Wp/vmw/Mwaha wa Milili

Mwaha wa Milili

Aari mulopwana a milili iihaniwa Xaapala. Mulopwana ola aapahula itthu vate eettaka ekwaha awe. Ola aarimwaattheya. Ntthoko nimosa ohaala mwiri oniiriwa naace. Nuuvenya, oorowa etthoko awe ekinaaku. Mwiri ole ohalakaru ohinnuwa, ohiima mihokhoroko ni soopacerya otthokottha. Vano, amwaara awe ehalakaru aarukula naace nnle ni ahoolya. Nuumala, amwaara awe ale ahookhwa! Ni atthu khiyaasuwela mananna oowaaloola athiyana ale maana iyeya ole khaapwanyaneya vakhiviru wa mutthetthe ole. Nto, amusi ni atthu akina yaahithukumana ewiihana axipalame ootheene a mutuniyani ntoko Nsiya, Ntthokolo, Mwiitiiti, Ekhwali ni axipalame akina wiira wapakiwe mukuttaanu woowiipa. Maxi, woomalelani wa mukuttaanu ole, axipalame ootheene ale yaathannliwe yaari Ekwali ni Mwiitiiti.

Nto, Ekhwali yoopacerya wiipa yiiraka:

-Kuruwe kuruwe(2x)

-Mwana anyu Xaapala, kuruwe kuruwe

- Kuruwe kuruwe(2x)

-Amwaara anyu ahookhwa, kuruwe kuruwe

-Kuruwe kuruwe(2x)

-Akhwiiye naace, kuruwe kuruwe

-Kuruwe kuruwe(2x)

-Naace nihilyiwaka, kuruwe kuruwe

-Kuruwe kuruwe(2x)

-Nilyelyiwaka eyaakha, kuruwe kuruwe.

Nuuvenya, Mwiitiiti navayiiye oopacerya wiipa iiraka:

-Ttii tti, mwaninyu xaapala, ttii tti

-Xaapala Xaapala

-Ttii tti, amwaara anyu ahookhwa, ttii tti

-Xaapala Xaapala

-Ttii tti, akhwiiye naace, ttii tti

-Xaapala Xaapala

-Ttii tti, naace nihilyiwaka, ttii tti

-Xaapala Xaapala

-Ttii tti, nilyiwaka eyaakha, ttii tti

-Xaapala Xaapala

Niwiipasa, yeemwiiriwa atthu annisuwela wiipa vano enavinya amwiitiiti ni akwali enarowa wa axaapala. Ephiyakarusa wa axaapala, aakasasa mmwirini. Nto, ekwali yoopacerya wiipa:

-Kuruwe kuruwe(2x)

-Mwana anyu Xaapala, kuruwe kuruwe

- Kuruwe kuruwe(2x)

-Amwaara anyu ahookhwa, kuruwe kuruwe

-Kuruwe kuruwe(2x)

-Akwiiye naace, kuruwe kuruwe

-Kuruwe kuruwe(2x)

-Naace nihilyiwaka, kuruwe kuruwe

-Kuruwe kuruwe(2x)

-Nilyelyiwaka eyaakha, kuruwe kuruwe.

Nuuvenya, mwiitiiti navayiiye oopacerya wiipa:

-Ttii tti, mwaninyu xaapala, ttii tti

-Xaapala Xaapala

-Ttii tti, amwaara anyu ahookhwa, ttii tti

-Xaapala Xaapala

-Ttii tti, akhwiiye naace, ttii tti

-Xaapala Xaapala

-Ttii tti, naace nihilyiwaka, ttii tti

-Xaapala Xaapala

-Ttii tti, nilyiwaka eyaakha, ttii tti

-Xaapala Xaapala.

Xaapala ayiwakaru wiira ariwe amwaara aka ahookhwa mwaha wa naace ni owo aahuupuwela wiira owaannyawe ahaala ninnlo mmphaka okathi ola va nootthokottha. Xaapala ooroxeya orowaka etthoko awe yeele yoopacerya, nuuphiya, ttiri ohaapwanya amwaara awe ekhwiiyeene. Vano, anakuxa muretthe awe anaavekhulela amwaara awe ale. Muhina wa okathi vakhaani, amwaara awe ale enahuhumuwa.

Ethoonyeryo

Ehantisi ela enihimya wiira vatthokoni vanimwiiwananiwa. Eyo ti eyo, mulopwana eettaka ekwaha awe ahinapahula itthu sinrumeeliwa vatthokoni vale asuwelaka wiira aakhalavo amwaara awe, anna awe nnakhala amusi awe. Hata mihokhorokho sa mmattha ohinapahula ohiiwananne ni amwaara awo, itthu inimwiiwihaniwa ihinatti ovariwa. Miiko oyeleeliha itthu sinceene sooreera sinrwa ohoolo wa ahu.