ዐዋሚድ ኤረትርየ ሐዳስ
1. አክባር ወተዕሊቅ፦ እሊ
ናይ ዶሉ አሕዳስ ወጠን ለታይን
እት ሰፍሐት ሐቴ ወክልኤ
ለትከምከመ እት ገብእ፡ እብ ሰበት
ሓድረት ሓለት ወጠን ለልትከተብ
ቱ። ምን አምዕል ተእሲሰ በህለት
ጃንዋሪ 2 ሰነት 2008 ለዐለ ዐባዪ
አሕዳስ ወጠን እግል ንታይን ስድ
ነሐዜ ጀሪደት ኤረትርየ ሐዳስ
እንዴ ቃለዐነ እንረክቡ። ሰበት እሊ
ጀሪደትነ ክም ዝሕረት አክባርና
ተ።
2. ደልአባብ፡ እሊ ዓሙድ
እሊ ለትፈናተ ረያይም ወሐጫይር
ናይ አማን ወኸያል ቅሰስ
ለልትከተብ እቱ ዓሙድ ሰበት
ገብአ እብ ቄርአቱ ፍቱይ ቱ።
3. ዐማር፡ ዓሙድ ዐማር
ምነ እት ኤረትርየ እት ብንየት
ትሕትየት ወብንየት በሸር ለገብእ
እስትስማራት ሚ መሰል ለታይን
ቱ።
4. ዕንጃረ፡ እሊ ዓሙድ እሊ
ምን ገዳይም ዐዋሚድ ጀሪደት
ኤረትርየ ሐዳስ እት ገብእ፡ እት
ፍንጌ ባጥር እንዴ ዐለ እብ ሐዲስ
ለአንበታቱ። አዋልድ አንሳት
ወዶረን እት ኩሉ ጀዋንብ ሐያት
ወዐቦት ለከስስ ጽበጥ ፈግር እቱ።
5. ምን ስጅል፡ እሊ ዓሙድ
እሊ አሰልፍ ታሪክ አግማም እበ
ልብል ዕንዋን አምበተ፡ ሐር ላኪን
ምን ስጅል ትበሀለ። ሀደፉ ህዬ ምነ
ቀደም ስኒን ብዙሕ እት አክትበት
ትግራይት ለትከተበ ለትፈናተ
አርእስ እንዴ ጸብጠ ምንመ
ትበገሰ ሐሬ ላኪን እብ ሰበት
ንዳል ሸዐብ ኤረትርየ እብ ስያሰት
ልግበእ ወስለሕ እግል ልትናወል
አስተብደ ወእቡ ለአተላሌ ህለ።
6. ተርብየት፡ እሊ
ዓሙድ እሊ ሰልፍ ተርብየት
ወእጅትማዕየት እበ ትብል እምቡት
ዐለ፡ እሊ ህዬ ተርብየት አጀኒት
ክምሰልሁመ ሓለት እጅትማዕየት
እግል ልትናወል እንዴ ትበሀላቱ።
ሐሬ ላኪን ለእጅትማዕየት ሰበት
ኢትናወለየ ወዲብ ተርብየት ሌጠ
ሰበት ተሐደደ፡ ሕኔት ተርበየት
ወእጅትማዕየት፡ ተርብየት ሌጠ
ትበሀለ። እትሊ ወክድ እሊ እት
ዕበያት፡ ዓፍየት፡ አደብ ወብዕድ
ናይ አጀኒት እንዴ ረከዘ ልተላሌ
ህለ። እሊ ምነ እት ጀሪደት
ኤረትርየ ሐዳስ ለይአትካረመ
ዐዋሚድ ቱ።
7. ዓፍየት፡- እሊ እት ዓፍየት
መጅተመዕ እብ ዓመት ወዓፍየት
እማት ወአጀኒት እብ ፍንቱይ
