Wp/vmf/Gleeb

Der ardigl is in Hâunlâuisch gschriiwn.

 gleeb (deidsch: Prallhang) is â hâuâlâuische bedsajchnung fir â hiisiche ôôrd fon bralhang. Diâ landschafd fon Hâuâlooe is haabdsächlich â hoochflächâ ufm Muschlghalch, in diâ sich dan diâ ärdlichâ flis, dii greschdâ sin dr Ghochâr, d'Jagschd un diâ Dauwâr, in diâfâ, ghurfichâ däälâr âjgrôôwâ hen. Diâ daalheng laafâ ofd undâ fom Undârâ iwârn Midlârâ bis dsum Owârâ Muschlghalch nuf. Dr Undâre Muschlghalch is bsondârs feschd, dr obâre aa, dr midlâre dâdswischâ eeâr waach un bregâlich. Endschbrächend is dâr undâre und obâre daalhang besondârs schdajl, dr midlâre had gschwungâne, eeâr hiichâliche fôrmâ. Gands undâ, wo dr flus am hang naachd, isâs nadiirlich am schdajlschdâ, den daal nend mr dan gleeb.

Blig aus dr lufd nach Siidâ uf's Ghochâr-daal baj dr Gajslingâr audobôô-brig. Dr flus ghumd âm endgejchâ. Fôrnâ rächds ôôdajdungswajs â flusghurwâ fom Ghochâr midâm bralhang. Wajdâr daalufwärds dââu dsiâd sich ân schdajlâr wald-schdraafâ dirägd näbârm daalbâudâ s'daal hooch, des is â gleebwald. Dr flus had sich hajd wechfârlaachârd, awâr däär had's âugrichd.

Blig undâr dârsälwâ brig dirägd uf diâ schduâfâ fom gleeb. Woo des fädsiche buschwärch is, is Undârâr Muschlghalch, owârhalb ba denâ eeâr flachâ fäldâr dr Midlâre, uugfäär am waldrand, woo's widâr schdajl wärd, fengd wool dr Owâre Muschlghalch âu.

Dôô is ofd ghâ rächds durchghomâ näwârm flus, es schdäd dan majschdens â räächd wildâr wald ufm hang, demmâr aa gleebwald nend. Diâ gleebwäldâr hen iire gands ajchâne wegedadsjoon, dôô schdeân ofd sunschd säldâne bflandsâ, wal mr diâ flächâ hald in ruâ lesd.