ለአስተሸሀደ አፍላም
መስፍን ተስፋይ
ብርጌድ 44፡ 23፡ 4፡ 31 ክምሰልሁመ ብዕዳት ውሕዳት ስለሕ ክቡድ፡ሀንደሰት ዐስከርየት ጀብሀት ሸዕብየት ሻፋም እቱ ለዐልነ ፋይሕ ጀብሀት ቅብለት ሳሕል ቱ። እግል ወራታት ሙናድሊን ለወስቆ ዲብ ክል ብርጌድ ዎሮት ወኪል ክርን ገቢል ወዎሮት ሙወሰውር ትረተበው። ሙናድል ፉጹም ገርብራይ ሙሰውር ብርጌድ 23 ገብአ።
ፍጹም ገብራይ ዲብ ሰልፍ ማርስ 1984፡ እግል ሽቅል ምን በርከ እንዴ መጽአው ዲብ ድዋራት ሕሊል አልጌነ ለዐለው አንፋር ብርጌድ 23 ዲብለ ወዱዎ ለዐለው ናይ መስኡሊን ወጅኑድ እጅትመዓት ዲብ ሻርክ ስወር ናሽፍ ዲብ ሰውር አስመነ። ወኪል ክርን ገቢል መምህር ተኸስተ ገብረመድህን እብ ጀሀቱ፡ እግል ተዕቢኣት ልትነፈዕ እቡ ለዐለ መሰጀል ወመክረፎን እንዴ ጸብጠ ዲብ አባይ እትለ ቀርበ ድፈዕ ዲብ ለአቴ፡ እግል ዓድል ንዳል ሸዐብ ኤረትርየ ለለሐብር፡ ደርግ እት ጄሹ ለዐለ እሉ ቅሽሽ ክምሰልሁመ ለሰለመው ዐሳክር ለሀዩቡ ለዐለ ሸሬሕ ዲብ ለአትመቃርሕ እብ መክረፎን ዲብ ነሽር አስመነ።
ወድ ገብራይ ምነ ገብእ ለዐለ እጅትመዓት፡ ዲብ ባካት አውጌት መሓዛት አልጌነ ህጁም እግል ልግበእ ክምቱ ሰበት የቀነ፡ ዲብ ሸንጠቱ ለዐለ አፍላም ከም ክምሰልቱ ፈተሸ። እምበልለ ዲብ ካሜረት እንዴ አተ ሰር ታርፍ ምኑ ለዐለ ክልኦት ፍልም ክምሰል ዐለ እሉ አከደ።ዎሮት ፍልም 36 ሐበት ሰበት ጸብጥ፡ እብ ዓመት 92 ሐበት ክምሰል ቡ አከደ። ዲብለ ጀብሀት ለገብእ መዓርክ ድቁብ እግል ልግበእ ክምሰል ቀድርመ ሸክ ኢወደ። ዝያደት ለለአሸቅዩ አፍላም እግል ለሀሌ እሉ ህዬ ሐዘ። ምን ቅብለት ምፍጋር ጸሓይ ሳሕል አስክ ምግባይ መክተብ ቅስም እዕላም ዐራርብ፡ ናይ አምዔላት ሰፈር ሰበት ገብአ ላኪን፡ ዲብ መደት ሐጫር እግል ልብጸሑ ለቀድር አፍላም ክምሰል ይህለ ፈሀመ። ሰበት እሊ፡ ለመዓላትለ ሐርብ እበ ዐለ እሉ አፍላም ዲብ ልትደገግ እግል ልወስቁ ክምቱ ፈሀመ።
ማርስ 21/1984፡ ቀዴማይለ ህጁም፡ፐሬተር ብርጌድ 23 እግል መምህር ተኸስተ ወፍጹምገብራይ ምሴ ዲብ ባካት አካነት ተውጅህ ብርጌድ እንዴ ተዐንደቀው እግል ልምጸ ክም ቦም ሐብሬ ሀበ። አንፋር እዕላም፡ ለሊከ እግል ተብጊሰት ክምቱ ሰበት ፈሀመው፡ ዲብለ ልትነፈዖ እበ ለዐለው ወለጭራም ሽልቱት ይሐድገው። ዲብለ ባካት ለዐለየ ውሕዳትመ ዲብ ልትባደረ ዲብ አካነት እጅትመዕ በጽሐየ። ቅያደት ቦጦሎኒታት፡ ለገብአት ሐከሽ እግል
