Wp/tig/መሐመድእድሪስ ዐብደለ (አሽትራነ)

እት ሰነት 1982 እት ሀበሮ ምንመ ትወለደ፡ እት መዲነት ከረን ዐበ ወደርሰ። እት 7ይት ዶረት ሳወ ትከረ። እት ወራራት ወያኔ ህዬ እት ጀብሀት ዐሰብ እበ ሳደፈዩ ክቡድ ጀርሕ ምን ዕስክርየት ሳርሐ። እት ሰማን ማርስ 2013 ሀደ። እትሊ ወቅት እሊ ህዬ ምስል ፍርቀት አሰር እበ መቅደረቱ ወንየቱ ላቱ ፈን ሸቄ ሀለ። ህድግ ምስል ምፈናን ሻብ መሐመድእድሪስ ዐብደለ (አሽትራነ) 1ይ ክፋለ እተ ሐልፈት ጥብዐት ቅዱማመ ክም ዐልነ ለልትዘከርቱ ከእግል ዮም 2ይ ወናይ ደንጎበ ክፋለ መቃበለት እግል ንቀድም እግልኩምቱ ቅራአት በኪተት።
ሰኣል፦ እት ለትፈናተ መናሰባት ሕላይ ፈናን ዐቤ ዐብደለ እት ደግም እሰመዐከ ። ድግመት ሌጠ ለኢገብአ ከማን ሰኒ ደግሙ፡ ሚቱ ለሰበብ ወከፎ ረከብካሁ?
በሊስ፦ አነ ምን ሕላይ ፈናኔነ ለገዳይም ሰኒ ብሱጥ አነ፡ ምኑ እንዴ ደረስኮቱ ሔልያል እግል እግበእ ለቀደርኮ።፡ ሐልየት እስታዝ አልአሚን፡ እስታዝ አብራሂም ጎረት ወእስታዝ እድሪስ መሐመድዐሊ ሰኒ እፈትዩ ወቀደርኩሁ ምንገብእ እግል እድገሙ ሐዜ።፡ናይ ፈናን ዐቤ ዐብደለ ምን ሰነት 2004 ቱ እግል እድገሙ ለቀደርኮ።፡ እብ ሰበብ ኦሮት ምን መሰጀዒንዬ እግል ሕለዩ አንበትኮ።፡ ህቱ አፎ ናይ ዐቤ ዐብደለ ኢትደግም ቤሌኒ ወእንዴ ተአየሰ ሸሪጥ ናይ ዐቤ ዐብደለ ሀቤኒ።፡ ለሸሪጥ እብ ከበሮ ወጣቅዒት ሌጣቱ። እምበል አላት ሙሲቃት ለትመልአቱ።፡ ክም ሰምዐኩሁ ሰኒ ፈቴክዉ ለሐቴ ሕላየት 12 ቤት በ።፡ ሐፈዝኩሁ ወአስክ አዜ ሐልዩ ህሌኮ።፡
ሰኣል፡ ምን ሕላይ ዐቤ ዐብደለ ብሱጥ እንተ በሀለትቱ?
በሊስ፦ አይወ ወእብለ መናሰበት እግል ሐምዱ እፈቴ።፡
ሰኣል፦ ሕላየት ጥዕም እግል ትበሀል ላዝምቱ ክሉ ሙሲቃት እግል ለሀሌ ዲበ?
በሊስ፦ ክመ ጸበጠ ሕላይ ቱ፡ ሰሩ ሐልየት እብ ክሉ አላት ሙሲቃት ልጥዕም ወሰሩ ህዬ እብ፡ ረባበት አው እብ ዑድ እግል ልጥዐም ቀድር።፡ እግል መሰል ክምሰል ዋንሮብ ወሽምበር ወቤሳይ እብ መሰንቆ ገርሞ ፡ ከላዝም ኢኮን ዮም 5 /1/2015 ሳዓት 10፡ 23 ናይ ላሊ ዐድ ሐባብ ከረን ክሉ አላት ሙሲቀት እት ክሉ ሕላይ እግል ተአትዩ ለትገርም ሕርየትቱ እብል ለጸገም።፡
ሰኣል፦ እንበል ትግራይትመ እብ ብዕድ ሀገጊ ተሐሌ ፡ እብ ከፎ ቀደርካሁ?
