Wp/wls/'Aho falani

E fakama'uhiga i 'Uvea mo Futuna te 'aho falani i te 'aho 14 o Sulio.

'Uhiga

Ko he 'aho fakamanatu o te laga a te haha'i falani o fehagai ki tanātou pule'aga hau i te 'aho 14 o Sulio 1789, o to'o ai te kolo o la Bastille i Palesi. Ko te 'aho aia ne'e fili ke fakamanatu ai te kamata'aga o te Lepupilika Falani.

Ko he 'aho fakapule'aga e fakamanatu i te 'atu kolo, koga fenua mo telituale o te Lepupilika Falani.

Pāki ta'ofi

Fakamanatu i 'Uvea mo Futuna

E fakahoko te 'u fakafiafia i Sagato Soane i Matā'utu i 'Uvea. 'Uhi ko te nofo vaelua o te fenua, e toe fakahoko mo ni'i fakafiafia i Fitugamamahi i Vailala.

I Futuna, e fakatahi Alo mo Sigave i Sausau (Leava) pe i te Fale 2000 (Alo).

Fakatu'utu'u

E teuteu'i te 'aho falani e he komite e taki e te pule o te matani gaue o te 'u koloa fakafenua.

E māhani mai e fakamanatu te 'aho falani aki te 'u fakafiafia 'aeni:

To'oto'oga fakalotu: e 'avahi te 'aho aki he misa i te ekelesia faka'epikopo pea kātoā mai ki ai te kau ma'u tu'ulaga o te fenua.
To'oto'oga fakapule'aga: toho fuka, lea mo hiva o te Marseillaise e te tamaliki'ako, file
To'oto'oga fakafenua: kava
Faigao'i papālagi: lele mānava
Gao'i fakafenua: pā 'ulutoa, fakatētē
Fakahaoga fakafenua: laga kato, tui kahoa
Fakahāhā koloa mo pāki
Falahaoga me'e
Fakahaoga hiva

Fakahaoga me'e

I te ta'u fuli e fakahoko te fakahaoga me'e pea ko te koga aeni e faka'amu ki ai te tokolahi.

E fakataupiepie te 'u pālokia e 3 i 'Uvea mo te 'u pālokia e 2 i Futuna i te hiva lau, te me'e tokotahi, te me'e fakatahi mo te teu me'e. E tahi fili e te pālokia tana kolo fakafofoga ki te fakahaoga.

'Uhi ko te ta'i mahaki ne'e mole fakahoko te fakahaoga i te 'u ta'u 2020 mo 2021.

I te ta'u 2022, koeni te fua o te fakahoaga me'e i Sagato Soane:


Tu'ulaga	Me'e tokotahi tagata	Me'e tokotahi fafine	Me'e fakatahi
1	Hihifo	Hihifo	Hihifo
2	Matā'utu	Matā'utu	Matā'utu
3	'Utufua	'Utufua	'Utufua

Ki hona fakakātoā

'Uvea mo Futuna 1: Talalogo o te 'aho 14 o Sulio 2022