ኢትሰመዕ፡ በርሀት እግል ኢትትረኤ ሰዓታት እዴ እግል ኢለአጭረዋርሕ እብ ሽልቱት እግል ልትገልበብ ሐብሬ ሀበው።
ወድ-ገብራይ እብ ምግብ ደብነ ለህለ ለትፈናተ መባትክ እንዴ ሐድገት ትትሸልሀት ለዐለት ጸሓይ እግል ኢትሕደጉ ዲብ ሸፍግ፡ እግል ልሰውር ትባደረ። ካሜረቱ አስክለ ሸሪጥ ብሬን እንዴ ትሆገለ ዕንዳቄሁ ሳድድ ለዐለ መንደላይ እዮብ ወጀሀየ። ለዕንዳቄ ቀደም ለሀ ዲብ ጀብሀት ቅብለት ሳሕል
- ናኹራ- ናይለ አስተሽሀደ በርሀ ቴድሮስ ክፉፍ ቱ ለዐለ። በርሀ ቴድሮስ መቅደረት ሰኔት ክያጠት ክፉፍ ለለአምር እት ረአስ እት ገብእ፡እብ ጠባይዑ ወአደቡ መሰል ሰኔት ሙናድልቱ ለዐለ። ሰበት እሊ ወድ-ገብራይ እግል እዮብ እንዴ ደጋገመ ሰውረዩ። “ዲብ እሊ ሐርብ እሊ ለሰሎላይ መንደላይ በክት ሽሂድ በርሀ ቴድሮስ ሳድፉ ገብእ?” እበይኑ ዲብ ልትሃጌ፡ ብዕድ ፍክሩ ለበድል ሽእ ዲብ ዕን ካሜረቱ ሽክ ቤለ።ከላሺነ ዲብ ምድር እንዴ ተክለት ልትበሀል ለዐለ እግል ተአተንሴ ትም ብህለት ለዐለት አበበ ወጀሀየ። ለንፉሽ ጭገር ረአሰ እግል ገጸ ሰበት ገልበበዩ ላኪን ለሱረት ስርግልት ክምሰል ኢትገብእ ኣመረ። ካሜረቱ መጋባተ ሸብ እቡል ለዐለ ሐጪር ስርዋነ ወድብ መሓዊቱ ልውሉይ ለዐለ ገምበሌ ወጀሀየ። እሎም ክልኦት ሽባን ክምሰለ ህቶም አባይ እግል ለአስርቶ ልትበገሶ ለህለው፡ አባይመ እብ ዕጹፋት እግል ልብለስ እሎም ለአምሮ ዐለው።ሰሓቆም ላኪን መጃቅሞም እንዴ ሳደደ፡ ለግሩም ልጡም አንያቦም ሐቴ…ክልኤ …ዕስረ ዲብ ትብል ክምሰል ልትዐለብ ገብአ።
ደም ለመስል ሰራባት እንዴ ሐድገት ለወድቀት ጸሓይ፡ወሬሕ በደለየ።ወድ ገብራይ እግለ ለአጭረርሕ ለዐለ ወሬሕ ዲብ ፍልም ካመረቱ እንዴ ኣተ እግል ልሰውር ጀረበ። ናይ ስጃረት ልግበእ ወባጣርየት ትልጭ እግል ትትረኤ አለበ ለትብል ሐብሬ ህይብት ሰበት ዐለት ላኪን፡ ካሜረቱ አስክ ምድር አድነነየ። እሙ ህቱ ሜዳን እንዴ ኢፈግር፡ “ጸሓይ ደም ለመስል ሰራባት እንዴ ሐድገት ትወድቅ ህሌት ምንገብእ፡ደምልትክዔ ህለ በህለት ቱ” ትብሉ ለዐለት ፈቅደ። ለፈጅራተ እተዩ ሐርብ ምን በሀል እሙ እግል ልትፈንቴ እሉ ተምነ።
