Wp/tig/አምዕል ሻም

እሊ እቱ ለህሌነ ዘበን እቱ ነብር ለህለ ቆም ናይ ኖሱ ገበይ መንበረት ዓዳት ወሰዋልፍ እግል ልጠውር ቃድር ህለ። እብሊ ህዬ፡ ክል አምዕል ናይ ኖሰ ታሪክ ወዓደት እንዴ ጸብጠት ትመጽእ ህሌት። እሊ ምስል ለትፈናተ አስባብ ወመናሰባት እንዴ ትጻበጠ እብ ደረጀት ድወል እዲነ ወመአሰሳት ክም ፍንቲት አምዕል እንዴ ተሐሰበት፡ እግለ መናሰበት ለሸሬሕ ዒድ ገብእ እግለ።

ዮም እት ሰፍሐት ሽባን እሊ ጋር እሊ እት ጌማም እንዴ ኣቴነ፡ እትሊ ወክድ እሊ እት ክለ እዲነ እግል ትትበዐል አቅሩደ ትነድእ ለህሌት አምዕል ሰብ ሻም (Valentine Day)፡ እተ ጀሪደትነ ፋግረት እተ ለህሌት አምዕል በሀለት ዮም 14 ፌብራይር ሰበት ሳደፈት፡ እብ ክሱስ እለ ዕለት እለ ገሌ እግል ኒበል ምን ሐዜናቱ እሊ ክቱብ እሊ እንቀድም እግልኩም ለህሌነ።

ከአሰልፍ ለምጽእ ወእግል ልትበለስ ለቡ ሰኣል አምዕል ሰብ ሻም እንብል እት ህሌነ ሚ በሀለትናቱ? ለልብል ቱ። በሊስ እሊ ሰኣል እግል ንኣምር ህዬ ግረ እግል ንብለሰኩም ቱ። አምዕ ሰብ ሻም (Valentine Day)፡ እት ክል ሰነት ለትገብእ መናሰበት ፈረሕ ተ እግል ኒበል እንቀድር፡ እግልሚ፡ እለ አምዕል እለ እት ክል 14 ፌብራይር ለትትዐየድ ሰበት ተ።

እለ አምዕል እለ ምን አየ መጽአት መስለኩም? ታሪክ እለ ዕለት እለ ምን ነአቀምት፡ እት 3ይ ክፈል ዘበን ለበልሰናቱ። ዎሮት ቫሌንታይን ለልትበሀል እት ሮማ ኢጣልየ ነብር ለዐለ ቀሽ ምን ዲን ክስታን ፈሬዕ ካቶሊክ ቱ። እተ ወክድ ለሀይ ስካን አሮበ ወእብ ፍንቱይ ከረ ኢጣልየ ምን ዕባደት ሓጃት እት ዲን ክስታን እግል ልእተው ልትከደም እቱ ለዐለ ዘበን ዐለ። እተ ዶል ለሀ ለሐክም ለዐለ መልክ ክላውድዮስ 2ይ ለልቡሉ ዐለ። ህቱ እግል ኖሱ ዲን ለይዐለ እግሉ ነፈር ሰበት ዐለ፡ እግለ ዲን ልትከበቱ ይዐለ።

እብሊ ህዬ፡ እግለ እት ሐንቴሁ ለዐለ ዴሹ እብ ክሱስ ሮማ በሀለት ወጠኖም ሌጠ እግል ልትሐሰሮ እንዴ ቤለ ህዳይ ምኑ ለመኔዕ ቃኑን ድቁብ እንዴ አፍገረ እሙሩ ሳይር ዐለ።

እትሊ ወክድ እሊ፡ እሊ ቫሌንታይን ለትበሀለ ቀሽ እብ ስቱር እግ’ለ ዴሽ እበ ገበይ ለዲን ክስታን ሰምሐ ክም ለሀዱ ወድዮም ነብረ። እሊ ከበር እሊ ለመጸዩ መልክ እግ’ለ ቀሽ እት ስጅን ከረዩ። ለቀሽ ህዬ፡ እተ ስጅንመ እት እንቱ እግ’ለ ምስሉ ለዐለው ቴልየት ዲን ክስታን ላቶም አሲሪን እብ ረሐመት ወእንሳንየት ልትዓመል ምስሎም ዐለ።

