ለአሲር
ዳዊት ዮሃንስ
ዴሽ ጀብሀት ሸዕብየት እግለ እት ጀብሀት ቅብለት ምፍጋር ጸሕይ ሳሕል እግል ሐምስ ሰነት ሻፍፍ ለዐለ ዴሽ እስትዕማር አቶብየ፡ “ውቃው እዝ” ዲበ ደውሸሸ እቱ ወቅት፡ ለበዝሐ ምነ እተ ህጁም ለሻረከ ዴሽነ፡ እግለ ጀብሀት እንዴ ሰብረ ገጽ ቀደም ለአቴ እት ሀለ፡ ሰሩ ገሌ ለዴሽ ህዬ፡ እግል ምህም ወእስተራተጅያይ ላቱ አካናት እንዴ ከርደነ እግል ዴሽ አባይ እት ጅልፍ ግራለ ቀደም ለሐልፈ ቅዋት እት ለዐሬ ወእግለ ሽቱት ለዐለ ዐስከር እንዴ ጸብጥ አሳደረ።
እት ካቲመ ዐመልየት መትደውሻሽ ውቃው እዝ፡ ምን ማርሰ-ተክላይ እብ እንክር ግብለት ክልኤ T-55 ደባበት ወሐቴ አንፊብያን ዴሽ ሸዕቢ፡ ገሌ ዴሽ አገር እንዴ ጸዐነየ ገጽ ቀደም እንዴ ልትፌተተ፡ ባብ በሐር ክምሰል ደብአያሁ፡ ከራዊ ደርግ ምድር ወዐስተር እንዴ ጨበ ዲቦም እበ ቀንጾ ትቀዌት እቶም። ምን አፍ ጠልገት ለደሐነው ዴሽ አባይ እብ ግንራሪብ በሐር እግል ልህረብ ክምሰል ጀረበ፡ ለደባባት እንዴ ከርፈያሁ እት አካነት ውርኪት እንዴ አጭፈረየ መዳፍዐን አግነሐየ ዲቡ። ለእብ ኣላፍ ለልትዐለብ እብ ከራሪም ለሀፍት ለዐለ ዴሽ አባይ እምበል ሞት ወመትጸባጥ ብዕድ በክት ይዐለ እግሉ። ምስለ እበ ፈግሮ እንዴ ትቀዌት ዲቦም እንዴ ኢፈቱ ለሰለምው ዐስከር አባይ ናይብ ቃእድ ውቃው እዝ ለዐለ ኮሎኔል ግርመ ተሰመ ዐለ። ህቱ። እት ፍንጌ ብዝሓም ዐስከር ወምስኡሊን ዴሽ አባይ ለጸንሐ ኮሎኔል ገጹ እብ ሸከም ለትገልበበ፡ እብ ሰበብለ ገብእ ለአስመነ ሐርብ እት ገሮቡ ናይ ተዐበት ወክርበት አሻይር ልትርኤ። ህቱ ወብዕዳም ዝባጥ ምነ ብዕድ ዐስከር እንዴ ትፈንተው እብ ፍንቲት ዐረብየት ዲበ ለልዓርፎ እተ አካን በጽሐው።
ሐቆ ዐመልየት መትደውሻሽ ውቃው እዝ ወተሕሪር ጀብሀት ቅብለት ምፍጋር ጸሓይ ሳሕል ዲብለ ተለ ሰኖታት ብዞሕ ክቡድ ሕሩባት ገብአ። ሕነ ለዐልነ ዲቡ ቅዋት ህዬ ክምሰል ክሉ ቅዋት እትለ ትፈናተ ጅሁማት ሻርክ ዐለ። እስትሽሃድ እንዴ ደፌዕ ወዐውቴታት እንዴ ጀቅፍ ዲብለ ትፈናተ አካናት ልትሐረክ ሐቆለ ጸንሐ፡ እት ደንጎበ እት ወለት ሽከር ለትትበሀል አካን ናይ ዕርፍ ወቅት