آشیق جونون کؤراوغلو داستانی Edit
آنا آنلاتیم
- آشیق جونون کؤراوغلو داستانی
گۆنلرین بیرینده کوراوغلو يئنه ده قێراتی مینیب گدیگی کسمیشدی. بیر ده باخدی کی، بۇدو بیر کاروان گلیر. کوراوغلو گؤزلهدی، ائله کی، کاروان گلیب چاتدی، بیر نره چکیب آتی داغدان آشاغیيا بۇراخدی. کاروانداکی آداملار ال-آياق آچانا کیمی کوراوغلو اونلارین باشینین اۆستونو آلدی. دئيیرلر کوراوغلو هر کاروانی سويوب داغیتمازدی. قاباقجا اونلاردان باج ایستردی. بۇ کاروانین دا قاباغینی کسیب باج ایستهدی. بزیرگانباشی اونو تک گؤروب سؤزلرینه فیکیر وئرمهدی. ایستهدی کی، کاروانی چکسین. او بیلمیردی کی، بۇ آدام آدی دیللرده داستان اولان قوچ کوراوغلودور. قان وۇردو کوراوغلونون بئينینه. دلی کوراوغلو يئنه جوشدو. اول میسری قێلینجا ال آتماق ایستهدی. سونرا لعنت شیطانا دئيیب اۆچ تئللی سازی دؤشونه باسیب، گؤرک نه دئدی:
- گل سنه سؤيلهيیم، بزیرگانباشی،
- گلمیشم من سندن باج آلام، گئدم!
- داغیدام قفلهنی، تؤکم مالینی،
- گلمیشم من سندن اؤج آلام، گئدم!
- پولاد شئشپرینن ازم باشینی،
- آخیدام گؤزونون قاننی ياشینی،
- جیدايیلن اؤلچم آل قۇماشینی،
- ناغدین دا اولماسا، وئج آلام، گئدم!
- کوراوغلويام، سرت قايادان آتیللام،
- هاردا داوا اولسا اوردا تاپیللام،
- آج قۇرد کیمی جۆملهنیزه تپیللم،
- اورتادان اولمازسا، اۇج آلام، گئدم!
بزیرگانباشی بۇنون کوراوغلو اولماغینا اینانمادی. او ائشیتمیشدی کی، کوراوغلونون يئددی مین يئددی يۆز يئتمیش يئددی دلیسی وار کی، اونلار دۆشمن گؤرنده، شیره، پلنگه دؤنورلر. ایندی اونو گؤروب کوراوغلو اولدوغونا اینانمادی، باج وئرمک ایستهمهدی. آتینی سۆروب يولا دۆزلمک ایستهيیردی کی، کوراوغلو آلدی باشینین اۆستونو، گؤرک نه دئدی:
- آلمامیش آل قۇماشینی،
- بۇراخمارام سنی بۇردان!
- ایچیب دويمامیش قانینی،
- بۇراخمارام سنی بۇردان!
- تۇتوبسان يۆکونو اۇجا،
- سنسن تاجیرباشی خوجا.
- ماتاهینی سويمايینجا
- بۇراخمارام سنی بۇردان!
- مئيداندا شئشپر آتمامیش،
- قوللارین دالدا چاتمامیش،
- قێرات دؤشونه قاتمامیش،
- بۇراخمارام سنی بۇردان!
- هارادان تۇتدون سوراغی،
- آل ائيلهدین قاننی ياغی،
- سیننه چکمهمیش داغی،
- بۇراخمارام سنی بۇردان!
- قوچ کوراوغلو ایستر خراج،
- ایگیدسنسه گیر، مئيدان آچ.
- مالینی ائيلهرم تاراج،
- بۇراخمارام سنی بۇردان!