ቅያደት ብርጌድ 23፡ብሪራይ ወተኽለ ልብሱ፡ እት ቀደምለ ጅምዓም ለዐለውሙናድሊን እት ቀሱ፡ መምህር ተኸስተ እግል ልሰጅል ቴቡ እንዴ ወለዐ ወፍጹም ገብራይ ካሜረቱ እንዴ አዳለ እት ቀደምለ ቅያደት ዳለው።ብሪራይቱ ሸሬሕ ለአሰብደ። “ሰመዑኒ ህሌኩም ማሚ?” ትሰአለ።ለሸሬሕ እግል ህጁም ክምቱ ኣምራም ለዐለው ሙናድሊን፡ ክርን ላሊ ገያሲት ክምተ እንዴ ፈሀመው እብ ሰሓቅ በልሰው እሉ።ወድ-ገብራይ እግለ ለውቀት እግል ልሰውረ ሐዘ። ለተአፈርሁ አምሴት ናይ ካሜረት በርሀት ላኪን አዜመ አፍረሀቱ።
ብሪራይ፡ “ፈንጎሕ ፈጅር እት ረአስ እሊ እት ቀደምነ ሻፍፍ ለህለ አባይ ህጁም እግል ነሀርስቱ። ትሰርገለ ምንገብእ፡ ጸብሕነ ክምሰልሁ ገብአ ምንገብእ ህዬ ድራርነ ዲብ ማርሰ ተክላይ ዓሰ እግል ልግበእ ቱ”ቤለ።
ወድ-ልቡሱ እንዴ ትከበተ፡ “ዮም ደባባትነ ውክቡድ ስለሕነ ኣንፍ ወሰበጣናት መዳፍዕ አባይ እግል ልስዐም ቱ። እግል አባይ ዲብ እንከብቡ ዲብ በሐር እግል ነአትርቁ ቱ” ወሰከ።
ወድ ገብራይ ገበራይ ዲብ ካሜረቱ ላጥአት ለዐለት ፍላሽ እብ መልሃዩ አምለጨዩ። ምን ፈግር ሰኒ ወምንመ ኢፈግር ህዬ ገለ ሐብሬ ለሐድግ እንዴ ቤለ፡ እበ ያሺከ ለጅንሰ ካሜረት ዐስር ለገብእ ሾት ነስአ።
ወድ-ገብራይ ወመምህር ተኸስተ ዲብ መደት በገስ መትካፋል ሽቅል ወደው። መምህር ተኸስተ ዓም ተቅሪር እግል ሊዴ ምስል ቅያደት ብርጌድ እንዴ ገብአ እግል ልታብዕ፡ወድ-ገብራይ ላኪን ዕንዱቀ ለዐለ ካሜረት ምን ዕስረ ምትር እንዴ ሬመት እግል ትሰውር ሰበት ኢትቀድር፡ ምስለ እብ ቀናብል ለሀጅሞ ለዐለው ሙናድሊን እግል ልእቴ ትዋፈቀ ከአስክለ አካን ሸፍ አተጀሀ።
ሜርሐት ናይለ ሰፈር አንፋር ስለለ ጀብሀት ወስለለ ብርጌድ 44 ዐለው። እብ ፍንቱይ ህዬ ለጀብሀት ቅብለት ምፍጋር ጸሓይ ሳሕል ወድፍዓት አባይ ክምሰል አጫብዕት እደዩ ለለአምሩ፡ ኮከብ ነፈር ዐይን ላቱ፡ ሙናድል የዕብዮ ተኽለኣብ (ዐቤ) ምስል መልህያሙቱ ለብርጌድ እንዴ መርሐ አስክ ከርስ አባይ እግል ልእቴ ለትበገሰ። ህቶም ዲብለ ድዋራት እግል መደት አርበዕ ሰነት ናብራም ዐለው። ዲብ ፍንጌ ድፈዓት አባይ ወሰውረት ለዐለት አካን እብ ወቅት ከም ነስእ፡ አባይ እተየ ለቀም ዳፍን ህለ? አገር ዴሽ እተየ ጻብጣም ህለው? ደባባት እተየ ሃግታት ህለየ? መዳፍእ አየ ገንሕ ህለ? ብዝሔ አባይ ከም ዐለ? ሰኒ ወአማን ቶም ለአሙሩ ዐለው። ዶልዶልመ መናሺር ጀብሀት ሸዕብየት እት ቀበት መዐሳክር አባይ ነሽሮ ወምን በርሚል አባይ ማይ ሰቱ ወብራሾታቶም እንዴ ማልአው አስክ አካኖም እብ ሰላም ልትብገሶ እቱ ለዐለው ወክድመ ዐለ።