ረከብነ። ወለት ትሽከር እት ባካት ሐመድሉል። ምን ሽዕብ እት ነሳፈት 20 ኪሎ ምትር እብ እንክር ቅብለት ትትረከብ። እሊ አካናት እሊ ጋድም በራር ቱ። ምን ኣውሎታት ለልትከሬ ወሓይዝ እብሊ አካናት እሊ እንዴ ሐልፈ እት በሐር ልትደረክ። እሊ ጋድሞታት እሊ ለቀዳምያም ጅኑድ ሰኒ ለሙሩ። እሊ ምድር ተእሪክ ብዞሕ ለሐቅፈ መሳክብ ቱ። ዴሽነ እትሊ አካናት እሊ ዑሩፍ እት ህለ፡ ከቲበትነ እግል እብ ሸፋግ አስክ ነቅፈ ትበገሰት። ዲብ ሄራር ወለዐል- ተሐት ሰበት ዐልነ እንዴ ኢንትሐጸብ አስመነ። ዲበ ለአቴነ
እተ አምዕል ምስል ጸርዬ እግል ንትሐጸብ ምዕጥን ወረድነ።
ለእግል መዲነት ነቅፈ እት ክልኤ እንዴ ከፍለየ ለልሐልፍ መሓዝ ምዖ ማዩ መሌሕ ቱ። እግል ሕጽቤ ገሮብ ወልባስ ሰኒ ሰበት ኢኮን ዲበ እብ እንክር ምፍጋር ጸሓይ ለዐለ ከዛን ማይ እግል ኒጊስ ሰተትነ። ምስልዬ ተስፈንድርያስ አርፒጂ ወመሓሪ ግርሰን ዐለው። ክምሰል ጥስ ለነፌዕ ጎመ ዐረብየት ወእት አካን ሳቡነት ህዬ ቅንሺ እንዴ ነስአነ ምን ባካት ዕንክለት ብራውን ትበገስነ። እብ ምንልዐለ ‘አካን ማሞ’ ለልትበሀል ባካት ንሄርር ዐልነ። እት ጀፈርለ ምንለዐል መስከብ ማሞ ለህለየ ሰለስ ዕጨት ማሞነ ሐቴ ጸዕደ ላንድ ክሩዘር እት ጀፈርነ በጥረት። ለሓርይ ባብ ናይለ ዐረብየት እንዴ ትፈትሐ። ዎሮት መንደላይ ትሩድ ቪድዮ ከሜረት እንዴ ነስአ እብ ሸፋግ ትከረ። ወድ-ፈረጅ ልትበሀል። በዲር ምስልነ ሰበት ዐለ ሰላም እግል ኢበሉ ምንመ ሐዜኮ ለጸርዬ ‘ትገሴ’ ሰበት ቤለዉኒ ህግያሆም ሰምዐኮ።
ለመንደላይ ካሜረቱ እንዴ አትራትዐ እግል ልሰውር እንዴ ልትዳሌ፡ እብ ቀዳማይ እንክር ናይለ ላንድክሩዘር ዎሮት እናስ ሐጪር ትከረ። ብዕዳም ግራሁ ዎሮት ገዚፍ ወዎሮት ቀጢን ክልኦት ነፈር እብ እንክር ድማን ትከረው። ለሙስውር ሸንከት ግረ እንዴ ትወለበ እግለ አንፋር እብ ሕበር ወእብ ዎር- ዎሮት ሰውሮም እንዴ ጸንሐ፡ ካሜረቱ ሸንከትነ አግንሐየ። መዋዲቱ ሰበት ኢረዴናሁ ገጽነ እንዴ ሐብዐነ ምኑ ገጽ ሐር አቅበልነ። አዜመ እብ ግራለ አንፋር እንዴ ገብአ መዐደይነ ለዐለ አድብር እንዴ ሰውር ርኤክዉ። ምን ቅብላት ክምሰል አቅመትኮ እት ሕግስለ ደብር አዳም ጅሞዕ ርኤኮ።