እምበል እሊመ እተ ወክድ ለሀይ ዕውር ለዐለት ወለትለ መልክ እብ ረሐመት ወፍቲ ለትዳለ ቅሰስ እንዴ ከትበ ልልእክ እተ ዐለ። እት ኣክር ህዬ፡ እት 14 ፌብራይር ሰነት 270 ሚላድየት ቀሽ ቫሌንታይን እብ ሽንቆ ክም ልትዓደም ገብአ። ምን እሊ አስባብ እሊ እንዴ ትበገሰት ህዬ፡ እብ ሑድ-ሑድ ወምስል ዘበን ስሜት እሊ ቀሽ እሊ እት ክለ እዲነ እግል ትብጸሕ ወአዳም እበ ወደዲቱ እንዴ ትዐጀበ ግረ ሽንቆ ቀሽ ቫሌንታይን እብ 200 ሰነት እለ አምዕል እለ እብ ስሜቱ እግል ትትበዐል ትዐለነ። እሊ እዕላን እሊ እበ ግራሁ ለመጸው ሰብ ደያናት ክስታን ለትነሰአት ምስዳር ዐለት።

እግልሚ፡ ዲን ክስታን እተ ወክድ ለሀይ እት ልትአ’መር ወብዝሓም ምን ስካን ምውዳቅ ጸሓይ እት ልተለዉ ሰበት መጸው፡ እት ከላንደር ካቶሊክ ክም ሕሽምት አምዕል እንዴ ገብአት እብ ረስሚ እግል ትትፈቀድ ትሳደቀ ዲበ። ምስል እሊ ለትጸበጠ እት ምግባይ ክፈል ዘበን ሻም ለትሸሬሕ እብ Chaucer ለትዳሌት ሽዕር እለ አምዕል እለ አምዕል ሻም እግል ትግበእ ለቃኔት ዐለት።

እብለ ገበይ እለ ህዬ፡ ናይ እሕትራም፡ ፈተ፡ ሻም ወረሐመት ሽዑርከ እግ’ለ እግል ትሽርሑ እግሉ ለትሐዜ ነፈር በደል ገጽ እብ ገጽ እንዴ ትዋጀሀካሁ ትዳግሙ እግሉ፡ እብ ምስጢር እንዴ አትዳሌካሁ ክም ልፍህሙ ውድየት ምን ዘበን እት ዘበን እት ልትለ’መድ መጽአ። እሊ ለመድ እሊ ወቅሰሱ እት ምልእት አሮበ አማደደ። እምበል እሊመ ምስል ሻም ለትጻበጠ ቅደይ ሕካም ለዐለየ አንሳት እተ ወክድ ለሀይ እትለ አምዕል እለ ክም ልትባለሕ ወድየ ዐለየ።

አምዕል ሻም ሚ እምር እሻረት በ? እንዴ እንቤ እግል ንሰአል ጠቢዒቱ። ሰበት እሊ እሻረት እምር ለበ አምዕል ተ አምዕል ሻም። እሊ ህዬ እሊ ዮም እብ ለትፈናተ አሽካል ወጅንስ ልዳሌ ለህለ ከርተሊናታት እትለ አምዕል እለ ለትመሀዛቱ እግል ኒበል እንቀድር። እግልሚ፡ እለ አምዕል እለ ለልአብዕሎ ሽባን ምንገብኦ ወብዕዳም እትሊ ከርተሊነ እሊ ሽዑሮም ወንየቶም እንዴ ሸርሐው እግለ ከስሱ ነፈር ለሀዩቡ ነብረው።