ቅዋት ጀብሀት ሸዕብየት እግል አባይ ዲብ መስከቡ እት እንቱ ቀናብል እግል ለውሑጡ ወድ-ገብራይ ዐለት ምስሉ ካሜረት መዓላት ፍራስ እግል ልወስቅ ሄራር አምበተ። ማርስ 22 ጽብሕ ምድር ለትበገሰየ ውሕዳት ምድር እንዴ ኢጸብሕ ዲብ አውጌት ሻፍፍ ለዐለ ዴሽ አባይ ትጸገዐየ። ሙናድሊን እንዴ አትሀመለው እግል አባይ ዲብ መሳክቡ እት እንቱ ቀናብል ወርሳስ ፌረቀው እቱ።ዲብለ ናይ ሰልፍ ስርጉላት ደቃይቅ ምድር ልሰዕ ሰበት ኢበርሀ ወድ- ገብራይ እምበል እት መጦር ሙናድሊን እንዴ ገብአ መትፈራጅ ወቀናብል ለኪፍ ለሰወረዩ ይዐለ። አባይ ምን ምስካቡ እንዴ ሐሶሰ እብ ክል አንክር ዘብጥ
ጠለቀ።እብ ምግብ ወስምጥ ለአተው ሙናድሊን እዴ እብ እዴ ሸፍ አተላለው። ሙናድሊን እንዴ ትሰርገለው ገጽ ቀደም አሳደረው። እት ቀደም መዐስከር አባይ እንዴ ፈግረው እግለ ዴሽ ሸንከት ምፍጋር ጸሓይ ገጾም ጌለለው። ምድር ክምሰል በርሀ፡ወድ-ገብራይ ምስል ካሜረቱ መጦርለ እብ ከላሽን ልትሓረቦ ለዐለው ሙናድሊን ሰፉ እንዴ ጸብጠ ሽቅሉ አምበተ። ሙናድሊን ዲብ ከርስ ሕፈር አባይ ቀናብል ዲብ ፌትቶ እብ ትሉሉይ ሰወረ። ሙናድሊን ወድቆ እት ህለውመ ሰወረ። አስፍ ሰኒ ጸብሕ ሐርብ እብ ሰርገል ልትቀደም ዐለ።ወድ-ገብራይ፡ ቁምብለት ለትከሬት እቱ ዐስከሪ አባይ ዐስተር እንዴ በጽሐ ምድር ሸውጥ እት ህለ ለሰውረየ ሱረት፡ ናይለ ወሬሕ ለሀይ ለሔሰት ሱረት እንዴ ትበሀለት ዲብ ቅላፍ ናይለ እተ መደት ለሀ ትጠበዕ ለዐለት መጀለት ‘ፍጻሜታት’ እንዴ ጠበዐት እግል ትትነሸር እሉ ዲብል ልተምኔ ሄራሩ አተላለ።
ዲብ ሐርብ ዎሮት ነፈር እበ ወደየ ፍንቲት ፍርስነት ተቅዪር እግል ልምጸእ ቀድር፡ ሐቴ ደቂቀት እበ ተአጀርዩ አደጎት ህዬ እስትሽሃድ፡ሐክር አውመ እብ ዐቢሁ ፈሸል እግል ልምጸእ ቀድር። አባይ፡ ብኡይ ሰበት ረክበ እንዴ አውተደ እግል ልትሓረብ አምበተ። እበ ክቱጥ ለዐለ ኤታን፡ ለሐርብ ጸሓይ እንዴ ኢትመርር እግል ልትመም ዐለ እሉ። ክምሰለ ተሐሰበት ኢትሰርገለ። ወቅት ዲብ ረይም አክለ ጌሰ ደባባት ወረሻሻት አባይ እበትነዘመት ገበይ ዲብ ምግብ ሐርብ ልትሻወር ጌሰ።