ተስፈእንድርያስ “ግርመ ተሰማ ቱ ምስስለኒ፡ አማንዬ ቱ ማሚ?” ቤለ ዲበ እናስ ለገዚፍ እንዴ ለአሽር። “ግርመ ተሰመ” ለትብል ስሜት ሐቆ መትደውሻሽ ውቃው እዝ እምርት ሰበት ዐለት፡ ለኢልአምረ ሙናድል ይዐለ እግል ኢበል እቀድር።
“ግርመ ተሰመ ትቤ” እንዴ እቤ እብ ድግማን ትሰአልክዉ። “ለናይ ጀብሀት ቅብለት ሳሕል ናይብ ቃእድ ለዐለ” ክምሰል ቤለ ትቅብ ሰበት ወደ ዲብዬ ሸንከቱ አቅመትኮ።
ግርመ ተሰመ በዲር ናይ ክፈል ዴሽ 23 ቃእድ ዐለ። ሐሬ ህዬ ናይብ ቃእድ ናይ ጀብሀት ቅብለት ምፍጋር ጸሓይ ሳሕል ገብአ። እት ኤረትርየ ዲብለ ትፈናተ ሕሩባት ለሻረከ፡ ተጅሪበት ሐርብ ለቡ ዛብጥ ቱ። ግርመ ሐቆ ትጸበጠ ዲበ አሲሪን ለነብሮ እቱ መዐስከር ዐለ። መደት ሐቴ እብ ሽቅል ዓራርብ ጋይስ እት አነ እምበል ዋርድየት እንዴ ልትሐረክ ርኢሁ ዐልኮ። እተ መደት ለሀ ላኪን ክእነ ክምሰል አዜ ነዲፍ ወዕሱም ይዐለ።
ስርየት ለገብኦ አሲሪን እግል እጅትመዕ እት ሕግስለ ደብር ክምሰል ዐለው
ይአንተብሀነ። ለአሲሪን ምን ክሻፈት ጥያረት እግል ልትነጀው ለበብስ ሸገሪት ሰበት ልትሀየቦም ምን ቃብል እግል ትፈርጎም ኢትቀድር። ክል-ዶል ምስል ድዋራቶም ክምሰል ልትማሰሎ ወድዎም ዐለው። እት ጀፈሮም አጠለታት እት ሕግስለ አድብር በሌዕ ዐለ። እበ ሖርመት ናይለ ደብር ዎሮት መንለ ሰብለ አጣል እብ እንክር ማኑ ፋስ ወእብ እንክር ድገልቡ ህዬ ሞረ ዕክት እንዴ ረፍዐ ተለው ቤለ ዲብነ። “ሚቱ? አምሐረ እጅትመዕ ወዱ ህለው?” እት ልብል ትሰአሌነ። አሰሩ ለመጽአ ከልብ ሽሎሕ እት ፍንጌነ በጥረ። መሓሪ ግርሴ ትግራይት ሰኒ ልትሃጌ። ምስለ በዐል አጣል ሰኒ ተሃጅከው። “ምህመት ናይ ህጅኮም አምሐረ ህዬ እግልሚ እጅትመዕ ወዱ?” እንዴ ልብሎ ልትሃገው ክምሰል ዐለው ሐሬ ፈሀምክዉ።
ደበኒት ሆበለት(ውልዋል) እንዴ ፌርዩ ድማን ወድገልብ ልትፌተት ምንመ ዐለ፡ ጸሓይ ላተ ሕፍን ዐለት። ተስፋንድርያስ(አርፒጂ) “ያጅማዐ ኒጊስ ሚ እንወዴ ህሌነ? ናይ እሎም ኢኮን ምን ናይ ኖስነ እጅትመዕ ማሽጋም ህሌነ” እንዴ ቤለ ህቱ ወመሓሪ ምስል ክባባይ ገብአው። አነ ላተ እግለ አቀመቶም ለዐልኮ አሲሪን ቴለሎም እግል እግነሕ ይዐሬክዎም።
