Wp/yua/Briceida Cuevas Cob

< Wp‎ | yua
Wp > yua > Briceida Cuevas Cob

Briceida Cuevas Cob Síij tu kaajil Tepakán, Calkiní, Campeche (1969). Tu ja'abil 1992 táakpaj ichil junmúuch Aj ts'íibo'ob u k'aaba' GéNALÍ (Géneros narrativo y lírico). Táakpaj ichil junmúuch' kaambal utia'al u ts'íibta'al Ik'ilt'aan tu Najil Miatsil (Casa de Cultura) tu noj kaajil Calkiní, jo'olbesa'ab tumeen Waldemar Noh Tzec, ichil u ja'abilo'ob 1992 tak 1994. Tu k'amaj u yáantaj Fondo Nacional para la Cultura y las Artes utia'al máasewal Aj Ts'íibo'ob tu ja'abil 1996.

Briceida Cuevas Cob.

Ichil u ja'abilo'ob 2005 tak 2008 áantajnaj utia'al u táakmuk'ta'al u múuch' meyajil maaya t'aan ichil u meyajil u beeta'al yéetel u su'utul ich maaya u áanalte'il u ka'ansa'al Modelo educativo para la vida y el trabajo indígena bilingüe (MEV y TIB) ti'Instituto Estatal de la Educación para los Adultos (IEEA) Campeche. 2008 tak 2010 tu jo'olbesaj u meyajil Programa de Alfabetización indígena.

Ts'aaba'an k'aj-óoltbil u ts'íib ik'ilt'aano'ob ti' jejeláas ts'alabju'uno'ob yéetel áanalte'ob oli' je'el bix Flor y Canto, jo'otúul u Aj ts'íibilo'ob noojol (INI/UNESCO, Tabasco, 1993), Poesía contemporánea en lengua maya (Tumbén Ik’t’anil ich Maya’ T’an. Madrid, 1994), Voci di Antiche Radiche, dieci poeti indigeni del Méssico (Hammerle/PEN Club, Trieste, Italia, 2005), yéetel ti' Las lenguas de América, ti' jump'éel u múulxookil ik'ilt'aan molts'íibt'ab tumeen Carlos Montemayor, UNAM. México, 2005. Tu ja'abil 1995, tu Najil Aj Ts'íibo'ob tu kaajil Bacalar, Quintana Roo (Casa Internacional del Escritor de Quintana Roo) tu jóok'saj junjaats u ik'ilt'aano'ob tu k'aaba'taj El quejido del perro (U yok’ol awat peek’). Tu ja'abil 1998 jóok' u áanalte' u k'aaba' Como el sol (Je' Bix K'in) Ku máan lajun ja'abo'obe' jóok'sa'ab u laak' junjaats u ts'íibo'ob tumeen Comisión Nacional para el Desarrollo de los Pueblos Indígenas, 2008. Tu ja'abil 2011e', tu ka'ansaj ts'íib junjaats mejen paalal jump'éele' ka'aj tu jóok'saj jump'éel áanalte' ich maaya yéetel kastlan tu k'aaba'taj Escribiendo la lluvia (U ts’íibta’al Cháak), tu'ux táakbesa'ab ik'ilt'aan yéetel popolt'aano'ob ts'íibta'ab tumeen paalal yéetel nukuch máak tu kaajal.

Briceida Cuevas Cobe' táakpaj le ka'aj beeta'ab u Mola'ayil Aj Ts'íiboob tu nojméek'táanlu'umil México. Tu ja'abil 2010 táakbesa'ab bey Creadora artística ichil Sistema Nacional de Creadores de Arte del FONCA. Bejla'e' táan u ts'íibtik jump'éel áanalte' utia'ak mejen paalal tu yóok'lal úuchben yéetel túumben báaxalo'ob yéetel bix u báaxta'alo'ob. Payalt'anta'ab tumeen Secretaría de Educación Pública utia'al ka' táakpajak utia'al yéeyik máax kun náajaltik u chíimpolalil Artes y tradiciones populares ichil Premio Nacional de Ciencias y Artes tu ja'abil 2011.