ወድ-ገብራይ ለኣንፍ ደባባት አባይ እግል ልስዐመ ለትበሀለየ ደባባት ጀብሀት ሸዕብየት ሰበት በልሰያሁ እንዴ በጥረ እግል ልሰውር ጀረበ። ለደባባት ላኪን እንዴ ኬደያሆም እግል ልሕለፈ ጀረበየ። ሰበት ተዐበ አስከን ሌጠ አቅመተ። “ቀይ በህር የኛ ነቅ” “የከራ መራ ድል ብቃሩራ ይደገማል”፡ “ድል ለአብዮታዊ ሰራዊት…” ለልብል ክቱብ ዲብለ ደባባት ላጥእ እት እንቱ ረአ። ብዝሓም ሙናድሊንመ ዲብ አፌት ድፍዓት አባይ ዲብ ወድቆ ወእግል ሊኪዳሆም ልትሸወረ ለዐለየ ደባባት እብ ከላሽን ወቀናብል እዴ ዲብ ጋብሁወን ረአ። ካሜረቱ ቃዕ-ማሕ ምን ብሂል ይዓረፈት።ወድ-ገብራይ ለዲመ ዲብለ ለአቴ እቱ ሐርብ ሙናድል “ሰልም?” ዲብ ልብል፡ ዐስከሪ ደርግ ህዬ “ጭቁን ነኝ” ዲብ ልብል ሰመዖ ለዐለ ከሊማት … “እጀህን… ሰጥ … ? አንተ ቅጥረኛ ወንድበዴ … “ እበ ልብል ከሊማት ለትበደለ ፈሀመ። ለአምዕል ህዬ “ልባስ ለአለበ አምዕል እኪት” ክምተ ኣመረ። ቀደም ክልኦት ወሬሕ ዲብ ተሰነይ ለገብአ ሐርብ ፈቅደ። እተ ወክድ ለሀይ ሙናድሊን ዲብ ረአስ ሰዋትር አባይ እንዴ ፈግረው ዐወቴ እግል ገቢል! ዲብ ልብሎ ወለትአሳቅሮ ሰወረ። ዮም ላኪን ደባባት ዲብ ወራሆምቱ ልትፈረጅ ለዐለ።ዎሮት ሙናድል ምስል ዎሮት ዐስከሪ እብ ግድለ ዲብ ሕድ ላሽባም እት እንቶም ረአ። ሰዳይት እንዴ ኢወዴ እሎም ካሜረቱ አስኮም ወጀሀየ። ካሜረቱ ትሰውር ዐለት እት ኢኮን ስወር ሰኒቱ ሚ ኢኮን ልብ ኢከረ እሉ። ገሌ ሙናድሊን እበ ህሌከ እተ
አካን እንዴ በከእከ ፍገር ለልብል ትእዛዝ ሰበት ተሐላለፈ ዲብ ቀደሞም ለዐለ አገሙደ ዴሽ አባይ እንዴ ካየደው እግል ልፍገሮ አምበተው። አባይ ፋሽ ሰበት ረክበ ምስል ዴሽ ጀብሀት ሸዕብየት እግል ልትሓበር አምበተ።
ጸሓይ ቅብለት ምፍጋር ጸሓይ ሳሕል ምን ረመጭ ዲብ ሃብ ትበደለት።ዎሮት መለሀይ ዲብ ወድ-ገብራይ እንዴ ሸአገ፡ “ የለ ተሐረክ … ሽፈግ ዐሬነ
… !” ቤለዩ፡ለአካን ለእበ አተ እበ እግል ልፍገር ዲብ ለሐብሮእር ለአጣቅዖ ስዖታት ረዪም ሄረረው።ለገበይ እብ ቀሊል ክምሰል ኢለቀብሎ እበ እሙር ዐለ። ደለ እበ ጌሰው ህዬ “ቁም… ቁም … እጅህን ሰጥ?” ለትብል ክርን እግል ትክረዖም አምበተት። ሙናድል ላኪን አስክ ናይ ደንጎበ ደቂቀት፡ እዴ እብ እዴ ተሓረበ።