ዲብ ሸረክ ሳሕል - ሰሕረ
ብንያም ሃይለ
ቅሎዕ ምንኬንለ ምዱድ ጋድም ቅብለት ምፍጋር ጸሓይ ሳሕል ለሐውጽ እት ህለ ነፍስ ትፈትዩ ለዐለ። እንክር ምፍጋር ጸሓይ ዔጻትከ እንዴ አትሌከ፡ እብ ምራየት ቀደምከ ለህሌት መሳፈት ዶል ተአቀምት ምድር ወዐስተር ክምሰለ ዝላም ለጽሄት ለህለ ምኑ ወዳሐት ለልትመጣወር ዐለ። እተ ዶሉ ህዬ ሙናድል ደሚሩ እብ ገናዐት ዲብ ልትለወቅ ልትረኤ።
ውላድ ስርየተ እግል ሉለ፡ እሊ በክት እሊ ኢሰአነው። ምናተ፡ ለደባባት ቆፎሀ ክምሰለ ትከመሀንህብ ዲብ ቀደሞም እት ልትገናበየ ስካብ ከልአያሆም። እግል ስኒን መምለከተን እንዴ አወጀየ ነብረ እቱ ለዐለየ ጋድም ሙናድሊን ዔረው እቱ። እተ ዶሉ ሐቴ ረሻሽ ለጸዐነት መኪነት ድርዕት (ኣንፊብያን) ዲብ ትለከፍ እቶም አስኮም ትገምቤት። ጣግየት ሐጺን (ሀለመት) ለለብሰው ዐሳክር ህዬ እት መሸንገለ እንዴ ገብአው ዲብ ኔሽኖ ዲብ ተንሺን ለአተ ሙናድል እግል ልግለው ልትባደሮ ዐለው። ላሊ መክረሀተ ምዩያም ለዐለው ዐሳክር ደርግ ለዐለ እቶም ፍጀዕ ዲብ ረሕመት ለአለቡ አዋይን ትበደለ።
ግረ ታርፈት ለዐለት ሉለ ለትትበሀል ሐኪመት፡ እተ ሳምን ለሀ ምን አምን ሰውረት ለመጽአዮም የማኔ ለልትበሀል ሙናድል ከብዱ እንዴ ትዘበጠ ዲብ ልሽሕግ ምን ቃብል ረኤቱ። “ከላስ፡ እግል ልትጸበጥ ቱ” እንዴ ትቤ ዲብ ተሐስብ፡ ናይበት ቃእድ መጅሙዐት ግምጀ ወልዳይ እብ ሸፋግ “ግስኮ ግስኮ” እንዴ ቴለተ ክምሰል ሰሬረት ነፍረት። ምነ ልትሰመዕ ለዐለ ወጀዕ ናይለ ተሐከረው ሙናድሊን ባካት፡ ርይም ክምሰል ትቤ፡ እብ ክለ ሒለቶም ለልስዑ ሙናድሊን ምን ቃብል ረኤት።ሸንጠት ገዛፍ ሕክምነ እንዴ ጾረት እት ረአሱ ክፉፍ እንዴ ወሰከት ዲብ ተሀረክርክ፡ ገጽ ግረ ውልብ ትቤ።ለአንፊብያን ክሉ ረአሱ እተ ኢትጸበረተ ነሳፈት ክምሰል በጽሐት ልብ ክሬት።ግምጀ እብ አመተ ኢተመረት ቀደመ እንዴ ወድቀት ለትትባለሕ እቡ ብስር መሀዘት። ገጸ ዲብ ሖጸ እንዴ ደገለት እደየ ክምሰል መስቀል እንዴ ማደደት ግናዘት እግል ትምሰል ዲበ ምድር ትመደደት። ለዲብ መርከበ ለዐለት ሸንጠት ሕክምነ እግል ተአፍግረ ላኪን በክት ኢረክበት።
እብ ዶል-ዶሉ እብ እንክረ ደባበት ለዐለት እቱ ባካት ልሰትመዕ ለዐለ ዘብጥ፡ “የምክን እግለ ገናይዝ ዘብጦ ህለው” እበ ልብል ወግም ሰኒ ወአማን ንየተ ሓጨረት። “ተበብ! ጭዝ” ዲብ ልብል እብ ረአሰ ክምሰል ሐልፈ ገሮበ ሰኒ ወአማን ሸዐለለ። ለኣንፊብያን ሰኒ ክምሰል ቀርበተ፡ ምራቀ እንዴ ቀርደዐት
ወሐጠቱ። ናይ ደንጎበ ምን እድንየ ለትሳርሐ ርሳሰት እግል ትትከበት ህዬ ለሸም ብህል ዐለ ዕንታተ ሰኒ ወአማን ጨቅጠቱ። ተአተንፍስ እት ህሌት፡ ለምለዐል ጫቅጠተ ለዐለት ሸንጠት ዝያደት ገሮበ ሀንደደት። ለኣንፊብያን ክምሰል አደገት ምነ፡ እብ እገሮም መጹኡወ ለህለው መስለ እተ። እብ ሸፋግ “አንሳይት ክምሰል አነ ለአሌሉኒ ገብእ?” እንዴ ትቤ አርወሐተ ትሰአል እት ህሌት፡ እግል ግናዘት ተብዐት ብዙሕ ክምሰል ኢልትአየሶ እቡ እንዴ ሐስበት ቱ።
ገሮብ አንሳት መብዝሑ ዶል እብ መባትኩ ልትሌሌ። ፍይሔ ጸሎ፡ ነሐር ወሕጭር። ናየ ላኪን አክል እሊ ለልትፈረግ ኢኮን። እብ ፍንቱይ ዲብ ውሕዳቶም ተድሪብ እት እንተ፡ጸረ ተአትጌግዮም ክምሰል ዐለት “መለሀይ ነዐ ምስል ኒሺን” ዲብ ልብሎቱ ለየንዱነ ዐለው። ላመ ጀብጀብ (ሙሩን) ጭገረ ምን ገብእመ፡ ክሉ ሙናድል ለወድዩቱ ለዐለ ቱ። ለኣንፊብያን አስክ ዐስር ምትር ቀርበተ።ፈርሀት ቅያሰ ሓልፈት ዲብ ሐጠር ሰበት ትትበደል “ኖሶም ለአምሮ” ዲብ ትብል እግል አርወሐተ አትሓጠረት። ለደባበት ክምሰል ሐልፈተ፡ አሰልፍ ሞቶረ ተአረምሽ ለህሌት መስለ እተ። ትረይም ክምሰል ዐለት እግል ትፍሀም ላኪን ይአደገት። ለዶል፡ ሖጸ ቄቄ ለዐለ አንፈ “ፊፍ- ፊፍ” እንዴ አበለት ፎቃየ እንዴ ሐከት ነግፈቱ። አስክ ድፍዖም ለአቅበለው ገሌ ዐሳክር ዲብ ርሽመትለ ደብር ዲብ ልትቃሰው ልትረአወ እንዴ ዐለው ምክራዮም ትቀዌት። የምክን ህተ ለኢትርእዮም ዋርድየት ምን ቅብላት አው እብ ክሻፈት ሪም ናይለ ህተ ዐለት እቱ ጋድም እግል ልራቁቡ ቀድሮ ዐለው። ለገአት ሐረከት እግል ኢቲዴ ህዬ ትጀመለት። ብዙሕ ክምሰል ጸንሐት ላኪን እብ መልሃየ ሸንጠተ እንዴ ሐርጠት፡ እግለ ቃስን ለዐለ ገሮበ አትዐረፈቱ።እብ ሰበብ ለህበት ርስሰ ለዐለ ገሮባመ ሐከቱ። “ምን እለ መለገት እለ ህዬ ከአፎ እግል እትባለልሕቱ?” ለትብል ፈርሀት ዲብ ሙከ ዐንበልበለት።
ለዘብጥ ዲብ ረይም ወለሐውን አክለ ጌሰ፡ እግል መስለሐተ ክም ኢኮን ፈሀመት። ሰእየተ ዲብለ ክትል ሙናድሊን ለዐለት ጽልመት ሌጠ ተሐደደ። ምናተ ዐሳክር አባይ እበ ህተ ዐለት እተ አካን እንዴ ኢለአቀባብሎ ክምሰል ኢልውዕሎ እሙርቱ።እብ አማን ላኪን “ግናዘት ተ” እንዴ ቤለው እት ልርኡወ ለሐልፎ ገብእ? ክምሰለ አጀኒት ቤቼ ቤትከ ዲብ ልብሎ ወልተልሀው ለሰኩቡ፡ ህታመ ትተርጀግ ለህሌት መስለ ዐለ። “ወንበዴ እሻጥረኛ” ዲብ ልብሎ ጸፈፍዕ ዲብ ወድወ ወነሱኡወ ሰበት ትካየለ እለ ሰኒ ሸዕለለት።
ሑጸ፡ አክል ሕድ ክምሰል መርተበት እግል ትስከብ እቱ ውጡይ ቱ። እብ ሐርብ ወሄራር እንዴ ተአንጎጌ ዐልከ፡ ሐሬእብ ራሐት ዶልትሰክብ ዲቡ ከፎ ወጠዐመ፡ ምናተ ለቴለል ክምሰልሁ ይዐለ። ሉለ፡ እብ ህሙም ዲብ ተዐርግ
ወትትከሬ መጦር እሊ ተዐብ ልትጸዐን እተ ዐለ።አከይ-ውዳይ ለውድየዐዶ እግል ኢለቅህምዲበእት ፈርህ ሙከ እብ ሸፋግ ፈየገ። ከንፈረ ነክሸት። ጨቅጠየ ምንገብእ ወለ ምን ባልሰ ትንፋሰ እንዴ ሐብዐት ማይተት እግል ትትመሰል ዳሌት። ድገለባይ ስምጠ፡ እብ ደም ሽሂድ ተፈሪ ጥሉል ሰበት ዐለ፡ ዲቡ ክምሰል ትዘበጠት እግል ልእመኖቱ ሰእዮበ። እምበል እብ ብዝሔ ሀወእ እንዴ ሰሐበት ትንፋሰ ሐብዕ ቀደም ክልኤ ሳዐት ለሞተት እግል ትምሰል ገሮበ እግል ተአንሽፍ እግል ትቅደር በ።
ክርን ዐሳክር ዲብ ትቀርብ መጸአት፡ “ወንድ ነው ሴት?” ለልብል ሰኣል ልትሰመዕ እት ህለ ሉለ አክደር ልባስ ለለብሰው ጦር ሰራዊት ጸላይምትካየለው እለ። ከርከለሕ ልብል ለዐለ ዐስከሪ ላኪን ዐፍሽ ረፍዕ ለህለ መስለ እተ። ብዕድ ዐስከሪ ዲበ እንዴ ሸአገ “ሴት ነች መስለኝ” በልሰ።
“እንዴ! ዮም ሸዕብየት አዋልድ አንሳት ሌጠ እትብግሰት ዐለት መስለኒ፡” ቤለ ለሳልፋይ መስእላይ።
ካልኣዩ ዲብ ልትሰሐቅ፡ “ዕውር ሕደግ ወሐንኪሽ ልብሎ እት ህለው እግል ልፍገረ ሰበት ኢቀድረያቱ” ልብል እት ህለ፡ ሉለ ዲብለ ሕመት ለመስል ሕብሩ ባርህ ወቀይሕ ዕስር ትዋሰፈ እለ። አክል ሕድ ዕስር ትሰሐቅ ከራይ መስለ እተ። እተ ዶሉ ፈርድ ዲብ ለዐምር ሰበት ሰምዐቱ ጭገረተ ትረበበት። ዝናድ ክምሰል ትሰሐበ ቀዕ ለትብል ክርን ክምሰል ሰምዐት ላተ እት ረአሰ ለሀንጦጥል ለዐለ መለክ-አልሞት ትገልጸጸ ምነ። ለፈርድ ናይ ኮምሽኔር ስርየተ ገብአት ምንገብእ ላተ ርሳስ ክምሰል አለቡ ተአምር ዐለት።
