Gloria de los Ángeles Treviño Ruiz (Monterrey, Nuevo León, 15 ti' febreero tu ja'abil 1968), maas k'aj óola'an bey Gloria Trevie'. Leti'e' ku k'aay, ku áaktwar, ku yóok'ot yéetel ku ts'íibtik k'aayo'ob. Tu paalile’ kuxlaj tu kaajil Syudad Biktoorya, Tamawliipas. Tu ja’abil 1985e’ bin kajtal tu Syudadil Meejiko yo’olal u kajik u meyaj bey áartista ti’ jump’éel grupo tu k’aaba’ataj Boquitas Pintadase’. Máan kamp’éel ja’abe’ ka’a tu jóosaj u yáax aalbum tu k’aaba’ataj ...¿Qué hago aquí? Lela’ ko’on tumen BMG Ariola.
Yéetel siinko u p’éelel produuksyoones ti’ paaxe’, giiras chuupo’ob yéetel kalendaaryo’ob jach probokaatiiboe’, Gloria Trevie’ suunaj juntúul u áartistail pop jach k’aj óola’an Meejiko. U ye’eskubáa jach probokatiibo yéetel sexwale’ tu meetaj u kritikaarta’al tumen le máako’ob jach konserbadooro’obo’ tumen tu beelile’ tun payt’aantik ka yanak jump’éel libertad sekswal jach je’ek’ab. Tu ja’abil 1990e’ ook ti’ siine’ yéetel óoxp’éel peliikulaob: Pelo suelto (1991), Zapatos Viejos (1993) yéetel Una Papa sin cátsup (1995).
Tu yoorail ts’o’ok u jach ka’anatal u meyaj Gloria Trevie’ je’esa’ab u káarrera yo’olal ya’abkach eskaandalo’ob. Ti’ 1997e’, Gloriae’ jáaw u chíikpajal ti’ escenaaryo chéen p’elak u ts’o’okol u programa ti’ telebisyoon XETU Remix. Ma’ úuche’, leti’ yéetel u yúuchben representaante Sergio Andradee’ denunsyaarta’abo’ob yo’olal áabuso sekswal ti’ menoro’ob. U awtoridaadilo’ob Meejikoe’ tu ya’alaj u kaxta’al yéetel u chu’ukul Gloria yéetel Sergio. Jóok’ u chu’uklo’ob tu kaajil Riiyo de Janeeyro, Braasil tu’ux k’a’al óoxp’éel ja’ab Gloria. Ich Febreero ti’ 2002e’ yanchaj juntúul u chaampal k’ala’anil ich kaarsel yéetel tu ts’áaj u k’aaba’ate’ Ángel Gabriel. Trevie’ taasa’ab bisa’ab Meejiko tu k’iinil disyeembre ti’ 2002, tu’ux beeta’ab jwisyo ti’. Ka beeta’ab justiisya ti’ tu lu’umil Meejiko’e absolbeerta’ab ti’ u deliitoil byolasyoon agrabaada, raapto yéetel korrupsyoon ti’ menoro’ob; bey tuno’ a’ala’abe’ ma’ kulpaablei’ yéetel cha’ab u jóok’ol libre. Jáalcha’ata’ab jump’èel 21 ti’ septyeembre ti’ 2004.