ለረከዘ እት ገብእ፡ ‘ሕኔት እንዴ
ሐመምከ መዳዋይ ምን ቀዳምከ
መትነጃይ’ እበ ትብል ልእከት፡
ሐብሬ ወምህሮ ዓፍየት ወገበይ
መዳፈዐት ለአደርስ ወለሐብር።
እሊመ ምነ አንበተው ወአስክ እለ
ለሀለው ዐዋሚድቱ።
8. መዐፍየት፦ እሊ ዓሙድ
እሊ ክምሰል ስሜቱ መዐፍየትናቱ።
ክም ዓሙድ ዲብ ልትአንበት
ታሪክነ ወዓዳትነ እብ ስወር እግል
ንርኤ እቱ ለአመማቱ። ልባስነ፡
ሰርጎነ፡ ጋራነ፡ ጽዋርነ፡ አግርበትነ፡
አብያትነ፡ ተዋብነ፡ ምድርነ፡ ኣሳርነ
ለኸስስ ስወር ምስል ሐብሬ ሐጫር
እግል ልፍገር እቱ ንየት ዐለት።
ምናተ ምን ሰልፉ አክል ሕድ
ክምለ እለ ተአመም ኢጌሰ። ክምለ
ብዕድ ዓሙድ እብ ክቱብ ወስወር
ለተለ ኣሳር ወታሪክ ኤረትርየ
ወሸዐበ ክምሰልሁመ ምነ ቀደም
ምእት ሰነት ለትከተበ ሕላይ
ሰብ በዲር ለልትናወል ዓሙድ
እንዴ ገብአ ለአተላሌ ሰበት ሀለ፡
አዜመ መዐፍየትቱ እግል ኒበል
እንቀድር።
9. ሽባን፡- እሊ ዓሙድ
እሊ ምነ እት ካልኣይት ሰነት
መትአምባት ጀሪደት ኤረትርየ
ሐዳስ ለአምበተው ዐዋሚድ
ምንማቱ፡ ዶል እት ገይስ ወዶል
እት በጥር ልሄርር ሐቆለ ዐለ፡ አዜ
ላኪን እንዴ ሰብተ እብ ትሉሉይ
ዋስል ለህለ እብ መሕበር ወጠን
ሸባባት ወደረሰ ኤረትርየ ለልዳሌ
ወልትመወል ቱ። ሀደፉ ህዬ እት
አፍዘዖት ሸባባት፡ መናሰባት ሸባባት፡
ሸባባት ናጅሓም ወሳልሓም ረበዮት
ክምሰልሁመ መሰል ሰኔት ላቶም
ሸባባት አትኣማር ለከምክም ጽበጥ
ለአዳሌ።
10. ሕበርበሮ፡ እሊ ዓሙድ
እሊ እት ለአትፋጌዕ ለለአደርስ
ወለለሐብር ዓሙድ እት ገብእ፡
ምነ ብዙሕ ለሄረረው ዐዋሚድ
ጀሪደት ኤረትርየ ሐዳስ ቱ።
መዳልያዩ ለትፈናተ አክትበት
እንዴ ቀርአ ወሸበካት ሐብሬ
እንዴ ቶረ ለለአዳልዩ ሰበት ቱ፡
ምነ ቄርአት ለፈትዉ ዐዋሚድ
እለ ጀሪደት ቱ።
11. ፈን ወዓዳት፡ እሊ
ዓሙድ እሊ ጀሪደት ኤረትርየ
ሐዳስ ተአሰብዴ እት ህሌት፡
ዓዳት ወሰቃፈት እበ ልብል
አርእስ እንቡት ዐለ፡ ሐሬ ላኪን
ፈን ወዓዳት እበ ልብል አርእስ
እንዴ ትበደለ፡ እብ ሰበት ዓዳትነ፡
ክምሰልሁመ ፍኑን አምር ክቱብ፡
ሽዕር፡ ነቁሽ ወብዕድ ልትናወል።