کوراوغلو سازلا دئدیگی کیمی سؤزده ده دئدی: – بزیرگانباشی! من سنینله داوا ائلهمک ایستمیردیم. ایندی کی، باج وئرمهدین، اؤز خوشونلا داوا-دالاشسیز کاروانی چنلیبئله چک! يوخسا زورلا آپاراجاغام. بزیرگانباشی اؤزونو ائله گؤستردی کی، گۇيا راضیدی، کاروانی چنلیبئله چکیر. آمما حیله يولو ایله گؤز آلتی اؤز ياراخلی-ياساقلی آداملارینا هیم ائلهدی کی، کوراوغلونو وۇرسونلار. ياراقلی تاجیرلر کوراوغلويا هۆجوم ائلهدیلر. ائله بیل کی، بئش-اون دنه سیچان بیر قێزمیش کرگدانی اؤلدورمک ایستهيیردی. بۇ قاباقجا کوراوغلويا گۆلمهلی گلدی. سونرا بوينونون قاتقات دۇران اتی قێزاردی. کوراوغلو آشدی، داشدی، آسلان کیمی جوشدو، قاپلان کیمی قئيزه گلدی. میسری قێلینجی چکدی، ترلان کیمی قێراتین بئلینه ياتیب مئيدانا تپیلدی. ساغدان وۇردو سولدان چێخدی، سولدان وۇردو ساغدان چێخدی، تاجیرلری خۇرد-خشیل ائلهدی. باخدیلار کی، يوخ بۇ زارافات ائلهمهلی آدام دئيیل، سلاحلارینی تؤکوب داياندیلار. کوراوغلو هامیسینی قێراتین دؤشونه قاتیب چنلیبئله گتیردی. دلیلر قاباغا چێخدی. ماللاری يئره دۆشوردولر، يئربيئر ائلهمهيه باشلادیلار. کوراوغلو باخدی کی، تايلارین ایچینده بیر بؤيوک دمیر ساندیق وار. فیکیرلشدی بۇ يقین قێزیل-گۆموشدی. ایشاره ائلهدی ساندیغی آچدیلار. نه چێخسا ياخشیدی. باخدیلار کی، ساندیغین ایچینده ساچی چیينینده بیر آدام اۇزانیب. کوراوغلو قالدی مهتتل کی، بۇ نه سیرردی؟ دؤندو بزیرگانباشی طرفه کی، اوندان سوروشسون، گؤردو بزیرگانباشی مئيیت کیمی تیر-تاپ اۇزانیب يئره. يانینا يۆيوردو، گؤردو خئيیر ها... دۆنن اؤلوبسن، بۇ گۆن! بزیرگانباشی قۇپ-قۇرو قۇرويوب. دلیلردن بیریسی دئدی کی، بس سن ساندیغی آچاندا او اؤزوندن گئتدی. سۇدان-زاددان تؤکدولر، کیشی بیر آز اؤزونه گلدی. کوراوغلو سوروشدو: “بۇ نه سیرردی؟”. بزیرگانباشی دئدی: – کوراوغلو، ایندی کی، بئله اولدو، دۆزونو دئيهجهيم. بۇ منیم آشیغیمدی. آدی دا آشیق جۆنوندو. بۇ او قدر آياغی يۆنگول، خئيیر برکتلی آدامدی کی، منیم يانیما گلندن بری مال-دؤولتیم هددینی آشیب. سن بیزه هۆجوم ائلیينده من هاوانی بۇلوت گؤروب اونو ساندیقدا گیزلتدیم کی، بلکه مالیم، دؤولتیم گئتسه ده، او قالسین. کوراوغلو فیکره گئتدی. بیر طرفدن آشیق جۆنونو اؤز يانیندا ساخلاماق ایستهيیردی، بیر طرفدن اونو بزیرگانباشینین الیندن زورلا آلماق ایستمیردی. بیر ده باشینی يۇخاری قالدیراندا آشیق جۆنونو قاباغیندا دیز چؤکموش گؤردو. آشیق جۆنون دئدی: – قوچ کوراوغلو، گؤزوم، کؤنلوم سنی تۇتوب. عؤمرومون آخیریناجان سنه قۇللوق ائدهجم. آشیق جۆنون او گۆندن کوراوغلونون يانیندا قالدی. عؤمرونون لاپ آخیر گۆنونهجن اونون آشیغی اولدو. دئيیرلر کی، آشیق جۆنون همیشه شهرلری، کندلری، اوبالاری، اويماقلاری گزیب دولاناردی، هاردا بیر ایگید، نجیب، آنا سۆدو اممیش اوغلان گؤرسه گلیب کوراوغلويا خبر وئرردی. کوراوغلو دا اونلاری اؤز دستهسینه گتیردردی.
قایناقلار
- Azadliq . org