መዲነት አስመረ፡ እበ ባቱ ታሪካይ
ወጀላል ለቡ መባኒ ጋዲም፡ ዲብ ስጅል
እድንያይ ሜራስ መነዘመት ተዐሊም፡
ዕሉም ወዓዳት መነዘመት መጅልስ
ቅራን- ዩኔስኮ እግል ትትሰጀል
ትቀረረ።
እሊ ቀራር እሊ ዮም 8 ዩልዮ
ዲብ መዲነት ክራኮው - ፖላንድ እተ
ገብአ ወካይል 21 ደውለት ለሻረከው
እቱ 41ይ ርቱብ እድንያይ እጅትመዕ
ሜራስ ቱ።
እተ መናሰበት፡ ሰፊረት ኤረትርየ
ዲብ ፈረንሰ ወሳብተት ወኪለት ዲብ
ዩኔስኮ ሰፊረት ሃነ ስምኦን እብ ስም
ኤረትርየ እተ ቀደመተ ከሊመት፡
አስመረ ዲብ እድንያይ ስጅል ሜራስ
መትሰጃለ፡ አክለ እሉ ለሀይብ ሐበን
ናይ ሕፍዘቱ መስኡልየት ከም ለአረፍዕ
ሸርሐት።
መዲነት አስመረ፡ ከም” እድንያይ
አሳር “እግል ትትአመር ለቀድረት፡
ጥዉር ኣርትዴኮ፡ ለብእቱ ምን ልውሕድ
15 ታሪካይ ሸክል መባኒ ሰበት በ፡ ለበስጥ
ተክጢጥ መዲነት ወንዛም አግቡይ፡
ሳሓት፡ ወዲብ ድዋራት ሕ’ዱድ ብዝሔ
ታሪካይ መባኒ ሰበት ትከምክም ቱ።
እተ ምን ዮም 2 አስክ 12 ዩልዮ
ዲብ ፓላንድ ገብእ ለሀለ 41ይ
እጅትማዕ ልጅነት እድንያይ ሜራስ
ዩኔስኮ፡ እብ ሰፊረት ኤረትርየ ዲብ
ፈረንሰ ሰፊረት ሃነ ስምኦን ለትመርሕ፡
መስኡል ፈርዕ ቴክኒክ አቅሊም ምግብ
መሀንድስ ተስፈኣለም ወልደሚካኤል፡
መመቅረሓይ መሻርዕ ሜራስ አሰመረ
መሀንድስ መድሃኔ ተክለማርያም፡
ዲብ ሰፋረት ኤረትርየ እት ብሪጣንየ
ወቅብለት ኣየርላንድ፡ መስኡል ቀደይ
ሜድየ አሰይድ ያሬድ ተስፋይ
እተክምሰልሁመ ባሕስ ታሪካይ አሳር
መዲነት አስመረ ዶክተር ኤድዋርድ
ደኒሰን ኤረትርየ እንዴ ወከለው ሻርኮ
ህለው።
መካስብ ታሪካይ መባኒ አስመረ
ለሸርሕ ዝያድ 1,300 ሰፈሐት ለቡ
እብ ስወር ለትተለ ዩኔስኮ ለትሰለመቱ
ወሳይቅ፡ ዲብ ወርሕ ዲሰምበር 2016
እብ “ሮያል ኢንስቲትዩት ኦፍ ብሪትሽ
ኣርክተክትስ” በህለት ‘ሪባ’ ለትትህየብ
ጃኢዘት ከም ነስአት ልትአመር፡
አስመረ ዲብ ናይ ዩኔስኮ ስጅል
እድንያይ ሜራስ መትሰጃለ፡ ከም ክሉ
ናይ ዓለም ታሪካይ ሜራስ እት ዐቦት
ስያሐት እግል ልስደያቱ። እሊ ህዬ እብ
ደረጀት ዓለም አስክ እሊ ወርሕ ዩልዮ
ሰነት 2017 እት 165 ድወል ለሀለ
1053 እድንያይ ሜራስ ዲብ ስጅል
ዩኔስኮ ኣቲ ሀለ፡ ምን እሊ 815 ናይ
ዓዳት፡ 203 ናይ ጠቢዐት፡ 35 ህዬ
ሕበርበሮ ጠቢዐት ለቡቱ።
እሊ ከም እድንያይ ሜራስ ለተአመረ
አሳር፡ 499 ዲብ አሮበ ወአሜርከ፡ 247
ዲብ ኤስያት ወፓስፊክ፡ 138 ዲብ
ካሪብያን፡ 90 ዲብ አፍሪቀ፡ 81 ህዬ
ዲብ ድወል ዐረብ ሀለ።