ሐቆ ወቅት ሑድ ዲብለ ሖጸ ሸፈሕ-ሸፈሕ ዲብ ልብል ሐከሽ እገር ሰምዐት። ሉለ ለመጻንሒ እግል ልግበእ እለ እንዴ አብዘሐት ለሰሐበቱ ሀወእ እብ መልሃየ አፍገረቱ። ወቅት ዲብ ተዐቅብ ወረአሰ እብ መልሃየ ዲብ ጣዌ ባካተ አቅመተት። ክሉ ክፉፍ ወሸንጠተ ንሱእ ዐለ። ልሰዕ ቃስን ለዐለ ገሮበ እንዴ ኢተሐርክ፡ ምን ሐዲስ ክርን አዳም ሰምዐት። አዜመ አስክ ቀሩበ እንዴ ታኬት ሀወእ ብዙሕ ዲብ ትስሕብ ከብደ ነፈሐት ወትንፋሰ ሐብዐት። ለጭፍር ናይለ አዳም ዲብ ቀርብ መጸአ። ህታመ እብ መጆቡ ገሮበ ዝያደት ቀርሰሰ።ዎሮትዐስከሪ ዲብ ፈንዶተ እንዴ ረድሀየከ “ይህችም ሴት ናት” ቤለ። ሽውየ ሓልፍ ምነ ለዐለ ብዕድ ዐስከሪ ህዬ፡ “ሆድወ ነች የተመታችው” ለትብል ህግየ ሽርዕብት ሰምዐት። ዲብ ገሮበ ለዐለ ደም እንዴ ረአ ልትሃጌ ክምሰል ህለ ህዬ ጌመመት። ጭልን-ጭልን ለልብል ክርን ሐጺን ሰበት ሰምዐት ህዬ ሰኒ ወአማን ገኖበተ ትካረበት። “በዋሪዶም ምን ፎቃዮም እግል ልክረው አው እግል ልርፍዕዉ ልትሰመዕ ለዐለ ናይ መናዱቅ ክርን ገብእ” እት ትብል
አርወሐተ ቃሸሸት። “መን ኣመረ?’ እንዴ ትቤ ለጌመመቱ ብስር ህዬ ለዐውተ ክምሰል ዐለ ልብ ከሬት። ምን ሐዲስ ናይ ነቢር ሰእየት ወዴት።
እት ረአስ ደምቀተ ስቅልት ለዐለት ጸሓይ ኢኮን እንዴ ትመደድከ እግለ፡ እብጣርካመ ለትርሕም ይዐለት።ረመጭ ወካቤት እግል ኖሱ ለለአነድድ ዐለ። ለዲብ ገሮበ ዐለ ደም ሽሂድ መለሀየ ናሽፍ ምንመ ዐለ፡ መትዘባጡ ላኪን ልሰዕ ልትካየል እለ ወለሽዐልለ ዐለ።ምን አርወሐተ ህዬ መሽገት። ላኪን እብ ሰበት መንገፎሃቱ ትሻቀል ለዐለት። ጽልመት ክምሰለወክድ ለሀይ ርምጭት እለ ኢተአምር። እተ ዶሉ ህዬ እብ ሕሳበ ዲብ ዝክርያት ወመዓለት ብርጌደ ተዐዴት።
ክልኤ ቦጦሎኒታት ናይ ብርጌድ 23፡ ዲብለ ስርጉል ህጁም ተሰነይ ሐቆለ ሻረከየ ምስለ እት ጀብሀት ሐልሐል ለዐለት ቦጦሎኒ ሰለስ አስክ ወድጃበ ትብገሰየ። ሉለ ዲብ ሕክምነ እንዴ ዐለት ተሓበረት እቶም።ዲብ ዴሸ እንዴ መጽአት ምስል መልሂተ እት ትትባደር ዲብ ገበይ እት ህሌት ክሉ ለቴል ትዋሰፈ እለ።
ለብርጌድ ምን ወድ-ጃበ አስክ ወድ-ጋን ሄረረት። መስኡሊን ብርጌድ ብሪራይ ወወድ ልብሱ ዲብ መሸንገል ትዮተ እንዴ ዐርገው፡ ጀብሀት ቅብለት ምፍጋር ጸሓይ ሳሕል እግል ትደውሸሽ ክምቱ በሸረው። ክልኢቶም ሜርሐት ወሕዳቶም እንዴ መርሐው፡ ስስ ስዖታት እብ ድማናይ ደንበር እንዴ ሄረረው ጋድሞታት እንዴ ተዐሮረው አውጌት እግል ልህጀሞ፡ ሐቴ ቦጦሎኒ ናይ ብርጌድ 58 ጋድሞታት ክራይ እንዴ ሐልፈት ዲቡ ሻፍፍ ለዐለ ዎሮትሻለቀ አባይ እግል ትደውሽሽ፡ ምን ቀደም ለዐለየ ቅዋት ህዬ ገጽ እብ ገጽ እግል ልህጀመ ሳዐት ሐቴ ናይ ላሊ ክምሰል አምበተ፡ ደርብ ብርጌድ 23 እንዴ ተለየ ለመጸአየ ደባባት ምን ሳዐት ክልኤ አስክ ሳዐት ሰለስ ጽብሕ ምድር ዲብ አውጌት እግል ልሕደረ ዐለ ለስታቲብ።
“ሐርብ ጋድሞታት ተጅሪበት ሐዲስ ሰበት ቱ፡ ናይ ገበይ ከሃላት ጠልብ” ምን ክሉ ለተሀየበ ሸርሕ እግል ሉለ አትሀመመየ። ሪም ገበይ ኢናስብ ምስለ። ሐኪመት ሉለ እተ ምሴተ ዐፍሸ እንዴ ከምከመት፡ እስእነ ራቅዐት ወማሲ ምድር ምስል ብርጌደ ትበገሰት። ለሰፈር ክምሰል ሰር አብጸሐው፡ ማይ እግል ልስተው ወነብረ (በስከዊት) እግል ልብለዖ ዓረፈው። ትርሓስ ሀይሌ (ሓባሪት) “ሉለ እለ ገበይ እለ እብ አማን እግል ትቅዴራቱ?” ቴለተ።
“ሄየእ! ምን እግር ወለት ጎይታነ ሐሚቅ ሚ አውድ፡” ክም በልሰት እለ፡ እብ ክርን ድህርትሰሐቀየ። ለምለም (ወለት-ጎይታነ)፡ ዲብ ሓምሳይ ወራር ሐክር እግር ሰበት ሳደፈየ ተሐንክሽ ዐለት። ሉለ ናይ ትርሓስ ያንዲን እግል ትጥዌ
ለተሃጌት እት ኢኮን፡ ዲብ ሰፈር ላተ አርወሐተ ብዙሕ ኢተሐምደ። “አነ ላተ እሊ ናይ ዮም ሐርብ ለአስፈኒ ህለ።ዮም ላተ ሐልፈ መስለኒ ይህለ፡” ቴለተን ሐባሪት ለትትበሀል መልህየተን ፍንቱይ ሽዑር ዲብ ልሰመዐ። ኖስኖሰን፡ “እሊ ጋድም እሊ ላተ እግል ሐቴሃቱ” ዲብ ልትበሀለ “ሰፍ ጽበጥ ትበገስ” ለልብል ትእዛዝ ደርብ ሕድ ተሐላለፈ።
እበ መሳክብ አባይ ክምሰል ረሐት እዴሆም ለልአምሮ አንፋር ስለለ ዲብ ልትመረሖ፡ ስስ ሳዐት ሄረረው። እምበል ለገብአ መታክል፡ አክልሕድ ሳዐት ሐቴ ላሊ ዲብ ቅምቤት አውጌት ጠበሽ ቤለው። ክል ቦጦሎኒ ሀደፈ እብ ዋድሕ ተሐበረየ። ሐቴ ቦጦሎኒ ናይ ብርጌድ 58 ላኪን፡ ክራይ እግል ትብጸሕ ልሰዕ ናይ ክልኤ ሳዐት ሄራር ታርፍ ምነ ዐለ።
ብርጌድ 23፡ ቦጦሎኒ ሐቴ ድማናይ፡ ቦጦሎኒ ክልኤ ድገለባይ፡ ቦጦሎኒ ሰለስ ህዬ እብ ምግብ አስክ አውጌት - ክሎም እብ ጀሀት ቅብለት እንዴ ሐልፈው እግል ልህጀሞ ቱ። ወቀይ ናይለ ሉለ ዐለት እተ ቦጦሎኒ፡ ለምን እምሀሚሜ አስክ ክራይ ለትነስእ ገበይ እንዴ ጸብጠት፡ ምን ክልኢቱ እንክር ለትመጽእ ራድኢት ክርዐት ዐለት። አሰልፍ ላኪን፡ እንክር ኒያለ ለዐለ ሰለስ ድፍዓት አባይ እግል ልትደመር ዐለ እሉ። ሐቆሁ ዲብ መጣግሕ ለዐለ ናይለ ድዋራት መርከዝ (ሶፌትዪን ለዐለው እቱ) እግል ትፈንጥሩ ትበገሰት። ዘብጥ አምበተ። ርሳስ ክምሰል ቅሎ ተበብ እት ልብል ልትሓነን እት ህለ፡ ሉለ ድማነ ወድገለበ ለዐለው ጅማዐተ ዲብ ተአትቃምት ገጽ ቀደም አለምቤት…።
ሉለ ምስለ ክም ፊልም ልትካየል እለ ለዐለ ወትደጋግሙ ለዐለት ዝክርያት ናይለ ሐርብ እት እንተ ዲበ ምክራረ ቀሸው ትቤ። ዲብለ እብ ሕልመ ለአተላሌቱ ሰዐይ ህዬ እግል ትትፈሀመ ለኢትቀድር ሒለት ትሰምዐተ። ዲብ ሐርብ ላሊ ምን መጅሙዐትከ ተሪፍ አው ሐሊፍ እት ብቆት ካሬ። እብ ርሳስ መልያምከ እግል ትዘበጥ አውመ እንዴ ተሐከረ ለተርፈ ዐስከሪ አባይ እግል ልተልሄ እትከ ሰበት ቀድር፡ ሉለ እብ ክለ ሒለተ እግል ተአለምቤ ጀረበት። እግረ ላኪን እብ ሐቴ ለኢትራቅበ ቅወት እንዴ ትቀየደ ኩስኩስ እግል ሊበል ኢቀድረ። እብ ሐሩቀት ዲብ ተሐራጥጥቱ ህዬ ዲብለ ዐለት እተ ሓለት ለበልስ ብርድ ሰበት ከብሀየ፡ እተ አካነ ዕኑድልት ዲብ እንተ ፈግ ትቤ። እደየ ፍንጌ ክልኦት መጋበ እንዴ ሎሸት ወረአስ እንዴ ከርከመት እተ አካነ ፍንጌ ኮፍ ወፈረጀ ሐፍሸት። እብ ዕን ሕውሪረ ድዋራተ አትቃመተት። ሐቆ እሊ ሽውየ ትማቀአት። ዲብ ገጸ ለትፌፈ ሑጸ እግል ትንገፍ ህዬ አጫብዐ ሌጠ ሐረከት።
ለወክድ ምድር እግል ልምሴ ቃርብ ሰበት ዐለ፡ ሉለ ምነ ህሌት እተ መለገት እግል ትፍገር ለህለ እለ በክት ዐቢ ክምቱ ፈሀመት። ሕኔት ምራቀ ህዬ ሀወእ
