ድግምለ ሓድር
ናጽነት አፈወርቂ
ለገብአት ጋሪት ለሐድረ ዲበ ነፈር ሰኒ ዳግመ። አናመ መዳግማይ ሓድር እንዴ ትዋጅሀኮ እግል እክተብ ሰበት ሐዜኮ፡ ዲብ ዐመልየት መትደውሻሽ ውቃው እዝ ለሐድረው ምሔርበት እግል ሕዜ ትወከልኮ። እሰለፍ ለትዋጅሀኮ ምስሉ ነፈር እተ መደት ለሀ ሐዲስ ሰበት ዐለ “ሐብሬ ታመት እግል ሀበኪ ይእቀድር” ቤሌኒ። እንዴ ደጋገምኮ ክምሰል ትሰአልክዉ። “መደት እንዴ በጥረ ስምዒኒ። አፎ እግል ሑኪ ኢትሰአሊ? ህቱ ዲበ ዐመልየት ሹሩክ ዐለ ማሚ።” እት ልብል ለኢትጸበርክዉ ከበር ለክፈ ዲብዬ።
“እብ አማን ትብለ ህሌከ?”
“ሰኒ አማንዬቱ!” ህቱ ዳምን ወኣምን ዲብ እንቱ ባልስ ዲብዬ ምንመ ዐለ፡ አነ ላቱ ሸክ ወዴኮ።
ሑዬ ቀደም እለ ክምሰል መርጀዕ ናይ ተእሪክ እትነፈዕ እቡ። ዲብለ ገብአት መናሰበት ናይ ጼዋነ። አነ ወህቱ መጦር አድሕድ እንዴ ትገሴነ ዲብ ክምኩመ አድሕድ እንበይእ። ክል-ዶል ህዬ እብ ክሱስ ተእሪክ ንትሃጀክ። ዋጅቡ ሰበት አውፈ ሌጠ እንዴ ኢገብእ፡ ዕምር ንእሹ ዲብ ንዳል ሰበት ሓለፈዩ። ሐያት ወቴለል ሰውረት ዳግም እግልዬ ዶል ትብሉ እንዴ ትለወቀ ዳግም እግልከ። ድግሙ ህዬ እት ቀሊላት ኢትትከለስ። ምን ህጅኩ ሌጠ ክሎም ምስሉ ለዐለው እግል ኣምሮም ቀደርኮ። ዲብለ ትፈናተ መናሰባት። እብ ክሱስ ጀብሀት ነቅፈ፡ ሐልሐል፡ ግንደዕ----ለአትሃጅከኒ ዐለ። እብ ክሱስ “ውቃው እዝ” እንዴ ልትሃጀክ ላተ ሳምዐቱ ይአነ። እብሊቱ ህዬ እግል ህደግ ምስሉ እንዴ ገሜኮ። እባዬ ተለፎን ወዴኮ ዲቡ።
“ሚ ትብሊ ህሌኪ ናጻ ሕቼ? እብ ክሱስ ጀብሀት ቅብለት ሳሕል ክልዶል አትሃጅከኪ ማሚ?” እንዴ ቤለ ለጋሪት ዲብዬ በልሰየ። ‘መን ኣመረ ውቃው እዝ ስሜት እንዴ ቀየረ እግሉ ዳግም እግልዬ ዐለ ገብእ” እንዴ እቤ ኢትከሐድክዉ። ዲብ ቤት ሕትነ እግል ንትዋጀህ ዕድም ወዴነ። እብ ሸፋግ ዲበ ቤት አምሐበረነ። ሕቼ እብ ክሱስለ ኢትትከለስ ድግምነ ክልዶል ትትፈከር። ሐት- ሐቴ ዶል እንዴ ተሐርቅ። “እንቲ ሚ ጋብአት እንቲ ዐባዪ ኢትከጅሊ፡ ጋሸ ሀለ ኢትብሊ፡ ክልዶል እግል ህጅክ ዲብ ሕግሱ ትትገሰይ። ምናተ፡ ህቱ ለአኬ ምንኪ።” አከይ-ግንሐት ትገንሐኒ። ለአምዕል ለሀ ላተ እብ በርናምጅ ሰበት መጽአናሁ ህጅክነ እግል ተአግምል ቡን ወዴት እግልነ።
ሑዬ እብ ዕምር ሰኒ ለዐቤ ምንዬ። አነ ሻብ ዲብ እንቱ እት መደት ንዳል ሰበት ርኤክዉ ቱ ገብእ ክምሰል ስነቼ እቀርቡ። ለገዚፍ ገሮቡ፡ ሕጭሩ ገልብብ እግሉ መስለኒ ረዪም እንዴ ገብአ ልትርኤከ። እት ሜዳን እርእዩ እት ህሌኮ፡ ሳዐት ዲብ እዴሁ፡ ዲብ ሕቀቱ ህዬ ፈርድ፡ ምስለ ክል-ዶል ለለብሰ ጅከት ዐስከርየት፡ ክእነ ክምሰል ዮም ልትርኤኒ። እት መጦሩ ክምሰል ትገሴኮ። ዲብ ዕምር ዕስራታት ለሀለ፡ እግል ኦፕሬተራቱ አማውር እንዴ ለሓልፍ ትዘከርክዉ። እተ መደት ለሀለ እግለ ኦፕሬተራት ለአትመቃሬሕ እርእዩ ሰበት ዐልኮ፡ ምስኡል ክምሰል ዐለ ላተ ባዲ ምንዬ ኢኮን። ዮመቴ ሺበት እንዴ ትገልበበቱ፡ ገሮቡ እብር ለቀባሸሸዩ ሻይብ ማስል ሀለ። ኣቤ፡ ህቱ ኮሎኔል ጸሃየ ኣፈወርቂ።
