Rɔwashi (Latini: Sassafras albidum; Ingrasa: sassafras; Pilanchi: bois de filé)
.png)
Rɔwashi rihku tohku tahta kichu ahak’ihch tarku hotushi rakuku. Tihikashi, kata wishi namu arahch, tika panu rawishtuku. Uhktɛrashki, uhktahkishi, ɔshka hotu rina shiriku. Rɔwashi uhktɛrashki amari enihku nahku poku: kɔrasha, uhkenrahpuninahku, utu enihku. Rɔwashi uhktɛnakɔla tohku kayisha. Uhkelu ɔshta kunasha ahak’ihch meli.
Tachalakiku Tachahtak’ɔma rɔwashi ɔshkahta wishiyimohku kɔrakata. Rɔwashi ɔshka wishiyimohku tayishi nuhk’utashtuku. Kaku uhkrok’ɔtahch, Takushatiku rɔwashi uhktɛrashkihta yimohkucha mashuku. Tayoroniku rɔwashi uhktɛrashki mak’ama samahkuta. Kaku uhktahkishi yasha yatihch, hɛkuhta uwitahki puhtihkuta. Tayoroniku Tachahtak’ɔma yukiwan rɔwashi uhktɛrashki sihu kirihkunta.