ወድ-ገብራይ እስትሽሃዱ ወእስትሽሃድ ናይለ እት መጦሩ ለዐለው ጅማዐቱ ደቃይቅ ክምሰል ተርፈዩ ፈሀመ። እስትሽሃዱ እግል አበያሙ ክልኤ መንፈዐት ክምሰል ተሀይብመ ሸክ ኢወደ። ህቱ እንዴ ኢለአስተሽህድ ለዲብ ከርስለ መዓርክ ለሰወረዩ አፍላም ክምሰል ለአስተሽህድ እግል ሊዴ ቀረረ። ገጽ ግረ እንዴ አቅበለ ህዬ እግል ጽበጥለ አፍላም ፈቅደ። ለሳልፋይ ፊልም፡ ሰሩ የናይር 1984 ዲብ ተሰነይ ለገብአ ህጁም ናይለ ትሰወረ ተረፍ ክልኤሱረት ክምሰል ዐለ ምኑ ፈቅደ። ለወክድ ለሀይ ሸዐብ ተሰነይለወደየ እሎም ሕድርኖት፡ እማት አፍ ልበን ዲብ ዘብጠ ምድር ዲብ ተፍጥፈ እግል ሙናድሊን ዲብ ልስዕመ ወምስል ሙናድሊን ዲብ ልሳረረ፡ ሙናድሊን ዐስሮታት አሲሪን ሐርብ ዲብ ጌልሎ ወገይሶ … ለለርኤ ስወር ለጸብጠት ክምሰል ዐለት ፈቅደ። እግል እሊ ፍልም እሊ አባይ ረክበዩ ምንገብእ ዲብ ረአስ ሸዐብ ተሰነይ እግል ለአጅርዩ ለቀድር ለለሽዐልል መዋዲት ትካየለ እሉ።ለፍልም አሰልፍ እንዴ ፈግረ እግል “ለአስተሽህድ ቡ’’ ቤለ።
ለካልኣይ ፍልም ቅያደት ብርጌድ እግለ ጅሙዕ ለዐለ ዴሽ ናይ ትበገስ መምርሕ ዲብ ለሀይቦ ወሙናድሊን እብ ደሚር ፋርሕ “ዐውቴ እግል ገቢል” ዲብ ልብሎ ዲብ ለአረይም ወለአቀርብ ለሰወረዩ ስወር ለወሰቀት ዐለት። አባይ እሊ እንዴ ረክበ ዲብ ጀራይዱ ሐቆመ ነሽርፈዩ፡ እሊ ወድ ፍላንቱ ማሚ፡ ወለት ፍላን … ተ! ዲብ ትብል አያይከ እግል ተአላሌ ምኑ ለትቀድርቴለል እግል ልትከለቅ ሰበት ቀድር አሰር ናይለ ሳልፋይ ፍልም እግል ለአትልየ ቀረረ።ሳልሳይ ፍልም ወድ-ገብራይ ቀበት ድፈዕ እንዴ አተ ሙናድሊን ዲብ አውጌት ዲብ ብነ ደፈዕ አባይ እንዴ ትጸገዐው ቀናብል ዲብ ለክፎ፡ዎሮት ሙናድል ለለክፈየ ቅምብለት፡ እግል ዎሮት ዐስከሪ አባይ እንዴ ሸወጠት ዐስተር ተዓርጉ ዲብ ህሌት፡ ቴለል እንዴ ትበደለ ዲብ መስለሐት አባይ ክምሰል ወዐለ ህዬ ደባባት አባይ ሙናድሊን እግል ልካይድ ዲብ በራር ጋድም ዲብ ልትገናበየ ወሙናድሊን እብ ከላሽን ወቀናብል እዴ ለክፎ እተን
እት ህለው፡ዎሮት እዴሁ ለተሐከረ ሙናድል፡ እግል ዎሮት ረአሱ ለትጀረሐ መለሀዩ እንዴ ጾረ ዲብ ገይስ፡ ገሌ ሙናድሊን እንዴ ኢለአስተሽህዶ ባሩደቶም ኣባይ እግል ኢልስለበ ብለቅ እንዴ ሻወጠው እበን ሳቡረን ዲብ ህለው … ለጸብጠ ፊልም ክምቱ ሰበት ኣመረ ሰኒ አስተንተነ።ወድ-ገብራይ ምነ ሻረከ እቱ መዓርክ ክምሰለ እት አውጌት ለሰወረዩ ስውር ርኢ ኢለአምር። እስትሽሃድ እት ረአሱ ለሀንጦጥል ምንመ ዐለ፡ እብ ሰበት አርወሐቱ እንዴ ኢገብእ እብ ሰበትለ አፍላሙ ዳየገ።