ዲብ ሳሉን መጦር አድሕድ ትገሴነ። ህቱ ዲብ ወረቀት ከሪጠት እንዴ አዳለ መካሪት ቅብለት ሳሕል እግል ለአርኤኒ ትዳለ። “ሰላሰ ሰነት ለወዴት ዐመልየት ከአፎ እግል ልፍቀዳ ቱ? እንዴ እቤ ዲብ ተሸክክ አቴኮ። እብ ከአፎ ክምሰል ለአፍህመኒ ላተ እግሉ ሰበት ከስስ ቀልብዬ እንዴ ከሬኮ እግል አተንሴ ትወጤኮ።
“ቅብለት ሳሕል---አውጌት፡” እንዴ ቤለ ትም ወደ። ዲብ ህጅኩ ክልዶል “አባይ ጀለፍናሁ፡ ደመርናሁ፡ ተናን አፍገርነ ምኑ።” እንዴ ልብል ዳግም። እግል አባይ ክምሰል ባጥል ወእግል ዴሽ ሸዕቢ ህዬ ክምሰል ቅድረት ኢላህየት ለበ እንዴ ወደ ቀድሙ። አዜ ላኪን ለናይ ምክሔ ከሊማት እብ አየ ክምሰል ረትዐ ምክራይዩ ትቀዌት። መተርቃብ ናይለ ገጹ ክምሰል አቅመትኮ ዲብ ዝክርያት ትሩድ ክምሰል አተ አተበትኮ። ጸሃዬ ሑዬ ዲብ ሀመት ዶል ለአቴ እበ እገሩ ምድር እንዴ ዘበጥ ወለአስተንትን። ትም እንዴ ወደ እብ እገሩ ምድር እግል ልዝበጥ ክምሰል አንበተ አናመ መጦሩ ትም ወዴኮ። ሕቼ ለሓለቱ ገብእ ሻቀለተ መስለኒ ሽንከቼ ትወለበት። መጋንሕተ ‘ሃሉቱ?’ ለትብል ልእከት ሓለፈ ዲብዬ። እንዴ ይእበልስ ዲበ እት ዝክርያት ቀዳም አቴኮ።
ሕነ ሜዳን ክምሰል አቴነ ሐት-ሐቴ ዶል ዲብ መዐስከር ላጅኢን እንዴ መጽእ ጋንሐነ ዐለ። ደረሰ መድረሰት ሰውረት ድራሰት ዶል እንደብእ እግል ልጋንሐነ መጽእ ሰበት ዐላቱ ክምሰል ሑዬ ሰኒ ለአምሩ። ሰለስ ዶል እግል ልጋንሐነ ክምሰል መጽአ እምዬ “ሐውከ ህዬ እግል ልጋንሑነ ኢመጽኦ ማሚ?” ክምሰል ቴለቱ። እንዴ ኢነቅመ ድንን ወደ። ለውዲት ለሀ አስክ እለ ዮም ኢትበዴ ምንዬ። እምዬ እሊ “ወልዬ መስኡል ሰበት ገብኣቱ እብ በኑ ለአትቃብል ለሀለ። ለሐዉ ህዬ ምስሉ ኢመጽእ እቦም ማሚ?” ለልብል ፍክር ሰበት ዐለ እግላቱ ለትሰአለቱ። ህቱ ላኪን ዲበ ናይ ቴንደት ቤትነ እንዴ ደ’ነ እብ እግሩ ምድር ደግደጎት እት ኢኮን ብዕድ እግል ልብለስ ኢቀድረ። ለክልዶል “ሐውዬ ሰላም ቤለዉኪ። ምስል እግል ንምጸእ ዲብ ነሐዜ ህቶም እብ ሽቅል
ተሐረከው።” እት ልብል እግል አትባዳይ ለብሉ ለዐለ ሀገጊት ከፌኒ ምኑ እንዴ ቤለ ትም ለሐረ መስል። ዲበ ሰባተት እት ኢኮን እንቤዕ ዔብ ልትሐሰብ ዲቡ ለዐለ ወቅት ሃሮሩ እት ከብዱ እንዴ ወደዩ እት ደምእ ወእምዬ “አባይከ። ልድነን ሕልብዬ እት ትብሉ” ክልዶል ልትዘከረኒ።