እብ ሸፋግ እንዴ ሰሐበት ወሐጠት። አሰልፍ አስክ ትትዕብ እንዴ ሸሐገት ትገሴት። ምን ሐዲስ እት ከብደ ለትወድየ ምን ረክብ እንዴ ትቤ ዲብለ እስትሽሁዳም ለዐለው ውላድ ውሕደተ ሀረክረከት፡ ለአሰልፍ ረክበተ ግናዘት ግንዳይ ትመስል። ፍርግጽ እንዴ ቤለ እግል ኢልከልዕመ ህዬ ፈርሀት። እብ መልሃየ ዲብ ተአሳድር ህዬ ቀርበተ። እንዴ አብረከት ወረአሰ እንዴ አድነነት ሰኒ ፈጥነተ። ለበዐል ገሮብ ሙሉእ ሳምኤል ወድ ግሩየስ ልትዘበጥ እት ህለ ርእየቱ ሰበት ዐለት ቱ። እግለ ህድልት እዴሁ ክምሰል ተምተመተ በራደት ትሰመዐተ። ህቱመ ክሉ ዐፍሹ ንሱእ ሰበት ዐለ ለገብአት ሓጀት ኢረክበት ምስሉ። ምንኬኑ ብዕዳም ሹሀደእ ምን ረክብ ዲብ ትጫፈር ትበገሰት። ምናተ፡ ክሎም ጻውራሙ ለዐለው ዐፍሽ ንሱእ ክምሰል ዐለ ሸክ ኢወዴት። ሕቀተ እብ ተማመ ክብ አበለተ። ዲብለ ብርጌዶም ትትሓረብ እቱ ለትመዬት ከረቢት አውጌት ህዬ ሐቴ ዶል ውልብ ትቤ። መርበየ እብ እሱው እትጀህ ክምቱ እንዴ ኢትደሌ፡ ምነ አካን እግል ቲሪም ሐዜት። ድማን። ድገለብ ወገጽ ቀደም ዲብ ክሉ እትጀህ አቅመተት። በክቼ እንዴ ትቤ እግረ አስክለ መርሐየ ሄረረት አስክለ ኢልትወሔ ለመስል ጋድም። ምን ወድ-ጃበ እብ እሱው አድብር እንዴ ሐልፈው ዲቡ ክምሰል በጽሐው እግል ትትፋቀድ ጀረበት። እግል ልትፈሀመ ላኪን ኢቀድረ። እብ ብርድ ፈጥፈጥ ትቤ። አንያባመ ሕርጢጥ ቤለ። ገሮበ ሐፋነት ምን ረክብ እንዴ ትቤ ካኪ (ሚላኖ) ከሚቸታ አስክ ለዐለ እንዴ ሰደፈተ፡ ፉጠተ ለጸላም እንዴ ትገልበበ እደየ ዲብ ነሐረ ከሬቱ። ፋጻሀ ሸማል “ቁም” ለትብል ክርን አባይ ለጸብጠት ዲብ መስል እተ፡ ዲብ ትጫፈር ወድብ ተአተናሴ ምነ ትሄርሩ ለትበጥሩ በዝሐ።መልህያመ እብ ሰበት ከራይ ልትሃጆኩ ለዐለውመ ፈቅደተ። “ከራይ ፈርሀካሀ ምንገብእቱ ለትበለዐከ፡ ኤማንከ እግል ትድሌ ድማንከ ወድገለብከ ትሻወር፡ እብ እገረ ጨበል ተሐናዴ…’’ ሐስበት።
የምክን ከራይ ረክበተ ምንገብእ ለገብአ ናይ ፈርሀት እሻረት እግል ኢተርኤ ቀረረት። ሐቆ ናይ ገሌ ደቃይቅ ሄራር ላኪን፡ ክሉ ሽእ ዲብ ለምዱ ጌሰት።
ሉለ ዲብ ሸቀላት ቆሪ ዲብ ተውቅ፡ ክሉ ለትመዬት እቱ ሐርብ ክምሰለ ተአትሐዝን ድራመ እግል ልትረአየ ወድብ ዝክርያቱ እግል ትሸመም አምበተት።
ቦጦሎኒ ሐቴ፡ ለእብ ድቁብ ዘብጥ ዲብ ረመጭ ለትበደለ ጋድም ዲብ ትካይድ ገጽ ቀደም ቀርበት። ልሰዕ ለሳልፋይ ከናል አባይ ላኪን ኢረአው። ሐካይም ክርን ወጀዕ ዲብ ለአተንሱ ወእግለ ወድቀው ዲብ ጽልመት ዲብ ተማትሞ እግል ልርዱኡዎም ትባደረው። ሐቆ ሰፉፍ ዲብለ መሐብዒ ረአስ ለአለቡ ጋድም በራር እንዴ ሐድገዎም ዲብ ከጥ ህጁም እግል ልትሓበሮ ትሳሰዐው። ዲብለ ናይ ሉለ ስርየት፡ ሐኪም ስርየት፡ ክፍሊት ሐጎስ፡ እግል ዎሮት ጅሩሕ
ሐክሩ ለዓሽብ እሉ ዲብ ህለ ሐኪመት ርቅየ መሐመድ (ወለት መሐመድ) እንዴ ደነት ሰዴቱ። እተ ዶለ እብ ክልክልኦት ርቅየ ለአቴት ርሳሰት ረሽራሽ ዙ-23 እግለ ጅሩሕ እንዴ አትዐሬት አምዓይቶም እንዴ ተልተለት ፈግረት።
ሳልፋይ ካናል አባይ ረአው። እተ ዶሉ ክልኢቶም ሜርሐት ስርየት፡ “የለ እቴ ገጽ ቀደም ሽክ ውዴ” ዲብ ልብሎ ትጣረሐው። ዲብለ ከናል ለአቱ እት ህለው ኮሚሽኔር ስርየቶም መሓሪ፡ ትርሓስ ሀይሌ (ሐባሪት) ሳበ፡ አብረሃም፡ (ቢንቢነ) ምነ ወድቀው ዐለው። ትርሓስ ከብደ ሰበት ትዘበጠት ወጀዕ ድቁብ ዐለ እለ። ሉለ እብረት ዲብ ረግዘ፡ “ከንዶእ እሊ ሐርብ እሊ ክምሰል ናይ ዮም 22 እንዴ ኢገብአ ኢተርፍ” ትቤ።
እንክር ድማኖም ለሀጅመት ቦጦሎኒ ሰለስ፡ ዲብ ቀደም ከረቢት አውጌት ዲብ ክልኦት ከጥ ሰዋትር እግለ ሻፍፍ ለዐለ አባይ ንሔቱ። ቀደምለ እት ሳልሳይ ከጥ ለዐለ ናይ ደንጎበ ድፈዕ እንዴ ኢትበጽሕ ላኪን፡ ለዲብ ምግብ ዐለ ኤምዳድ አባይ ነደ።ሀልሀል ለብል ለዐለ ብርሃን ሙናድሊን ዲብ ዕን አባይ ኣተዮምወ ሐሊፍ ከልአዮም። እግለ ጽልመት ሰበት እት አደሐ ቀየረየ ብርጌድ እብ ከማለ አድሕድ ለትርኤ እተ ደረጀት ትበጸሐት። እብ እንክር ድገለብ ለአቴት ቦጦሎኒ ክልኤ ላኪን፡ ሀደፈ ባጽሐት ዐለት። ደጉፍ ዘብጥ ዲብ ትወዴ ህዬ፡ አባይ እብ ስምጥ እግል ትሸዋንኑ አምበተት። ዲብለ ጋድም እብ ግሬደር ለትሸቀ ድፍዓት አባይ፡ ብዝሓም ሙናድሊን አስተሽሀደው። አባይ ዱሉይ ሰበት ዐለ፡ እንዴ ኢኔሽን እንዴ ደሀረ መጃምዕ ርሳስ ከዐ እቶም። ለጋድም በራር ሰበት ቱ፡ ህዬ ሕኔት አርእሶም እገሮም እግል ልትዘበጦ እንዴ ሐረው ሕኔት ዳናም እት እንቶም ለአቱ እብጣሮም ዲበ ተሐዬ ለዐለት እሳት ሽክ ወደው። ሐርብ እንዴ ኢልአትካርም፡ ዐመልየት አውጌት እንዴ ኢተምም፡ ምድር እግል ልጽበሕ አምበተ። ሉለ ዲብለ ለልትሐረክ መክሉቅ ለአለበ ባዶብ እብ መልሃየ ሄረረት። ለእግረ ዲብ ልውሕል እብ ሰር ሒለት ክምሰል ትገይስ ወዴ ለዐለ ድበብ ኤማነ አግመመ። ተአሳድር ለህሌትመ ኢመስለ እተ። ሉለ፡ እምበለ ዲብ ደሚረ ለትመየ ሐርብ ለከልቀቱ እተ ሸዕሊለት፡ ምን ጽልመት ላተ ፈርሀት ይዐለት እተ። ዲብ ህሙም ትሩድ ትትወሐጥ፡ ተአትቃምት፡ ላኪን ሴመ ኢትርኤ። ዳነት እት እንተ ሄረረት። ሀለዮተ ዶል ትዘከር፡ እብ ፈርሀት እንዴ ትሽዕር ረአሰ ተአሸንን። እንዴ ኢልትፈሀመ ህዬ ምን ሐዲስ እንዴ ደነት ተአትቃምት ወትሄርር።
አመተ ኢተአመረት፡ ቀደመ ምነ ዐለት ክትክተት፡ለልአርዕብ ጥርዓን አንሳይት ሰምዐት። ዲብለ ከደን ለዕውድዉድ፡ ኣቤ፡ ዲበ ጽልመት ሐራስ፡ ኢኮን ለትውዔ ወለት አንስ፡ ወለት ሐውርየ እግል ትጽንሓመ ሰእየት ይዐለት እለ። ሉለ ዲብ ሐያተ ክምሰለ ወክድ ለሀይ ፍጅዕት ኢተአምር። ድንግጸት ዲብ እንተ “መን
እንቲ?” እንዴ ቴለተ ህዬ ዲበ ምድር ግሲ ትቤ። “መን - መን እንቲ?” ደግመት። “አናቱ” ለትብል ክርን ድህር ትከበተተ።
“እዴኪ ርፍዒ?” ደግመት ለእምበል ስለሕ አዳም እግል ትጽበጥ ለትበገሰት ሉለ።
“እሺ (ሰኒ)፡”
እብ ሐጠረ ዲብ ትትፈከር፡ ምነ ወለዐል ፋርሀት ለዐለት ላኪን ሉላ ተ። ዲብ አካን እስቡዕየት አባይ ለአቴት እግል ኢትግበእ ዲብ ፈርህ እብ መልሃየ ዲብ ትጫፈር ክምሰል ቀርበተ፡ ፎካሀ ግረ እንዴ ነትለቱ እብ ብሼሸ እግል ትፈትሸ አምበተት። ምን ሃባጠ አስክ ጸሎሀ፡ ጀላብየተ እንዴ ቀልዐት ህዬ ዲብ በቃሪሀ አስክ ብርከ እብ ትር-ተረት ፈተሸተ። ምን ሐዲስ “እበየ ለመጽአኪ እንቲ?” ዲብ ትብል ዲብ ትትዐጀብ ትሰአለተ። “እህህ!” እንዴ ትቤ እት ረአስ ብላየ ጀገሕ ትቤ። “መልህያምኩም ናስኣምዬ ዐለው - ሐድገውኒ። አዜ ተዐብኮ፡ ገበይ በዴት ምንዬ፡ ሕልቅምዬ እብ ጽምእ ነሽፈት . . .” ድርብ ሕድ ለሳደፈየ መሻክል ዳገመት እለ።
ለወለት፡ ወዳይት ዐሳክር አቶብየ ለዐለት ተ። ሉለ ወለ ውዳይት አባይ መስደድ ናይለ ቴለል አትዓረየን። ዲብ ሕድ ረሐመየ፡ - ተሃጀከያመ። ሉለ ላኪን ኢተሀመለት እለ። ልሰዕ ዲብ ከብድ አባይ ክምሰል ህሌት ቃውየት ይዐለት። ምስል ግሱያት እት እንተን ልትሀርገተ ሰበት ዐለየ ዲበ አካነን እብ ስምጠን ገብአየ። ግራሀን ሕድ እንዴ አትለየ ህዬ ሰክበየ። ሉለ አዜመ እብ ከያል ዲብ ዝክርያት ናይለ ሐርብ ትሸመመት. . .።
