Wp/vmw/Okhala Ekwaasuni

Okhala Ekwaasuni

Saari imwali piili saarowa wiina nto yaahikhala ekwaasuni yaatthuna otthaana. Alesa eniira muttike emmanakasa. Maxi ekwaasuni ele enathipelela otthaana. Ephiyakarusa, imwali iye ilyaaka itthu sooreera in orupa vooreeravo, ekwaasuni yaalya misoope ni orupa vaate woohireerelavo. Nto ohiyu okathi aximwali erumpeene, yaahoorwa anamakhuura eniira:

-Mwali mwali, ninleelo khamurumpe?

Okhala wiira ekwaasuni ele yiiha ehirummpe, yaahaakhula yiiraka:

-Ninleelo ninleelo, khinnarupe khinnarupe

-Noowani noowaani, khinnarupe khinnarupe.

Vaxaakaru, mmiravo ole ohaakoha aximwali ale wiira: mwaaniiwa etthu ele ohiyu yiira: nakhuure nakhuure!!?

Aximwali yeemwiira nnaari. Nto mmiravo ole iira ohiiyu ola wa olelo kimmuritha nakehi aka wiira atthu kaattukwele mulipwini mwa aya okathi anoorwaaya miyo kacuca mukhoyi owo nvinyesa woohinyakula wiira mwaawehesa. Alesa yeemwiira hiyo nihiiwa. Vano anamakhuura awo erwaakara, mmiravo oocuca mukhoyi ni aximwali ale aavinya yaawehasa anamakhuura yiiraka:

-Mwali mwali, ninleelo khamurumpe?

Mmiravo ohaakhula iiraka:

-Ninleelo ninleelo, khinnarupe khinnarupe

-Noowani noowaani, khinnarupe khinnarupe.

Vaxaakaru, imwali iiye haarowela axiiyeya wiira nyuwosa munipheela oniiva? Munihoole waaxitithihu. Alopwana alesa yeemwiira nnaari. Nto nihiku naatthommwale wiira yiiviwesa aximwali ale, mmiravo ole iiha apankeene ekeelo awe ni tho axitiithi ayasa yiiha yinlalyeene exukhuru nuumala tho apakinnheene matthanka anihimya wiira aniihu ale annrimeelo khaninwoonatho maana yaahivirasa miyaakha soowaattha ehooniwesa.

Mmiravo ookuxa mattuwa, miri ni itthu sikina oohela mukeeloni mme ni ohiira: axilamu aka, olelo mukihiye keettakase ni axirokoraka ala ninoottika. Etthuniheriwakarusa, aawelasa mmme ni mmiravo oopacerya wiipa iiraka:

-Ekeelo aka teleya teleya

-Mukiveleele teleya teleya

-Ori amaama, teleya teleya

-Siike, mwaamwali nrowe

Ekeelo yoovava ele erowaka elapo ya aximwali ale, erowa yakasa mummankani waattamenle wa axitiithi aya. Niiwe otheka waalimmwa wiiha orikoolavaniwa. Ookhumelela nsiya anakohiwa wiira woorumani mwaphiya munrowa wiira hayi?

Owo eemwiira kinrowa wiira:

- kuukuru namankuukuru (2x)

- kuukuru anamwane yaarimeenle

- kuukuru namankuukuru

- kuukuru anamwane aaphiya

- kuukuru namankuukuru

Atthu yeemwiira yookhala enirwa, nimaale niiwiriyane. Nto nsiya noottikela wiipa:

- kuukuru namankuukuru (2x)

-Mweexeke mwaapu

- kuukuru namankuukuru

- kuukuru anamwane aaphiya

- kuukuru namankuukuru

Atthu yeemwiira ariwe anamwane aaphiya. Vahilekenle enooniwa ekeelo erwaaka mphaka vaate. Otuthuwa wootheene wa atthu ale akina arootthawa akinaku othamala yiiraka: wulu!!? Nwooneke, anamwane yaale yaarimeenle olelo aaphiya. Awosa yaahaakheleliwa ni aximwali ale yaahiira: maama ni nyuwo tiithi, ahaari murokorahu ola hiyo naahookhwa!