አዜመ እብ ድግማን። ‘አውጌት’ እንዴ ቤለ ገጹ ክምሰል አስረ ፈርሀት ትሰምዐተኒ። ፍክረቱ አስክ ከምክም ፒሮ ወወረቀት እት ጠውለት እንዴ ከሬክዎም ትጸበርክዉ። ሕቼመ አከይ-ግንሐት ሰበት ገንሐተኒ ሰኒ ኢትሰምዔኒ። “እግልሚቱ። ክልዶል ትቀዋቂሉ። ሐቆ ሐዜኪ አፎ እንዴ ቀርአኪ ኢትደርሲ?” ትብለኒ ለህሌት እት መስል እንዴ አፋዘዘት ገንሐተኒ። እብ ተርተረት ክልኤ ዶል ገንሐክዎም። ዝያደት ላኪን ዲብ ሑዬ አቅመትኮ።
“ቅብለት ሳሕል፡” ሰኒ አተንፈሰ። “ክምሰለ ዲብ ተእሪክ ለትቀርእዩ፡ ዲብ ሰነት 1978 እብ ሰዳይት እት እትሓድ ሶቬት ሜዛን ዐስከርየት ትቀየረ። አባይ አረጂን ምን አስልሐት ወዴሽ እንዴ ከምከመ ምን ምድር እግል ልንቀለነ እብ ትሉሉይ ስስ ወራር ሀረሰ። ሕነ ህዬ እግል ርሕነ እንዳፌዕ ምንመ ዐለነ፡ ዶል- ዶል ላተ እንዘብጡ ዐልነ። ዲብ እሎም ስስ ወራራት አባይ አጅገርናሁ። እት ደንጎበ ህዬ ፈለልናሁ።
“ውቃው ለትብል ከሊመት ተርጀመተ ‘ቕዓዮ’ በህለት ቱ። ውቃው እዝ ብርጌደር ጀነራል ሑሴን አሕመድ ለቀይዱ። ለተፈናተ ከፈፍል ዴሽ ወየም አለቡ አስልሐት ለመልክ ቅዋት ድቁብ ቱ ለዐለ። ክምሰለ ቀደም እለ ለእቤለኪ ቱ፡ እግል መደት ሐምስ ናይ ጅግረ ሰኖታት አባይ እብ ሒለት ምን ገብእ ወእብ መዕነውየት ሐወነ። እት ደንጎበ ሒለቱ እንዴ ትመዘነት። ህዬ እንዴ ከርደንከ እግል ልትደውሸሽ ሀለ እግሉ ትበሀለ። ዲበ ዐመልየት ዴሽነ እብ ብዝሔ ሻረከ። ምን ብርጌድነ፡ ብርጌድ 31፡ አወላይት ከቲበት ሻረከት። አነ ህዬ መስሬዕ ሀንደሰት እንዴ ነስአኮ ሻረኮ።” እብ ዋዴሕ እግል ለፍህመኒ ክምሰል አንበተ ሰኒ ወአማን እግል እስምዑ አንበተኮ።
“ሜርሓይ ብርጌድነ መሐመድ ችኔቲ ዐለ። ከረ ወድ ተኸስቴ፡ ገብሬኤሌለ ፍላን ወፍላን---ጅማዐቱ እግል ልትፋቀድ አንበተ። አስማይ መልህያሙ ዶል ፈቅድ ፈራሰቶም ሰበት ልትርአዩ ምን ድግሞም ክሉ ረአሱ ኢጸግብ። ምነ አነ ሓስበቱ ለዐልኮ መውዶዕ እግል ኢልፍገር “ሚ ዶል ቱ ለዐለ ውቃው።” እት እብል ግረ በለስክዉ።
“አወላይ ህጁም ዲብ ወሬሕ ክልኤ ናይ ሰነት 1984 ገበአ። ለካልኣይ ህዬ ሐቆ ወሬሕ” ዝያደት እግል ልትዘከር ትም ቤለ ምንዬ።
“ህግያከ ኢትፈሀመተኒ። እግል መደት ወሬሕ ተሓረብኩም በህለት ቱ?” እት እብል እብ መትዐጀብ ትሰአልክዉ።
“እሰልፍ ስምዒኒ---” እብ ቅሩቱ በለሰ ዲብዬ። ሐው ክምሰል ሕነ እንዴ ትረስዐናሁ። እት ሽቅልነ ገብአነ።