ዲብ ኒያለ ወድዋራተ ለሀጀመ ለዐለየ ቅዋት ዲብለ ተሐደደ እለን ወቅት ሀደፈን እግል ልብጸሐ ኢቀድረየ። ሰበት እሊ፡ ዲብ እምሀሚሜ ለዐለ መርከዝ ውቃው እዝ ኢትሸለለ። አባይ ምን ሐዲስ ትነዘመ። እስቡሕ ህዬ ደባባት እንዴ አምረሐ አስክ አውጌት ትበገሰ። እት ወሪዱ መሽነቀት ስድድ ልውሊት ለዐለት ብርጌድ 23 ትወጀሀ። ቦጦሎኒ ሉላመ እብ ጀሀት መጣግሕ እግለ ዐለ ዴሽ አባይ ልሰዕ ክንቲቱ ይዐለት። እብ ድገለበ ለዐለት ቦጦሎኒ ሰለስመ ነድ ናይለ መዐደኒታት ገበይ ሰበት ከልአየ ዲብለ ውቁል ድፈዕ አውጌት ሻፍፍ ለዐለ ዴሽ አባይ እግል ተሓቅቁ ኢቀድረት። እስቡሕ እብ ግራሆም ጸሓይ ፈግረት። ጀሀት ንያለ ዲብለ ክምሰል ምን ዝላም ምጥብሕ ለቀዌዕ ምድር ወሰመ ገጽ ለዐል ለለዐቦርግ ዕሳስ ትረአ።ዴሽ አባይ ምስል ደባባቱ ተሐረከ። ሙናድል እብ ድግማን ስጋዱ እንዴ ጠወ እብ ጋድሞታት ወድጋን ወቀጣን እግል ልእተየ ለተሐሰበየ ደባባት ጠበሽ እግል ሊበለ እቱ እብ ልቡ ደዐ ወደ። እብ ፍንቱይ ለዲብ በለቅ እንዴ ለጥአው እንዴ አውተደው ልትሓረቦ ለዐለው ዐሳክር አባይ
ሑድ ቀናብል ደባባት ወድቀ እቶም ምንገብእ መቃወመቶም ወአክተመት ዐለት ለትብል ስቀት ዐለት እቶም።
ሰልሲልተን ቦጦሎኒታት ሕድ እንዴ ቀርበየ ምስል አባይ ሸብከየ። እግል ሞት ወሐዮት እዴ እብ እዴ ተሓናቀው። ደባባት ምስል አርፒጂ ሸብከየ። ሙናድሊን ርሳሶም ዲብ ልትወሔ አክለ ጌሰ እንዴ አውተደው እግል ልትሓረቦ ክምሰል ኢቀድሮ ፈሀመው።ዴሽ አባይ ህዬ እብ ሰሩ እንክራት እንዴ አውተደ ተሓረበ። እግል ኢልብከ ላተ ተሐለለ። ሐቆ እለ አባይ በሰር ብዕድ ባሰረ፡ ዲብ ከርዶን ካምል እግል ለኣትዮም ፋይሕ እንትልፋፍ እግል ሊዴ አምበተ።
ብዝሔ ሹሀደ ወሙጀርሒን ምሔርበት ኢሐደ። ምስል ሉለ ሰፎ ለትመየው ሐካይምመ ምነ በክት ለሀይ ኢትሰልመው። ህተ ለዐለ እለ ጠነብል (ባንድጅ) ወስራይ ወጀዕ ክሉ ትነፈዐው እቡ። ዲብ ክል አካን ለሰምዐቱ ወጀዕ ወጥርዓን ከብደ በልዐየ። ዝያደትለ ወጀዕ ላኪን ሜዛን ሐርብ ዲብ መስለሐት አባይ ሰበት ትበደለ ዝያደት ትሻቀለት። “እሊ ቴለል ክምሰል ዮም 17 መስል ህለ።” እንዴ ቤለ፡ ኦፐሬትር ስርየት፡ ስራጅ፡ ክምሰል ተሃገ ሉለ “እሱው በህለቱቱ?” እንዴ ትቤ ዝክርያተ ፈተሸት። እንዴ ጸንሐ ስራጅ፡ ሬድዮ እትሳል ሓዝል እት እንቱ፡ “የለ ቅድረት ለብከ ጅሩሕ ቅምብለትከ እንዴ ጸበጥከ ምን እለ መለገት እግል ትፍገር ጀርብ” ዲብ ልብል እት ልትረመጭ ዲበ ባካት አንጎገ።ወድ የውሃንስ (ገዕ) ነከኩ ሀጨምጪመት ጋብእ እት እንቱ እንዴ ልትነዋኔ እት ገይስ ሉለ ረኤቱ። መጃቅመ እንዴ ጸብጠት፡ “ክእነ እት እንቱ አየ እግል ልብጸሕቱ ገብእ?” ዲብ ትብል ትፈከረት።
ምነ እንትልፋፍ እት ወድየ ልትባደረ ለዐለየ ደባባት አባይ፡ ሐቴ ረሻሽ ለጸዐነት ኣንፊብያን መርበየ አስኮም ሰበት ዐለ ፈርሀቶም ዜደት። ሉለ እብ ሸቀላት፡ ሰፉፍ እንዴ አትካረመት ሸንጠተ ደብአት። እደየ ዲብለ ከንፈረ ከናል እንዴ ረበዐት እብ ንየት ሐጫር አቅመተት። ሰር ክፋል ናይለ ደባባት ልትረአየ ሰበት ዐለ አስክለ ደባበት አቅመተት። ወድ ፈሲለተ ለሰኔት ብጥረቱ ሐቴ እዴሁ ህድልት ላተ መድፈዐጂ አርፒጂ ሳምኤል ወድ ግሩየስ እግል ለአንድደ ኢቀድረ ምንገብእ ናይ ክሉ ሽእ ካትመት እግል ልግበእቱ። ዱቅሪ ትርእዩ ምንመ ይዐለት እብ ልበ ላኪን ረምቀቱ - ሐቴ ቅምብለት እግል ልክሬ እተ። እተ ወክድ ለሀይ ቃእድ መጅሙዐት ተፈሪ፡ እግለ አርፒጂ ምን ወድ ግሩየስ ነስአዩ። እንዴ ኔሸነ ወአትራተዐ ህዬ ሸወጠየ። ለኣንፊብያን ዎሮት ጎመሀ ገጽ ለዐል ዲብ ነጥር ትረአ። ብቆት ተሀንጦጥል እቶም ለዐለት ሙናድሊን ህዬ እብ ፈርሐት “ተዐወት፡ ተዐወት ረከብካሀ” ዲብ ልብሎ እብ ሕበር ክርን ፈርሐት አስመዐው። ለኣንፊብያን ጎማሀ ደብል ሰበት ዐለ ሑድ ቱ ለትሳረረት።መንገፎሀ እግል ተአክድ ሽውየ ሐቆለ ትሸላተፈት፡ ምን ሐዲስ ሰበጣነተ እንዴ አትራተዐት
አስክለ ሙናድሊን ኔሸነት። ተፈሪ ካልኣይት ቅምብለት እግል ልንደእ እተ ዲብ ልጠባጠብ አመተ ኢተአመረት እንዴ በድረቱ ቅምብለት ዲብ ባካቱ ትካሬት፡ ብሶቱ እንዴ ትዘበጠ ህዬ ገጽ ግረ ትከብለለ።
ለቴለል ክምሰል አፍ ሾመት ጸበ። እብ ሕበር ልግበእ ወበንበን ከፎ ክምሰል ለአንስሕቦ ላኪን ለአሙረ ዐለት አለቡ። ሉለ ለዲብ ብሶት ተፈሪ ውቱድ ለዐለ ሐጺናይ ብሉሕ እግል ትስሐቡ ለሰድየ ነፈር ሐዜት። “እንቲ ወለት እዘሚ ምኑ’ ዐፍሽኪ ሌጠ ከምክሚ” ለልብል በሊስ ተሀየበየ። አርወሐተ ኢወዴት እለ። አክል እሊ ላቱ ሐጺን ናይ ሚ ሰጃየት ክምቱ ለኢትደለ፡ እት ብሶት ተፈሪ እንዴ ትወተደ ክምሰል ረኤቱ ላተ ለቴለል ሰኒ ወአማን አሸዕለለየ።ለሐጺን እብ ሒለት ክምሰል ሰሐበቱ ለማሱረት መስል ደም ምን ከብደ አስክ ድገለባይ ስምጠ ሐንገረየ።እብ ድንጋጽ ብራይድ ገብአት። ዲብ ሕቅፈ እትጽግዕቱ ለዐለት ስጋዱ ክምሰል ደልደለ ምነ ጠለቀቱ። ለፈጥፈጥ ትብል ለዐለት አርወሐቱመ ህዬ አክተመት። እንዴ ሐድገቱ ገይስ ዲብ ህሌት ምን ቅብላት “ምነ አካን ንክሲ ሌጠ”ለልብሰ ጅሩሕ ወድ ቦጦሎኒሀ ዲብ ልሽሕግ ረኤቱ። “ሄየእ! ዲብ ሚ ቴለል ባጽሓም ህሌነ?” እንዴ ትቤ እግል ትትዐጀብ ሳምኤል ወድ ግሩየስ እንዴ ትዘበጠ ዲብ ልትከብለል ሐቴ ገብአ።
ደባባት አባይ አሰልፍ እተጀሀን ሸንከት ቅብለት (እትጀህ ቅሮረ) ትወጀሀየ። ምን ሐዲስ ሸንከት ግብለት ጠወየ። ለዲብ ጋድሞታት እንዴ ተአከበ ለዳፈዐ ሙናድል ህዬ ምን ግረ ዘብጠያሁ። እተ መደት ለሀ ፍንጌ ጅንዲ ወመስኡል ለዐለ እትሳል ትበተከ። “የለ ርሕከ አፍግር” ትበሀለ። ለትጸበጠው ዐሳክርመ ለቴለል እንዴ አትፈከረዮም ምስለ ጅኑድ ሰዐው። ለምለም ሐጎስ (ወለት ጎይታነ)፡ወወለት ጸጋይ ምነ ደባበት እንዴ ዐሬቶም ቀናብለን እንዴ አፍገረየ ለአንተሐረየ ዐለየ። ሙናድለት ኤልሰ ታደሴ፡ አብረሀት ጎይትኦም (ወለት ጫሕመ) ሳረ ወሐኪም ስርየት ክፍሊት ሐጎስ ምነ ማይታም እንዴ ትመሰለው ለቀዳምያም እግል ለዐርየ ልትባደረ ለዐለየ ደባባት ለሓለፈወን ዐለው። ዲብለ ጋድም ለምዱድ፡ ምስለ እብ ጽልመት ለአተው ድዋራት መብዘሖም ተዐድወነው። ሰሮም አስክ ቆሮረ ወበሐር ገይሶ እት ህለው፡ ሰሮም ዲብለ ረክበው መሐብዒ እግል ለአጭፍሮ ጀረበው። ለእግል ልፍገሮ ለቀድረው፡ ለእብ ስስ ሳዐት ለመጸአው እተ ጋድም ለእበ ካቤቱ መብዘሖም ክምሰል ፈረስ ዲብ ልትባደሮ እብ ክልኤ ሳዐት ዲበለትበገሰው ምኑ አሳክቦም አቅበለው።
ስካብ ለዐንነ ለዐለ ሉለ፡ ልሰዕ ዲብ ናይ ሕልም ዐለመ ተሐምስ እት ህሌት፡ “ኡይ ደባበት!ደባበት ትመጸአነ ህሌት ዳምበ፡” እት ትብል እግል ሜርሓይ ስርየተ ተኸስተ ዳምበ እግል ተሐብር ጣርሐት። ‘እንዴ! ሚቱ ሚ…’ለትብል ብዕድ ለልአደንግጽ ወእብ ደቅብ ለለሐቅፍ እደይ እግል ሉለ አትሐሶሰየ።ምነ
እንዴ ጨቅመ ለጸብጠየ እደይለ ሳክበት ምስለ ለዐለት እንዴ ክም እንዴ ትፈርቀቀ፡ “በስመኣብ ወልድ መንፈስ ቅዱስ” (ኣዑዝብላሂ ምነ ሸይጣን አረጂም) ለልብል ከሊማት ክምሰል ሰምዐት ላኪን ዲብ ሓለተ አቅበለት።