በርሀት እንዴ ሀበ እግል ልምስሑ አርወሐቱ ኢወዴት እሉ። እግል “አበርብሩ … ወለ ሽውየ … እጽነሕ?” ሀም ገም ቤለ። ዲብ ሐርብ ምን ከላሽን አስክ መድፍዕ ምን ልትሰለብ ምኒነ እተ ተሌ መዓርክ እብ ዕጹፋት ምን አባይ ክምሰል ልትሰለብ ለአምን ዐለ። ወሲቀት ዶል ትሰለብ ላኪን ክልኤ ሞት ገብአት እቱ።
“እሊ አፍላም እበርብሩ … ሚ እጽነሕ” ምን ሐዲስ ሐቴሀ ቀወ። ምኑ ብዙሕ እንዴ ኢረይም፡ “አንተ ወንበዴ እጅህን ሰጥ….?” ጭው….ጭው…. ለልብል አክራን ወእት ሰመ ለልትፌረቅ ዕሳስ ንየቱ ሓጨረ። እት መጦሩ ለዐለ ሙናድል “…. በጥ በል….….” ቤለ። ዲብ ልሽሕግ ህዬ ዲብ ዎሮት በልቃይ ዐቢ ትጸገዐ። ወቅት ኢነስአ፡ ለሳልፋይ ፊልም እብ ጠረፍ እንዴ ጸብጠ እግል በርሀት ጸሓይ ሀበየ። ሱድፈት ላኪን እት ባካቱ ልትከሬ ለዐለ ርሳስ በጥረ። “ሽውየ ሰብርመ ኢወዴኮ….!” ሰኒ ገሀ፡ እግለ ብርሃን እንዴ ቀደመዩ ሽውየ ጽባበት ምን ረክብ፡ ለብርቡሩ ዐለ ፊልም እብ ሸፋግ እንዴ ደረከ ጅወ ኣተዩ። እግል ደቃይቅ እትኩሩም ለዐለ ዘብጥ ምን ሐዲስ አስተብደ።ወድ ገብራይ ምፍጋር ምን ረክብ አትቃመተ። ገጽ ቀደም ዶል ትብገሰ ክልኤ ርሳስ እብ ድማኑ ወድገለቡ ሐልፈየ። ምነ እት መጦሩ እንዴ ገብአው ለክፎ ለዐለው መልሂቱ ክልኦት እት ምድር ምዱዳም ረአዮም። “መለሀይከ ረአሱ ዶል ልትላጼ እንታመ ረአስከ አጥልል” ክምሰለ ልትበሀል እግለ ታርፋም ለዐለው ክልኦት ፊልም እንዴ በርበረ እብ በርሀት ክምሰል ከርብ ወደዩ። ክምሰለ ዐቢ ዐውቴ ለሰርገለ ህዬ እንዴ አሬመ አተንፈሰ። ዲብ ባካቱ ዋድቃም ለዐለው መልህያሙ እግል ልስፈፎም አስኮም እግል ልሽሐግ አምበተ። ስለሕ አባይ ዲቦም እንዴ ትወጀሀ ባካቱ ክሉ እሳት ትከስከሰት እቱ። አዜመ ዲብለ አሰልፍ ካርር እተ ለዐለ በልቀት እንዴ ሸሐገ ትንፋሱ እንዴ ሐብዐ አጭፈረ። አው እብ ናይ ኖስከ ቅምብለት አርወሐትከ ሰደቆት አውመ አስክ ለአወድቁከ ሰዐይ? አርወሐቱ ዲብ ክልኦት ሕርያን ኣተየ።ወድ-ገብራይ ለብእቶም አርበዕ ሙናድሊን ጅሩሕ እንዴ ጾረው እግል ልፍገሮ ክምሰል ትብገሰው እብ ክል እንክር ዔደር ርሳስ ትከበተዮም። ሰሮም ህዬ ተሓከረው። ዲብለ ኢነት ለስድት ጻውራሙ ለዐለው መለሀዮም አቅመተው….