“ድድ ውቃው ክልኦት ህጁም ወዴነ። እት ፍንጌሆም ናይ ክልኦት ወሬሕ ፈርግ ሀለ። ሕነ አወላይት ከቲበት ናይ ብርጌድ 31 ዲብ ምግብ ዐለነ። እብ ድማነ ብርጌድ 44፡ ግራሀ 23፡ እብ እንክር ድገለብ ህዬ ብርጌድ አርበዕ ዐለት። በጠሎኒ ዶል እብል ቅወት ዐባይ ተ----ልትዘከረኒ ሰር-ላሊ ህጁም አንበትነ። ለምድር አድሐ ስኒ ሕፉን ቱ። ላሊ ላኪን ሸበህ ቱ። ለሐርብ ስኒ ድቁብ ዐለ። አባይ ምነ ጻብጡ ለዐለ “ባሕሪ ዱበ” ለትበሀል ድፈዕ እንዴ ደርገግናሁ እት ባካት እምሀሚሜ ለሀለ ንያለ ለልትበሀል ደብር ጸብጥናሁ።
ሐቴ ከቲበት ናይ ብርጌድ 23 እብ እንክር ድማን እንዴ ዶረት እት ግረ አባይ ‘ዲብ አውገት’ ለልትበሀል መርከዝ አቴት።” ሐቆለ ቤለ ቱእ እንዴ በጥረ ገንሔኒ። አናመ ክታበት እንዴ አዘምኮ ምነ ትክ ወዴኮ። ሓዝን ዲብ እንቱ ዕንታቱ ከዋክብ ልርኤ ለሀለ ዲብ መስል ዐስተር አግነሐዩ። ዕርጌ ናይለ ዐልነ ዲበ ቤት እብ ክሉ እንክራቱ ዶረዩ። ዲብ ርክን ለዐለት ሱረት ሽሂድ ሑነ እንዴ አቅመተ ትም ወደ።
“አላ!----” ፊቃዶ በዲሩ ዮም ትረአዩ መስለኒ ዲብ ሀመት አተ። እንዴ ኢናድል ዲብ ቤት ምህሮ ፖቴጎ ሰበት ደርሰ ጥልያን ሰኒ ቀድረ። እንዴ ልትሃጀክመ ጥልያን ለሐባብር። ፊቃዶ ቴለል መሪር ላተ ምን መዓቅቅ ልብ ለበዴ ኢኮን። ዲብ ተፍሲር ዝክርያቱ እግል እብለሱ እብ አኖካይ እትጸበሩ ክምሰል ህሌኮ ጭልሕም እቤ እግሉ።
“ክምሰለ እቤለኪቱ፡ ላሊ እብ ግዲደ ንትሓረብ ትመዬነ። ለበዝሐ ሰዋትር አባይ እት ሐንቴ ምልክነ ምንመ ኣቴናሁ። አክል ናይ አባይ ለገብእ አስልሐት ላቱ ይዐለ እግልነ። እግል ለዓሬነ ለዐለት እግሉ አስልሐት ክቡድ እብ ገሌ አስባብ እት ሳዐቱ እግል ልምጽአነ ኢቀድረ። አባይ እለ ተወክ እለ እንዴ ትነፍዐ። እግል ልህጀመነ አንበተ።” ክምሰል ቤሌኒ። እብ ድንጋጽ በራይድ እንዴ ገብአኮ ቢሮዬ ለከፍኮ። “ሑዬ ዘብጥነ፡ ጀለፍነ፡ ሰለብነ ወዘመትነ” እት ኢኮን ዘብጠዉነ እት ልብል ሳምዐቱ ይአነ። አናመ ለናይ ዐውቴ ከሊማት እግል እስመዕ ሌጠ ሐዜ መስለኒ። ለእንብትት ለዐለት ቅሰት ክሉ ረአሱ ምን ወሪጄ መትከራይ አቤት።
“ሐሬ ህዬ?” እንዴ እቤ እግል ለአተላሌ እግልዬ ትሰአልክዉ። ለሐርብ ክምሰለ
ተንዚምነ ለከጠጠየ ዲብ ሀደፉ እግል ልትሰርገል ኢቀድረ። ዲብ ሐርብ ለሰተትካሁ እት ዶሉ እግል ትሰርግሉ ሐቆ ኢቀደርከ። መደረት ዐባይ ለአጀሬ። አባይ እንዴ ትነዘመ እግል ልህጀመከ መንግአት ትፈቴሕ እግሉ በህለት ቱ። ዲበ ሐርብ ሐቴ ከቲበት ናይ 23 እት ከርዶን አቴት። ለከቲበት ዲብ ከጥ ናይ አባይ እንዴ ጨለቀት ለአቴት ዐለት። ለሐርብ እብ ንዝምት ገበይ እንዴ ሄረረ ብዕዳት ቅዋት እንዴ ዐረያሀ ደማነት እግል ልክለቀ እግለ ወእብ ሕበር ውቃው እግል ልደምሮ ዐለ ለስታት። ምሽክለት ትርድት ትከለቀት። ለከቲበት እብ ተማመ እት ሐንቴ ከርዶን አባይ ትከለበት። እንዴ ሸገት እግል ትፍገር ህዬ እትሽሃድ ክቡድ ደፍዐት።” ቤለ ሰኒ ሓዝን ዲብ እንቱ። ክልኢትነ እብ ሕበር ዲብ ሀመት አቴነ። አነ ለቴለል እንዴ አትዋይን፡ እግለ ዲበ ወቅት ለሀይ ለአስተሽሀደው ምሔርበት እብ ደሚርዬ ፈቀድኮ። ሑዬ ህዬ ነዛረቱ እንዴ አፍገረ ዕንታቱ እንዴ ዳክክ ርኤክዉ።