በሊስ፦ ብሊን ሕላዮም ጥዑምቱ።፡ እት ለትፈናተ መናሰባት ብሊን እት ሓብር ሐሌ።፡ ለህግየ እት መዲነት ከረን ሰበት ዐቤኮ ገሌታይ እግል ኣምር ምነ ቀደርኮ ወእብ ዐቢሁ ህዬ ምስል ፍርቀት ዓዳት አቅሊም ዐንሰበ ምስል ሰበት ዐልነ ሰዴኒ።፡ ዐረቢ ናይ ወርዲ ወአልካብሊ ሰኒ እፈትዩ ወሐልዩ።፡ መሰንቆ ሰበት እዘብጥ ትግርኛመ ሚጋርዬ እገርግሸ።፡
ሰኣል፦ አሽትራነ መቅደረቱ ዝያድ እት ሚተ? እት ሽዕር፡ ክርን መ ለሐን?
በሊስ፦ አነ ሽዕር ምንመ እከትብ እብ ናዬ ብዞሕ ይእትናየት፡ ለሐን ላኪን ኢለሐይለኒ።፡ ከንኢሽ ቅድረቲት ናይ ለሐን ብዬ እብል።
ሰኣል፦ ገሌ ለሰደፌከ ፍንቱይ ዝክርየት ምን ለሀሌ?
በሊስ፦ ብዞሕ ሳድፈከ መሰለን ምን ትዘከር እት ሰነት 2005 እት ክለን ዐዶታት አቅሊም ዐንሰበ ዝያረት ዋድያም ዐልነ ወለዝያረት እት ወቅት ከረም ሰበት ዐለት እት ገሌ አካናት ወሓይዝ ከርዐነ ዐለ። ላኪን እት ብሩር ለሀለ ሸዐብነ ሰኒ ጸጋይ ወመሰጀዓይቱ።፡ እተሐልፈ አሽሁርቱ እት አስማጥ በርናምጅ ዋድያም ዐልነ፡ ሻዕር አብራሂም (ፈሪካይ) ናይ ሰፈላል ሸዐረ እግልዬ በሀለት ናይ አሰናይ ደሐን መጸኩናተ። እለ ምነ እት ሽቅል ለሳደፈተኒ ለይእትረስዑ ተስጅዕ እብ ሽዕርተ።፡
ሰኣል፦ ሐላይ በዲር ወናይ አዜ ከፎ ተአጃግሩ?
በሊስ፦ መብዝሑ ሕላይ በዲር ጥዑም ቱ ለሰበብ ህዬ ሽቅል ሕበርቱ። መብዝሑ ሕላይ አዜ ላኪን፡ ምን ሸሀር ወለዐል ለልሰመዕ ሑድቱ።፡ ለምሽጢር ህዬ ወሮት በኑ ልሽዕረ ወልልሕነ እብ ሳምፕል (ሽንካሮ) እስቲድዮ ለኣትየ ወእት እዘን ሴምዐት በጽሕ። ሽንካሮ ሰበትተ ህዬ እግል ተአጽግብ ኢትቀድር።፡ ለገበይ ለሰኔት ላኪን ክእነ ኢኮን ፡ ሚደአም፡ ለሕለየት እንዴ ኢትፈግር እብ ሽቅል ሕበር እግል ትሕለፍ በ።፡ ሐቆ እለ ሽንካሮ እንዴ ኢትገብእ እብ ሽቅል ካልስ እት እዘን ሴምዐት እግል ትብጸሕ በ።፡
ሰኣል፦ ፈናን ፡ ዕዉት እግል ልግበእ ሚ እግል ልከምክም ቡ?