ዲብለ ዐጭም ለሰብር ብርድ ናይለ ሖጸ፡ እብ ፍንቱይ እግል እገረን እቅርሱሱ ዐለ። ለባዶብ ምስል ጀላብ እግል ልሄረ እቱ ክልኢተን ምስል እግል ልትመንቀሸ አምበተየ። ለወዳይት አምሐረ እንዴ ትጸንሕ እብ ሐዋኒት ክርን “ሕልቅምዬ ነሽፈት፡ ማይ ጸመአኮ፡” ትብል። ለእግል ፈታይ ወአባይ ለፈዴሕ ቲቶብ ለመስል ጸዕደ ነጸላሀ እግል ሉለ አፍረሀየ።
‘ምሽክለቼ ለኢቀደርኮ ምሽክለት ወሰክኮ’ እንዴ ትቤ ሉለ አትማረረት። “እግል ኖሼ ለለአትመንቅሸኒ ለሐዜ፡ ብዕድ እግል አትመንቅሽ?” እግል ኖሰ ተአሳድር ለህሌት ምንመ ኢልትሰመዐ፡ ለአደገት ‘ጋብሌ’ ተሓበረት ምስለ።”እንኪ ምንለዐል ልቤሱ” እንዴ ትቤ እግለ ፉጠተ ምን ገሮበ እንዴ መልጠጠት ሀበተ።ደርብ ሕድ ዲብ ልትመንቀሸ ለኢልትወሔ ለመስል ደርብ ‘ሸፈሕ’ ዲብ ልብለ ጌሰየ እቱ።ወሬሕ ሰኒ ባርህ ሰበት ይዐለ፡ ምን ሑድ አምታር ወኬን ለገብአት ሓጀት እግል ትፈንቴ ለልትቀደር ይዐለ። ዲብለ ጋድም ለርሒብ ለተክለን ሽእ ልግበእ ወብዕድ ወድ ምንክብ ይዐለ።ምናተ፡ ኑግ ዲብ ልብለ ምነ ትበገሰየ ምነ አክናነት እግል ለአቅብላመ ክምሰል ቀድረ ሸክ ዐለ እለን። ዲብለ ሰክበየ እተ መደት እትጀሀን ጀላብ እግል ለአሌልየ ለለሐብረን ዕጫይ ኢተክለየ። አውመ እስእነን ዲብለ ለሐዝያሁ እትጀህ እንዴ አግነሐየ ኢከረያሀ።
ሉለ እብ ዶልዶሉ ዕንታታ እግል ተአትዐርፍ እብ ከዋክብ ዲብለ ትሰርጌት ዐስተር ተአቀምት። እተ ወክድ ለሀይ ድግም ውላድ ፈሲለተ ፈቅደት። ሰብዐት፡ ልሔ፡ ኬመ ወመስቀል ለልትበሀል ከዋክብ ሳሙ እት ህለው ሳምዐት ዐለት። ሰሮም እትጀህ ለለሐብሮ ክምቶምመ ፈሀመት። ምናተ፡ እይስት እቡ ሰበት ይዐለት እግል ትፈንትዮም ኢቀዲረ አተዐሰየ። ምግብ ምግብ ሄራረ ግራሀ ትትመንቀሽ ለዐለት ወዳይት ዐሳክር አባይ ውልብ እንዴ ትቤ “እንቲ ህሌኪ ማሚ?” ቴለተ። “ህሌኮ አይወ” በልሰት እብ ሐክሬነት ሐዋኒት። ዓም ሸክል እት ኢኮን ገጸን ልሰዕ ሰኒ ሕድ ርኢ ይዐለ።ምድር ጸብሐቤለየ እት ኢኮን ሳዐት ከም ክምሰል ህለ እግል ልጌምመ ኢቀድረየ። ብርድ ዲብ ልደቀብ አክለ ጌሰ ላኪን ለወክድ ዲብ ጽብሕ ምድር ገጹ ክምሰል ሸአገ ሸክ ኢወደየ። ሐፋነት እግል ልርከበ ጸሓይ ዝያደት ትሰፍለለያሀ። ዝያደት ክሉ ላኪን፡ “እት ቅብላትነ ሚ ገብእ ሀለ? እንዴ ነአነጽር?” ዲብ ልብለ ትረመጨየ። ሉለ እግል ከዋክብ ክምሰል እተ ወክድ ለሀይ እቅምትቱ ኢተአምር። ደረሳይት እት እንተ ‘ከዋክብ ዲብለአቀምቶ ቴለል ለደሉ አዳም ህለው’ ዲብ ልብሎ ትሰምዕ ዐለት። “በክቼ
ህዬ ዲቡ ገብእ ክቱብ ለሀ?” እሊ ፈነጥር ጋብእ ለህለ ከዋክብ እብ ከአፎ ዲብ እንዴ አትመቃርሐው፡ ከሊማት ከልቆ?” ዲብ ትብል ሀም ገም ትቤ። “ከዋክብ ምን ኢለሀሌ ምድር አክል-አዪ ወጸልመተ ዐለ?” አደሐ ጸሓይ ላሊ ህዬ ወሬሕ ወከዋክብ ዲብ ትብል ክምሰለ ወቅት ለሀይ እቅምትተ ለኢተአምር ዐስተር ምን ልበ ተዐጀበት እበ።
ለከዋክብ ዲብ ልውሕድ፡ ለሰኒ ፋርያም ወዳምቃም ላተ ሌጠ ተርፈው። ምድር እብ ብሼሽ እግል ልጽበሕ አምበተ። ለክልኤ ሰቦት ለአትራከበተን አዋልድ ሓዋመ እግል ሰልፍ መረት ገጽ ሕድ ረአየ። “አነ እገርም ወለ እንቲ?” ልትበሀለ ለህለየ ዲብ መስለ ሕድ አቅመተየ። በርሀት አስክለ ዕንታተን እግል ልብጸሑ ለቀድር ባክ ለርእየን ምድር ክምሰል ጸብሐ ህዬ እብ ሸፋግ ድማነን ወድገለበን አቅመተየ። ለባካት አዳም አለቡ ወዕጨይ። ለእብ ሑጸ ለትከደነ ጋድሞታት፡ አርወሐት ለቡ መክሉቅ ለነብሩመ ኢመስል። ጪቅ-ጭሪቅ ለለብል ሰራይር ወምን ቃብል ለልትረኤ አድብር እግል ኖሱ ሰእየት ቱ። ለእትጅሁ ወሕዱዱ ለኢልትአመር ጋድም ሴመ ለልትረኤ እቱ ሓጃት ይዐለ።እብ አመተ ኢትአመረት ሰለስ ግሩማት ሸወክን ሰበት ረአየ አክል-ሕድ ክምሰል ወድ አዳም ለረክበየ ፈርሐየ። እትጀህ ገበየን ህዬ አስክለ ሸወክን ለሀርበየ እቡ እንክር ሰበት ዐለ ክምሰል ፋል ሰኒ ሐስበያሁ። እብ ሰእየት ደርበን አሳደረየ። ምን ሐዲስ ዲብ ብዕድ ወሐዲስ ሰእየት ለለሀይብ አዋይን ተዐደየ። ጸሓይ እብ እንክር ድማን ፈግረት።
ሉለ ክልዶል እስቡሕ እንዴ ቀንጸት ለሙሩን ጭገረ እብ እዴሀ ዲብ ተማትም ተአሳንዩ እት ህሌት ፍንቲት ለውቀት ከልቅ እተ ዐለ። እብ ፍንቱይ እት ረአስ ብሶተ ለትዳነነ ጭገረ ገጽ ተሐት ስሕብ ተአብሉ። ዕንታተ እግል ልገልብብ እለ ህዬ ዝያደት ትትነየት። ጭገረ ክርድ ሰበት ቱ ላኪን እግል ትምኔተ ለለአተግንዕ ይዐለ። ለእስቡሕ ለአፈጡሩ ቅጨ ወድ ዐከር ወእብ ጬወት ለትበጭበጨ ሐሊብ ሳልስ ዐለም ሰበት ትካየለ እለ ሽውየ ምራቀ ጀበ። ከናፍረ እንዴ አጥለለት ህዬ ምራቀ ወሐጠቱ።
ምድር ሰኒ ክምሰል ጸብሐ፡ ናይ ደባበት ልግበእ ወመኪነት እግል ልፈንትያሁ ለኢቀድረየ ክርን መቶር ምን ረዪም ሰምዐየ። ክምሰለ ሸወክን ወመነትል ረአሰን እንዴ አተናከለየለልአትቃምተ ወለአተናሴ፡ ህተንመ እዘነን አተናከለየ ወአተናሰየ። “ሱዳን ገብእ አው መዐስከር አባይ?” ወለ ናይ ጅማዐትነ? ሉለ ዲብ ተሐስብ ሽውየ ክምሰል ጌሰት፡ ፈርሀተ ሰበት ዜደት ግረ ውልብ ትቤ። ለርሹድ ገሮብ ካብድ እተ ለዐለ እብ ተዐብ ሀለውእ ለገብአት መልህየተ ወዳይት አባይ ላኪን ደርብ ሉለ ዲብ ትትመንቀሽ ግያስ ኢገብአ ምንገብእ፡ ለክርን እግል መስለሐታቱ ማ ኢፋል ለገብአ ሽዑር ኢከልቀ እተ።
ለወለት 25 ሰነት ለትመስል ወዳይት እበ ቴለል እኩይ ግርመተ ትጀጋለበት። ለዐለት እቱ ሰፈር መሪር ዝያደት ሔለየ።እሰልፍ አርሓት እገረ ሰበት ጸልዐ፡ ሐናከሸት። ሐሬ ህዬ በቃሪሀ፡ ዲብ ሕድ ዲብ ልትበሀሽ ሰበት ትለሀፈ ግያስ ሐግለት።
“ማይ ጸምአኮ ሐሰብኪ ነዓርፍ፡ አዳም እንረክብ እንገብእ? ዲብለ ትገሴት እተ አካን ለትሰአሉ ሰኣልቱ። ሉለ እንዴ ሐድገተ እግል ኢቲጊስ መስኡልየት ርሕ አዳም ሰበት ትሰምዐ አርወሐተ ኢወዴት እለ፡ ጸሓይ ምን ንቅረት ዐስተር ሕልፍ ክምሰል ትቤ ላኪን ለወዳይት እብ ፈወራን (ኮልቦዲሶለ) ወድቀት። ሉለ ብላየ እት ረአስለ ወድቀት ወዳይት መደቱ። እብ ጠረፉ ዎሮት ዲብ ሸርፈ ሀወእ ክምሰል ትረክብ ወዴተ። ረዪም እንዴ ኢትገይስ እግል ኖሳመ ሰበት ተሀርገተት ቀሸው ወዴት።
ሰፍረ ወጽምእ ሐፋነት እንዴ ትወሰከት እቱ፡ቀመት ለኢተምም ስካብ ህዬ ወቅትከ ለቀትል ወዝያደት ለለአከስልቱ ለዐለ። እለ ፈርሀት እለ እት ረአስ ሉለ ተሀንጦጥል ለዐለት እትገብእ፡ ለጨቅጠተ ሒለት እንዴ ደረከት ሐሶሴት። አርወሐተ እስእልተ ዐለት። እብ ሸፋግ እት ረአስለ ወዳይት ለዐለ ብላይ ክምሰል ቀልዐት ላተ አርወሐተ ሸዕለለት ወተአሰፈት። ለእግል ገበይ ቱሊተ ዐለት መልህየተ አፉሀ ሃህ ቤለ፡ ዕንታታ ሰሩ ትከሰተ፡ ገጸ ይሕብሩ ለብሰ፡ ረአሰ እንቅዕሩር ጸንሐየ። እግል ተአክድ ብሶተ ወአፍ ልበ ክምሰል ተማተመት ገሮበ በርደ። ሰራሪታመ ምን ሀንደጎት ዑርፍት ዐለት። ለለአፈርህ ባዶብ ሐቴ በል እዬ፡ ለቤለ መስለ እተ። እግረ እንዴ አትራተዐት እለ እበ ላብሰቱ ለዐለት ብላይ ከድነተ። ደሚረ እግል ተአቅስን ህዬ አጥራፈ ብላይ እብ ሖጸ ጨቅጠቱ። ለዐለ እተ ጾር ክቡድ እንዴ ሐድረት ህዬ እስፍት ወሕይርት ዲብ እንተ ትበገሰት። ልሰዕ እበ ትገይሱ ለዐለት ታካብ ለመከለሱ ኢልትአመር ጋድም ትውሕዩ ገብእ፡ እግል ኖሰ አርወሐተ ለኢተድሕን እቡ ሄራር ግምሽ መስለ እተ።