“አድማይ ናይለ ፍራስ ላተ ግምሽ እት ከደን ኢትከዐ። ናይ ዲመ በርሀት ወለደ።” አርወሐቼ ዲብ አትጋኔዕ እት ሽቅልዬ እግል እብለሱ ጀረብኮ።
“አወላይት ዐመልየት ክምሰል ፈሽለት፡ እግል መደት ረያም ዲብ መሓዝ ወድ- ጋን ዓረፍነ። ሰበብ ናይለ ፈሸል ተቅዪም ቆሪ ገብአ ዲቡ። ዐገብ ወአትዐገቦት ነፍስ። እት ሰርገል ለአብጽሔነ ዓዳት ጀብሀት ሸዕብየት ክምሰል ቱ ኖስኪ ተአሚሩ።” እንዴ ቤለ ገንሔኒ። እግል ለአተላሌ እግልዬ ሰበት ሐዜኮ እሻረት እጃብየት ሀብክዉ። “ዲበ ሐርብ ለትርአ ነቃሳት ተስዬሕ ገብአ ዲቡ። ለተአዜት ከቲበት ምን ክሉ ለቅዋት ለትሐረው አንፋር እንዴ ትፋገረው ትወዝዐው ዲበ። ዲበ መደት ወሬሕ ለገብእ ለዓረፍነ ዲቡ ወቅት እግል ካልኣይ ህጁም ክሉ ለልአትሐዜነ ዲብ አዳለዮት ሓለፍናሁ። ዲበ ሐርብ ለትርአ ጌጋታት ክምሰል ቤለ፡ ‘ናይ አንፋር ከለጥ ቱ። ፈርሀት አው ህዬ ጥልም’ ለልብል አፍካር ዲብ ደሚርዬ ሰበት አትቃበለ በሊስ ዋዴሕ እግል ለሀበኒ ትሰአልክዉ።
“ላላእ! ክል ጅንዲ ነፍሱ እንዴ ጸብረ ሰበት ለአቴ መታክል ይዐለ።” ፈርሀት ትትበሀል አለቡ። ጥል’ም ይዐለት። ኢመትፋሃም ወለትሀየቤከ ወቀይ እተ ራትዕ ወቅቱ ይአግደዮት፡ እብ ገሌ ናይ ተክኒክ አስባብ ለመጸ ቱ ለዐለ። ለሰበብ ምሽክለት ዐባይ ይዐለ። ለተእሲር ለናዩ ቱ ክቡድ ለዐለ። ክምሰለ እቤለኪ ቱ ናይ ተክኒክ ቱ ለዐለ። ልግበእመ እት ኢኮን ራትዕ ጌማም እንዴ ገብአ ዲቡ እግል ልትሰየሕ ወጅቡ ዐለ። ሀደፍ ናይለ እብ ጀሀትነ ለትነስአት ከጥወት ህጁም፡ ለጀብሀት እንዴ ደውሸሽነ፡ ዲብ መዐስከር አባይ ክዙን ለዐለ ዐፍሽ ወአስለሐት ሰሊብ ቱ ለዐለ። እት ረአስ አባይ ደማር ክቡድ ምንመ አጅሬነ፡ ሀደፍነ ላኪን ኢተዐወተ። ብዝሓም ፍራስ ደፍዐነ። እሊ እግል ክል ጅንዲ መትወሓጥ እግሉ አበ። ዲበ እንዴ ተለ ለገብአ እጅትማዓት ምን
ሐሩቀት ለትበገሰ ረአይ ትቀደመ። ለህጁም ላዝም እት ወቅት ሐጪር እግል ልትደገም ሀለ እግሉ። አባይ ኤማን እግል ነሀቡ አለብነ። መርባት ሹሀዳእነ እግል ንፍደዩ ብነ ወእሉ መስል ደሚርከ ለተምትም ረአይ ቀርበ።
