Wp/tig/በሐር ለአለበን ድወል ኢዲነ

ምን ድወል እዲነ ለ44 ደውለት እብ ምድር ለትከለለየ እት ገበአ፡ ምን እለን እብ ፍይሔ ምድር ለዐቤት ደውለት ዲብ ኣስየ ለህሌት ከዘኪስታን ተ። ለነአሸት እብ ብዝሔ ሸዐብ ወፍይሔ ምድር ህዬ ለዲብ ከርስ መዲነት ዓሲመት ሮመ ኢጣልየ ለህሌት ደውለት ቫቲካን ተ። ብዝሔ ሸዐብ ለበ እብ ምድር ለትከለለት ደውለት ህዬ ለዲብ አፍሪቀ ለህሌት ደውለት አቶብያ ተ።

ፍይሔ ናይለ እብ ምድር ለትከለለየ ድወል 11% ገብእ እት ህለ፡ ዲብ እለን ድወል እለን ለነብር ሸዐብ ህዬ 7% ቱ። ምን እለን 44 ለእብ ምድር ትከለለየ ድወል 3 ደውለት እብ ሐቴ ደውለት ለትከለለየ አው እት ከርስ ሐቴ ደውለት ለህያ ተን። ህተን ህዬ ቫቲካን እት ከርስ ዓሲመት ኢጣልየ ሮመ ህሌት። ሳንመሪኖመ እብ ኢጣልየ ለትከለለት እት ገብእ፡ ዲብ አፍሪቀ ህዬ ሌሶቶ እብ ደውለት ግብለት አፍሪቀ ህሌት።

ምነ ምስል በሐር ለኢትጋነደ ድወል፡ ሰረን ኖሰን በሐር ለአለበን ዲብ ገበአ ምስል በሐር ለአለበን ብዕዳት ድወል ለልትሓደዳመ ህለየ። ሊችቴንስትየን እብ ክልኤ በሐር ለአለበን ድወል በህለት ስዊዘርላንድ ወኦስትርየ ትትጋነድ ዲብ ህሌት ኡዝብክስታን ምን ድወል ኣስያ ህዬ እግል ኖሰ በሐር ለአለበ ትገብእ እት ህሌት ምስል ሐምስ ብዕዳት በሐር ለአለበን ድወል በህለት ከዛኪስታን፡ ኪርኪዝስታን፡ ታጃኪስታን፡ አፍጋኒስታን፡ ቱርኪሚስታን ትትጋነድ።

እምበል እሊ በሐር ለአለበን ዲብ እንተን ቅወት በሐር ለበን ድወል ምን እንረኤ ቦሊቭየ ዲብ ግብለት አምሪከ እግል ንስሜ እንቀድር። እለ ደውለት እለ የምክን ሐቴ ምዕል በሐር ተሀሌ እግልነ ትግበእ ምነ ልብል መስኢት ዲብ ወሬሕ ማርስ አምዕል ቅዋት በሐር እንዴ ገብአት ትዘከር። እትሊ ምነ በሐር ለአለብን ድወል ላኪን ቅዋት በሐር ለበን ፓራግዋይ እግል ንስሜ እንቀድር፡ ፓራግዋይ ሐቴ ምነ ዲብ ግብለት አሜርከ ለህሌት እትገብእ፡ ትርድት ቅወት በሐር ህሌት እግለ።

ብዕድ በሐር ለአለበን ዲብ እንተን ምነ በሐር ለበን ድወል ወለዐል ለተጀረየ ድወልመ ህለየ። ህተን ህዬ ስዊዘርላንድ፡ ኦስትርየ፡ ጀምሁርየት ቼክ፡ ከዘኪስታን ወሀንጋሪ እግል ንስሜ እንቀድር። እብ ምድር ለትከለለየ ድወል ምነ ሳድፍ መታክል ህዬ ሚ ተአምሮ? አይወ፡ ገሌ መሻክል አው መታክል ምነ እብ ምድር ለትከለለየ ድወል ለሳድፍ ረኤነ ምንገብእ፡ ዎሮ ናይ መዋሰላት ህለ። እሊ ህዬ ምነ ናይ በሐር ናይ ምድር ሰበት ቀሌ ምን በሐር አው ሚናት አስክ ምግብ ምድረን እግል ለአብጸሐ ቀሎት ትሳድፈን። ዓዳተንመ ሕዱድ ቱ። እግልሚ ምን ካርጅ እብ ቀሊል እግል ልምጸአን ለቀድር ዓዳት ሰበት አለቡ። እብሊ ህዬ ምነት ፈናተ ዓዳት ክሩማት ገበአ።
እብ ምድር ለትከለለየ ድወል ሚ ፋእደት ረክበ?
• ለድወል ምነ እብ በሐር ለመጽእ አው ምስል በሐር ለትጻበጠ መሻክል ሕርተን። እሊ ክምሰል ከረ ሳይክሎንስ፡ ናይ ግንራሪብ በሐር መትሸርሻር ወሱናሚ እግል ልትሀደግ ቀድር።

• ብዕድ እለን በሐር ለአለበን ድወል ወቁል አድብር ሰበት በን እሊ አድብር እሊ ክምሰል ድፈዕ አው ሕጌ እግል ልግበእ እለን ቀድር። ስዊዘርላንድ መሰል ሰኔት ናይ እሊተ።