እት ቀደም ናይለ አሲሪን ሐቴ እብ ዕጨይ ለትሸቄት ጠውለት ሐዋኒት ክሪት ዐለት። እት ረአስለ ጠውለት ህዬ እብ ሐጀር ለሸቄ ማይክረፎን ክሩይ ክምሰል ዐለ አንተብሀኮ። ዎሮት ኬን ወእንሰር ልብል ለዐለ መንደላይ ቅንጩብ እግለ ማይረፎን እንዴ ረፍዐ “ኡፍ-ኡፍ” ቤለ። ለማይክረፎን “ጺጽ--ጺጽ፡ ጺጽ” እት ትብል ሰበት አትዐበቱ፡ ወቅት እንዴ ነስአ ጫቅጠ ሐቆለ ጸንሐ፡ እብ አምሐራይት “ሐቴ፡ ክልኤ፡ ሰለስ፡ ሐቴ ክልኤ ሰለስ ልትሰመዕ ሀለ ማሚ?--” እንዴ ልብል ዐለ ዎሮት ምነ አሲሪን “ኣቤ፡ ልትሰመዕ ሀለ” ክምሰል ቤለዩ፡ እግለ ማይረፎን ሰኒ እንዴ አትራትዐዩ፡ “ተማም በገ፡ ከአፎ አስመንኩም? በኪታም ወዑፉያም ማሚ?” እንዴ ቤለ እብ ድማናይት እዴሁ ዲብ ለአሽር፡ ህግያሁ እንዴ ለአተላሌ፡ “እሊ እት ቀደምኩም ትርእዉ ለህሌኩም ናይብ ቃእድ ውቃው እዝ ለዐለ ኮሎኔል ግርመ ተሰማ ቱ።” እት ልብል እግለ እትመጦሩ ለዐለ ጋሸ አትኣመረዩ። ለአሲሪን ናይ ለውቀት ጣቅዒት ወተአዪድ ወደው። ለመመቅርሓይ ህግያሁ እንዴ ለአተላሌ---- “አዜ ኮሎኔል ግርመ ዲብኩም እግል ልሓልፈ ለልሐዜ ልእከት ህሌት እግሉ። እብ ሰብር እግል ትታብዕዉ እት ፋኔ” ለማይረፎን እግል ኮሎኔል ግርመ ሀበዩ።
ኮሎኔል ግርመ ምነ ለዐለ ዲቡ ክልኤ አው ሰለስ ምስዳር ገጽ ቀደም እንዴ ቀርበ፡ እብ ሀዳአት ወሕሽመት ሕልቅሙ እንዴ ሐስሐሰ። “ውላጄ ወሐውዬ” ከአፎ ህሌኩም?” እት ልብል ህግያሁ አንበተ። እንዴ አትለ፡ “ዮመቴ እትለ አካን ንትዋጀህ እት ህሌነ፡ ፈርሐት ትሰምዐኒ።” ሐቆለ ቤለ እሊ ለተሌ ወዐዝ አስምዐ።
“ሕነ ዐድኩም ዐረብ ወረወ፡ ወንበዴታት ሸዐብ ለሓርዶ፡ ዘምቶ ወቃጭፎ ሰበት ህለው አዳምኩም አድሕኖ----እንዴ ትበሀልነ፡ ዐድነ እግል ኢትትወረር እግል ንዳፌዕ፡ ሕሽመተ እግል ኢትትከየድ ህዬ አርወሐትነ እግል ንባሌሕ ወጀላብ ገቢልነ እግል ነአስተሽህድ መጽአነ። ዲብ አድብር ቅብለት እተ ገብአ ሐርብ ኣላፍ መልህያምነ ሞተው። ሕነ ህዬ በክትነ እንዴ ሰነ ትጸብጥነ። ምናተ፡ ሕኩመትነ(ደርግ) ጤልመት እት ኢኮን አሲሪን አለብዬ እት ልብል ጠልመተነ። እብሊ ህዬ እድንያይት መነዘመት ቀዬሕ መስቀል ክምስለ ክሎም እት ዐለም ለህለው አሲሪን ሰዳይት እግል ልውዴ እግልነ ኢቀድረ። ምናተ፡ እት ሐንቴ ዕዛል ጀብሀት ሸዕብየት እብ ሰላም እነብር ህሌነ። ከእብሊ፡ ትጸበጥነ እንዴ እንቤ እግል ንህመም አለብነ። ዲብ ዐስከርየት መትጸባጥ፡ መትጀርሖት ወሞት ለዐለ ወለ ሀላቱ። ሕነ ገድም ጅኑድ ጀብሀት ሸዕብየት ለበልዐወ ሕበዘት እት እንብሌዕ፡ ህቶም ለለብሰወ ድብለት እንዴ ንትከደን አስክለ ገብአት ትገብእ እግል ንጽናሕ ቱ።”
አነ ህግያሁ እት እሰሜዕ ጸሓይ ደምቀቼ ትዘብጠኒ ክምሰል ህሌት ሰበት ተአመሬኒ ሸንከት ዕዛል ቀነጽኮ። ኮሎኔል እት ፍንጌ ህግያሁ። “እብ ሐያትከ ነቢር ሰኒቱ። እብ ሐያትከ ሐቆ ነበርከ እኪት ወሰኔት ትርኤ።” ክምሰል ቤለ ጣቅዒት ዳምቀት ወደው እግሉ። ለመስኡል ዴሽ ለዐለ አሲር፡ አክለ ከሊመት በልሰ ለአሲሪን ለአጠቅዖ እግሉ ሰበት ዐለው። አናመ እበ ለዘት ለበ ህግያሁ ትለወቅኮ። ለእጅትመዕ አስክ ተምም ምን ቅብላት አቀምቶም ዐልኮ። እጅትመዕ ክምሰል ተመ ለአሲሪን ዲበ ኮሎኔል እንዴ ቀርበው ሰሮም ልስዑሙ፡ ሰሮም ልትሳሎሙ ወሰሮም ህዬ እዴሁ እግል ልጭቀሞ ለሃፍቶ ሰበት ዐለው፡ አክልአይ ዐዶም ወአዳሞም ስፍሉላም ክምሰል ዐለው እብ ቀሊል እግል ኣምር ቀድርኮ። እግል ግርመ ተሰመ እንዴ ጸብጠት ለመጽአት መኪነት እግሉ እንዴ ነስአት ረብረብ እት ተሀርስ እግለ አሲሪን እት ደራባት እንዴ ሐድገቶም ክባባይ ገብአት።
ለክልኦት መልልህያምዬ እንዴ ሐድገዉኒ ምን ገይሶ ብዞሕ ወዴኮ። ድንጉር ክምሰል ህሌኮ እንዴ ኣመርኮ እብ ሰዐይ ኣርፒጂ ወወድ-ግርሰን ልባሶም እንዴ ጨፍጨፈው። ገሮቦም እንዴ ኢልትሐጸቦ እብ ምሽጥ ጭገሮም እንዴ ለአነድፎ ጸንሐዉኒ። መጦሮም እንዴ ገብአኮ ልባሼ እንዴ ጨፍጨፍኮ ወነፍሼ እንዴ ተሐጸብኮ ገሮብዬ ማይ እንዴ ጼኔ፡ ምስል ጸርዬ ጀረካነቼ ረፍዐኮ ወአስክ ድፍዐዬ አቅበልኮ።