“ምድር ሱዳን እግል ልግበእ ቡ እት ኢኮን ዲብ ዐድነ ለኢልትከለስ ጋድም ይህለ” ትቤ ሉለ ምስል አርወሐተ። ዲብ ሐያተ ክምሰል ሖጸ ለአቤቱ ይዐለ። “ለበዲለት መስል ሽክነ ገመል እት ኢኮን አዳም እግል ልሄርር እቱ ኢትከለቀ” ዲብ ትብል ህዬ አትማረረት። ዲብ ደብር ተከል እት እንተ ለትምባክ ሰፎ መልሂተ ከንፈሮም ጀል እንዴ አበለው ዲብለ ጋድም ዲብ ለአቀምቶ፡ “እንተ እሊ ህምል ምድር እግለ በሐር እምቤ እት ኢኮን ወለ እብ ትምባክ ወአዝቤናሁ፡ ” ዲብ ልብሎ ወልትደአሎ ትቅብ ቤለ እተ። ረአሰ ዲብ ነክንክ፡ “አማኖምቱ ምን በሕ ኢትበገሰው!” ትቤ። “ዕጨት አለቡ፡ ማይ አለቡ’ ኬልም ድበቡ፡ እምበል እግል ሽቅየት አብያት ሚ መዓድን እግል ለሀሌ እቱ?” ዲብ ትብል እብ ንየት ሐጫር አቅመተቱ።
ለመርከብ ሰቦት ሳሕል-ሰሕረ ለካቤት እግል ተአብርድ እለ ለትቀድር ለህበተ ዲብ ትጨመም ሰበት ጌሰት እብ ሐፋነት ዐሎበጠት። ዲብ ክል-ደቂቀት አርወሐተ ትነድድ ለህሌት መስለት እተ። እብ አጥራፍ ሽዳሀ ለአቴ ለዐለ ጽሕጽ እግል ረሐት እገረ ሰበት አጽለዐዩ ክምሰል ወአት ሰከክ ዲብ ተሐናክሽ ሌጠ ሄረረት። “አላላላ ሉላዬ እብ ክእነ ግያስ ምን እሊ ባዶብ እሊ ምዶል እግል ትፍገሪቱ ገብእ?” ዲብ ትብል እግል አርወሐተ ቀበተ። ጸሓይ አዜመ ሸንከት ምውዳቀ አድሮሬት እንዴ ጸንሐት ህዬ ሰኒ ወአማን ትሸልሀተት ከተሐበዐት። በናሀ ላኪን እግለ ወድቀት ምነ ዐስተር ሕብር ብርቱካን እልቡሱ ዐለ። ብዙሕ እንዴ ኢትገይስ እግል ተዓርፍ ወድብለ ትገሴት እተ አካን ጀገሕ እግል ቲበል አምበተት።እዴሀ ላኪን ይሀበት። ላሊ እብ ግዲደ እግል ትሄርር ቀረረት። ፈጅራተ እስቡሕ አዳም እግል ትርከብቱ አው ህዬ ለፋዬሕ ጋድም ግሱይ እግል ልውዐል ምስለ ተአምሩ ዐለት አለቡ።
ሉለ ምነ ለአሽዐልል እስትሽሃድ ውላድ ስርየተ ሱድፈት ዘበን ንእሽናሀ ለሓለፈት እተ አስመረ ተዐዴት። እስቡሕ እብ ዐሳክር ልክፍት እት እንተ ለረኤተ ግናዘት ምስለ ሮዘ ለብሰተ ትካየለ እለ። አብያቶም ባካት ስታድዩም አስመረ ዐለ። ለእብ ባካት አብያቶም ለሐልፍ ማይ በለ ዐሳክር አቶብየ ለቀትለዎም ሙዋጥኒን ዲብ ለክፎ እቱ ፈቅደት። እንዴ ጸነሐት ዋልዴነ ወሐወ እብ ዎር-ዎሮት እት ቀደም ዕንታተ ሐልፈው። ለትወለደት እተ ሰነት 1963 ክምሰል ዐለት እንዴ ፈቅደት፡ አዜ 21 ሰነት ዋድየት ክምሰል ህሌት ኣመረት። እብ ሕሳብ ዐስር ሰነት ግረ አቅበለት። ዲብለ ወቀት ለሀይ ዋልዳዮም አሰይድ ተስፋማርያም ስብሃቱ፡ እብ ሽቅል ሕኩመት አስክ አቶብየ ሰበት ትቀየረ፡ አጀኒቱ እንዴ ነስአ ጌሰ። ሉለ፡ ህግየ አምሐርንየ ምን ንህግየ እመወኬን ዝያደት ኣመረተ። ዲብ ሜዳን ሰበብ ናይለ አምሐራይት ለትብል ክናየታመ፡ ልሰዕ እት ንሳለ ለዐለ ለህጀት አምሐርንያተ። ዲብ ዩልዮ 1977 እት ንዳል ፈግር እት ህሌትመ ትቅብ ቤለ እተ። ሐቆ ተድሪብ ዲብ ሕክምነ ፍልፍልተ ለትወዘዐት። ዲብ ዐምበርበብ ግርመ አስመሮም እንዴ ሰድዮም ሕክምነ እንዴ ወከለት ዲብ ሰዐይ ወኩረት እግር ለተልሄት እቱ መደት ሳድስ ወራር፡ ዲብ ብርጌድ 23 ለወዘዐት እቱ አውካድ …… እብተበሰም ሐዋኒት እንዴ ወዴት ፈቅደቱ። ዲብ ደንጎበ ምስለ ሓርያም ወላድ ፈሲለተ ከረ መድሀኔ (ቀጢን ቀላይ) ወድ ሐሸለ፡ ጀሚል ሐሰን፡ ወለት-ጎይታነ ወሓባሪት ለደአለቱ ወለትጋደለቱ አውካድ ትሰራበበት።
ምን እለ መለገት እለ እንዴ ፈግረት፡ ዲብ ሕቅፍ በዐል ሻመ - ኢያሱ አሰፋው (ወድ-መናባብሮ) አቴት ምንገብእ፡ ሐቆሁ እግል ካልቀ ሚ ይሀብከኒ እግል ቲበሉ - ክሉ ትዋሰፈ እለ። እያሱ ምልህዮቱ፡ ያንዲኑ፡ ለክቡብ ረአሱ እንዴ
አድነነ ካርካር ልብል እት ህለ፡. . . ትካየለ እለ። ምን ክትረትለ ሰፈላል ዕንታተ እግል ልፍገር ሐዘ።ዶል ተዓርፍ ስካብ እግል ለሀምለ እት ለሐዜ ዲብ እደየ እንዴ ተንከበት ትቀንጽ ከምን ሐዲስ ገበየ አተላሌት። ፈርሀት ሞት ክምሰል ጸዐነት እተ፡ ዲብ ምድር እንዴ ኢትተንከብ ዲብ ትትሀላወእ እንዴ ቀንጸት ሄረረት ላሊ እብ ግዲደ።
ሐቆ ሰር ላሊ ላኪን ዲብ ሖጸ ለትወሐለ ሸካኒሀ እግል ተሀርሱ ሒለት ወደቅብ ሐግለት። ‘እግል ኢጊስ ሀለ እዬ’ ለልብል ደሚር እብ በይኑ ሌጠ ሀንጦጠለ። ከወኒ እብ አስማጠ እግል ልራግዘ ሰበት አምበተ ቅሬራይ ንኡሽ ሰበት ረክበት ዲቡ እንዴ ተንከበት ትገሴት። ዲበ ቅራር እንዴ ትጸገዐት ህዬ ፉጠተ ትገልበበት። ኣው-ከደን እግል ኢልተልሄ እተ ምንመ ፈርሀት፡ ህርጋቴሀ ላተ እግል ትክረዐ ኢደቅበት - ሰክበት ሌጠ። ለኢስርጉል ህጁም ቅብለት ምፍጋር ጸሓይ ሳሕል ሳልስ ላሊሁ እንዴ ሓለፈ ሳልስ ነሃሩ ተለው ብህለት ዐለት። እብ ጀሀት ምፍጋር ጸሓይ ዲብ ዐስተር ለለጥአት በርሀት ዲበ ጋድም እንዴ ትከሬት እግለ ጽልመት ዲብ ትውሕጠ ጌሰት። ለዲብ ሕግስ ቅራር ንኡሽ እንዴ ትከርከመት ሰክብ ለዐለት ሙናድለት ላኪን ለድቁብ ተዐብ ጫቅጠ ሰበት ዐለ ኢሐሶሴት።ለልሆብል ዐለ ውልዋል መጋውሕ ላኪን ምነ ስካበ አትሐሶሰየ። ድዋራተ አትቃመተት። ለረኤቱ ጋር ዕንታተ እግል ትምኔተ እንዴ ረስመ ለአቅረበዩ እግል ኢልግበእ እንዴ ደጋገመት ዕንታተ ዲብ ዳክክ አቅመተት። ለምን ቃብል አንጸረቱ ደብር ህዬ እብ ሸፋግ ሰእዮብ ሀለዮተ አዜደዩ። ቅንጸተ ሒለት ክምሰል ወሰከት ሐበረተ። ብላየ እንዴ ነግፈት ገጽ ቀደም አሳደረት።
ተክሽ ጠፈሕ ዲብ ትብል እንዴ ትሄርር ዕንታተ ምነ ደብር ብዕደት አካን ይአቅመተ። ለደብር እግል ኢልትሐበዕ ምነ ለፈርሀት እት መስል እግል ልቅረብ እለ ትረመጨት። ዲብለ ባካት አዳም አው ማይ እግል ትርከብ ሰእየት ወዴት። ለደብር ብዙሕ ዳገመት ምስሉ ወሰኣላት ብዙሕ ትሰአለቱ። ሰእየት ለለአበትክ ምድር ላኪን ሰእዮበ ትባጠረዩ። ለሄራር ሰሩ ክምሰል በጽሐት ገሮበ ፈጥፈጥ ቤለ።መነትል ክምሰል ኢትትነዐየን ሰበት አግረሰየ አስክ ቀርበን ታከያሀ። እዘነን እት ለአተናክለ ህዬ “አብሽርኪ ቀረብኪ” ልብላሀ ለህለየ መስለ እተ። ሃህ ዶል ትቤ፡ ንሳለ ዲብ ነጋደ ነሽበ። እብ ስምጠ ለራገዘየ ከወኒ እግል ተአርሄ ክሹከ (ፉጠተ) ዲብለ ናሽብ ኣምዒተ ለውሌተ። መትከርካረ ህዬ በዐል ሐዘን አምሰለየ። እገረ ኖስኖሱ እግል ልትሐላወዕ ወልትሐባለክ አምበተ። መንጾረር ክምሰለ ጸብጠዩ ነፈር ዲብ ልትሐባለክአትዐበየ። ሰንደልደል ዲብ ትብልጀፈር ሐቴ ዕጨት ወድቀት። ሐንገለ እግል ትርፍዑ ኢቀድረት። እብ ሕቀተ ዲበ ምድር ትመደደት። ዐስተር እንዴ ገንሐት ክምሰል አቅመተተ ህዬ “ዎካልቅ! አርወሐቼ ትከበተ” ትብል ለህሌት መስለት። እግለ ‘ምኩሕ’