በሊስ፦ አወል አነ ልሳዕ እት ፈን ሽብር ጋይስ ይህሌኮኒ፡ ላኪን ረአዬ እትሊ ሰኣል፡ ፈናን ክመ ስሙ እብ አደቡ፡ ልብሰቱ፡ መጋሲቱ፡ ህጅኩ ወአስሉቡ መሰል ሰኔት እግል መጅተምዑ እግል ልግበእቡ፡ ለዓልክሉ ህዬ ፈታይ ሽቅል ወሙሕተረም እግል ልግበእቡ እብል።፡
ሰኣል፦ እት ለትፈናተ መናሰባት ክም ወጠንያይ ዐያድ ከም ሕለየት ቅዱም ህሌከ?
በሊስ፦ ስዕ አው ዐስር ገብእ።፡ እተ ክምሰልሁመ ሄለን መለስ እት ዒድ ሕርየት ፡ በሀለት እት መንገአት እት እስታድዩም አስመረ ለሐሌተ ለሕን ወዴኮ እግለ።፡ ለሽዕር ላኪን ናይ እስታዝ መ/ ስዒድ ዑስማንተ።፡ እምበልሁመ እግል ሰሚረ (ወለት ሐጋት) እተ ወድ ሀገር ለሸዐረየ እግለ ሽዕር ለሕን እወዴ እት ህሌኮ፡ እተ እም መሳኒቼ ስዒድ ብርሃን ወእድሪስ አቸው ለትዳለ ተማሲል፡ ደብዐት ምስጢር፡ እስትሽሃድ ወድሽሂድ፡ መሰባል ወገበነ ክም ሽዕር ወልሕን ኖሼ ለሸቄኮ እግለን ሐልየት ቅዱም ዐለ።
ሰኣል፦ ተማም አሽትራነ አስክ አዜ እብ ሕላይ ለነስኣካሀ ጃእዘት ምን ተሀሌ?
በሊስ፦ እት መህረጃን ኤረትርየ 2015 እብ ሕላይ ዓዳት 2ይ ፋግር ዐልኮ።
ሰኣል፦ “ዶንክ” ክም ሐሌከ ሰኒ ተአመርከ፡ ላኪን ቀደም ገሌ አሽሁር እት ሸበከት ኢንተርኔት “ዩ ትዩብ” ኦሮት እት ካርጅ ለነብር ሴምዓይ ሕላይከ፡ እግለ ሕላየትከ ክሊፕ እንዴ ወደየ እት ኢንተርኔት ጥሉቀ ሀለ። እለ ሚልእከት በ እግልከ ወእግል ፈናኔን ጸርከ?
በሊስ፦ ወላሂ. . . ለሰኣል እቱ ወወጀበት (ሰሓቅ) ክምረአዬ ላኪን ልእከተ ፈናኔነ ካሜረት ፈሩሀ ወለሚቱ ቪድዮ ክሊፕ ኢትወዱ ቱ ለልብል ሀለ።፡ ወላመ ቪድዮ ክሊፕ እግል ቲዴ ሚዛንየት እግል ተሀሌ እግልከ ላዝምቱ። እግልሚ እግል ሙክርጅ፡ ሙሰውር፡ ሌጥማይ ወሙመስስሊን እግል ለሀሉ ሰበትቱ ላዝም ግሩሽ ተሐዜ።፡ ከሕናመ ግረ እለ እንሸአላህ ክሊፕ እግል ኒዴቱ መቅጠን እንዴ ወዴነ።
ሰኣል፦ ከእት ደንጎበ ህጅክነ እግለ ትብል ምን ተሀሌ?
በሊስ፦ እግለ ወዴኩመ እዬ መቃበለት እብ ድግማን እግል ሐምደኩም፡ ክምሰልሁመ እግለ መጦርዬ እንዴ ገብአኩም እግል ገጽ ቀደም ሄርር ትሰጅዑኒ ለህሌኩም ሴምዐት ሕላዬ፡ እስረቼ ወፈርቀቼ ፍርቀት አሰር እግል ሐምድ እፈቴ ሹክረን!