Wp/tig/ምን ቡን አክል አዪ እግል ትስቴ ብከ

ምን ቡን አክል አዪ እግል ትስቴ ብከ

ገሌ አንፋር፡ክለ ለአምዕል ጀበነት እት ጨራቦ ልውዕሎ፡ ወእብለ ገበይ እለ እት ሐቴ ምዕል ምን ቡን ምን ዐስር ፍጃን ወለዐል ሰቱ።እብ ዐክስ እሎም ገሌ አንፋር ህለው ዎሮት ፍጃን ዶል ልትባሸሮ ልቦም ምን ቅያስ ወለዐል ለሀንድግ።

ከእት ቅብላት ማደት ካፈይን ለህሌት ናይ መትሐማል ቅድረት ምን ነፈር ዲብ ነፈር ትትፈናቴ፡ ከገሌ ባሕሲ ከመ ለሸርሕዎ፡ ሰኒ ሐሳሲን ላቶም አንፋር እብ ፍንቱይ እት ቡን ለትትረከብ ማደት “ታኒን” ታእሲር እት ወዴ ዲቦም ልትረአው።ከእሎም ቡን ዶል ሰቱ ገሌ ናይ ዐክስ ተእሲራት ለለአርኡ እግለ ገሮቦም ወለለህይቡ ሐብሬ ብዙሕ ልብ እግል ልክረው እቱ ለአትሐዜ።

ከማደት ካፈይን እትለ ምግባይ ዐሰብያይ ጅሃዝ ተእሲር ትወዴ፡ ወእሊ ህዬ እግል ልብ ወጅሃዝ ደውረት ደም እብ በይኑ ለለአዜ እንዴ ኢገብእ፡ምን እሊ ወኬንመ፡ ሐሰብ ለኩምየት ለምነ ቡን ትትሰቴ እት ከርሸት ወአምዓይት ወከላዊ ዐባይ መደረት ለአትዐሬ። እብሊ ሰበብ ካፈይን እግለ “አዴኖሳይን” ለትትበሀል ገሮብ ኖሱ ለሸቅየ ወእግል ዕርፍ ገሮብ ለትሰዴ ማደት ለልትከበቶ ዐናስር ክም ልትዐጠሎ ወዴ፡ወእሊ ህዬ ምስምሰ ናይ ኣቢ ስካብ ገብእ። ሃንዝ ቢሳልስኪ ለልትበሀል ዲብ ሽቱትጋርት እት ጃምዐት ሆሀንሃይም ክም ኡስታዝ ናይ ኬምስትሪ ወባዮሎጂ ወዕሎም ነበሪት እንዴ ገበአ ለሸቄ፡እሊ ጋር እሊ እቱ እንዴ አሸረ ክም እሊ ልብል፣“አዳም እግል ቡን እት ወቅት አስቦሕ ወእት እዋን አደሐ ለሰትየ እቡ ሰበብ፡ምን እሊ ለልታከየ ፋእደት ሰበት ህሌት ቱ።ህታ ህዬ ፈዛዐት ወረከዞት ክም ለሀልየ እሎም ሰበት ትወዴቱ፡ ወእብለ ምስምሰ እለ፡ እትለ ጋብሃሆም መሳእል ሻፍግ ቀራር እግል ልንስኦ ሰዳይት ገብእ እሎም።”

እትለ በዝሕ ወቅት ገሌ አንፋር ቡን እትለ ሰቱ እቱ ወቅት እብ ገሌ ሰድመት መስል እት ልሽዕሮ ልትረአው። ከእት ክም እሊ መስል ሓላት ገሌ ሻፍጋት ላተን ናይ ርያደት ተማሪን ዶል እንወዴ ገሮብ እግለ ምን ቡን ለረክበየ ጣቀት እግል ለአንድደ በክት ወሰዳይት ረክብ። ጄሴላ ኦልያስ ለልትበሀል እት ጀርመን ዲብ መዐሀድ ብሑስ ነበሪት ለሸቄ ባሕስ፡ እብ ክሱስ እሊ ክምእነ ልብል፣” ለትፈናተው አንፋር እግለ እት ገሮቦም ለትትረከብ ማደት ካፈይን እብ ለትፈናቴት ገበይ ለነድኦ እባ ለትፈናቴት ደረጀት ሸፋግ ቦም፡ ከእብለ ምስምሰ ገሌሆም አንፋር እግል ካፋዬን ምን ቀበት ገሮቦም እት ፍንጌ ሰለስ ወሐምስ ሳዐት ነድእዎ እት ህለው፡ገሌሆም ህዬ አስክ መደት 12 ሳዐት ጸኔሕ ባኮም”ልብል።ከቢሳልኪ እት ረአስ እሊ እት ወስክ ክም እሊ ልብል፣“ምስምሰ ናይ እሊ ሕነ እብ ጠባይዕነ ዎሮት ከምንለ ዎሮት ሰበት ልትፈንቴ ቱ።”
እብ ክሱስ ርሑ ክም እሊ ልብል፣“አነ እብለ ኖስዬ ሐቆ ድራርመ ልግበእ ቡን ዶል እሰቴ፡ እትለ ዶልዬ ዲብ ስካብ ትሩድ እትከሬ፡ ምናተ ሻሂ ሰቴኮ ምን ገብእ ላቱ ሕማም ገብእ እግልዬ” ልብል።