نکیاں گالھیں نقصان وڈا کریندن اللہ پاک ہر چیز تے ہک پردہ رکھیے لیکن زبان کوں ڈُو پردیں ءچ رکھیس ہک ڈندیں دا پردہ ڈوجھا تھوڈیں دا پردہ تاکہ اے جتناں چپ رہ ونجے اتناں خیر تھیسی ،نکی گال دا جھیڑا اتناں ودھیے جو اوں سوچے سمجھے بغیر چاقو دے وار کرکے بندہ قتل کر ڈتے کجھ ڈینھ تاں سمجھ نئیں آئ جو کیا ہا تے کیا تھی گئے ، مفروری دی زندگی کنیں تنگ تھی کے اوں آپکوں پولیس دے حوالے کر ڈتا ،پاکستان دی عدالت کویلی دی ٹور کوں شرمیندیں ھوئیں کیس کوں چلا ڈتا قاتل دے وارثیں پہلے زمین ویچی پچھیں مال ڈھگی دی واری آئ ،آخر کار دھیریں بھینڑیں دے گاھنڑے ویچ کے کیس دی پیروی جاری رکھی جیرھلے کجھ پَلے نہ رھیاء عدالت وی قاتل کوں سزائے موت دا حکم جاری کر ڈتا ، جڈاں موت دا حکم جاری تھیندے پچھیں پتہ لگدے موت ھے کیرھی شئے قاتل ہر مُلاقاتی کوں ہتھ بدھ کے فریاد کرے اللہ دا ناں ھیوے میڈی صلح کراؤ اُو جو کجھ منگدن میں ڈیونڑ تے راضی ہاں ،مگر مقتول دے وارث کہیں صورت ءچ صلح کرنڑ تے راضی نہ تھئے مقتول دے ابے دا جواب ھوندا ہا میڈی لاش کوں مونڈھا ڈیونڑ آلا ُپتر گھن آؤ میں معاف کر ڈیساں بھلا ٹُر گئے کڈاں ولدن جو گھن آون ہا ، قاتل دے وارثیں ءچ بُڈھا ہا جیرھا زندگی دے کئ روپ ڈیکھ کے اکھیں کنیں محتاج تھیاء بیٹھا ہا اوں ساری برادری کوں سڈ کے آکھیے جیویں میں آھداں اُنویں کرو صلح تھی ویسی ساری برادری بڈھڑے دے ڈتے ھوئے سبق کوں یاد کرکے مقتول دے گھر روانہ تھئے انھیں دے کٹھے قاتل دی دھی جئیندی عمر چھ ست سال ھئ نکے نکے قدم بھریندی ٹر پئ مقتول دے پیؤ دی اوھا گال ہئ میڈا پتر گھن آؤ ،اجاں او گال کریندا بیٹھا ہا نکڑی دھی اٹھی کے اوندے پیریں تیں بوچھنڑ سٹ کے نکے نکے ہتھ بدھ کے آکھیس ڈاڈا تیڈا پتر نیں ول سگدا میڈا ابا تاں ول سگدے میکوں میڈا ابا ولا ڈے دنیاں ڈیھدی ھئ جو ساری برادری دے اکھیں ءچو نیر ہن مقتول دے ابے باک بھر کے پیریں توں بوچھنڑ ہٹایا گل لگ کے آکھیس دھیریں کوں خالی ہتھ کون ٹُریندے انھیں دی بوچھنڑ دی قیمت کون بھر سگدے ونج میڈی دھی تیڈا ابا تیکوں ڈتا اوکوں آکھیں کہیں دے لال نیں کھسیندے بھینڑیں دے آسرے نیں تُرڑیندے کہیں بُڈھڑے دیاں بانہواں نیں کٹیندیاں میں تاں وت وی ابا ہاں چپ کر کے رو گھنداں اوکوں آکھیں کہیں امڑی داجگر نیں کڈھیندا،،،جمیل حیدری