Wp/vmf/Burchbärch (Franggâhaard)

Der ardigl is in Hâunlâuisch gschriiwn.

Dr Burchbärch is ân 534 m hôôchâr Bärch un â Waldgebiid drum rum, wäschdlich fon dr Schdad Graalsâ in Nordoschd-Baadâ-Wirdâbärch.

Dâr Bärch sälwâr

Dr aussichdsdurm ufm Burchbärch

Dr Burchbärch is â grâub fon Wäschdâ nach Oschdâ laafnde, fraje Hoochflächâ von ebâs um die 150 uff 40 Meedâr, gnab meâ wiâ siwâ Ghilâmeedâr wäschd-siidwäschdlich fon dr Graalsâmâr Schdadmide. Äär lajd grôôd noch ufm Gmôôndsgebiid fon Franggâhaard gechâ Graalsâ dsuâ. Äär schdajchd reechd schdajl aus sanâr dirägdâ, aa maaschdâdaadls waldfrajâ Umgeechnd uugfäär 20 m wajd hôâch. Däär Bugl beschdäd geoloogisch aus Bundâ Märgl. An sânâ heng siid mr guâd diâ räschd fon dswaa ghondsendrischâ, foor-gschichdlichâ Ringwäl. Är wôôr neemlich, nach dem wase in ausgroowungâ anâ 1935 rausbrôchd hen, in dr friiâ La-Tène-dsaid dôômid befeschdichd. Gnab ân Ghilâmeedâr im Siid-wäschdâ fonem lefd dr Landsâbach vorbei, ân gwäl-aschd von dr Schbäldich, ewâs iiwâr dswaaâhalb Ghilâmeedâr im nordoschdâ diâ Maulich, diâ däälâr fon denâ dswaa iwârschdajchd âr um uugfäär 100 m. Uf sam oschd-schboorâ schdäd ân aussichdsdurm fom schwääbischâ alb-fârâj, undârum aus schdôô, wajdâr obâ aus hoolds. wenâr ofâ is, siid mr fon dobâ wajd naus iwârs land, fôr alâm nach Nordâ uf d'Hâuâlâuâr Eewâne naus, wal diâ schee flach is un oone fiil Wald. Im Siidâ gugd mr iwârn ofânâ Schbäldich-gruund bis uugfäär Môôgling, wal hindâr därâ schduufâ-ghandâ, uf däär des dorf hogd, maaschdens Wald is, ärghend mr dahindâr ärschd widâr was, wenn's wajd wäch is. Im Wäschdâ siid mr diâ Waldâburchâr Bärch, im Oschdâ die Franggâhäâ.

Sâj Umgeechnd

Um diâ bärch-schbidsâ Burchbärch rum lajd â gräsârs dsamâhängâds Waldgebiid mid ghâum ârâ fôôrschdrôôs durch, gräâschdâdaals uf Hochflächâ, diâ geologisch aus'm Schilf-sand-schdôô odâr wajdâr drundâ fon dâr Ghorbula-Bangh fom Owârâ Gibs-ghajbâr bschdeânâ, des had dsâmâ wajd iwâr dswandsich Gwadraadghilâmeedâr un mr nend des Burchbärchwald odr aa Burchbärch. Däär Wald is dan ausârum grâub abgschdegd mid Ägârdshausâ 4,5 km im Nôrdwäschdâ, dem Dôrf Maulich 2,5 km im Nôrdoschdâ, dem Graalsâmâr induschdriigebiid fon Fliichlau 3,5 km im Oschdâ, dem Dorf Owâr-Schbäldich 2 km im Siidâ, Felbärch 7,5 km im Siidwäschdâ un Grôâsôôldôrf 5 km im Weschdâ. Ale endfärnungâ sin dâbaj fon dr bärch-schbidsâ aus ghärdsâgrôôd grächnd. Däär grôôse Wald is dan dâ närd-eschdlichschde Auslaafâr fom Schwääbisch-Fränggischâ Wald. S'dsiâchâ sich aa fiile wandârweech durch dâ Wald, diâ majschdns ufm Burchbärchgibfl dsamâlaafâ. Diâ majschdâ Bôôm san Fichdâ.

Im Nedz

Wikimedia Commons has media related to:

Burchbärch