እሊ ህዬ እግለ ልትሀየቡ ለህለ ነፈር እበ ለሀይቡ ለህለ ነፈር ለትከተበ ከሊማት እግል ግርመቱ፡ ጽጎቱ ወብዕድ እንሳንየቱ ለሸርሕ ወትምኔት ሰኔት ለወክል ክቱባት ለከምከመ ሰበት ገብአ። እትሊ ወክድ እሊ እለ ምስል ደያነት መጻባጥ ለበ አምዕል እት ብዝሓት ድወል እዲነ ክም ዓደት እንዴ ትነስአት ክም አምዕል ሰብ ሻም እንዴ ገብአት እግል ትትበዐል እንብትት ህሌት። እብሊ ህዬ ምስል እሊ ዘበን ቴክኖሎጂ ጥዉር ሽባን እግል ሰብ ሻሞም አውመ ሻባት እግል ሰብ ሻመን ዝያድ ለረይሕ ህያባት እት ሂበት ወአዳለዮት ልትረከቦ ህለው። እብሊ ህዬ እትለ አምዕል እለ እብ በላዪን ለልትዐለብ ከርቴሊናታት ልትሀየብ ህለ። እምበል እሊመ ሻም ለሸርሕ ዕንቦባታት ወብዕድ ልትሀየብ ነብረ፡ እትሊ እቱ ለህሌነ ወክድ ላኪን ዝያድ ምን ዕንቦባታት እንዴ ፈግረ እብ ለትፈናተ ሸክል እግል ትትበዐል እንብትት ህሌት።

ሰብ ሻም እግል ሰብ ሻሞም እት አካን ፍንቲት ወዝያድ ራሐት ለትሀይቦም እተ ክም ልትደረሮ እት አርድ ብዕድ እንዴ ሄረረው እብ ስያሐት ክም ልሓሉፈ ውድየት ወለበዝሐው ሽባን ለብእቶም ህዬ እብ ለትፈናተ ሸክል ለትዳለ ቺኮላታት ክም ህያባት አዳላይ ገሌ ምነ ልትርኤ ለህላቱ። እለ አምዕል እለ አዜ እግል ክል ነፈር ለትወክል ጋብአት ህሌት፡ ሰብ ዕያል እግል አንሶም ውላዶም ወብዕዳም ህዬ እግል ብዕዳም እብ ለትፈናተ አስባብ ደሚሮም ለረይሖ ለትፈናተ ህያባት እንዴ አትዳለው ለሀዩቦም።

እሊ ለገብአ ኣቡ ሰበብ ሻም እት ክል ክፈል ምጅተመዕ እብ ናዩ መቃይስ ወአስሉብ ሰበት ህለ። እምበል እሊመ ሰብ ሻም እትለ አምዕል እለ ፍንቲት ምዕራፍ ሐያት እተ እግል ልትዐደው እንዴ ቤለው እግለ እብ ሻም ምስል ለሄረረው ሰብ ሻም ካቲመ ሰኒ ወምን ሰብ ሻብ እት ሰብ ዕያል ወጼወ እግል ልትዐደው እተ ለሐርወ እተ ኢነት ሰበት ህለው እት ፍንቲት አካን እግል በዐል ሻሞም እንዴ ነስአው ፍንቱይ ህያብ ክም ከረ ካትም ሕጼ እንዴ አትዳለው፡ “አነ እፈቴኪ እግል ትትሀደኒ እትሐሰበኪ ህሌኮ!” እንዴ ቤለው ለአበርኮ እግለን ወረሙቀን ልትረአው። ገሌመ ፍንቱ ወራታት ክም ከረ እት ውቁል አካናት ዐሪግ ወእት ፍንቱይ አካናት ታሪክ ሻረኮ ምነ ርይሐት ለልሀይቦም ጋር ጋብእ ህለ።