“አነ ክምሰለ እትዘከሩ እት ቀበት ወሬሕ ካልኣይ ህጁም ወዴነ። ምን መሓዝ ወድ ጋን እንዴ ትበገስነ ሐቆ ሄራር ረዪም ዲበ ለትየመመት እግለን አካን በጽሐነ። አባይ ዲብ 4.1 ለትትበሀል ዕንክለት እንዴ ሸ’ፈ ጸንሔነ። እምበል ፈጥን ህጁም ሻፍግ እንዴ ጠለቅነ ዲቡ ደውሸሽናሁ። አክልሕድ ሳዐት ሐቴ መሓዝ አስራይ እንዴ በተክነ። ዲብ ዐነክል አስራይ ትጸገዐነ። እተ ዐነክል እንዴ ይእንፈግር ምን ቅሮረ ለመጽአ ዴሽ አባይ እብ ረሻሻት ወዐረባት መደርዓት እንዴ ትነፍዐ ዲብ መሓዝ አስራይ እግል ልብተከነ ጀረበ። ሐርብ ሰኒ ድቁብ ወዴነ ። እተ ሐርብ ለሀይ ሕነ ሌጠ ክልኦት ዘ-23 ረሻሻት ሰለብነ። እግለ ሬድኣይ ዴሽ ዔረት ወትፈረረት ወዴናሁ። እንዴ ነአሳድር አስክለ እት ቀደምነ ለዐለ ደብር መዳቅሕ ተዐገልነ። አባይ ዲበ ደብር ለሀይ ካልኣይ ሳትር ዋዲ ሰበት ዐለ ለዕንክለት እግል ንጽበጥ ምስል አባይ ትባደርነ። ህቱ ሰዋትሩ እግል ልጽበጥ ወሕነ እት ሰዋትሩ እንዴ ኢበጼሕ እግል ንጅለፉ ሕድ ህብ አለብነ። እት ደንጎበ አባይ እንዴ ደውሸሽነ እግል ደብር መዳቅሕ ጸብጥናሁ። አባይ ገናይዙ ወመጀርሒኑ እንዴ ሐድገ እብ ሰከይ ትጠለቀ።
“እብ ሸፋግ ትነዘምነ። ናይ 44 ሳልሳይት ከቲበት ናይ ጨዓይ፡ እብ እንክር ድማን ዲብነ እንዴ ትወሰከት፡ እብ ክልኦት ታኪ መስሬዕ እብ ሰዐይ አተላሌነ። አምዕል ወላሊ እብ ግዲደ ሄረርነ። አስቦሕ እግል ሰዋትር አባይ ናይ አውገት እብ ግራሁ አቴናሁ። ምስለ እብ ድማነ ወድገለብነ ለዐለ ቅዋትነ እንዴ አሰርነ ሐርብ ሳሬዕ ወዴነ። አባይ ደባባቱ ወረሻሻቱ እብ እንክር ድማን እንዴ አፍይሐ እግል ልከርድነነ ጀረበ። እተ ሐርብ ለሀይ ደባባትነ ወአስልሐት ክቡድ ናይነ ለወደወ ፈራሰት ስነት አለበ። ደባባትነ ሑዳት ዲብ እንተን እግለ የምአለቡ ደባባት አባይ ፈለየ። መጦርነ እት ልትሸወረ መዕነውየትነ ወቀለየ። ዴሽ አባይ ለመይት ሞተ ወለተርፈ ህዬ አስክ ጋድሞታት ክራይ ሀርበ። ሐነ አሰሩ ዲብ ነአራብድ ‘ለፈግር አዳም ወስለሕ እግል ለሀሌ አለቡ’ ለትብል ንየት ሰበት ጸብጠተነ ፈጥን ከልአናሁ። ጋድሞታት ክራይ ዝናር እንዴ ተዐንደቅከ ወመንዱቅ እንዴ ተሆገልከ እብ እብ እገርከ እግል ትትዐደዩ ለኢትቀድር ሰሕራ ቱ። እብ ቀበቱ እግል ትሻግጉ ኢኮን እብ ዕንካመ እግል ትግንሑ ካቤቱ ኢትትረዴ። እተ ወቅት ለሀይ ምርወት እት ኢኮን እገር ኢኮን ልስዔ ለዐለ። አባይ ዲብ ዐነክል ክራይ ክምሰል በጽሐ እግል ልዳፌዕ አንበተ። እብ ምድር ክቡድ አስልሐት ወእብ ሰመ ህዬ ጥያራት ምድር እሳት ትክዔት እቱ። እት ቀበት ሃይሞት ምሔርበት አሳደረው ሌጠ።
“እት ዐነክል ክራይ ክምሰል በጽሐነ ዴሽነ እብ ጽምእ ወሰፍረ አረይ ገብአ። ሰበት እሊ እግል ነዓርፍ አማውር ተሀየቤነ። ማይ ወነብረ ለጸዐነየ ፍንጣሳት ሰበት ዐረያነ ምን ኦፈ በልዐነ ወጽምእነ አርዌነ። ሳልሳይት ከቲበት ናይ 58 ሰበት ዓረፈተነ ሳክባም ትመዬነ። ለሐርብ ላሊ እብ ግዲደ ትመየ። ፈጅራተ አዳሕየት ባካት ሳዐት ሴዕ እት ፍንጌ ብርጌድ 44 ወአርበዕ እንዴ አቴነ ዐነክል ክራይ እግል ንህጀም አንበተነ። ምስለ ልትሓረበ ለትመየየ ቅዋት እንዴ ትወሰክነ ህጁም አተላሌነ። ዲብ ዐነክል ክራይ ሻፍፍ ለዐለ አባይ እንዴ ደመርነ ህዬ አስሩ ዲብ እንስዔ እት ግንራሪብ ማርሰ ተክላይ ጌለልናሁ።
