وڈے آہدے ہوندن جو یقین سبھ توں وڈا پیر ہے اے گالھ حقیقت اے ایندے اچ کئی شک کینی جو ساڈا ذہن ساڈے اتیں ہک اینجھی کمانڈ کرنڑ دی صلاحیت رکھدے جو اساں اوکوں لاشعوری طور تے خدا دی حیثیت ڈتی ودے ہوندوں۔ لیکن اے چیز مننڑ اچ شئیت ساکوں بہوں مشکل تھیسی۔ چھوٹے لا کنوں اساں جیہریاں گالھیں سنڑدے ہیں ہنیں گالھیں دا کہیں نہ کہیں طراحویں ساڈے اتے اثر لازمی ہوندے۔ بال کیونکہ اندھارے اچ کشے نہیں ڈیکھ سگدے ہوندے لہذا اندھارے توں ڈردن۔ ایں واسطے نکے لا اماں آھدی ہئی سمھ رہوو نہ تے رات دی ماء چا ویسے وے۔ ساڈے لاشعور اچ رات اندھارے نال تعلق دی وجہ کنوں خوف دی علامت سمجھی ویندی ہئی تے اوندی ماء مزید خوفناک ہئی۔ اساں حالانکہ اج تئیں رات دی ما نہ ڈٹھی ہئی لیکن ساڈے ذہن اچ پروپیگنڈہ کر تے اے گالھ فٹ کر ڈتی گئی ہئی جو او ہے تے بال شیطانگی کریسن تاں چا وی ویسی۔۔ اصل اچ بالاں تیں آپنڑی مرضی چلاونڑ دا اے ہک انداز ہا جیہرا اماں استعمال کیتا۔ ایویں ڈھگ ساریاں گالہیں ہن پیاں بہرحال گالھ اگو تے ویسی پئی میں آکھنڑ اے چاہنداں جو بہوں ساریاں غیر حقیقی چیزاں ساڈے دماخ اچ عقیدے دی حیثیت رکھدین اے ایویں نئیں بلکہ ایندے پچھو ہک ترتیب ہے جیں ساکوں اے چیزاں مننڑ تے تیار کیتے۔ ہنڑ جیکر انھیں چیزاں دا انکار وی کروں تاں وی ساڈے دماخ اچ انھاں دا کجھ نہ کجھ شئیر ضرور رہسی۔ او بھانویں جیہری حیثیت نال ای ہووے لیکن رہسی لازمی۔ ہک سنگتی میکوں آکھیے جو پھل تعویز اثر ای کریندن؟ میکوں کیا پتہ اثر کریندن یا نہ ؟ لیکن میڈا دماخ منیندے جو انسان آپ جیہرا کجھ کرے او گالھ ہوندی اے تے اوہو عمل ہوندے میڈی اے گالھ کوڑ وی تھی سگدی اے تے سچ وی۔ اوں دوست آکھیے میکوں آپ کوں وی پھل تعویز تے یقین کینی لیکن میں کہیں تے پھل تعویز کرنڑ چاہنداں ۔۔ ایں توں مراد اے جو او ساڈا سنگتی لاشعور اچ کتھائیں نہ کتھائیں پھل تعویز دا معتقد ہے پیا یا نئیں وی سہی تاں اوں پروپیگیشن دا اثر کہیں نہ کہیں حیثیت نال اوندے دماخ اچ ہے پیا۔ میں سوچینداں پیا ہم جو جیکر میں وی کہیں جنگل اچ جا پوندا جتھاں کوئی نہ ہووے۔ نہ کوئی کمونیکشن نہ کجھ ۔ اتھاں میں آپنڑیں ذہن اچ ایہو کجھ سوچیساں جیہرا ہنڑ سوچینداں ؟ جیکر ایویں ہے تاں وت مقدر ہک حقیقت ہے۔ جیکر نہیں تاں وت اے وی ہک غیر حقیقی پروپیگنڈے دے نتیجے دی حیثیت رکھدے۔ بہرحال سوچنڑ دی گالھ ایہا ہے جو میڈا دماخ اوں صورت اچ ایویں سوچے ہا یا نہ۔(مظہر حسین)