Pātele Luka TUIPOLOTA'ANE (1954-2005)
'Ako
editNe'e tupu Luka Tu'ipolota'ane (Saliga) i te 'aho 4 o Fepualio 1954 i 'Uvea ite palokia o Mu'a. Ne'e kamata tana 'ako i Mala'etoli pea hoko atu ki te seminalio o Lano pea mo te seminalio o Saint Léon i Païta. Hili tana 'ako i te fale'ako lahi o Marcellin Champagnat i Païta pea alu leva Luka o fakahoko tana temi solia. Osi aia pea mavae Luka o hū ki te seminalio lahi o Sagato Petelo Sanele i Fisi o nofo ai ta'u e 6.
Ma'uli fakamamahi
editNe'e fakanofo patele Luka i te 'aho 4 o Tesepeli 1982 pea toe hoko atu tana 'ako ite fale'ako ma'oluga katolika o Palesi lolotoga ta'u e 2.
Hili tana 'ako pea toe liliu mai patele Luka ki 'Uvea nei o gaue i totatou tiosesi lolotoga ta'u e 20. Ne'e lahi te 'u gaue ne'e tu'ulaki e patele Luka pea e kei tou manatu'i fuli pe te 'u folau mo fakatahi ne'e ina teuteu'i:
- 21 o Novepeli 1986: Fagona tapu a te kaiga lotu e toko 72 ki Fisi o felave'i i ai mo te Tui Tapu - 27 o Oketopeli ki te 5 o Novepeli 1987: Fakamanatu o te ta'u 150 o te kua tau mai o te lotu katolika ki 'Uvea nei - 14 ki te 22 o Sunio 1988: Fono lahi o te kau epikopo o te Pasifika i 'Uvea nei. Ne'e kau ki ai kaletinale e 2 mo epikopo e 21 - 24 ki te 26 o Maio 1996: Fakamanatu o te kua ta'u 150 o Lano mo Sofala. Ne'e folau mai ki 'Uvea nei te toko 120 ape mai Niu Kaletonia, Tahisi, Toga, Fisi, Ha'amoa, Vanuatu mo tai atu - 31 o Sulio 1997: Fagona tapu a te kaiga lotu e toko 148 ki Palesi ki te Fakatahi fakamalamanei o te kau tupulaga (18 ki te 24 o Aukusito). - 7 ki te 14 o Tesepeli 1997: Fakamanatu o te kua ta'u 50 a te'u nofo'aga o Mala'etoli mo Petania.
Mole kei puli ki he tahi i Mu'a te 'u fakatahi mo fakafiafia faka'osi ta'u ne'e teuteu'i e patele Luka mo te kau tupulaga mo finemui o te palokia.
Ne'e toe taki e patele Luka te 'u gaue ki te taupau o te haha'i vaivai, te faigao'i a te kau maimo'a, te 'ako hiva a te kau tupulaga, te hiki faka'uvea o te tauhi fo'ou.
I te faka'osi o tona ma'uli, logo la tana kua mahaki kae ne'e kei lahi teu gaue ne'e kei fai e patele Luka i tona 'uhiga pule palokia, hoa gaue ki te epikopo pea pule taki o te 'ako o te lotu.
Ne'e mavae mo tatou ia patele i te 'aho 14 o Tesepeli 2005 i Niumea i tona ta'u 51.