ⵎⵙⵎⵓⵏ ⴰⵡⴰⵍ ⴰⵎⴰⵜⴰⵢ ⴰⵙⵏⵎⴰⵍⴰⵢ ⵏ ⵜⵎⴰⵣⵉⵖⵜ (ⵙ ⵓⵣⴳⵣⵍ: ⵎⵎⵙⵎ) ⵉⴳⴰ ⵜⴰⵢⴰⴼⵓⵜ ⵏ ⵜⵡⵓⵔⵉ ⵏ ⵉⵎⵔⵣⵓⵜⵏ ⵏ ⵡⴰⵎⵎⴰⵙ ⵏ ⵓⵙⵎⵙⴰⵙⴰ ⵏ ⵜⵓⵜⵍⴰⵢⵜ, ⵔⴰⴷ ⵏⵏ ⴳⵉⵙ ⵢⴰⴼ ⵓⴳⴷⵓⴷ ⵍⵍⵉ ⵙⵉⵙ ⵉⵜⵜⵇⵇⵍⵏ ⵢⴰⵏ ⵉⵎⵉⵙ ⴰⵎⴰⵡⴰⵍ ⵓⴱⵖⵉⵔ. ⵉⵜⵜⵡⴰⵙⴽⵔ ⵙ ⴽⵕⴰⴹⵜ ⵜⵓⵜⵍⴰⵢⵉⵏ: ⵜⴰⵎⴰⵣⵉⵖⵜ ⴷ ⵜⴼⵕⴰⵏⵚⵉⵚⵜ ⴷ ⵜⵄⵕⴰⴱⵜ. ⵜⵓⵜⵍⴰⵢⵜ ⵏ ⵓⴽⵛⵛⵓⵎ ⵖⵔⵙ ⵜⴳⴰ ⵜⵜ ⵜⵎⴰⵣⵉⵖⵜ, ⴹⴼⴰⵕⵏⵜ ⵜⵓⴷⵉⴼⵉⵏ ⵏⵏⵙ ⴰⵏⵎⴰⵍⴰ ⵏ ⵉⵙⴽⴽⵉⵍⵏ ⵏ ⵓⴳⵎⵎⴰⵢ, ⵉⵍⵉⵏⵜ ⵓⵍⴰ ⵙ ⵜⵄⵕⴰⴱⵜ ⴷ ⵜⴼⵕⴰⵏⵚⵉⵚⵜ ⴰⵛⴽⵓ ⵜⵓⵜⵍⴰⵢⵉⵏ ⴰⴷ ⵍⵍⴰⵏⵜ ⴳ ⵓⵎⵓⵖⵍⵉ ⴰⵎⵏⵜⵍⴰⵢ ⵏ ⵍⵎⵖⵔⵉⴱ ⵍⵍⵉⴳ ⵜⴳⴰ ⵜⵎⴰⵣⵉⵖⵜ ⵜⵓⵜⵍⴰⵢⵜ ⵜⴰⵎⴰⴷⴷⵓⴷⵜ ⵏⵜⵜⴰⵜ ⴷ ⵜⵄⵕⴰⴱⵜ, ⵜⴳ ⵜⴼⵕⴰⵏⵚⵉⵚⵜ ⵜⵓⵜⵍⴰⵢⵜ ⵜⴰⴱⵕⵕⴰⵏⵉⵜ ⵜⴰⵎⵣⵡⴰⵔⵓⵜ ⴳ ⵜⵎⴰⵣⵉⵔⵜ.
ⴰⵎⴰⵡⴰⵍ ⴰ ⵓⵔ ⵉⵥⵍⵉ ⵙ ⵢⴰⵜ ⵜⵏⵜⴰⵍⴰ, ⵉⵙⵎⵓⵏ ⴰⴽⴽⵯ ⵜⴰⵎⴰⵣⵉⵖⵜ, ⵉⵔⴰ ⴰⴷ ⵜⵜ ⵉⵙⵙⵓⴷⵙ ⴰⴼⴰⴷ ⴰⴷ ⵜⵎⵙⴰⵙⴰ ⴰⴷ ⵜⴳ ⵢⴰⵜ. ⵙ ⵓⵢⴰⴷ ⵓⵔ ⴷⴰ ⵢⴰⴷⴷⵔ ⵜⴰⵎⵏⴰⴹⵜ ⵍⵍⵉ ⴷ ⴽⴽⴰⵏⵜ ⵜⴳⵓⵔⵉⵡⵉⵏ. ⵢⴰⵏ ⵡⵓⴷⵎ ⵢⴰⴹⵏⵉⵏ ⵍⵍⵉ ⵙ ⵉⵥⵍⵉ ⵎⵙⵎⵓⵏ ⴰⵡⴰⵍ ⵉⴳⴰ ⵜ ⵓⵙⵉⴷⴼ ⵏ ⵜⴳⵓⵔⵉⵡⵉⵏ ⵜⵉⵏⵓⵍⴼⵓⵜⵉⵏ ⴰⴼⴰⴷ ⴰⴷ ⵉⵙⴱⵓⵖⵍⵓ ⵜⵓⴷⵔⵜ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ. ⵜⴰⵙⵏⵉⵔⵎⵜ ⴰⵡⴷ ⵏⵜⵜⴰⵜ ⴷⴰⵔⵙ ⴰⴷⵖⴰⵔ ⵏⵏⵙ ⵜⴰⵎⴰ ⵏ ⵜⵓⵜⵍⴰⵢⵜ ⵜⴰⵎⴰⵜⴰⵢⵜ. ⴳ ⵜⴳⵉⵔⴰ ⵏ ⵎⵙⵎⵓⵏ ⴰⵡⴰⵍ, ⵍⵍⴰⵏ ⵙⵉⵏ ⵡⵓⵙⴽⵉⵏⵏ ⴰⵔ ⵜⵜⴰⵡⵙⵏ ⴳ ⵓⵔⵣⵣⵓ ⵏ ⵜⴳⵓⵔⵉⵡⵉⵏ ⵙ ⵜⵄⵕⴰⴱⵜ ⴷ ⵜⴼⵕⴰⵏⵚⵉⵚⵜ.
ⵜⵜⵢⴰⵔⴰⵏⵜ ⵜⵓⴷⵉⴼⵉⵏ ⵙ ⵜⴼⵉⵏⴰⵖ ⴷ ⵉⵙⵙⴽⵉⵍⵏ ⵉⵎⵙⵉⵙⵍⵉⵜⵏ ⵉⵎⴰⴹⵍⴰⵏⵏ ⵙⵎⵙⴰⵙⴰⵏⵉⵏ ⴰⴼⴰⴷ ⴰⴷ ⵉⵔⵅⵓ ⵓⵔⵣⵣⵓ ⴳ ⵓⵎⴰⵡⴰⵍ ⴰⴷ ⵅⴼ ⵎⵉⴷⴷⵏ ⵍⵍⵉ ⵓⵔ ⵉⵙⵙⵉⵏⵏ ⵜⵉⴼⵉⵏⴰⵖ. ⴰⵢⴰ ⵉⵣⵎⵔ ⴰⴷ ⴰⵙⵏ ⵢⴰⵡⵙ ⴳ ⵓⵍⵎⵎⵓⴷ ⵏ ⵓⵙⴽⴽⵉⵍ ⵏ ⵜⵎⴰⵣⵉⵖⵜ.