 Bâuchâgreewâ is ân aus wajdâruâdâ gflochdânâr ghôrb mid ôôm ôôndsichâ dsendraalâ henggl nach owâ. Mr benudsd'n gäärâ bajm âjsamlâ fon glôônâ sachâ, bam ebflbrächâ uf dr laadâr dowâ odr um was wonôô ds'drôôchâ. Mr brauchd dsum haldâ un drôôchâ neemlich nur ôô godsiche hend un had dan diâ andr fir andre sachâ fraj. Desdâweechâ däfâr ned ds'grôâs sâj, sunschd wiirâdâr ds'schwäär, odr däädâr imâr an d'fiâs boglâ bam geâ, des wäär ärchârlich. Un wal dr hengl in dr mid iwârm lâuch is, ghâu mr aa nigs gands arch grôas inân nâjdoânâ, wal des looch hald âweng fârschbärd is.
 bâuchâgreewâ is alârhegschdens 45 cm braad un 35 cm hôâch, dâdsuâ ghumd dan noch diâ häâ fom henggl. Diâ gresârâ drechd mr an dr hengândâ hend, diâ glenârâ aa am elâbâuchâ. Friâr had mr aa fiil glôône gherblâ fon därâ fôrm ghed, dsum bajschbiil fäschbârghärblâ odr ajârghärblâ, diâ hen dan awâr aa ghärblâ ghaasâ un ned greewâ, wal hald â greewâ imâr was gresârs is. Awâr hajd ghefd mr ja d'gagâlich im babâdegl un sunschd alâs mid umfârbhagung, mr drechd aa nigs meâ haam odr fôrd, sondârn feerd alâs midm audo fon diir dsâ diir, alsâ brauchd ânâr oone hâus odâr gardâ diâ bragdisch nime. Nadiirlich gajd's so eenlichs glôôdsajch drodsdem hajd noch uf dâ märgd in hil un fil ds'ghaafâ, d'wajwâr brauchâ ja imâr was dsum d'wâunung fârdsiirâ un fâulschdelâ. Desdâweechâ sin diâ dan awâr aa ned, wiâ des friâr iiblich wôôr, aus uugscheeldâ wajdâ gflochdâ, sondrn aus gscheeldâ odr sogôôr aus besârm madârjaal, sin daalwajs sogôôr farwich, damid's hald was häärmachâ.