አሲር ግርመ ተሰመ ለትሃገየ ህግየ ዲብ ሄራር ሐያቼ ክል-ዶል እትፋቀደ። ሰብር ዐውል ክምሰል ሀለ እግለ፡ ዐስከሪ ሐቆ ገብአከ ብዞሕ ጋራት እግል ልሳድፈከ ክምሰል ቀድር እንዴ ኣመርከ፡ እግል ትክሀል ወኤማን እግል ትውዴ ክምሰል ወጅበከ እግለ ዴሹ ለዐለው ዐስከር ምህሮ ሀበዮም። እብ አማን ህዬ ኮሎኔል ግርመ ሐቆ ትጸበጠ ብዞሕ ጋራት ኣመረ። በርናምጅ ወሀድፍ ጀብሀት
ሸዕብየት እንዴ ፈሀመ፡ ጀብሀት ሸዕብየት እግል አሲሪን ሐርብ ትወድየ ለዐለት እንሳንየት ወመራዐየት እብ ዐመል ክምሰል ረአ፡ ደርግ ጤልመት እት ኢኮን አሲሪን ሐርብ አለብዬ” እት ልብል ነሽሩ ለዐለ ሕሰይ እግል ፈድሖት ምስዳር እንዴ ነስአ ክምሰልሁ ላቶም ለዓልያም ዝባጥ እንዴ አፍሀመ፡ እግለ እብ ኣላፍ ለልትዐለቦ ዲብለ ትፈናተ አካናት ሳሕል ለዐለው፡ አሲሪን ሐርብ አቶብየ እንዴ ገይስ ወተዐቢኣት እንዴ ወዴ እግል ትርአዩ ለልአትፈከር ጋር ቱ። እግልዬ ክምሰል ሙናድል እብ አማን አትሐበኔኒ።
ኮሎኔል ግርመ ተሰመ እግል አሲሪን እጅትመዕ እንዴ ወዴ ሐቆ ርኤክዉ ሰለስ ሰነት ሐልፈየ። ቅዋትነ እተ መደት ለሃመ እት ወለት-ሽከር ዐለ። እተ መደት ለሀ እት ፍንጌ ጀብሀት ሸዕብየት ወንዛም አቶብየ ህድግ ሰላም ገብእ ሰበት ዐለ፡ እምበል እብ ክርን ገቢል ሬድዮታት ዓለምመ እንታቤዕ ዐልነ። አነ ሬድዮ አምሪከ ታብዖት እፈቴ ሰበት ዐልኮ፡ ምን ሬድዮ ፈሲለትነ ለትትረከብ ዲቡ አካናት እት ፈንቴ ይዐልኮ።
እንዴ ትደረርነ ወዋርደየት ክምሰል ነድአነ ንትሃጀክ ማስያም እንዴ ዐልነ፡ ሳዐት ሰማን ክምሰል ሐልፈት ውላድ ፈሲለትነ አስክ ክዋናሆም(ተሽኪል) ጌሰው። አነ ህዬ ሳዐት ሬድዮ አሜሪከ አስክ ተምም ዲብ ሐንቴ ደባበቼ እንዴ ገብአኮ እት ጸበር ዐልኮ። አክባር እንሰሜዕ እበ ለዐልነ ሬድዮ 175 ትትበሀል ዐለት። እብለ ሬድዮ ክርን ገቢል ወክርን አሜሪከ እግል ንስመዕ ሐምስ ምትር ለገብእ ስልክ ምስል አንቴነ እንዴ አትጻበጥነ እንክራት እንዴ እንቃይር እንሰሜዐ ዐልነ።
እት ፍንጊለ ደባባትነ ለእንገርሽ ዲቡ ዖበል፡ ዐዳይ ወቅስለ እንዴ ገብአኮ። ለሬድዮ ዲብ እቀዋቅል ክርን አሜሪከ እተ ሳዐተ ረከብክወ። ለልሙድ ለሐን ወእምቡተት አክባር ሐቆለ ሀበት፡ እት አርእስ አክባር ሐልፈት። ለአርእስለ አክባር ክእነ ልብል ዐለ፦