“አዳም ሰለስ አምዕል ወላሊ እግል ልትሓረብ ሰኒ ክቡድ ቱ። አዜ እግል ትህደግ እቡ ቀሊል መስል። እብ ዋጅብ እግል ትሽርሑ ላኪን ቀሊል ኢኮን። ዲበ ሐርብ ክል-ሙናድል እንዴ አቀመጨ እብ ኤማን ለአቴ ሰበት ዐለ ዐጃይብ ሻቂ ቱ። ምን ለዐል ክሉ ዲበ ለፈሽለት ዐመልየት ፍራስ መልህያምነ ቡልሓም ሰበት ዐልነ፡ ዲብ እሊ ሐርብ እሊ መርባቶም እግል ነአቅስን ምን ክሉ ቀልብነ እንዴ ትበገስነ ክሉ ለልትቀደረነ ወዴነ። ‘እብ ክሱስ ወቀይ ናይ ፍንቱያም አንፋር ሚ ትዘከር?’ ምን ትብሊኒ፡ ሐርብ እብ ሰብ መቅደረት እንዴ ተሀንደሰ፡ እብ ገቢል እት ዐመል ለልውዕል መጃል ቱ። ለገብአ ምሔርባይ መርባት እግል ልፍዴ እብ ኤማን ሰበት ተዐንደቀ ክል-ዎሮት ከእብ እንክሩ መስተንክር ሸቀ። እግል መሰል፡ ዎሮት መልሀይነ ጠልገት ሰበት ዘብጠቱ ሐንገሉ ትፈትሐ። ለደምቀቱ አክልሕድ ትትርኤ ዐለት። ሐኪም በጠሎኒ ናይነ እብ ፉጠት እንዴ ገልበበዩ አስክ ሕክመነ ምግባይ ነድአዩ። ክምሰል ለሀይ ጅረሕ ክሉ ረአሱ ርኢ ይአነ። አዳም እንዴ ልትቃረጭ ወልትዳየሕ እርኤ ዐልኮ። ምናተ። ክምሰል ለሀይ ጅረሕ ዲብ ሐያቼ ርኢ ይአነ። ለልአትዐጅብ ህዬ ለነፈር አስክ እለ እብ ሐያቱ ሀለ።
“እት ግንራሪብ በሐር ክምሰል በጽሐነ፡ እንዴ ትከርደነው እግል ልፍገሮ ቀድሮ ለይዐለው ዐስከር አባይ፡ ሰሮም ገሌ ተነቅል እንዴ ገብአው እት በሐር ልተራከሾ እት ህለው። ለሰሮም ህዬ ምነ በሐር እንዴ ፈግረው ዲብነ ሰልሞ ዐለው። ብዝሓም ህዬ ልቦም ክምሰል በደ ዲቦም፡ እተ በሐር እንዴ አተው አርወሐቶም ቀብቶ ዐለው። እብሊ ህጁም እሊ ውቃው እዝ እብ ተማሙ ትደመረ። አክልሕድ ሳዐት ሐቴ ወሰር ማርሰ -ተክላይ ዲብ እዴነ በርደት። የም አለቡ አስልሐት ሰለብነ። መዕነውየት ዴሽነ ህዬ ትወቀለት። ሜዛን ሒለት ዲብ መስልሐት ሰውረትነ ትቀየረት። አባይ ዲብ ምድርነ ለጽንሕ እቱ ወቅት ሐጪር ክምሰል ቱ ትወድሐ እግልነ። ቃእድ ውቃው እዝ ጀነራል ሕሴን አሕመድ ሑዳት አውቶብሊንደ-ጎመ እገረን ደባባት እንዴ ጸብጠ ምን እዴነ ፈግረ። እብ ሰለስ አው አርበዕ ዐርባት መደርዓት እንዴ ልትዐቀብ እብ
ግንራሪብ በሐር አስክ ማርሰ-ተክላይ ሀርበ።”
እግል ለአትምም ክምሰል ቤለ ሰኣል አትዐሬኮ። “አውጌት መዲነት ዐባይ ተ?” ስሕቅ ወደ። “አውጌት መዐስከር ዐቢ ናይ አባይ ዐለት። መጆብ መዲነት ተ” “ክምሰል ከረ ነቅፈ?”