ገለ ምን ውሕዳት ጀብሀት ሸዕብየት ክርዱናም ለዐለው ጅማዐቶም እግል ለአፍግሮ እብ ድማን ወድገለብ ዘብጥ ፈትሐው።“ተናን ወሓጥር ምፍጋር ኢለሐግሎ” ክምሰለ ልትበሀለ ዲብ ቀበት ሰዋትር አባይ ምስል አባይ ልትሳሰዐው ለወዐለው ወድ-ገብራይ ለብእቶም ሙናድሊን፡ ምነ መለገት እንዴ ትነፈው ፈግረው። ፍንጡር ለዐለ ሙናድል ህዬ ምን ሐዲስ እግል ልትነዘም አምበተ።
ወድ-ገብራይ ዲብ ስዱድ ቴለል ለሰወረዩ አፍላምእንዴ በርበረ፡ ህቱ ላኪን እብ አርወሐቱ ሰበት ተርፈ ኢፈርሐ። ቅያደት ብርጌድ ለዐለ ቴለል እግል ጌመሞት እተ ዶሉ እጅትመዕ ወደው። ሜርሐት መጃምዕ፡ ሜርሐት ፈሳይል፡ ስርየት፡ ቦጦሎኒታት እግለ ፈዳብ ወሐዋን ጀዋንብ ናይለ ወዐለው እቱ መዓርክ ረአዮም ሀበው።ወድ-ገብራይ ላኪን እምበል አድኖናይ ብዕድ ሰኒ ወእኩይ ዐለ ኢቤለ። “….አሃ ወድ-ገብራይ ረአይከ ሚቱ?” ብሪራይ ትሰአለዩ።ወድ-ገብራይ ንየቱ ሐጭረት።ብሪራይ፡ወድ-ገብራይ ዝን ብሂሉ ለሐርብ ዲብ መስለሐቶም ምን ኢወዐላቱ ገብእ አው እብ እስትሽሃድ ወጀረሕ መልህያሙ መዕነውየቱ ለአውደቀ መስለዩ “ዲብ ሐርብ እግል ትደርክ ወትደረክ ለዐለ ወለ ህላቱ። አባይ ምዶል ማይ ጫቅም ጸንሔነ…. ዲብለ ሐጭረ ወቅት ተቅዪም እንዴ ወዴነ አባይ ጻብጡ ለህለ አካናት እንዴ ሐረርነ ናይ እስራተጅያይ ተቅዪር እግል ኒዴቱ!” ቤለ።ወድ-ገብራይ ረአዩ እግል ልሽረሕ ዲብ ቃእድ ብርጌድ ቀርበ። “ለሰወርኩው ሰለስ አፍላም እንዴ በርበርበኮ ሰድቀት ውዴክወን” እብ ውዲቱ ሰበት ተዐሰ ረአሱ ይሀረሰ። ቃእድ ብርጌድ “እንዴ በርበርኮሰደቅክዉ” ለልብል በሀል ኢፈሀመዩ። “ሚ በህለትካቱ?” ትሰአለ። “ወሳይቅ እንዴ ትጸበጠ አባይ ሕኔት ልትነፈዕ እቡ እንዴ ትበርበረ እግል ልእኬ ሐሬኮ፡ አነ እንዴ ይአስተሽህድ ለስወር እግል ለአስተሽህድ ሰበት ቀረርኮ ህዬ በርበርክዉከእግል ብርሀት ሀብኩው። ምስለ እት አውጌት ለተርፈው መልህያምነ ተርፈ….። እበ ወዴኩወ ዐገብ ህዬ እግል እጃዜ ዱሉይ አነ።”ብሪራይ እብ መዋዲት ወድ-ገብራይ ተዐጀበ። “አባይ፡ ዲብ አውጌትእንዴ አስተሽሀደው ምነ ሐደግናሆም መልህያምነ እምበል ዲብ ብሶቶም እብ ርሳስ እንዴ ትዘበጠው እብ ፍርስነት እስትሽሃዶም ብዕደት ለረክበ ሐብሬ አለቡ።መን ኣመረ! እንተ ምን ተአስተሽህድ ወአባይ እግል እሊ አፍላም ምን ረክቡ ላኪን፡ እግለ ረክበዩ ናይ ዶሉ ነስር ደርዕ ወገብአ እሉ። ናይለ ህለው ወአስተሽሀደው ስወር ዲብ ጀራይዱ ወነሸረዩ። እሊ ለሸቄካሁ ሽቅል ምስል ፋርስ ፋርስ እት ኢኮንምስል ፈረህ ወስሉብ ኤማኑ ኢልሓብረከ፡ እንዴ ጊስከ ሌጠ ዓርፍ!” ቤለዩ።