መአሰሳት ተጃረት እለ አምዕል ፍንቲት እለ እንዴ ትነፈዐየ ብዞሕ እግል እለ አምዕል እለ ለትዳለ ሸዓራት ወአትገራራም ወድየ ልትረከበ ህለየ። እግል መሰል ቺኮላተ ለሸቅየ መአሰሳት እግል እለ አምዕል እለ ለሸርሕ ሸክል ወሓባር እቡ ለትዳለ ቺኮላታታ እት አፍረዮት ሌጠ እንዴ ኢልትሐጨረ እግል አትፋዝዖት ወሐብሬ ለከትባሁ ክቱብመ ልብ ለሰልብ ቱ፡ ገሌ ምኑ ሽባን ወአምዕል ሻም (Valentine Day) ዶል እንርኤ ህዬ ክእነ ለልትብል ቱ፦ “አስክ አካናት ሐለዋኒታት ሄረሮት ለልአከጅል ኢኮን፡ እግለ ሐለዌተትከ ሐለዋት ምን ትዛቤ ምኑ ለልሐይስ አለቡ፡ ሻም እብ ዐውል ለልትቀየም ቱ መስለከ? ኢፋልከ፡ ሻም ዐውሉ ቃሊ እብ ማል ለኢልተመን ቱ፡ ከእትለ ቃልየት አምዕል እግል እለ ቃልየት በዐል ሻምከ ለልአፈርሕ ሓጃት እበ እለ ገብአ ልግበእ ዐውል እግል ትአዳሌ ወተሀበ ህለ እግልከ፡ እግልሚ እንተ እብ ዐውል ለኢልተመን ሻም ሰበት ራክብ ምነ ወደሚርከ ትረይሕ ቱ!”፡ እግልኩም ለረይሕ ህያባት እዱሉያም እግልኩም ህሌነ፡ አብሽርከ እብ ክሱስ ጂብከ ኢትትአሰፍ! እንተ እግል ትትረየሕ ወህተ እግል ትትረየሕ ክሉ እዱሉያም እግልኩም ህሌነ ትፈደሎ!” ለልብል ገሌ ምኑ ቱ።

ከእሊ ልግበእ ወሌሂ እት ዐድነ ኤረትርየ እንዴ አቅበልነ እለ አምዕል እለ ዶል ነአቀምታመ እብ ሽባን ዝያድ ለገብአት አምዕል እንትትዐየድ ትትርኤ ህሌት። እብ ፍንቱይ እተ ዐባዪ መዳይን ዐድነ ከረ አስመረ ለመስል መአሰሳት ክዳማት እጅትማዕየት ክም ከረ ገሃዊ፡ ሲነማት ወአካናት ረግስ እግል እለ አምዕል እለ ለሸርሕ ሽዓራት ቀደም ሳምን እንዴ አትዳለየ እት ዐዙመት ሰብ ሻም ፍሩራት ህለየ። አናመ እለ አምዕል እለ ርስዐ እት አነ ማሌ ለሀ ቀዳሚት እብ ምግብ ሻርዕ ሕርየት እት ሐልፍ እለ አምዕል እለ ለአትዘከረተኒ ወረቀት ዐዙመት አካን ረግስ እተ እንዴ አንተበሀኮ ቱ እግል እዘከረ ለቀደርኮ፡ ከሕነ ሽባን እለ አምዕል እለ አክል አዪ ምህመት በ እግልነ? እንዴ እንቤ ዶል ንትሃጌ እብ ገበይ ደያነት እጅትማዕየት ፡ዓዳት ወለመድ ምህመተ አክል ሕድ እግል ትትርኤነ ወኢትትርኤነ ሰበት ቀድር እብ አዳም ወደየ በደል እንስዔ ወእንወድየ መዐነተ እንዴ አትዳወርነ እግል ንተለየ ህለ እግልነ መስለኒ።

እሊ እቱ ለህሌነ ዘበን፡ ዓዳትነ ደያነትነ ወወጠንየትነ እንዴ ሐርጠ ምንእነ እብ ሃልነ እት ሻርዕ እግል ኢልሕደገነ መደጋግ ለልትሐዜ እቱ ዘበን ሰበት ገብአ ልብ ክሩይ ሰኒቱ።