“ኢኮን። ከረ ነቅፈ ወአፍዐበት ሐርብ ደመረየን እት ኢኮን፡ መዳይን ዐባዪ ተን። አውጌት ላኪን ጋድም በራር ዐለት። አባይ ክምሰል ሐድረየ መጆብ ዲብ መዲነት ቀየረየ።
“ድግምዬ እግል አትምም እግልኪ። እስትሽሃድ ወምስክነ እት ሐርብ ለሀላቱ። እትሊ ሐርብ እሊ ለእንፈትዮም መልህያምነ ትባልሐነ። ምናተ፡ ለሐርብ ተዐወትነ ዲቡ። ምህመትነ ክምሰል አትመምነ ዲብ ደብዐት ምን ሐዲስ ትነዘምነ። ምን ጅደ ለመጽአነ እት እንመስል፡ እግለ ምን አባይ ለሰልብናሁ ልባስ ወብዕድ ሓጃት እንዴ ጀቀፍነ ዲብ መስከብነ ለቀዳም ጀብሀት ነቅፈ አቅበልነ----” ሐቆለ ቤለ፡ “ሃሃሃ! ትረስዐኮ ምንኪ።” እብ ሰሓቅ በረቴዕ ገብአ።
“እት ጀብሀት ነቅፈ ምስለ ለዐለው ጅማዐትነ ክምሰል ተሓበርነ። ሰብ አውጌት መሰጀላት ወሸራይጥ አባይ ሰበት ሰልበው ወራር ዓዳት ወዱ ህለው እንዴ ቤለው ዲብ እጅትመዕ ዐገበዉነ።” ክምሰል ቤሌኒ አናመ ምስሉ ትሰሐቅኮ።
ሐቆ እሊ ብዞሕ ኢትሃገ። ፋሬሕ ዲብ እንቱ ለድግም እንዴ አትመመ ተርኪዙ እት ብዕድ ወደዩ። አነ ፈክ ወቀዩ እብ ሚ እግል ልትፈዴ ቀድር ዲብ እብል እብ መትዐጃብ አቅመትክዉ።
“ምህመትነ እንዴ አትመመነ ዲብ ጅብሀት ነቅፈ በህለት ዲበ መስከብነ ለዳይም አቅበልነ።” እንዴ ቤለ ልቡ ዲበ ሕቼ እፍልሕተ ለዐለት ጀበነት ወደዩ። ህቱ እግልዬ እንዴ አዝመ ምንዬ ምስል ሕቼ እግል ልትሃጀክ አንበተ። አናመ ልብዬ ዲበ ሀነን ወዴ ለዐለ ሐራር ናይለ ጀበነት ከሬክዉ። ሐሬ ላኪን እብ በይንዬ አስተንተንኮ። “ምህመትነ አትመምነ” ቤለ። “መን ምህመት ሀበዮም? መን ትበገሶ ቤለዮም?” ሰኣል ዐቢ ሀረስኮ። እብ ኖሼ በሊስ ራቴዕ ለእቤሉ ሀብኮ። ለበሊስዬ ህዬ፡ “እሊ ምድር፡ እሊ ገቢል-----ተእሪክ---ወቅት---ገብእ” እቤ።
“ለተሀየበተነ ምህመት ትቤ፡ መን ምህመት ሀቤኩም?” እንዴ እቤ እግል እትሰአሉ ነዌኮ። ትክ ወዴኮ ገንሐክዉ። ህቱ ላተ ምን ስርቤብ ወእስትንተን እንዴ ትባልሐ ምስል ሕቼ እብ ክሱስ ፈርዐነ እግል ልትሃጀክ አንበተ። “መን ምህመት ሀቤኩም?” ለለብል ሰኣል፡ ኖሼ “ፍቲ ወጠን” ለልብል በሊስ እንዴ ሀብኮ ዲብ ህጅክ ቡን ምስሎም ተሓብረኮ።