- ናይ አልማንየ(ጀርመን) ቻንስለር ሄልመት ኮል በደ እንዴ ልትበሀል ዐለ፡ እትለ ሳምን እለ፡ እት ሐቴ ቤት ስተይ እንዴ ልትሻበብ ትረአ
- እብ ጀብሀት ሸዕብየት ጽቡጥ ለዐለ ናይብ ቃእድ ውቃው እዝ ኮሎኔል ግርመ ተሰመ ዲብ ዋሽንግቶን እግለ ለልትረከቦ አቶብዪን እጅትመዕ ወደ
ለልብል አክባር ክምሰል ሰምዐኮ፡ እግለ ሬድዮ ምን እዘንዬ እት ገጬ እንዴ አቅረብኮ ገንሐክወ። ለሬድዮ ለቴለቱ ሳምዑ ዲብ አነ እግል እመኑ ኢቀደርኮ። እግል ክሉ ለአክባር እንዴ ተአየስኮ ሰምዐክዉ። ግርመ እግለ እት ነቅፈ እግል አሲሪን ለቤለዩ እት አሜሪካመ (ዋሽንግቶ) ደግመዩ።
“ለአሲር አሜሪከ ጌሰ በህለት ቱ?” መረ ትፈከርኮ። እተ ወቅት ለሀይ እግልዬ፡
ሪም አምሪከ ሳቤዕ ሰመዋት መስለ እቼ። ተፍኪርዬ ዶል ለሀ ምን ኣመረ ምን ባጼዕ ወምን ከረን ለልሐልፍ ይዐለ። ተፍኪር ጀበሀት ሸዕብየት ላተ ሰኒ ርሒብ ዐለ። እት ሳሕል እንዴ ገብአ እብ ክሱስ አምሪከ ለሐስብ። ሐቆለ አክባር ለሀይ ለሬድዮ ከበር ይሀበት። ሬድዮ እንዴ አቅሰንክወ ጸሓይ ወሬሕ ምንመ ይዐለት ለገበይ አምረ ሰበት ዐልኮ ተከሽ እት እብል አስክ ክዋናዬ ግስኮ።
እተ ጽልመት ጅማዐቼ ሳክባም ሰበት ጸንሐዉኒ ኢትሃጌክዎም። እንዴ አንጸፍኮ እብ እንቅራርዬ ክምሰል ትለከፍኮ ክሉ ረአሱ ኢትበለስኮ። ምድር እግል ኖሰ እንዴ ትቤ ጸብሐት። አስቦሕ ገሌሆም ለጅማዕቼ እት ክርን አሜሪከ ለሰምዐክዉ አክባር ደገምኮ እግሎም። መብዝሖም ክምሰልዬ ትፈከረው። ዎሮት ምኖም ላኪን ኢፈርሐ። እብ ሕሩቀት ተናን ፈግረ ምኑ። “ማሌ፡ ማሌ ኣላፍ ዴሽ እንዴ ከምከመ እግል ለአብዴነ ድድነ ልትሓረብ ወለአትሓርብ ለዐለ ዐስከሪ አባይ ምን ስጅን ዲብ አሜሪከ! ሚ ሽቅል ቱ እሊ?” እት ልብል ሐሩቀቱ ሸርሐ።
ዲበ ለተለየ ሳምኖታት ኮሎኔል ግርመ ተሰመ እት ዋሽንግቶን፡ ኒውዮርክ፡ ሳንድያጎ ወብዕዳት መዳይን አሜሪከ እንዴ ከልል እግል አቶብዪን እብ ክሱስ ጀራይም ወጀኣረት ንዛም ድርግ፡ ቴለል ዴሽ ወገቢል አቶብየ። ቴለል ናይለ እት ሐንቴ ጀብሀት ሸዕብየት ለህለው አሲሪን ዴሽ አቶብየ እብለ ከስስ ሰሚናራት ወዴ ክምሰል ዐለ ምን ክርን አሜሪከ እግል እፍሀም ቀደርኮ።