Patele Sagato IAU (1935-2006)
Ne'e tupu Patele Sagato i Hihifo i te 'aho 20 o Fepualio 1935 pea ne'e 'ako i te seminalio o Lano (1949-1955) pea i te seminalio o Païta (1956-1964). Ne'e fakanofo patele i te 'aho 6 o Sanualio 1965 i Matā'utu pea kamata gaue i Mala'etoli.
'Uhi ko tana kole ke hū ki te kautahi o Malia, ne'e alu leva Patele Sagato ki Falani o fakahoko tana novisia i Lyon (1965-1966). Hili aia pea liliu mai ki Niu Kaletonia o gaue tafito mo te kaiga lotu o 'Uvea mo Futuna ne'e kua ma'uli ai. Ne'e nofo Patele Sagato o taupau te 'u palokia o Vallée des Colons, Motor Pool, Maré mo Auteuil (1978-2005).
Ne'e ma'uhiga 'aupito te 'u gaue ne'e fakahoko e Patele Sagato ki te taupau o te kaiga o 'Uvea mo Futuna i Niu Kaletonia. Ne'e ina faiga'i, i tona 'uhiga pelepitelo, ke faifaitahi mo tokalelei tu'uma'u te kaiga. Pea ne'e tokoni mo kinakina ki he tokolahi i te 'u faigata'a'ia fuli ne'e tau mo nātou i te temi 'aia i Niu Kaletonia.
Ne'e fakatau ki ai te metai fakapale o te pule'aga falani e te pule kolo o Niumea i te ta'u 2005.
Ne'e mavae mo tātou ia Patele Sagato i te 'aho 2 o Malesio 2006 i Niumea pea ne'e 'avaifo i 'Uvea.
Matapuna edit
- Tiosesi o Niu Kaletonia: https://diocese.ddec.nc/communike/iau.pdf