Wp/tig/በይሉል

በይሉል

በይሉል ምን ዐሰብ እንክር ቅብለት ምውዳቅ ጸሓይ እት መሳፈት 60 ኪሎሜተር ራይመት ለህሌት ዐድተ። እለ ዐድ እለ እብ ጋምል ዕጨይ ዐርኮከባይ ለትገልበበት ዲብ ጠረፍ ሕሊል እስስት ለህሌት ዐድተ፣ ዝላም ትደቀብ ዲብ ህሌት ናይ ወሒዝ መደ’ረት ዲብ አዳመ ወመምተላካተ ዲብ ሳድፈ ጸንሐ፣ ክምሰ’ለ ልደገም፡ በይሉል እንዴ ኢትትአሰስ ዲብ ድዋራት በይሉል ሉል ልትረከብ ዐለ ወሐቆሁ እብ ሰረፋሪፍ እንዴ ትገልበበ ክሰመል በደ ልትበሀል፣ እብ ሂገ ዓፋር በይሉል በህለት ሉል በደ ለበህለት ክምሰልተ ልትአመር፣ ስሜት ናይ እለ አዜ በይሉል ትትበሀል ለህሌት ዐድ ምን እለ ለትበገሰ ክምሰልቱ ልደገም፣

ስካን በይሉል፡

ስካን በይሉል 740 በጼሕ። መናበረቱ ህዬ ዲብ ጀለቦት ዓሰ ወአንተጆት ጬወት ። ርዕዮ ንዋይ ወትጃረት ትተንከብ፣ ሐትሐቴ ዶል ዲብ ነኣይሽ ግረህ ጀራዲን እምቡታም ህለው፣ ዲብ ደዋይሕ በይሉል ለህለ ፋይሕ አራዲ ሐርስ ወጡይ ወርሹድ ሰበት ቱ እንዴ ደረሰ እግል ዐመሮቱ ለትፈናተ ወራታት ገብእ ህለ፣

በይሉል ቀደም ሕርየት፡

ዲብ በይሉል ቀደም ሕርየት ለትበኔት ሐቴ መአምብታይት ቤት ምህሮ ብኒት ዐለት

በይሉል ሐቆ ሕርየት፡

ዲብ በይሉል ሐቆ ሕርየት ሐቴ ዕያደት ወኦሮ መክተብ እዳረት ደዋይሕ ብኑይ ህለ፣ አምበል እሊ ሑድ ደካኪን ወመጣዕም ዲብ በይሉል ህለ።

መዲነት ረሐይታ፦

ራሓይተ ሐቴ ምነ ዲብ አቅሊም ግብለት በሐር ቀያሕ ለተአሰሰያ ናይ ሰልፍ ዐዶታት ዲብ ገብእ ቀደም 700 ሰነት ክምሰል ተአሰሰት ልትሀደግ። ራሓይታ ዲብ በሐር ቅሩብ ለአቴት እት ገብእ ምን ዐሰብ እንክር ግብለት መፍጋር ጸሓይ ዲብ መሳፈት 70 ኪሎሜተር ዲብ ሕዱድ ጅቡቲ ትትረከብ። እስትዕማር አትራክ ዲብ ረሓይታ መዓስክር እንዴ አሰሰው ነብሮ ክምሰል ዐለው ለለርኤ ድበን አብያት ባስካት ማይ ወዐሳራት ዜድ አስክ እለ ህለው። አትራክ ዲብ ረሓይታ ምን ስምስም ዜድ ለዐስሮ ክምሰል ዐለው ልትሀደግ። ክምሰለ ልደገም ለራሓይተ ትብል ስሜት ምስል ዐሰሮት ዜድ ለትጻበጠት ክምታ ልትሀደግ። እብ ሂጋ ዐረብ “ ረሓ “ በህለት ዐሳረት ለበህለት ታ። ረሓይታ ለትብል ስሜት ምን እለ ረሓ ለትብል ከሊመት ለመጽአት ክምሰልተ ልደገም።ድዋራት ረሓይታ እብ ሱልጣናት ቱ ልትመቃረሕ ለዐለ። ምግባይት አካን መንበሮ ሱልጣን ህዬ ዲብ ረሓይታ ተ።

ጥልያን ዲብ ረሓይተ ዕስኩር ምንመ ለሐድገዩ አሰር ክምሰል ይህለ ምናተ እስትዕማር አቶብየ ወእብ ፍንቱይ ህዬ ደርግ ዲብ ረሓይተ እንዴ ዐሰከረ መሊሻታት ለሀጅም ክምሰል ዐለ ልትአመር፡ ረሓይተ ቀደም ሕርየት። ሐቴ መድረሰት ዐለት እግለ፡ ሐቆ ሕርየት እብ ሐዲስ መብነእ እንዴ ትበደለ ወሐቴ ዓደት ትበኔት እለ፡ ሸዐብ ረሓይተ አርበዕ ኪሎሜተር ራይመት ምነ ህሌት አካን እብ ድሪል ለተሐፈረት ዔለ ነዲፍ ማይ ሰቴ ህለ።

ብዝሔ ሸዐብ ረሓይታ ሀድ 1860 በጼሕ፡ መናበረቱ ህዬ ዲብ ጀለቦት ዓሰ፡ ርዕዮ ንዋይ ክምሰልሁመ ትጃረት ለተንከበት ክምሰልተ ልትአመር። ዔማት፦ እብ እዳረት አቅሊም ግብለት በሐር ቀየሕ ለዳለ ክቱብ።