله سنین دلیلرینه قاریشدیم. ال وئر، دۆشمنینله دۆشمن، دوستونلا
- دوستام.
- کوراوغلو ایله گیزیروغلو بیر-بیرلرینه ال وئردیلر. او گۆندن دوست
- اولدولار.
قایناقلار
- Azadliq . org