Ne’e ko te Pulotu, ne’e ko te nofo’aga aia o te ‘u atua mu’a pea ne’e ko he fenua ne’e ma’u ai me’a kai lelei fuli pea ma’uli fimāliē kita i ai. Ne'e pule ki ai ia Hikule'o
Ne’e lava fagona pe ki ai te kaiga ne’e tauhi lotu lelei, faka’apa’apa ki te ‘u tapu o te fenua, fatogia mo ma’uli fakalogo ki te ‘u ‘aliki kae tafito pe nātou ne’e to'a mo mamate i te tau.
Ne’e ko te fenua o te he'egata ne’e tu’u i te lagi pea ne’e tu’u ai te fu’u akau ko te Puka Tala pea ne'e ma’u mai ai me’a kai lelei fuli.
Ne’e tu’u ai mo Vaiola, ko te vai mokomoko mo fakama’uli ne’e ma’anu ai te kaiga kua kaku ki ai.
Ia mu’a o te fagona o te ma’uli o te kaiga kua mālolo ki tona fenua fo’ou, ne’e nofo ‘aho e 4 i te lalolagi nei.
I te ‘aho nei, e kei tou ‘ui mo faka’amu ke manu’ia mo mokomoko te fai fagona o te kaiga kua mavae mo tātou pea ke ma’u mo honātou fenua lelei.