ለቴለቱ ደብር ሰእየት ባትከት እት እንተ አቅመተቱ። እት ክእነ ቴለል ዐሳክር ደርግ አርወሐቶም እግል ለአንግፎ ወዱዎ ለዐለው መዋዲት ፈቅደት። ‘አፎ ኢትጀሪቡ ነፍስ ለልብል ፍክር ህዬ በአየ። ለወክድ አጫብዕ እደየ ረድ-ረድ እት ልብል እብ ሒለት ሰደፍ ስርዋነ እግል ልፍተሕ አምበተ። ስርዋነ እንዴ ከሬት ህዬ እዴሀ ሓለፈት፡ ሐቆ ብዙሕ ጀርቤ ህዬ ሑዳት ሽንታት ዲብ ረሐት እዴሀ አቅተረጥ። ዲብ ንሳለ ክምሰል አቅረበቱ ላኪን ገጸ ትቀጥረነ። ቅርድዕ እንዴ አበለት እግል ኢትስተዩ፡ ምን ሕልቅመ ለልትደሬ ይዐለ። ዲብ ደንጎበ እንዴ ፈንፈነት ክዔቱ። ምነ ሽላን ለመስል ሰዐር እንዴ ጀምጠት መጭረት። እብ ሒለት እግል ትውሐጡመ ጀረበት። ዲብ ሕልቅመ እንዴ ለጥአ አተስረቀየ። አምዓይተ እብ ስዕለት ትከተፈ። እብ ሒለት ህዬ አፍገረቱ። እብ ክርን ሐዋኒት “እግል እድሐን ኢኮን እንተ ካልቅ አፎ እብ ሸፋግ ኢትነሰአኒ፡” ትቤ እብ ንየት ሐጫር ቃነ ወሐዋን።
“እንዴ ትዐዘብኪ ሕኔት መይቲ አፎ እንዴ ትሸነቅኪ ኢትትካረጂ?” ለልብል ሽዑር ሱድፈት ዲብ ደሚረ መጽአ። ሙናድል እንዴ ትሸነቀ እግል ሊሙት ዝንብ እንዴ ገብአ ለትሰመዐዩ ደሚረ፡ ለሓለፈተ ጅርበት እንዴ ፈቅደት እግል ተአትአምኑ ጀረበት። እግለ ፉተጠ ዒን (መሸልሀቲት) ወዴ እሉ ዲብ ህሌት፡መልህያመ ግናዘት ተሀንጦጥል ክምሰል ረአው እብ ድንጋጽ ለገብእዉ ትካየለ እለ። “ለህሌኮ እተ ጅርበት ኖሼ አምረ፡” እንዴ ትቤ ምስል አርወሐተ ዲብ ትትከሐድ፡ ዲበ ግንዳይ እንዴ ተንከበት ቀንጸት ወአንቀዕረረት። እግለ አቅሹን አቅመተቱ - እግል ተዐርዩ ኢትቀድር። ትነከደት፡ እግለ ግንዳይ እብ እዴሀ በቅ አበለቱ። እተ ምድር እንዴ ኢትጀግሕ ላኪን እግለ ደብር እግል ትርገሙ ረአሰ ሀረሰት። “…ማሸለ!ሽ አጣል… አጣል!” እንዴ ትቤ አርወሐተ ትበሽር እት ህሌት፡ ሒለተ ዲብ ዳይመት ሓለተ ለአቅበለት መስለ እተ። እገረ ረድረድ ዲብ ልብል፡ ክምሰል ሰክራን ዲብ ልትሀላበእ ወምን መካሪቱ ዲብ ሸክፍ ትበገሰት። ትወድቅ፡ ላኪን እንዴ ኢትትሐለል አዜመ ክምሰል ሀበይ ዲብ ትሽሕግ ትሄርር። ምን ሐዲስ ትቀንጽ፡ ልሰዕ ምን ቃብል እት ህሌት ክልኤ እደየ ክምሰል መንዴረት አወልወለተን። እግለ ክልኦት ሰብ ንዋይ ክምሰል ቀርበቶም ላኪን አብራከ ጠልመየ። እብ እገረ እግል ትብጠር ለዐለት እለ ሒለት ትሸለተት።
“ማንጁስ! ማንጁስ እንተ ማንጁስ!” ምሽድገ አሽኽ ልትሸለዕ ትላኬት። ለሰብ አጣል ዲብ ትሽሕግ እንዴትቀርቦም ክምሰል ረአወ እንዴ ደንገጸው ሰከው ምነ። እደየ “ከፌነ አስክ ልብለ” ዋሼት እቡ። ምን ሐዲስ አስኮም ሸሐገት። ለአጀኒት ሀምገም እት ልብሎ ቀርበወ።
“አቡኩም አስእሎ እዬ፡ከራመት ክምሰለ ልታኬ ሬምቃይ እደየ እንዴ መደት
አበዎም እግል ልትላከው እግለ አሰአለቶም። ሐቆ እሊ፡ ዔጻታመ ሰበት ጠልመተ እተ ምድር እንዴ ትመደደት ዐስተር ሌጠ አቅመተት። እብ ነኣይሽ ቀረፍ ወልሜት ለትከደነ ከናፍረ እንዴ ትሳጠረ አፉሀ እግል ልክደን ኢቀድረ።
ለሰብ ንዋይ አግሩዝ ኖስኖሶም “ጅንድየት ተ?” ትበሀለው። ለዎሮት ምስል አጣሉ ወምስል ሉለ ተርፈ። ለካልኣይ ክልኦት ነፈር እንዴ ጸብጠ ጠበሽ ቤለ።አቡዬ መሐመድ ጅንስየትለ ገመኔ ኢበዴት ምኑ። ዲብ እደየ ወከናፍረ ላጥእ ለዐለ አቀጥፍ ክምሰል ረአ ድንጉጽ ዲብ እንቱ “ዘመተ አቡኪ” ቤለ። ምነ ጻውሩ ለዐለ ሀወት ሽውየ ማይ ክምሰል አስተየ ትንፋሰ ምን አፍ ሞት እግል ለአቅብል ሐዘ። እብ ብላይ ሳውሪት እንዴ አዳለው እለ ህዬ አስክ ዐድ ነስአወ።ዐድ ክምሰል አተው እበ ምነ ዲብ ሕድ ካልል ለዐለ አብያት ፍንቲ እንዴ አበለው ዲብ ቀበት ደብዐት ዐዳይ አተክረረወ። ዲብ ረአሰ ወዔጻተ ማይ ክምሰል ከዐው እለ ለምን አግመኣቱ እንዴ ፈግረ አስክ ዐስተር ሌጠ ለአቀምት ለዐለ ዕንታተ በል-ሸም አበለቱ። ማይ እግል ለአስቱወ ህዬ ትሰአለቶም።
“ላለእ ማይ እበኑ እኩይ ቱ ወለቼ” ቤለ አቡዬ መሐመድ፡ እት አካን ማይ ለትበጭበጨ ማይ ሽከር መጠየ። ሉለ እግለ ሽከር ጋእ-ጋእ ዲብ ተአብል ክምሰል ቀርደዐት ምኑ እት ቅያብ ገብአት። ሐቆ ሑድ ወቅት ክምሰል ሐሶሴት አርወሐእት ፍንጌ ክልኤ እብ ረሕመት ለለአቀምታሀ አንስ ጸንሐተ።
“አልሐምዱለ ማይተት ዐልኪ ኢኮን ረቢ ነጄኪ” ቤለየ እገረ ዲብ ጫቅመ እለ። ለትለመጨ አቀጥፍ፡ “ስራይቱ” እንዴ ቤለየ እግል ትስተዩ አትናየተያሀ። ሉለ ሐኪመት ሰበት ተ ወለአቀጥፍ ክምሰል ኢነፍዕ ተአምር ምንመ ዐለት፡ አቤኮ እግል ኢቲበል ላኪን ተአሰፈት ምኖም ወሰቴቱ። ምናተ ለሰቴቱ አቀጥፍ ዲብ ከርሸተ እንዴ ኢበጥር እባሁ ፈግረ።
“ከላስ ሐቆ አፍገሬኪ አዜ ሐዬኪ፡” ቤለያሀ ወከደን ለትፈግር እተ ሕፍረት ሐፍረየ እግለ። እብ ቅርጨት ለተለ ፍጋር ሰበት አትሐወነየ፡ ምን ሐዲስ እት ቅያብ ገብአት። ሐቆ ወቅት ሑድ፡ እበ ልትሰመዕ ለዐለ ድንግሔ አዳም ድንግጽት ዲብ እንተ ሐሶሴት።ዕንታተ ክምሰል በዐል ሕማም ስኒን ትሳረቀ ወወጅሀ ትረበበ። ገሌ ሙናድሊን ዲብለ ሉለ ለዐለት እቱ ድጌ ክምሰል መጽአው ሉለ ትወሀመት። ክሉ ረአሱ መልህያመቶም ሚኢፋሎም እግል ትእመን ኢቀድረት። ለእብ መርዒት ትራዕዩ ለዐለት ጭገረ ናትሕዉክምሰል ወዐለው ንፉሽ ጸንሐዮም። ውላድ ስርየተ ልኡክ ሰበት በጽሐዮምቶም ጠበሽ ለቤለው። እብ ሳውሪት ጸውረ እት ህለው ለዲብ ግድለ ወድንኪክ ለለአሙሩ ሜዛን ሉለ ኢጸንሐዮም፡ ገሮበ እንዴ ትሸለተወሰቅመ ዲብ ሽልቱታይ ብዱል ዐለ።
እግል አድብር ቅብለት ምፍጋር ጸሓይ ሳሕል፡ ጄሪካን ማይ ወሴፈ እንዴ ትሆገለት ትፈግሩ ወትትከረዩ ክምሰል ይዐለት፡ ኖሰ ዲብ ትትረፈዕ ምን ቃብል ተአቀምቱ እት ህሌት፡ ቀዳሚተ እንዴ ትፋቀደት ብርሽእ ትቤ። ለረፍዑወ ዐለው ሙናድሊን ዲብ ልደአሎ እግል ለአስሑቀ ጀረበው። ህተ ላኪን ምን ገጾም ሕቡዕ ናይ ሐሩቀተ ወቀሀር አዋይን ቀርአት። ዲብ ልብ ክል ምኖም ህዬ “እሊ ህጁም እሊ እብ ሸፋግ እግል ልትደገም ቡ!” ለልብል ናይ አቅሰኖት መርባት ሽዑር ዐቢ ዐለ።
ሐቆለ ቃሊ እስትሽሃድ ለጠልበ ሐርብ ዲብለ ገብአ እጅትመዕ፡ ክል ሙናድል “ደምነ እንዴ ኢነሽፍ ለህጁም ምን ሐዲስ እግል ልደገም ቡ፡ ለወድቀው መልሂትነ ጋኖም እግል ነአስክብ ቡ” ለልብል ሽዑር ዐለ እቶም። ናይብ ቃእድ ብርጌድ ወድ ልብሱ፡ “ደባባትነ አንፎታተን ምስል አንፎታት ደባባት አባይ አስክ ልትዳገሽ እግል ልእተያቱ፡” ቤለ።
