Yimohkuhirant'ɛrɔwa (Latini: Pycnanthemum spp.; Ingrasa: mountainmint; Pilanchi: baume)
Yimohkuhirant'ɛrɔwa yimohku tihikatɛpan. Yimohkuhirant'ɛrɔwa shalat’ɛnahku raku. Uhktɛnakɔla rɔwa, wɛhatahani milisha ahak’ihch ɔshta. Tihikatahch’a yuk’akihch, kɔlilaku. Tahch’aruwina Tehukuma pan’ɔkihch, kɔlapaku. Uhktɛrashki kɔrasha. Ɔshta, rɔwa, ahak’ihch laspirɔwa uhkkosu. Yimohkuhirant'ɛrɔwa shokuwihch, rihki shirikati. Kata tahtakɔla lihcha arahch, kata Tahch’ihchi panu wɛhatihch, lapuya raku. Yimohkuhirant'ɛrɔwa, oni uchinashi ahak’ihch uchikashi hashukuku. Kewistat, yimohkuhirant'ɛrɔwa saku tapa lapu.
Takushatiku, oni osini uhkyitihch, yimohkuhirant’ɛrɔwa ɔshkahta wishiyimohku mashuku. Oni urishi uhkhɛyatihch, yimohkuhirant'ɛrɔwa lamihkuta. Hinyatihch, urishi kichu uhkhushuku. Takushatiku, oni uhkshtohkutihch, wishihiranyimohku sapari uhkahpuhkuta. Tachahtaku Tachalakik’ɔma, oni uhksepitihch wishiranyimohku uhksoluwan mashuku. Tachalakiku yimohkuhirant'ɛrɔwa tɛrashki sakuku.