12. ርያደት፡ እሊ ዓሙድ
እሊ ምን ለአነብት ክሉ ረአሱ
ለይአትካረመ ወአስክ እለ ልሄርር
ለህለ ዓሙድቱ። አክባር ርያደት
ዐድ ወካርጅ ለከስስ ጽበጥ ህዬ
ልትከተብ እቱ።
13. ነፌት አምር፡ እሊ ዓሙድ
እሊመ ምነ አሰልፍ ለአስተብደው
እት ገብእ፡ ክምሰል ዓሙድ
ሕበርበሮ፡ ላቱ ዲብ ለአትፋጌዕ
ለልሐብር ወለለዐልም ጸበጥ
ልትናወል።
አዜ ለህለ ሳብት ዐዋሚድ
ጀሪደት ኤረትርየ ሐዳስ እሊ
ለትበሀለ እት ገብእ፡ እምበል እሊ
ለተሀደገ ሳብት ዐዋሚድ፡ እት
ፍንቱይ መናሰባት፡ እት ወክድ
ዓያድ ወጠን፡ መህረጃናት፡
ሲምፖዝዮማት፡ ፍንቱይ መቃበላት
ርኢስ ወውዘረእ ለመስል ዶል
መጽእ ለሳብት ዐዋሚድ እንዴ
አጀለት ለናይ ሓድር ቴለል ጽበጥ
እብ ክቱብ ሌጠ እንዴ ኢገብእ
ስወርመ ዓሙድ እንዴ ፈንቴት እሉ
ተአፈግር። ክምሰልሁመ ዳይም
ለኢኮን ቃኑን እግል ዐቦት ወዐድል፡
ለልብል ዲብ ፍንቲት መርሐለት
ለመጽአ፡ ምስል መደኒያይ ወቃኑን
ጀሪመት ለለአትኣምር ዓሙድመ
ተአፈግር።
ጀሪደት ምነ አስተብዴት እቡ
መዋዴዕ አው ዐዋሚድ፡ እትሊ
ወክድ እሊ ለይሀለ ላኪን ምህም
ለዐለ እሊ ለተሌ እግል ልትሀደግ
ቀድር፡
ጊማይ ስያሰት ሓለት
እዲነ እት ስያሰት ለአተንከበ ጽበጥ
ልትናወል ለዐለ።
ህግየ ወላዲት ተ፡ ምን
አምሳል ወሕከም እንግሊዝ እንዴ
ትዳለ ዲብ ትግራይት ለተርጀመ
ክቱብ ፈግር ዲቡ ለዐለ ርክንቱ።
ዝያረት፡ ለትፈናተ
አካናት እንዴ በጽሐከ ወባሐስከ
ልዳሌ ወምስል አሳርመ ልትጻበጥ
ለዐለ።
ጀዋባት ቄርአት፡ ጀሪደት
ኤረትርየ ሐዳስ እተ ወክድለ ሰልፈ
ብዝሓም ቄርአት ሰበት ዐለው
እግለ ጀዋባት ብዙሕ ተንክር እተ
ዐለ። ሰልፍ ክል ሳምን፡ ምኑመ እት
ክልክልኤ ሳምን ዓሙድ ጀዋባት
ተአፈግር ዐለት። ሐቆ መደት
እት ሰር ሰፍሐት፡ ሐቆሁ ምን
እያም ፈግር ገብአ፡ እት ልብል -
እትልብል ምን ሓምስ ሰነት ወሐር
ላተ ጀዋባት መጆብ በደ በጽሐ።
ምህሮ ህግየ እንግሊዝ፡
እብ ብሪቲሽ ካውንስል እት ልዳሌ
እት ክልክልኤ ሳምን ለልትቀደም
ዓሙድ ዐለ እግለ፡ እሊ ዓሙድ
እሊ እብ ደረሰ ወሙደርሲን ፍቱይ
ለዐላ ቱ።
