Wp/vmw/Filipe Nyusi

Ohariwa

Filipe Jacinto Nyusi (nfalume a elapo ya oMosampiikhi) – oyariwe muttetthe wa oNamawu, etistritu ya oMweeta, eprovinsiya ya “oCabo Delgado”, mahiku yettaka mathannamaxexe a mweeri wa “Fevereiro” a mwaakha wa 1959. Namuhakhu ni namatthara sa poliitika a oMosampiikhi, nfalume a naanano elapo-awe okhuma mwaakha a 2015.

Muteko

Okhuma mwaakha wa 2008 mpakha 2014 waavara muteko wa omahoolela mwaalano onweherya mukhapelelo wa elapo. Othanliwe okhala nfalume a neexexe a Elapo ya oMosampiikhi mwaakha wa 2014 ni otthikela tho othanliwa 2019. Osoma wawe wiixuntte otekateka “Enginheiro Civil”. Anamayari-awe yaari atthu oowana ekhotto yowoopola elapo wa moono a FRELIMO. Epaceriwakaru ekhotto yowoopola oMosampiikhi, axipaapa-awe yaala yahicawela elapo ya oTansaaniya, weywo asomihiwaawe eXikola ya masomelo oopacerya ya Frelimo “oTunduru”. Nyusi oheetta exikola ya masomelo a nenli oMariri, “oCabo Delgado”, vamosa ni eXikola ya masomelo a nenli Samora Machel ya “oBeira”. Mwaakha wa 1973, orineene iyaakha muloko n”ixexe ahiikeliha muhina mwa FRELIMO, yakhelelaka muxuttiho wootthokihiwa ni sa poliitika ni esurtaato, elapo ya oTansaaniya. Ohaakunve othonmwa okhalela nikhuru naafalume nakela ovaraka ni Armando Guebuza, Nyusi oovara muteko omutthenkeso waanamunceene wa Iphantari ni Irampha sa xipooro oMosampiikhi – CFM, ni mwaakha wa 1995 khithonmwa okhala mahoolela a moono woota wa mutthenkeso yoola, khikela weywo wunnuwa okhulupale-awe wookhala muhina mwaanamalamulela, mwaakha wa 2007. Okhuma mwaakha wa 1993 mpakha 2002, waari tho mukhulupale a nikhuru naanamattikha na “Ferroviario” a Wamphula, nikhuru ninmuttikha mphira a mikutthaano sa muthinto woopacerya, eseeti-aya emphwanyaneya Wamphula. Waari tho prusoore “namaweha”oXikola ya masomelo maalupale, ekhalayi yiitthaniwa “Pedagogica”, olelo va Rovuma emphwanyaneya Wamphula ni ori muhina mwa nikhuru nuulupale na mulaponi naale awanne ekhotto yowoopola elapo. Filipe Nyusi ta nloko na nihimo n”amakhontte.

Othela

Oothela ni amwaarawe aniitthaniwa Isaura Goncalo Ferrao Nyusi, ookhalana anamwane axexe.