Wp/tig/ስካብ ወግዝፍ ከርሸት

ስካብ ወግዝፍ ከርሸት

ካፊ ስካብ እግል ንርከብ ክም ወጅበነ እብ ለፈናተ አግቡይ እት ልትሐበር ጻንሕቱ። ምናተ ሰበቡ እንዴ ኣመርነ እግል ንሽቄቡ ለወጅበነ አክል አዮም ሕነ? ስካብ አክል- አድሕድ ክም ነብረ ቱ ለለትሐዜነ። እግለ ለተሌ አምዕል እንዴ ዓረፍነ ወፋዝዓም እንዴ ገብአነ እግል ንትነፈዕ እበ ገብአነ ምንገብእ ካፍየት ዕርፍ ለአትሐዜነ። ረኪብ ስካብ ካፊ ህዬ ምን ኬንለ ዲብ ዐቅል ለልአመጽአ ፈዛዐት፡ እት ግዝፍ ገሮብመ ሐዞት ክምቡ ልትሐበር። እብ ፍንቱይ ህዬ ግዝፍ ከብድ ለሰብብ ክምቱ እብ ባሕሲን ለትአከዳ ጋር ቱ።
ባሕሲን ሕክምነ ማዮ-ከናደ ስካብ ምስል ግዝፍ ከርሸት መትጸባጥ ክምቡ ሸርሖ። ዑለመእ ኢረኪብ ስካብ ካፊ ለከርሸትነ ምን ወክድ ዲብ ወክድ ክም ትገዝፍ ክም ወድየ ለአፍህሞ። ህቶም እንዴ አትለው ዎሮ ነፈር ካፊ ናይ ዕርፍ ወክድ ዶል ለሀሌ እሉ ምን ለዐልለ እግል ልንስኡ ለወጅቡ ካሎሪቱ ክል አምዕላይ ለነስእ። ሕኔት ለዓርፍ ወሰክብ ላኪን እብ ብዝሔ ነበሪት ቱ ለበልዕ። እሊ ጋር እሊ እንዴ ተአመረ፡ እብ ለመድ ስካብ አበ እግልነ ምንገብእ፡ ስከርያት ለበ ነብረ በህ ትብለነ ወእት ኢወክዱ ምን ለወጅበነ ወለዐል ቅያስ ነብረ ዲብ እንበልዕ ንትርኤ። እብሊ ሰበብ እሊ ህዬ እብ ስካብ ለእንረክቡ ካሎሪ ዶሩ እግል ንፍሀም ክም እንቀድር ልዑለመእ እንዴ አትለው አፍሀመው።
ለባሕሲን እብ ለትፈናተ አስባብ ወክድ ላሊ እግል ለዓርፎ ለኢቀድሮ እንፋር ክምሰልሁመ ዕርፍ ካፍየት ለረክቦ እንፋር እብ አሻረኮት ቶም ለድራሳት ለወደዉ። እብ አሳስ ለወደዉ ድራሳት ህዬ ለርቱብ ዕርፍ ለኢዐለ እግሎም እንፋር ምን አምዕል ዲብ አምዕል ከባደት ገሮቦም እብ ፍንቱይ ህዬ ግዝፍ ከርሸቶም እት ወስክ ክም ትረአ ሐበረው። ለሰበብ ህዬ፡ ክመ ዲብ ለዐል ሽሮሕ ለህለ ናይ ስካብ ወክዶም እብ ነብረ ሰበት በደለዉ ክምቱ ተአመረ። ለእብ ርቱብ ለሰክቦ አንፋር ላኪን መባትክ ገሮቦም ሰኒ ወምን ለኢለትሐዜ ሽቤሕ ገሮብ ደሐን ክምቶም አከደው።
እት ደንጎበ ለባሕሲን እምበለ እብ ሰበብ ሽቅል፡ ተጠውር ቴክኖሎጂመ እት ስካብነ መደረት እምጹእ ክም ህለ ሸርሖ። እት መትነፋዕ ኣላት ቴክኖሎጂ እግል ርሕነ ንዙም አግቡይ ኢአጽበጥናሀ ምንገብእ መሻክል ክም መጽአነ ለባሕሲን አፍሀመው። ህቶም እንዴ አትለው ገሌ አንፋር ካፊ ስካብ ወርቱብ አግቡይ ሙነት እት ልተብዖ እግልሚ ከርሸቶም ትገዝፍ ለትብል ፍክረት እግል ኣመሮትመ እብ ለትወቀለት ገበይ እግል ልድሮሱ ዱልያም እግሉ ለህለው በርናምጅ ክምቱ ሐበረው።