ዲብ ቀበት ዎሮትወሬሕ ለህጁም እበትነዘመት ገበይ እግል ልትደገም ትቀረረ። ብርጌድ 23 ምን ወድ-ጃበ ክምሰል ትብገሰት፡ ሐቴ ወለት እደየ እብ ክሹክ እንዴ ተአሰረ አዳም ትፈንተ እለ። “ስምዒ እንቲ እሊ ሐርብ እሊ ናይ ደንጎባቱ ቤለውኪ? ያሬት ትትሓረቢ! ምናተ፡ ዲብ ሕክምነ ብርጌድ አዜቱ ማጽአት ለህሌኪ ጽንሒ ሐቆ ትበሀልኪትጸንሒ።ትብገሲ ሐቆ ትትበሀልኪ ህዬ ትትብገሲ፡ አማውር ዐስከሪቱ።” እት ልብል መክረየ ወድ በቀ ለልትበሀል እት ሕክምነ ለዐለ ጅሮሕ። ህግያሁ እበ ሐቴ እዝነ እንዴ ሰምዐተ እበ ካልእ ፌረቀተ። ህቱ ክምሰል ሬመየ ፍርክ አምደደት። እሱር ለዐለ እደየ እት ገበይ አዳም እንዴ ረምቀት አፍተሐቱ። “ሐሬ ምን ለሐዙ ልጃዙኒ እግልሚ ላኪን ለአተርፉኒ? ለልትሰፈፍ ጸልዕ ወለልትነሰእ ከናይን አለብዬ” እንዴ ትቤ እብ በይነ ክምሰል ጥሕረት ገመኔ ሐራቀመት። ዕንታተ እብ ትምሳል ሹሀደእ፡ ወደሚረ ዲብ ዝክርያቶም እንዴ ሽሙም ዲብ እንቱ፡ ለተክይዱ እንዴ ኢትደሌ ሌጠ ቀደመ አሳደረት።
መምህር ወረዴ፡ ርቅየ መሐመድ፡ አስመረት (አሞይ) ናይለ ስርየት ሹሀደ ሐካይም ዐለው። አሞይ ርሒመት ወሜክራይት እምተ ለዐለት። አንሳት ሙናድላት እግል ልትጠወረ እብ ክለ ሒለተ ለትጻገም፡ መስኡል ልግበእ ወጅንዲ ዶል ልትጌጌ ለትነስሕ፡ ዲብ ዕስክርየት ግረ ለኢተሐረግርግ ፋርሰት ተ። ሕምት ሰበት ዐለት እግል ትትረፍ እስኡላመ እት እንቶም ምንኩም ይእተርፍ እንዴ ትቤቱ ዲብለ ሐርብ ለትበገሰት።
ሐኪመት ርቅየ መሐመድ (ወለት መሐመድ) ምን አካን 17 (አካን ሐራሳት) ቀዴማይለ ዲብ ሐርብ ለትበገሰው እተ ኢነት መጸአት። ህታመ “ምንኩም ረቢ
ኢልአትርፈኒ” እንዴ ትቤ ሽት ትቤ ከትበገሰት። ሐጫር ወቀየሕ፡ ሸምለ ጭገረ ትርሓስ ሀይሌ፡ ለስርየት ምነ ህለየ እግልነ ለትብለን ፍራስ ዐለት። ህታመ “ዮም ላተ ለሐልፈ ኢመስለኒ፡ መርባት እግል እፍዴ ላኪን ብዬ” ትቤ ወትበገሰት።
ሉለ እግል ካልኣይት መረት እንዴ ፈረት ክምሰል ዐሬቶም፡ ውላድ ስርየተ ዲብ ልትዐጀቦ “እንቲ ወለት ለትበሀልክየ አፎ ኢትሰምዒ?” ዲብ ልብሎ ትሄረረወ። አማውር ሰበት ኢትከበተት ህዬ ምን ሐዲስ ተአሰረት። ዲብ ሰፈር ሰበት ዐለው ህዬ እስርት ዲብ እንተ ክምሰል ተዐርዮም ወደወ። ዲብለ ፈሽለ ህጁም፡ ምን ሐድ 120 ውላድ ስርየተ 17 ሌጠ ለፈግረው ምኑ ሐርብ ትካየለ እለ። ለለሽዐልል ወለኢትትረሰዑ ሐርብ ወግራሁ ለሳደፈየ ትዘከረት።
ዲብ ከጥ ሐርብ ለአቱ እት ህለው ላኪን ምን እስሮሀ ፈትሐወ። ማርስ 19/1984፡ አትኒን ዐለት። ጀብሀት ቅብለት ምፍጋር ጸሓይ ሳሕል እብ ተማመ እብ ጊም ትገልበበ።ዴሽ ደርግ በራስ እተ ትትበሀል አካን እግል ዕፌ ዓዳት ልትዳሌ ዐለ። ሙናድሊን፡ አክል ሕድ ሳዐት 12፡30 አድህር ምነ እትህቡሳም እቱ ለዐለው ሰዋትሮም ዲብ ልትፌተቶ ቃቀት ለመስል ህጁም ጠለቀው። ብርጌድ 23 እበ እተ ህጁም ለፋሽ ዮም 22 ፈብራይር ለአተው እቡ እትጀህ ሻፍፍ ለዐለ ዴሽ አባይ ዲብ ከብብ አውጌት ጠበሽ ትቤ። ቦጦሎኒ ሐቴ አስክ አውጌት ትበጽሕ ክምሰል ራድኣይት እንዴ ገብአት ቱ ምን ግረ ተሌ ለዐለት። ክሉ ለምን ድማን ወድገለብ ወምግብ ናይለ ጀብሀት ለትጌለለ ዴሽ ደርግ ምስል አስለሐቱ ዲብ አውጌት ተአከበ። ዲብለ እት ብሩር ጋድም ለህለ መዐስከር አውጌት አክል ሕድ ሳዐት 11፡20 ናይ ላሊ ህጁም ተአምበተ።ዴሽ አባይ ሞት ወሐዮት እንዴ ቤለ እብ ክለ ሒለቱ ተሓረበ።
ቦጦሎኒ ሰለስ - ለዲበ ሳልፋይ ህጁም ለአቤት እግሎም በልቀት፡መስኡለት መጅሙዐት ትርሓስ (ወለት መምህር) ቅምብለት እንዴ ለክፈት እግል ትፍገር እተ በድረየ አለቡ።ዴሽ ደርግ እብ ርሳስ ክምሰል ትከንተ፡ ክሉ ከረቢት አውጌት ደርብ ሕድ እግል ዴሽ ሸዕቢ ሰለመዩ ከቅፈቱ እንዴ ረፍዐ ትበነገ ምኑ።
ዴሽ አቶብየ ምን ሐዲስ እንዴ ትነዘመ ህጁም ምዳድ ጠለቀ። ክምሰል ራድኣይት ምን ግረ ተዐሬ ለዐለት ቦጦሎኒ ሐቴ፡ እብ ስምጥ እንዴ አቴት እቱ ይማሙ ሐምረገት ምኑ። ፐሬተር ተስፈአለም (ወድ ሽሪጠ)፡ እግል ደባበት እብ ቅምበለት እዴ ወከላሽን ዋጀሀየ። ህተ እግል ቲኪዱ ወህቱ ምንለዐል ቅምብለት እግል ለኣቴ እተ ሕድ ትነዐው። መድፈዐጂ አርበጂ ጀሚል ሐሰን፡ “ዲብ እሊ ጋድም እሊ አርፒጂ እት ኢኮን ብሬን ኢለትሐዜ” ልብል ዐለ። እግል ብዝሓም አንፋር ፈሲለት ቀናብል አርፒጂ እንዴ አጾረ፡ እብ አርፒጂ
ሌጠ ተሓረበ። ጽብሕ ምድር ዴሽ ደርግ ኣላፍ ገናይዙ እንዴ ሐድገ “ዕውር ሕደግ ወሐንኪሽ” እንዴ ቤለ አስክ ክራይ ሀርበ።
ሐርብ ክምሰል ተመ፡ ሉለ ለትምቱም ዐለ ደሚረ ትሳረ። ዲብ ከረቢት አውጌት እንዴ ዐርገት ህዬ፡ ጅርበት ወዐዛብ ለሓለፈት እቱ ጋድም ዲብ ተአስተንትን ትፈረጀቱ። ረሽራሽ ለጾረየ ደባባት ደርቦም ዲብ ልትገናበየ፡ ሰሮም እብ ሐክር እኩይ ገሮቦም እንዴ ትከተፈ ዲብ ወድቆ፡ ሰሮም ህዬ “ሕኔት ገጽ አባይ ትርኤ” ዲብ ልብሎ ወቀናብሎም እንዴ ፈትሐው ዲብ ለአንተሕሮ… ክሉ እተ ዶለ ዲብ ደሚረ ደረ ወአቅሎለ።
ዲብለ መደት ለሀ ናይብ ቃእድ ፈሲለት ለዐለ፡ ‘ሽዕብ’፡ ከብዱ ዝቡጥ ምንመ ዐለ፡ እት ቅያብ ላኪን ጋብእ ይዐለ። እት እግርከ ሕዜ ክምሰል ትበሀለ፡ እሲቱ ይርገኣለም፡ ረክበቱ። እስፍት ዲብ እንተ ህዬ አቅመተቱ። እንዴ ትፋኔት ምን ገዪስ ወኬን ላኪን ለትወድዩ እሉ ሴመ ይዐለ።
ምነ 22 አንፋር ፈሲለት፡ ቃእድ ፈሲለት በርሄ ተስፈሚካኤል ምስል ራብዓይ ረአሱ ሌጣቱ ለፈግረ። ጽጌ መሓሪ እንዴ ተሐከረት ምስልኩም ፍገሮ እብዬ ዲብ ትብል ትትላኬ ዐለት። እግል ኖሶም ምፍጋሮም ቃውያም ሰበት ዐለው ላኪን ለወዱው ሴመ ይዐለ። ጽጌ መሓሪ ሐቆለ ትጸበጠት አባይ እግል ልቃሽሸ ጀረበ። ምናተ፡ ለእት ረአስ መልህያመ ለለሽዐልል ቀትል እት ለአጀሩ ለረኤቶም ዐሳክር ዲብ ገጾም ጠፍአት እቶም። ፍንጌ ክራይ ወማርሰ ተክላይ ህዬ ቀትለወ። ነፈር ስለሕክቡድ ብርጌድ 23፡ወድወለዴሃንስ፡ ዲብ ሕፍረት እንዴ አጭፈረ ተርፈ። እብ ጽልመት ዝያድ 48 ሳዐት እንዴ ሄረረ እብ መብአ እንዴ በትከ ፈግረ። ህይወት ይሕደጎ (ወለትአርበዕቴ) እንዴ ጠዌት ፈግረት ወድብ ጅማዐተ ተሓበረት። ቃእድ ስርየት ጆን ዐሊ ወከንቲበ ተፈሪ (ዕንድኩር) ዲብ ክትክተት ዕጨት አጭፈረው። አምሱይ ህዬ እት ጅማዐቶም ተሓበረው።
ለሐቴ እዴሁ ቅርጭት ቃእድ ቦጦሎኒ ክብሮም ክፍሌ (ውዲ ክፍሌ) “ለቀድረ ልፍገር” ክምሰል ትበሀለ፡ ቀደምለ አረይ ደባባት ለገብአው እግል ልፍገር ሰበት ይሐዘ፡ ዲብ ዳፍዕ እሎም አስተሽሀደ። ቃእድ ቦጦሎኒ፡ወድጊሌ አስክለ ናይ ደንጎበ ደቂቀት ሐቆለ ተሓረበ፡ ብእምነት ወልደገርግሽ ለህለ እቶም ሙናድሊን እንዴ መርሐ ዲብ ፈግር ዲብ ዴሽ አባይ ሰበት አተ፡ ክሎም አስተሽሀደው።ሉለ፡ ዲብለ ሐርብ ለሀድአ እቱ ወቀት ሐጪር፡ ክሉ ዲበ ሳልፋይ ፋሽል ህጁም ለጀረ ቴለል ክምሰል ስወር እት ቀደም ዕንታተ ትካየለ እለ።
ሐርብ መሪር አተላለ። ዐሳክር አቶብየ ዲበ ጋድም ፋዬሕ እበ ዐለት ድቅብት ጸሓይ ወካቤት ዲብ ልትቀለው እት ክል አካን ዔረት ወትፈረረት ገብአው።
ምነ ማርሰ ቴክላይ ለበጽሐው ህዬ ሰር እብ መንዱቁ ወሰርመ እት በሐር እንዴ ተርቀ አርወሐቱ ለቀትለ ገብአ። ለበዝሐው ላኪን ምስል ታምም ጽዋሮም ትጽበጠው። ለምን የናይር 1979 እንዴ አንበተ ዲብ ቅብለት ምፍጋር ጸሓይ ሳሕል ሻፍፍ ለዐለ ውቃው እዝ ህዬ ዲብ ሓምሳይት ሰነቱ እንዴ ትቀበረ ስሜቱ ትከሬት።